DHOORAGHT
Earroo 12 Yn Cheshaght Ghailckagh Mee ny Nollick 1998

Er hoh dhyt Dhooraght reesht. Ta artyn anaasagh as yindyssagh ‘sy choip shoh vees caghlaa raad dty vioys. Ta caa dhyts cosney queig keead thousane punt (shen kiart £500,000!!!) my vees oo lhaih dy chooilley ‘ockle ayns dagh art - jeeagh ec jerrey yn raieaghan shoh son tooilley fys!

Yn Whallag

Yn nah laa hie shin dy chur shilley er Mainshter Cannell, as va yindys mooar orrym dy gheddyn failt gennal as firrinagh voish, myr dooyrt Paaie, T'eh dy jarroo ny ghooinney-seyr, doaieagh as kenjal, as cha ghow eh snee tra dinsh Paaie da nagh voddagh ee poosey rish. 'S'cummey shen,' dooyrt eh, ta mee toiggal ny oyryn as ta mee cur arrym er ny mianyn eu, as ayns aght, ta mee coardail riu, dy vel poosey gyn graih gollrish bee fegooish sollan, gyn blass, gyn soylley, as gyn maynrys firrinagh aynsyn.'

Eisht va shin loayrt mysh yn obbyr ayms, as tra dinsh mee da dy row mee gobbragh ec Balladoole myr seyr-thie, dooyrt eh, 'Dy voddin cooney lhieu ec traa erbee, cur fys hym Yoe, ta ymmodee caarjyn aym ayns keird, as jean shiuish Phaaie, tannaghtyn marym myr my ven-thie rish tammylt s'liurey?' 'Nee'm,' dreggyr Paaie, as hie shin thie ayns gien mie, booiagh erskyn towse dy row yn chooish er ny reaghey.

Fastyr Jerdein hie Paaie marym dys y Vheillea ec Grenaby, as va traa yindyssagh ain. Cha row Paaie er jeet ny quaiyl yn feallee veih'n Whallag, er-lhimmey jeh Hommy Beg, as chelleeragh v'ad nyn gaarjyn mie. Ayns eashyn foddey er dy henney va cliaghtey mastey ny Manninee dy reayll yn bart jerrinagh jeh'n arroo, shen yn Vheillea, as cur lesh thie e myr oural da Jee yn Arroo, agh nish ta'n Vheillea keint dy ghiense, goaill toshiaght lesh lhongey mooar, eisht kiaulleeaght as daunsin, as fidleyr dy chloie er nyn son, as va Kirree as Eleanor skibbylt myr ferrishyn, agh dooyrt Chalse 'Ta'n cheim ro happee as cheh dooys, shegin dou goaill fea rish tammylt.' Eisht dooyrt mee, 'Ta mee paagh agglagh as ta tubbag dy lhune ayns y chorneil hoal, lhig dooin goll dy gheddyn jough, as goaill fea ry-cheilley.'

Va Bonny ayns shen marish Maud Kinnish, agh va Maud faitagh, gyn veg eck dy ghra; v'ee jeeaghyn ass-ynnyd ny mast'ain. Haink Fred Shimmin neesht, marish e ghuillyn, agh va Will as Peddyr goaill soylley jeh cumraagys ny paitchyn elley va goll dy schoill maroo.
Eisht ghow yn kiaulleeaght toshiaght, lesh possan dy scoillaryn goaill arrane v'ad er n'ynsaghey ec y schoill, as va nyn goraaghyn feer villish. Ghow Kirree arrane, agh va'n coraa eck bing agglagh, gollrish kellagh-kiark gerrym ayns yn oie; agh bare lhiam dyn dy ghra ny smoo, veagh eh myr 'ta'n oghe gyllagh thoyn losht da'n aiee', va mish foddey ny smessey:

Va dy chooilley pheiagh gyllagh orrym, 'Nish Yoe, shoh yn caa ayds, tar royd as gow arrane er nyn son.' Dobb mee ec y toshiaght, gra nagh row coraa aym as jannoo leshtalyn elley, agh cha derragh ad geill dou as va mee er my hayrn dys mean y laare. Eisht begin dou jannoo red ennagh, agh ren mee brock jeh; va yn chiaulleeaght ayms gollrish cliogaragh yn rannag vooar, as chossyn mee moylley-craidey as garaghtee ard. S'mie shen, ve feer aitt!

Daag mee yn Thie-Schoill roish my row yn chooish ec-kione, agh hug mee fockle er Hommy cho leah as veagh eayl-mooghit ain, eisht jeeaghyn da yn aght dy yannoo mortyr-eayl as dy hroggal boayllyn.

Un laa va mee loayrt rish Will as Peddyr Shimmin, as vrie mee orroo, 'Vel shiu goll eeastagh ayns y trooan ny cheayrtyn?' as dreggyr Will, 'Cha nel eh feeu, ta ny brick ro veg, agh ta poyll enmyssit 'Dub ny h-Astan', as ta ram astanyn ayn, agh cha laik lhien y dub shen edyr; ta ny guillyn gra dy vel scanjoon aynsyn jeh oikan va ceaut stiagh ayns yn ushtey bleeantyn er dy henney, as ny cheayrtyn oddagh fer clashtyn y lhiannan-shee keayney son e vummig. Va shin genmys y dub 'Poyll Vaaish.' Eisht hyndaa mee gys Peddyr as dooyrt mee, 'Vel shoh firrinagh, ny skeeal ass dty heiltynys?' 'S'feer eh,' dreggyr Peddyr, 'as my ta mee ginsh breag, she breag va inshit dou.' Ny s'anmee, vrie mee jeh'n ayr oc, Fred Shimmin, row eh kiart, as dooyrt Fred, 'Cha 'saym cre voish hooar ad yn skeeal, agh cha dinsh mee veg daue, agh ta fys ayd cre'n aght nee paitchyn loayrt mychione reddyn yn lheid shen, agh, s'feer dy jarroo, s'feer dy liooar yn skeeal.'

'Rish bleeantyn nish, ta'n smugglerys er n'gholl er lesh palchey lhune as liggar mygeayrt; ny cheayrtyn gyn veg dy eeck er e son, as er y fa shen va ram scooyr-ayn. Va dooinney dy row veih'n naboonys, (cha n-abbyrym yn ennym echey), as v'eh ny veshtallagh atchimagh. Yinnagh eh baarail dy chooilley phing er y jough lajer, faagail e ven veen fegooish argid dy chionnaghey bee. Shimmey keayrt veagh ee pleadeil marish dy chur seose y jough, as yinnagh eh gialdyn shen y yannoo. Cha row eh rieau dewil as cha woaill eh rieau ee, agh cha voddagh eh baghey fegooish y jough; va'n chooish geiyrt e ven ass e keeayll. Eisht, va oikan er ny ruggyr daue as va nyn voaynoo ny s'melley na va roie, as hie yn ven er-keeagh dy bollagh. 'Oie ghorraghey dy row, ghow ee yn oikan as cheau ee ayns y dub eh, as va yn corp er ny gheddyn yn nah laa ec daa ghuilley. Va'n chooish er ny freayll feer feagh, as va yn ven voght er ny coyrt ersooyl ayns y thie-baanrit. Er-lhiam dy vel ee ayns shen foast, agh t'ee gyn smooinaght as gyn cooinaght, as t'ee ceau yn traa eck cloie lesh babban as taggloo rish myr dy beagh eh yn oikan eck-hene.' (2)
'Shee bannee mee! Shen skeeal atchimagh, Fred,' dooyrt mee, 'agh ta mee goaill aggle dy vel reddyn yn lheid shen ayns Doolish taghyrt bunnys dagh shiaghtin; cha nhyrrys dy vel yn purt shen er chosney lheid y drogh-ghoo. Va drane-craidagh er ny screeu, as er ny choyrt ayns y pabyr-naight laa chaie. Lhig dou lhaih eh er dty hon:

Dooyrt Hommy dy row screeuyn er jeet veih America dys y Whallag, veih'n ven-vooinjerey echey Mona, (yn nah 'neen da Chalse as Kirree), as, er-yn-oyr nagh voddagh ad lhaih yn Vaarle, yinnagh Eleanor lhaih eh tra veagh shin ooilley ayns y thie lurg munlaa goaill aash rish tammylt lurg obbyr chreoie: v'ad bwoailley yn arroo lesh yn toost:

Cha row red erbee oddagh shin jannoo ec Ballaskeig, myr shen hie mee as Hommy dys y Whallag dy chooney lhieu; va mish cur yn arroo ayns dollan as craa eh myr creear, eisht va'n choau er ny sheidey ersooyl lesh y gheay.

Eisht hie shin ooilley sthie dy chlashtyn yn naight veih'n Theihll Noa: Dooyrt Chalse, 'S'foddey nish neayr's cheayll shin red erbee mychione Mona, agh ny yeih, t'ee ny share dy screeu na'n chuyr eck Bella, nish Eleanor ta shin ooilley fuirraght ort dy veen:'

'Ta shoh scruit ayns Baarle,' dooyrt Eleanor, 'as shegin dou chyndaa eh dys y Ghailck myr ta mee goll er:

'Yishag as Vummig veen, as cagh elley jeh'n lught-thie,
Myr hee shiu ec kione y screeuyn shoh, ta Hal as mee baghey nish ayns Baltimore, as ta ennym my wooinney-sheshey Harry Kissack. Va shin poost daa-vlein er dy henney, as s'mie lhiam ginsh diu dy row guilley beg er ny ' ruggyr dooin ec y Chaisht mleeaney, as ta'n ennym echey Juan, cha nee ' Johnnie, agh Juan myr t'ad gra ayns Ellan Vannin. S'treih lhiam nagh vel mee er screeu rish bleeantyn, agh cha nel mee screeu feer vie foast ayns Baarle, as cha noddym screeu 'sy Ghailck. Aghterbee, ta leshtal mie aym nish dy chur fys hiu dy vel Dada nish Daa, as Mama nish Maa, my Haney as my Warree myr jir Juan dy gerrid. Ta shin goaill moyrn ass Juan, as t'eh cheet er dy mie, as er-lhiam dy vel eh goaill er caslys jeh Hommy tra va eshyn ny ghuilley beg, lesh sooillyn gorrym as folt airhey echey. B'1aik lhiam fakin shiu reesht, s'bastagh eh dy vel shin scarrit liorish wheesh faarkey!'

Eisht scuirr Eleanor, as dooyrt as nagh row yn ayrn shen scruit feer vie, agh lurg tammylt, lesh doilleeid, lhaih ee dy row Mona er ve gobbragh da marchan ayns yn ard-valley, cha row ee gra cre'n valley ve, agh v'eh ny ghooinney grouw as garroo, as drogh-ellynyn echey. Laa dy row begin da Mona goll marish dys y vargey dy screeu sheese yn leagh as reddyn elley mychione dagh nhee va er ny chreck, as v'ee scoaghit dy gheddyn magh dy row yn Mainstyr dellal ayns sleabyn neesht, sleih dhoo as dhone er nyn goyrt lesh veih Africa myr fir-vondagh, deiney, mraane as paitchyn, agh tra honnick Mona naght v'ad bwoailt as eiyrit myr beiyn, as clashtyn rish screeaghyn as keayney ny sleabyn, cha dod ee jannoo rish ny sodjey, as roie ee ersooyl, keayney dy sharroo. 'Nish ta'n screeu red beg ny share,' dooyrt Eleanor, 'agh ta palchey ny smoo ry lhaih foast; er-lhiams dy bare dooin faagail eh derrey nyn mrastyr beg.'
Bwooise da Phil Kelly reesht son scannal shoh stiagh ‘sy cho-earrooder echey as kiartaghey eh beggan. Scruit ec Juan y Geil

TROAILT ROLLAGEAGH

Shoh dhyt yn "cloie" va jeant ayns Skylley Maayl ayns Feailley Ghaelgagh. Va ourys ec Brastyl Ballabeg dy beagh ad jummal nyn draa mannagh veagh cooney lesh ny eaishtee - chyndaays gys y Vaarle, ny, ec y chooid sloo, skeeal giare jeant jeh dy hoilshaghey magh cre va taghyrt. Agh myr dooyrt yn ughtar (Bobbee Bob), “my vees fys ocsyn cre ta bun y hrustyr shoh, shegin daue insh dooys neesht”.

RHEYNN NANE

Spoar: yn cagliagh s’jerree. Shoh ta ny turryssyn jeh’n lhong rollagagh (rollageagh?)
Brastyl Ballabeg: yn gerrym echey rish queig bleeaney, dy ronsaghey seihllyn quaagh; dy hirrey magh bea-chrooghyn noa as ardveenidyn; dy dy daaney gholl c‚raad cha jagh peiagh erbee roish nish.

Kirk: Lioar lhuingys y Chaptan, laa rollagagh (rollageagh?) queig as feed, nane-jeig poynt nuy hoght. Ta’n Brastyl Ballabeg goll dy tappee trooid spoar tra ta doilleeid lesh yn jeshaght warp.

Mnr Sulu: Ta shin tuittym magh ass warp, Chaptan.

RHEYNN KIARE

Oltey 1: Shoh yn Captan reesht.

Kirk: S’mie yn naight, deiney. Ta caa dooin faagail yn boayl shoh.

Oltey 2: Cre’n aght ta shen?

Spock: Hooar shin magh dy vel foast skeddan oor oc ‘sy tuinney coheeynt shoh.

McCoy: Fodmayd lhieeney y lhong rollagagh ain lesh warpyn skeddan.

Kirk: Kirk gys y Vrastyl Ballabeg.

Coraa Scottee: Immee royd, Chaptan.

Kirk: Jean aarloo dy ghoaill er boayrd warpyn dy skeddan dy liooar ain rish foddey. (8)
Coraa Scottee: Aye, Chaptan. Vel oo çheet er . . .

Kirk: Shen kiart, Vainshter Scott. Ta skeddan ry-gheddyn ec ny Manninee aynshoh. Kirk magh.

Spock: Neemayd goaill lhien macsoylleyder voish y tuinney coheeynt shoh nish, as bee thammagyn dy skeddan ry-gheddyn ain son dy bragh.

Oltey 3: Myr shen, ta caa dooin cosney er-ash gys y tuinney ain as Balley Beg.

Oltey 4: Beemayd nyn venee. Skeddan - ta ny eeast etlee ain.

Oltey 1: Ta. As share dooin etlagh ersooyl gys yn edd ain reesht.

Oltey 2: Cre’n edd shen?

Oltey 1: Yn edd Maddrell.

Kirk: Goull shin seose, Scottee.

Ooilley: Bee bio dy beayn as bishee. Carswell

Crosh Ockle

(9)

TESSYN SHEESE
1) Beiyn feayr ayns yn arrane. (6,2,8) 1) Rage in hoddok - boayl ayns Mannin. (5,7) 9) Contraartagh jeh veg. (7) 2) ___ Vannin. (7) 10) Slaynt vie! Ta mee ___ vie, gura 3) Armal. (9)

mie eu! (4)
11) Cummey ny 11 sheese. (2) 4) Gollrish 17 tessyn. (5) 12) Oddagh mucyn jannoo shoh, foddee. (7) 5) ___ Gennal as Blein Vie Noa! (7) 13) ___ as wass. (4) 6) Cha nee aynshen. (7) 15) Feayr/s'feayrey: cheh/___ (5) 7) Sorch dy voayl ching. (4,7) 16) Ta mee goll. Jea ! (3) 8) Mooarane jeh 9 tessyn. (7) 17) Biljyn oddys shiu feddyn ayns 11) Cha row eh jiooldagh. (2)
Pulrose. (3)
18) Cheet ayns yn emshir chaie. (5) 14) Fer jeh'n lught thie. (2) 20) Fockle cadlagh. (4) 15) Ynnyd ard. (6) 22) Tar stiagh ayns yn ___ Maud! (5) 19) Ass yn thie. (9) 24) Laa Tinvaal. ___ queiggoo Jerrey 20) T'eh ry-gheddyn ec Whitehall, ___
Souree. (4) cooinaght. (7)
25) Ren cur. (3)
28) Vel oo ___, gollrish Ny Scrialtee (6) 21) Foddee shiuish feddyn shoh 'sy billey euar. (2)
30) Mustela ermina. (5) 23) Ta mee smooinaghtyn. (2,5) 31) Dou/dhyt/___ (2) 26) Ta Nollick as Caisht taghyrt yn mennick 32) Lieh gaag? (2) shoh. (4,5) 33) Tra va mee ___ nish my 27) T'eh ry-gheddyn ayns yn 7 sheese. (9) ghuilley beg. (5)
34) Cha nee mie. (5) 29) Goll seose ayns y theihll! (5) 36) Moir ec yn chayt? (2) 34) Un dooinney, daa ghooinney, tree ___ (6) 37) Mwyllin Doo ___; shenn ennym. (3) 35) Darragh, sampleyr. (6) 38) Aigney. (5) 40) Fockle beg scanshoil! (2) 39) Feer veg. (3) 41) Foddee oo feddyn shoh ayns goaill yindys.(3)
43) Shuyr yn ayr eck. (7) 42) Baiagh, agh cha nee ooilley. (3) 44) Ceaghley ny daa vee jeig. (5) 44) Jeeagh 11 tessyn. (2) 45) Er yn juys 5 sheese, foddee. (8,4)

Julie as Chris


YN REAGHEYDER

S’treih lhiam gra dy vel yn co-lught ren chebbal queig keead thousane punt son co-chuirrey ayns y Dhooraght shoh er chur dou chaghteraght gra nagh vod ad cur yn argid shen dooin nish. Honnick stuireyder yn cho-lught TROAILT ROLLAGEAGH va jeant ec Brastyl Ballabeg as v’eh cha agglagh as nagh vel yn co-lught shen arryltagh dy ve kianlt lesh.

Brian Stowell ‘Kione y Sker’ 1998 - jeant dy mie Brian. Gura mie mooar eu ooilley ren cooney lesh y Ghaelg mleeaney.