DHOORAGHT
Earroo 10 Yn Cheshaght Ghailckagh Mean Souree 1998

Er hoh diu Dhooraght reesht. Ayns y choip shoh hee shiu stoo anaasagh dy liooar scruit ec Mark Braide ayns y lioar giarrag echey as fy-yerrey hoal ta’n Cheshaght goaill toshiaght er clou yn Whallag (skeeal scruit ec Juan y Geill).

Yn Whallag

"Ta'n shenn reill caghlaa, cur ynnyd da fer noa," myr shoh screeu y bard Tennyson ayns e ghrane 'Morte d'Arthur,' as s'feer shoh mysh dy chooilley heer 'sy theihll, as dagh balley ayndoo chammah smoo as sloo.

S'feer shoh mysh'n Ellan ain-hene; ta caghlaaghyn yindyssagh goll er 'sy cheer, ayns ny baljyn, ayns lhongn er y cheayn, as greieyn-etlee 'syn aer, as cha nel ad dy kinjagh son y chooid share, noadyr.

Ta stroialtee ec obbyr, lhieggey sheese thieyn mie, as ayns nyn ynnyd troggal blick graney jeh 'concrete', as mannagh beagh eh son obbyr Yn Treisht Ashoonagh as sheshaghtyn elley, cha beagh veg jeh nyn eiraght er n'aagail dooin; ny yeih, er y chooid smoo, ta caghlaaghyn ayn t'er n'yannoo bioys ny saasey dooin ooilley. Cha nhimmey sleih b'aillieu goll er-ash dys ny shenn traaghyn mie, lesh obbyr creoie feiy'n laa, gyn monney argid, as beggan dy ee agh praaseyn as skeddan, arran corkey as anvroie.

Tra va ny doouryn-ushtey er nyn droggal, va shiartanse dy hieyn lhieggit sheese, ny oanluckit fo'n ushtey, as tra va'n doour er ny yannoo ec Cringle, faggys da'n clieau Varrule, va'n thie-eirinys Cringle as thieyn elley er nyn lhieggey: er-y-gherrit, va garaghyn-biljagh er nyn soiaghey 'sy thalloo mygeayrt-y-mysh y doour, dy reayll yn ushtey glen, as ayns y keyll er y cheu yesh, ta tholtan jeh boayl enmyssit Y Whallag, as tra va mee aeg ayns Sostyn, bione dou caarjyn as haink nyn shennayraghyn veih'n Whallag as buill elley 'syn ayrn shen jeh Skeerey Malew.

Nish, ayns y lioar 'Place Names' liorish Mnr. J.J.Kneen, t'eh gra dy vel yn ennym kiart, Yn Whaiyllag, (Quaiyl Beg) raad oddagh deiney ayns streeu rish y cheilley, goll lesh nyn aggyrt-leigh as geddyn y chooish er ny reaghey, as dy mennick yioghe y fer-varriaght argid-chosnee (damages).

Va boayl faggys da'n Whallag enmyssit 'Lheeanee Streeu,' as foddee dy row yn thalloo shoh yn oyr jeh'n streeu eddyr daa ghooinney mychione y cagliagh jeh nyn dhalloo co-lhiantyn rish y cheilley, as va'n chooish er ny ghoaill kionfenish y 'Setting Quest' ec y Whallag.

Ta chammah 'Yn Whallag' as 'Lheeannee Streeu' nyn imraa ayns y Manorial Roll jeh 1703.

Nish, lhig dooin goll er-ash ayns sheiltynys mysh daa cheead blein, as inshyms skeeal diu mychione y Whallag, as yn sleih va baghey aynsyn ec y traa shen.

Daag mee Ballachashtal, goll shaghey Keeill Malew, eisht faagail y raad mooar, ghow mee yn bayr coon dys Grenaby as tessyn y trooan er ny claghyn-keim as hroailt mee jeeragh dys cass yn clieau Varrule faggys da Cringle, agh s'goan oddins feddyn y Whallag kyndagh rish biljyn tramman as thammagyn aittin cho ard as y thie-hene.

Myr haink mee ny sniessey da'n thie honnick mee ben veg soit er stoyl rish y dorrys, as gobbragh y wheeyl, snieu ollan as kiaulleeaght 'Snieu, wheeyl, snieu,': cha dooyrt ee veg rhym, agh hug ee failt orrym lesh snog y chione eck as mynghearey gennal.

Lurg tammylt scuirr yn wheeyl, as dooyrt mee, 'Fastyr mie eu, Venainster Keniagh, as b'leayr dou dy row ee ny shenn ven, lesh e folt cho gial as sniaghtey' as e h'eddin coadit lesh craplagyn, as y crackan eck cho dhone as reen as lhiare, lurg lhing liauyr jeh obbyr creoie cheumooie ayns ny magheryn, as va e laueyn crontit as cassit lesh aacheoid.

Eisht dooyrt mee r'ee, 'Vel oo dty lomarcan ayns shoh?' as dreggyr ish, 'O ta, dy mennick ta mee my lomarcan nish, t'ad ooilley ayns ny magheryn, gobbragh ayns ny ouyr,' as vrie mee j'ee, ' Quoid jeu t'ec obbyr?' 'Kiare,' dooyrt ee, 'my vac Chalse as e ven Kirree, my 'neen Eleanor as y guilley eck Hommy Beg, ga nagh vel eh feer veg nish edyr, t'eh taggloo mysh geddyn poosit dy gerrid, agh cre'n voayl hed ad dy vaghey lurg shen cha s'ayms; cha nel rheamys 'sy Whallag rish peiagh erbee elley. Agh, insh dou, cre voish t'ou uss er jeet? T'ou loayrt y Ghailck lesh blass Phurt ny h-Inshey.' Dinsh mee r'ee dy row mee er jeet veih Ballachastal, as ghow ee yindys clashtyn dy row m'ennym Keniagh, 'Joe Keniagh,' dooyrt mee, 'as ta mee baghey ayns thie thooit faggys da Ballakeigan, ayns Skeerey Cairbre, as ta mee gobbragh myr seyr-thie ec y thie mooar Balladoole, jannoo kiartaghyn er ooilley ny thieyn mygeayrt y voayl.'

'Ta shoh my chied thurrys gys Barrule,' dooyrt mee, 'as ta mee er jeet dy chur shilley er y Whallag, er yn oyr dy vel mee er chlashtyn wheesh my-e-chione, as y skeeal jeh'n Lheeannee Streeu. Nhione dhyts red erbee er y chooish?' 'Ogh, cha nee,' dooyrt ee, 'Haggyr eh feer foddey er dy henney as te ooilley jarroodit nish. Ta shin as ooilley nyn naboonyn baghey cooidjagh ayns shee as caarjys, gyn streeu erbee, agh ec un traa va Manninee dy mennick tuittym magh as goll dys y leigh son reddyn fardailagh, tra oddagh ad v'er reaghey yn chooish dy aashagh eddyr oc-hene. Va skeeal er ny insh dou tra va mee aeg, mysh daa ghooinney goll dys y Whallag mysh kuse dy skeddan-sailjey, treishteil dy gheddyn argid-leigh, (damages) ass y chooish. Nish, ta kuse dy hieyn ayns y cheer ayndoo ta lhune er ny h-imbyl, as tra haink ad magh ass y Whaiyl, dooyrt y fer cosneyder rish y fer elley, 'Cur dooys dty ghoarn, ta mee er n'yannoo dy mie, ta daa phunt dy argid-cosnee aym, lhig dooin goll dys thie Billy Ned, ta lhune mie echeysyn.' Myr shoh, chraa ad nyn laueyn, as ersooyl lhieu tessyn y trooan gys y thie-lhionney, as duirree ad ayns shen derrey va'n argid ooilley er ny vaarail, as eisht hie ad thie lheastey mygeayrt er y chassan ayns gien mie, agh gyn ping eddyr oc. Ny s'anmee, foddee, veagh ad ny s'creeney na v'ad roie!

2

S'leah ta'n bleb as e argid er nyn scarrey, stroohene.

Ny sheyn, haink Eleanor stiagh veih'n vagher, as honnick ee mish, my yoarree, my hassoo aynshen. Nish, ta mraane Manninagh dy cadjin nyn dost kiongoyrt rish joarreeyn, agh cha nee Eleanor! Hug ee failt orrym myr dy beign my ghooinney-seyr ooasle! 'Fastyr mie eu Vainshter,' dooyrt ee lesh croymmey beg y chione eck as mynghearey aalin. Ghow mee yindys as taitnys lheid y failt y gheddyn ayns boayl cho foddey veih'n ard-valley, as 'sy tullagh shen smooinee mee cre'n carrey yindyssagh yinnagh ee!

Ta Eleanor er jeet thie dy gheddyn meddyr dy vainney gear as bonnag dy arran corkey dy chur lhee gys ny fir va giarrey yn arroo, as dooyrt ee rhym, 'Jean shiu giu bine dy vainney-gear as meer d'arran corkey?' 'Ogh, cha jean, gura mie mooar eu, agh voddym goll merriu dys y vagher, as gymmyrkey y meddyr son eu? Dreggyr mee r'ee. 'Foddee oo dy jarroo, ta shiu feer chenjal,' dooyrt ee, eisht ersooyl lhien cooidjagh dys y vagher. Myr va shin shooyl nyn geilley, dinsh mee m'ennym j'ee, as va yindys urree dy row mee fer Keniagh, as dy row my henn ayraghyn veih boayl ennagh 'sy cheer shen, agh ny sniessey da Forsdal.

Vrie mee j'ee mychione y dooinney eck, as dy beagh paitchyn elley marish Hommy Beg; v'ee ny tost rish tammylt beg, eisht yeeagh ee orrym dy hrimsagh gra dy row Robin Gorry e dooinney-heshey, ny hiaulteyr er lhong-hiaullee vooar, agh va Robin caillt ayns sterrym mooar tra v'ad cheet thie veih cheer yoarree, as nagh row Hommy Beg agh ny stuggey ec y traa shen. Darr mee my cho-ennaghtyn firrinagh j'ee, as eisht, dy chaghlaa y chooish, dooyrt mee, 'Vel shiu rieau er ve harrish yn ushtey?' 'O ta,' dreggyr ee, 'va Robbin as mish er nyn boosey ec Keeill Noo Niglus ayns Lerphoyll, choud's va'n lhong echey 'sy phurt.' Hoilshee e h-eddin lesh eunys dy insh dou skeeal ny s'maynrey, as lesh mynghearey ghow ee er: 'Ta mee credjal dy row ny three shiaghteeyn cheau mee marish Robin, ny laghyn s'maynrey jeh my vioys, goll mygeayrt cooidjagh er buill eunyssagh 'sy cheer mygeayrt-y-mooin. Un laa hie shin ayns baatey-ymmyrt gys Eastham marish ny Maynee, eisht hooyl shin trooid ny keylljyn dy gheddyn fainagh-chabbil dys Chester. Er-lhiams dy vel Chester yn ard valley s'bwaaie 'sy theihll, agh hie yn traa ro happee, as begin da Robin goll er-ash dys y cheayn.'

Va shin nish er roshtyn y vagher, as cha row caa son ny smoo taggloo, agh shiaghtinyn ny s'anmee dinsh Eleanor dou dy row ee kiarail dy vaghey ayns Lerphoyll dy gheddyn ny smoo traa marish Robin tra-erbee haink eh thie; er-y-fa shen hie ee myr ynney-veyl gys marchan berchagh baghey ayns thie mooar ooasle: 'sy valley, (eisht, hoig mee yn oyr va mish er my oltaghey cho creeoil as va Eleanor cho meiygh, tra haink shin nyn guaiyl). Haink reddyn lhee as v'ee booiagh dy liooar, agh tra va Robin ersooyl v'ee ny lomarcan as lurg tammylt va foddeeaght urree son Yn Ellan as e mooinjer hene, as fy-yerrey dinsh ee yn chooish da Robin, cre cho treih v'ee tra v'eh ersooyl.

'Mie dy liooar,' dooyrt Robin' 'bare lhiam Ellan Vannin neesht, na boayl erbee elley; hemmayd thie reesht yn nah cheayrt vee'm er-thalloo.'

Agh roish shen, haink drogh naight son Eleanor - va'n ayr eck caillit ayns mooirchoor er Langness. V'eh ayns baatey-eeastee beg marish daa chumraagyn tra heid clabbin atchimagh as v'ad er nyn eiyrt er ny creggyn as y baatey er ny vrishey dy bollagh. Lurg shen, haink Eleanor er-ash thie dy ve marish e moir, as 'sy nah vlein va Hommy Beg er ny ruggey.

3

Tra hie mee marish Eleanor stiagh ayns y vagher, va mee er my choyrt er enn da Chalse, Kirree as Hommy Beg, as va mee cuirrit dy hoie sheese as giu as gee maroo. Ghow mee taitnys mooar shen y yannoo as dy gheddyn caarjyn noa, agh cha row traa son coloayrtys er-lhimmey jeh'n emshir as beagh yn ouyr mie ny sie, as y lheid. Va tooilley obbyr dy ve jeant foast roish my duittagh y dorraghys, as hass mee jeeaghyn orroo giarrey yn arroo.

Honnick mee dy row Chalse giarrey lesh red-ennagh noa - yiarn folderagh, as v'eh jannoo ny smoo obbyr lesh na queig fir elley lesh y corran. S'yindyssagh! Agh va Hommy Beg giarrey lesh y corran, myr va sleih er n'yannoo rish keeadyn dy vleeantyn, choud's va Kirree as Eleanor tarroogh chymsagh yn arroo, jannoo boandaghyn as kiangley yn arroo ayns bunneenyn, eisht cur ad nyn shassoo ayns stook dy hirmaghey.

Hug eh taitnys orrym jeeaghyn er Chalse lesh y yiarn-folderagh! V'eh gobbragh myr nagh beagh laa-ny-vairagh ry-heet, jannoo skeabyn lhean, as scuirr nish as reesht dy chur foyr er y yiarn lesh striggle as dys obbyr reesht. Chluinnagh fer y yiarn feddaney myr roie eh trooid ny gish, as cre'n kiaull millish da cleaysh ny beaynee! Va Hommy Beg jannoo e chooid share lesh y corran, gobbragh kinjagh as jeidagh, as cur foyr er y corran lesh y striggle neesht.

Agh nish va tuittym keeiraght y laa, as begin dou shooyl dys Ballachashtal, myr shoh, deam mee magh, 'Gow my leshtal shegin dou ve ersooyl nish, agh b'laik lhiam cheet reesht as cur shilley erriu, Oie Vie eu, as gura mie mooar eu son y kenjallys eu.' As haink y freggyrt, 'N'abbyr fockle, trooid shiu reesht traa erbee as beemayd booiagh dy chur failt erriu, Oie Vie, Yoe.'

Yeeagh mee stiagh ayns y thie dy ghra Oie Vie da'n chenn ven Benainster Keniagh, gialdyn dy chur shilley urree reesht dy gerrid.

Cha dug mee geill da'n raad liauyr goll thie reesht, as by gummey lhiam dy row eh ceau trome; va mee ayns gien mie, smooinaght er y vaynrys, taitnys as kenjallys hooar mee ec y Whallag, as kiarail dy heet er-ash cho leah's veagh caa aym.

Kuse dy laghyn lurg shen, va mee cheet thie voish m'obbyr, as ghow mee yindys mooar fakin Hommy Beg fuirraght rhym ec y ghiat, as dyllee mee er: 'Fastyr mie ort, Hommy, agh c'red t'ou jannoo ayns shoh?' as dreggyr eh 'Begin dou cheet neose dys Ballacashtal dy gheddyn medshin as reddyn elley son nyn naboo ec y Rheeast, Benainster Shimmin; v'ee ching fud ny h-oie as jeeaghyn moal dy liooar moghrey jiu, as choud's va mee 'sy valley, ghow mee yn eie dy heet dty whaiyl ayns shoh, er yn oyr dy vel reddyn aym shegin dou ginsh diu, eisht hem thie reesht trooid y Valley Beg as Grenaby.

Va Hommy jeeaghyn treih, myr dy beagh eh laccal carrey dy loayrt rish as neu-laadey e aigney, as dooyrt mee; 'S'mie lhiam fakin oo reesht Hommy as s'treih lhiam clashtyn dy vel dty naboo aslaynt, agh choud's t'ou ayns shoh, trooid gys y thie ain dy gheddyn jough as greim dy vee marin. Ta mish my ghooinney treoghe; hooar my ven baase dy gerrid lurg dooin geddyn poosit, as ta my huyr er ve my ven-thie rish ymmodee bleeantyn.'

Tra rosh shin my hie-hene, dooyrt mee, 'Shoh my huyr Paaie, Hommy, as cha 'sayms kys oddins jannoo ny fegooish, t'ee ny tashtey gyn-leagh.' 'Cum dty hengey, Yoe,' dooyrt Paaie, 't'ou ro vrynt, as brynneragh agglagh,' eisht rish Hommy, 'trooid shiu stiagh as failt erriu; ghuilley veen.' Lurg y lhongey, dooyrt mee rish Hommy dy raghin marish choud's y Valley Beg, as oddagh shin loayrt ry cheilley er y raad. Eisht dinsh Hommy dou ooilley mychione e ayr, Robin Gorry, as b'leayr dou dy dug eh ooashley rish cooinaghtyn e ayr; va Robin yn feniagh trean echey, as yindyssagh er-bastal.

4

Heill Hommy dy row Robin ny 'er stroshey, as s'daaney jeh ooilley ny shiaulteyryn 'sy theihll; v'eh cho shickyr-coshee as goayr er y clieau, as gollrish apag dy ghrappal gys y shiaull-mullee syrjey dy chiangley coourse. (reef a sail)

Ny cheayrtyn veagh Robin ersooyl rish meeghyn, agh tra harragh eh dy-valley, cre'n boggey as taitnys ghoghe Eleanor as Hommy Beg fakin eh reesht.

Dy jarroo veagh yn clane lught-thie maynrey, as veagh lhongey mooar as giense er ny aarlaghey, lesh kiaulleaght as whilleen skeealyn goll er insh.

Veagh Hommy Beg geaishtagh dy geyre rish ny skeealyn inshagh e ayr, mychione buill yoarree, as sleih quaagh ayndoo, lesh cliaghtaghyn oc feer neu-chadjin, ayns cheeraghyn foddey jeh, eisht skeealyn jeh taghyrtyn er y lhong, ayns drogh earish as emshir braew, jeh eeastyn-etlee, muckin-marrey, perkin-mooar, as cretooryn elley yindyssagh.

Gollrish ymmodee guillyn Manninagh elley, va Hommy Beg er hoiaghey e chree er goll dys y cheayn, dy ve captan jeh lhong mooar as shiaulley mygeayrt y cruinney, agh va Robin as Eleanor nyn 'oi; bione daue gaueyn ny marrey!

Hooar mee aittys ass skeeal beg er ny insh ec Hommy: dagh traa va Robin er y lhong shiaulley stiagh ayns purt erbee, as lhong elley faggys dy liooar, eamagh Robin dy ard, 'Cre'n ash ta shiu? Vel Manninagh erbee er-boayrd?' as dy mennick harragh freggyrt, 'Ta, quoi shen as Gailck echey? Cre voish t'ou?' as ny cheayrtyn ghoghe fer Albinagh ayrn maroo 'sy chooish.

Eisht dinsh Hommy dou yn aght va'n ayr echey caillt er y cheayn, tra va Hommy-hene ny ghuilley beg: Va Robin er lhong enmyssit y 'Ben Varrey' as v'ee cheet thie veih'n slyst airhey ayns Africa Sheear, agh myr v'ee shiaulley tessyn y Vaie Biscay, roie ee stiagh ayns sterrym mooar, as ny tonnyn girree myr sleityn. Va'n Ben Varrey shiaulley dy mie as ooilley yn carmeish eck kianglit coourse as sauchey, agh doaltattym heid y gaal myr dorrin agglagh, as vrish yn shiaull-mullee syrjey seyr, as va bennalt dy feie.

Chelleeragh va Robin heose er y luir-hiaull, agh huitt faarkey mooar y lhong as cheau eh ee er e lhiattee, derrey va'n lieh-latt ayns ny tonnyn, as tra va'n lhong er kiouyl corrym reesht cha row Robin ry-akin, v'eh caillt.

Vrie mee jeh Hommy cre voish hooar eh skeeal y sterrym, as dooyrt eh dy row Manninagh elley er-boayrd y 'Ben Varrey' as honnick eh yn drogh-haghyrt. Va kinney echey ec Ronague agh v'eshyn baghey ayns Lerphoyll, as yn nah cheayrt va caa echey dy heet harrish dys yn Ellan, haink eh dy chur shilley orrin ec y Whallag. Va my voir feer trimshagh, ny yeih v'ee feer dunnal, as cha vaik mee jeir erbee, agh cha jeanym jarrood y seaghney er e gruaie choud's vee'm bio.' Va mee mysh daa vlein yeig d'eash ec y traa shen.

'O, bwoi veen,' dooyrt mee, ' s'doogh lhiam clashtyn dty ghoo-skeeal; cha nyrrys dy vel oo jeeaghyn treih lurg seaghney yn lheid shen. Ta mee coennaghtyn mayrt as marish dty voir, as b'laik lhiam carrey y ve diu ayns ny laghyn ry-heet. Nish ta shin er-gerrey da caardee Valley Beg as shegin dou dt'aagail, Hommy, agh hee'm oo reesht dy gerrid. Oie Vie ort, as bee er dty hwoaie ayns y dorraghys.'

Keayrt elley hooill mee thie ayns smooinaght dowin, shirrey orrym-pene y feysht bragh beayn, 'Cre'n fa.' Cre'n oyr begin da feallee dooie as kenjal surranse guin as seaghyn, choud's ta ny riftanyn goll seyr?

Jesarn er-giyn va mee heose ec y Whallag reesht, as va'n chenn ven fuinney berreenyn er y ghryle, as conney moain er ny lostey fo'ee, as dyllee mee veih'n dorrys, 'Moghrey mie eu, my henn charrey veen, ta soar millish ayns shoh jiu.' Hyndaa ee mygeayrt gra' 'O, nee uss t'ayn Yoe, Failt ort as s'mie lhiam fakin oo reeesht; trooid stiagh as soie sheese ayns shoh as insh dou yn naight, vel red erbee noa ayd?'.

5

'Cha nel monney,' dreggyr mee, 'agh ta fou goll er insh 'sy Valley dy row daa ghooinney Vallachashtal er nyn dayrtyn mooie er y cheayn ayns baatey-eeastee liorish fir-ny-geesh Sostnagh as er nyn goaill dys Lerphoyll. V'ad nyn ghrogh-hraghtalee, smuggleryn t'ou toiggal, as ta ourys aym dy chaillagh ad y baatey oc as e lhught, as mannagh vod ad geeck yn argid-whaiyl, bee ad er nyn goyrt ayns pryssoon; lhieusyn myr t'ad toilchin, bione mie daue yn kerraghys; nish, vel red erbee noa euish?'.

'O ta'' dooyrt ee, 'agh cha nel veg aym agh drogh naight; ta nyn naboo ec y Rheeast marroo. Hooar ee baase arroo-y-jea, choud's va Hommey Beg ec Ballachashtal dy gheddyn medshin er e son, agh va'n jurnaa echey ayns fardail, v'eh ro anmagh. S'doogh lhien ooilley as ta shin co-ennaghtyn lesh Fred Shimmin as e ghuillyn Will as Peddyr. Ta Eleanor ec y Rheeast maroo nish, as ver ee ny guillyn dys shoh noght dy hannaghtyn marin derrey vees y chooish hrimshagh ec kione; ta'n oanluckey er ny reaghey son Jydoonee shoh, faagail y thie ec mun-laa.'

Eisht haink Chalse as Kirree stiagh dy gheddyn jough as braghtan, faagail Hommey dy yannoo creagh jeh'n voain v'er ny choyrt lesh thie. Ec y Whallag v'ad taggloo rish tammylt liauyr mychilone baase nyn naboo, Ealish Shimmin, as reaghys as cliaghyn yn oanluckey. Va'n choir-verriu er ny jannoo ec seyr-thie ayns Ronnag, ass fuygh cadjin garroo, coadit lesh aanrit dhoo, as er ny coyrt lesh dys y thie ayns y dorraghys. Ren ad coodaghey ny uinnagyn as va cainleyn er nyn lostey mygeayrt-y-mysh y choir-verriu, as veagh farrar er ny reayll dagh oie roish yn oanluckey.

Dy mennick veagh yn farrar feer feiyral as garroo, lesh kiaull er y feddan as scooyr, agh hug Fred feoh da ymmyrk-rastagh y lheid shen; v'eh er ny chleayney liorish ny preachooryn Saasilagh, as cheayll eh John Wesley eh-hene preacheil er cleigh ec cass slieau Baarool, choud's v'eh troailt er-mooin cabbyl veih Ballachashtal dys Purt ny h-Inshey.

Ny yeih, begin da farrar y ve er ny reayll; cre shen ta'n shenn raa-creeney gra? "Mannagh vow cliaghtey, cliaghtey, nee cliaghtey coe. Myr shen, dreayll Fred farrar marish kuse dy chaarjyn as naboonyn, agh dy feagh, harrish tubbag dy lhune as red ennagh dy ee, taggloo as kiaulleaght psalmyn as bardoonyn gys y vadran.

Eisht dirree seose Hommey, gra, 'Ta obbyr ain dy yannoo,' as loayr eh rhym, 'ta shin cur lhien thie yn moain jiu, as shegin dooin goll er-ash son lught elley; b'laik lhiat cheet marin Yoe?'. 'B'lait dy firrinagh' dreggyr mee, as ersooyl lhien marish y garran as sleod dy ymmyrkey y voain veih Cronk Fedjag, sheese y lhergagh as seose yn ughtagh er y cheu elley dys y Whallag; va mee booiagh dy gholl maroo er yn oyr dy baillym ve ainjyssagh rish Chalse as geddyn co-loayrtys marish.

Ghow Chalse toshiaght gra dy beagh y cassan er lhiattee yn clieau ro shliawin, verragh ad daa vhurlin er-mooin y chabbil as lhieenagh ad ad lesh moain as harragh ad dy valley er cassan elley, bayr mooarane ny slhiurey.

Bwooise da Phil Kelly son scannal shoh stiagh ‘sy cho-earrooder echey as kiartaghey eh beggan. Nee yn Cheshaght clou yn slane skeeal tra t’eh jeant, agh cha row yn cabdil s’jerree scruit ec Juan y Geill.

Scruit ec Juan y Geill

Coon lesh Eiraght Ashoonagh Vannin

Vel cooinaghtyn ec peiagh erbee er rolley va jeant ec Bill y Radlagh jeh’n reih Gaelg va ry-gheddyn veih ny jyskyn jeant ec yn Rheynn Beealeydys Nerin. Hug Kirsty Neate fys dou dy row rolley jeant tra va’n Cheshaght smooinaghtyn er clou paart jeh’n coloayrtys ymmodee bleeantyn er dy henney, agh cha nel yn rolley shen ry-eddyn nish boayl erbee!

6
Cooinaghtyn Millish er Laghyn Maynrey

Stoo anaasagh veih Harry Kelly : Cuckoo in April
Cuckoo in May
Cuckoo in June
Then fly away
- The cuckoo goes with the first ruck of hay!

1st man to fly - William Collister of Cregneash was the first man to fly. He used two dollans & left his wife to fly to Ireland as a missionary saying “With the help of God I’ll leave you.” The wife had to dig him out of the midden with a grep!

“Such learning as would melt two sea buscuits together” - very clever man indeed.

Yn reih red (pronounced rye) - the best thing.
Quoi yn reih! - Which is the best?

Thunnagyn T’ad gee dy chooilley vinnid ‘sy laa - They are eating every minute in the day.

Jeeagh er Hymn 43, dulliag 39 Lioar dy Hymnyn (1830)
As lhig da’n chorp shoh geddyn baase
As lhig dooin nish da neesht goll mow
Veih’n seihll dy heaghyn (hrimshey) as angaish (d’angaish)
Hig Hed yn annym seose gys niau

Eisht marish Nooghyn beem ec shee
Geddyn my chronney beayn
Ayns Yn maynreys t’ec ny flaunysee
Ayns oghrish [Yee] yn Eayn

Ta my eïn beggey ec gaase dys earragyn (aragen)
- my little chicks are growing into pullets
tilgey - vomiting clean (kledn) praase (prœs)- potato creel
clean conney - gorse creel

Lhongey moddey as trostey foddey - a dog’s feed & a long fast ( something similar to “a feast or a famine).

Vel enn (edin) ayds (eds) er y ‘neen shen - do you know that girl
Cha nel enn ayms urree - I do not know her

T’ad tryal freayll Schoill ayns Doolish yn gheurey shoh - they are trying to keep a school (for Manx) in Douglas this winter.

Glutheryn (glessaryn) breck - jelly fish i.e. speckled glasses - very descriptive
see also BAYRN MOOAR

Bless my heart said Nessy Clark
(Jee banee mee dooyrt Paaie Magie)
Ta’n booa er geck ‘syn arroo
Dy jarroo ta dooyrt Betsy Quaye
Ta keck mooar ayn dy jarroo

Cha row caa (kay) ayms dy ynsaghey Gaelg - I had no chance to learn Manx.

Tom the Dipper when preaching in house at Cregneash told the people to look down on the floor when he would call the blessing down on them from heaven with the words ‘Jeeagh shiu heese as neems jeeaghyn seose, as neems goaill y vannaght sheese marym.” While they bent their heads he took down a cheese from the drying shelf in the house and hid it under his coat.

He also said once when in Market Place at Douglas - Ny guiy feie (fay-ee) mee, ny Yernagh braddagh breagagh agh geddyn lhongyn (lhongaghyn ayns Cregeen) cour y laa lesh geeck as dellal cairagh.

‘Mairin’ was the word used by Harry - could this be “meeryn” pieces of bread.
grunt yeeastagh - a fishing ground, cowrey yeeastagh - a fishing mark

Gow my leshtal dy vel shoh beggan meshtit (as ta Baarle ayn neesht!), agh bare dou cur diu ooilley va scruit echey. Ta ny focklyn ayns italics er ve currit stiagh echey ny s’anmey.