DHOORAGHT

Earroo 14 Yn Cheshaght Ghailckagh Mean Souree 1999

Ta Dhooraght er jeet rish reesht myr collee-saggyrt ayns y tobbyr oonlee ny feeder ‘sy chuilleig hashtee fo ny greeishyn. ‘Sy choip shoh hee oo yn Whallag reesht as artyn scruit aym as ec Brian, Alec as Mook.

She yn cliaghtey aym gobbragh er Dhooraght mysh laa ny ghaa roish my nhegin da kione ve currit er. Myr shen eer dy vel eieyn erskyn towse aym son artyn as skeealyn, cha nel ad rieau jeant. My leshtalyn dhyt son shen agh s’treisht lhiam dy gow oo soylley jeh. Phillie.

KIMMEE GAELGAGH ?

Shoh screeuyn beg dy insh diu bee possan beg dy chimmee gobbraghey ec Thie ny Gaelgey dy gerrid. Bee ad aarlaghey as slaa ny kione-gaabylyn jeh'n scoill. Ta jerkallys orrym dy bee ablid ad dy cur kione er ayns un shiaghtyn. S'treisht lhiam ansherbee.

Bee shoh ry-yannoo kindagh rish keead blein yn Cheshaght Ghailckagh mleeaney. Ta'n pryssoon as ny kimmee feer arryltagh dy cur cooney er reddyn Manninagh. Myr shoh, bee possan-obbyr kimmee troggal seose y paalan buillvollee son Yn Chruinnaght mleeaney as cur cooney da’n ving dy yannoo stoo elley gollrish ny voayrdyn, chaairyn as y ardan.

Mook

Coloayrtys Rish My Oe

Keayrt dy row dooyrt my oe rhym pene, “C’red v’ou jannoo, haner, tra v’ou ayns dty aegid.” Dreggyr mish “Va mee gobbraghey fo reiltys Sostyn, er yn oyr nagh row startey erbee ‘syn ellan shoh ec y traa v’ayn.”

Eisht vrie eh jeem “C’raad v’ou goll as c’red v’ou jannoo?” Dooyrt mee. “Keayrt dy row, hie mee ersooyl my hiar gys cheer cheh - ellan mooar enmyssit Borneo, cheer ny deiney feie. Ayns shen va mee gobbragh fud etlanyn as radioyn.

Aght erbee, un laa ren mish as queig deiney elley cheet er red quaagh yn lheid nagh row shin rieau er nakin roie. Hass shin mygeayrt eh ayns kiarkyl jeeaghyn er. Vrie my oe reesht “Cre’n sorch dy red quaagh v’ayn?” Dreggyr mee “Ve cullyrit glass, va kiare lurgey echey, feeacklyn liauyr as geyre, as bunnys queig trie veih stroin dys baare e ‘amman. She sorch dy dragane beg v’ayn t’enmyssit iguaan (ny iguana ayns Baarle).”

“Aght erbee choud’s va shin shassoo mygeayrt ghow eh toshiaght dy roie gour y ghib hyms hene! Hyndaa mee dy tappee as roie mee ersooyl boayl ennagh, cha bieau as y gheay, as cha row mee rieau fakin eh reesht, booise da Jee.”

Lurg grig dy hostid vrie my oe “Vel shen yn firrinys?” “S’feer eh” dreggyr mee.

Lurg tammylt beg, mysh shiaghtin ny s'anmey, va my oe as e charrey cloie ry-cheilley. Vrie eh jeem’s “Insh dou yn skeeal reesht mychione y dragane lesh aile ennalagh cheet magh ass e veeal!”

Ta’n skeeal gaase lane s’moo traa t’eh goll er insh! Nagh vel?

Alec Kissack

Turrys Dys Y Cholloo
14oo, 15oo as 16oo Mee Boaldyn

Ayns y vlein s'jerree 'sy villey bleeaney shoh, hie hoght Gaelgeyryn reesht dys Y Cholloo son sabbadagh bleinoil. Ren Fiona McArdle, Karin McArdle, Stewart Bennett, Peddyr Shimmin, Peddyr Karran, Dave Fisher, Ian Morrison and Steoin Blackburn scapail veih'n raghtanys jeh vea ayns Mannin, ga nagh row eh agh rish daa laa. Va'n turrys baatey kiune dy liooar. Ren Steoin soie er y cheu aggair jeh'n vaatey as er y fa shen hooar eh y tonn harrish e chione, agh ayns tammylt beg va ny Gaelgeyryn er y thalloo sauchey as aarloo dy ghoaill nyn
hoshiaght er y chassan seose dys y gowaltys.

T'ee shenn gowaltys niartal as t'ee foast jeeaghyn gollrish gowaltys-obbyr, agh gyn kirkey as keck y vooa. Cha nel peiagh erbee gobbraghey urree rish bleeantyn nish. Va'n lught-thie s'jerree dy obbyr ayns shen Robert Garrett ayns y jeig as feedyn . T'ee kemmyrk-ushag nish as ta lhiabbee dy-liooar t'ayn son hoght keayrtee.

Cho leah as hooar dagh peiagh yn lhiabbagh reih oc, ren peiagh ennagh cur sheese aile ayns e hamyr as va jough, bee as co-loayrtys yindyssagh ry-gheddyn. Ren shin cloie gammanyn, giu beggan jough as goaill arrane fud ny hoie.

Va emshir niartal ayn rish y chione chiaghtyn shen, cheh, chirrym, kiune as cha nel mee er nakin boayl cho aalin roish nish. Shooyl mooie fo'n speyr ghlen, marish caarjyn ayns cordail rhym. Ren mee goaill taitnys ass jannoo ymmyd jeh chengey ny mayrey as cha row feme ain er y Vaarle.

Feie'n laa, va beoyn shinyn dy shooyl ayns possan beg as loayrt mychione ny blaaghyn, ny ushagyn as mychione, ny possanyn elley. Er-lhimmey jeh Peddyr Karen, ren eshyn jus shooyl e lomarcan, as loayrt rish ny kirree mychione e hene. Myr dy row va eshyn foast ec y offish ny 24. Ta mee spotch, gow my leshtal Pheddyr.

Ooilley as ass, v'eh kione shiaghtyn ree-vie. Ta mee cur moyll er peiagh erbee as goaill taitnys ass shee as kiunys fo'n ghrian, bee, jough as arraneyn marish nyn gaarjyn as feme oc dy heet lesh ynsagh y chengey ny mayrey Vannin.

Gura mie eu dys ny reagheyderyn as dagh peiagh v'ayn son traa taitnyssagh.

Mook

Tooilley Thieyn Noa?

Shiuish ta jeean er Radio Vannin as y cloudeyrys ayns Mannin va fakin ny clashtyn reeshtagh veih ny jantee thallooin dy vel genney dy hieyn ayns Mannin. T'eh jeeaghyn dy vel roauyr dy oikyn as thieyn braew stoamey nagh vod adsyn ta shirrey thieyn fordrail goll er troggal ec yn traa t'ayn. Myr shen cha nel thieyn cooie ayn dauesyn ta shirrey kionnaghey thie noa son y chied keayrt as ta ny jantee thallooin laccal acyryn neuventit son lheid ny thieyn shoh y hroggal.

Cha nel mee dy bollagh noi ny jantee thallooin (wahll, breagerey mish) as ta lane fys aym dy vel eh jeeaghyn dy vel tooilley feme son thieyn ayns Mannin 'sy lhing ain jiu na va rieau. Ta fys mie aym neesht dy vel dy chooilley pheiagh ta jannoo dellalys shirrey tooilley argid glen ec jerrey y vlein argidoil, as cha nhegin dooin shen y yarrood. Dy jed whilleen dy hieyn er hroggal as ta ny jantee thallooin geearree hig ad dy ve berchagh dy liooar - cha nee shirveish y theay agh shirveish daue hene t'ayn!

Dagh blein ta'n chaghteraght cheddin currit dooin lioroosyn ta geearree mooadaghey ny cosnaghyn oc - mannagh vel tooilley thieyn as oikyn troggit dy leah hig geyre-ghaue da'n vargey thieys. Yioym rish dy nhegin da paart dy hieyn goll er troggal dagh blein agh car ny jeih bleeaney as feed t'er n'gholl shaghey ta'n shenn Ellan Vannin er ve stroiet lesh steatyn-thie graney neu-vriwnyssit. Cha nod yn ellan ain gymmyrkey whillin dy hieyn goll er troggal car ny jeih bleeaney as feed shoh cheet er lhiam.

Agh cha nee mish my lomarcan ta smooinaghtyn myr shoh. Coardail rish yn Reayrtys Gallup va jeant ayns 1990 cha row agh 10% dooin ayns Mannin geearree mooadaghey yn earroo dy lieh va cummal er nyn ellan. Va shoh mysh jeih bleeaney er dy henney as ta kiare ny queig thousane dy noanee er jeet gys shoh neayr's shen.

Myr shen t'eh feer scanshoil nagh vel yn reiltys ain geiyrt er yn raad ta soilshit liorish ny jantee thallooin as thie. Shegin dooin ooilley smooinaghtyn dy dowin er yn chummey vees er nyn ellan 'sy traa ry-heet mannagh dermayd sthap er ny steatyn-thie ta sthampey foue ny lheeannagyn glass Vannin.

Mysh feed blein er dy henney v'adsyn va boirrey mychione ny gaueyn jeh roauyr dy hollaghar 'syn aer, er y thalloo as 'sy cheayn as yn aght va farrysyn cheerey as boodeeyssyn goll er lhiasaghey dy neuymmyrkagh, coontit dy ve ass nyn geayll. Nish ta ooilley ny reiltyssyn mooarey cur scansh trome da shoh myr t'eh baghtal nish dy jean caghlaaghyn mooarey cheet mannagh dermayd arrym da'n theihll.

Nagh vel eh traa dooin ayns Mannin dy chooney lesh Tinvaal dy chroo polaseeyn foddee yn ellan shoh gymmyrkey as nagh vel mhilley yn edd ain hene. Ny smoo na shen lhig dooin shaghney ny shenn aghtyn tootagh as jollysagh va geiyrt er argid ny lomarcan gyn scansh da'n cheer as da'n theay.

Screeu mee shoh heose ayns Mee Averil agh ren ny pabyryn naight Ellan Vannin gobbal cur stiagh eh ayns fockle ayns dty chleaysh er y fa dy jinnagh eh cur corree er ny jantee thallooin as thie. Shen y fa nagh row fockle ayns dty chleaysh ry-akin rish mee ny ghaa - cha row ad arryltagh cur fys dou dy jeeragh as v’ad ginsh breagyn dooys my-e-chione rish queig ny shey shiaghtin gra dy row Gremlinyn ayns nyn go-earrooder. S’trimshagh dy vel argid ny jantee thallooin cur stap er naight seyr!

Phil Gawne

NY HEWNYN AS HEWNISH

Ta anaase aym er cooishyn Hewnagh, Palestine as Israel rish ymmodee bleeantyn. Va mee aeg tra va'n nah chaggey mooar goll er, agh s'cooin lhiam dy mie ny h-artyn ayns ny pabyryn-naight as ny filmyn ginsh dooin ny naightyn agglagh mychione yn aght hie millioonyn dy Hewnyn er marroo ec ny Natseeyn. Lurg shen, lhaih shin as cheayll shin mychione ny Hewnyn as ad streeu dy chur Israel er bun ayns Palestine. Tra ghow mee toshiaght dy ynsaghey Gaelg, va anaase mooar aym er yn aght ren ny Hewnyn aavioghey Hewnish (yn ynrican chengey hie er aavioghey dy bollagh, t'eh jeeaghyn). Rish keeadyn as keeadyn dy vleeantyn va ny Hewnyn goaill ymmyd jeh Hewnish myr chengey ry-hoi cooishyn crauee agh cha nee myr chengey ry-hoi cooishyn laaoil. Ny smoo na keead blein er dy henney, roish my jagh eh dy chummal ayns Palestine, ghow Hewnagh enmyssit Ben Yehudah toshiaght dy loayrt Hewnish myr chengey yn theay. Coardail rish skeeal ennagh, dooyrt eh rish e ven (cha row ad poost agh laa ny ghaa roish shen): 'Veih laa ny vairagh cha jeanym loayrt agh Hewnish rhyts.' Ren eh shen, as lurg tammylt va'n ven echey ayns y thie-lheihys! Ren ee couyral, as ayns Palestine ren Ben Yehudah as sleih elley gobbraghey dy jeean dy aavioghey Hewnish. Chroo ad thousaneyn d'ocklyn noa as loayr ad Hewnish, ga dy row Hewnyn elley gra dy row shoh noi goo Yee. Roish y chied chaggey mooar, tra hug Germaanee Hewnagh ram argid da ny Hewnyn ayns Palestine, va treealtys jeean jeant dy ynsaghey ooilley ny paitchyn Hewnagh ayns Palestine trooid Germaanish. Agh va scoillyn Hewnish ayn hannah as hie ny ynseyderyn er stholk tra cheayll ad mychione y treealtys shoh. Va'n stholk speeideilagh as lurg shen cha row ourys erbee ayn: veagh ny paitchyn goll er ynsaghey trooid Hewnish ayns ny scoillyn ayns Palestine. Ta sleih ennagh smooinaghtyn dy jagh Hewnish er aavioghey kyndagh rish Shoah (yn Holocaust) agh cha nel shen kiart.

Er y gherrid, cheayll mee veih Yuval, Israelagh aeg, trooid yn Eddyr-Voggyl. V'eh laccal gynsaghey Gaelg as kiaull Manninagh. Hug mee stoo-ynsee huggey as lurg paart dy veeghyn ghow mee yindys tra cheayll mee veih Yuval dy row eh er jeet gys Mannin marish carrey, ben aeg enmyssit Haddas. Ta'n jees oc cummal ayns Haifa as t'ad nyn giaulleyderyn. Myr Israelee, t'ad toiggal y scansh jeh chengaghyn dy dooghyssagh as v'ad er nynsaghey Gaelg dy liooar. By vie lhieu cosney Teisht Chadjin Ghaelgagh. Vrie mee jeu mychione Hewnish as focklyn noa. Dooyrt ad dy vel sheshaght oikoil ayn ry-hoi shoh, agh dooyrt Haddas: 'Cha nel shin cur geill dauesyn. Ta shin loayrt ass y Hewnish ain hene!' Tra haink ad gys y thie ain ayns Doolish, va Haddas cur graih mooar da cruitch yn inneen saa ain, Breeshey. Cha mie lesh Haddas ve scarrit rish y chruitch eck hene, dooyrt ee. Ta Yuval cloie y feddan stainney feer vie, chammah's greieyn elley.

Dooyrt ny h-Israelee shoh dy vel imnea er dy chooilley pheiagh ayns Israel car y traa (cha nhyrrys). V'ad coontey ram jeh Mannin as guee dy noddagh ad cummal ayns shoh. Erskyn ooilley v'ad loayrt mychione yn aght ta sleih ayns Mannin shooyl er y traie marish ny moddee oc. 'T'eh jeeaghyn dy vel y sleih nyn gadley', dooyrt ny h-Israelee.

Brian Stowell

BANGLANE JIASS!

Ec y chaglym shoh chaie eck choard bing ny Sheshaght Ghailckagh dy chur er bun fo ving dy eddyn magh anaase ny jiassee ayns laare ny/as possan Gaelgagh ayns y jiass. Er lesh ymmodee Gaelgeyryn dy nhegin da'n Cheshaght er lheh as ny Gaelgeyryn hene croo tooilley caaghyn dy yannoo ymmyd jeh'n Ghaelg, as jannoo ny smoo obbyr na ta shin dy chur er hoshiagh y Ghaelg.

Ta banglane twoaie er ve gobbragh dy doccaragh er cooishyn Gaelgagh er dyn traa nagh row mee oc my stuggey beg, as she obbyr vie dy jarroo t'er ve jeant oc er y twoaie. Mysh hoght ny nuy bleeantyn er dy henney va Caarjyn ny Gaelgey currit er bun as adsyn jannoo yn chooid smoo jeh nyn obbyr ayns mean yn Ellan er lheh yn heear. Reeshtagh she obbyr niartal as ymmydoil ta ny Caarjyn er n'yannoo.

Shinyn 'sy jiass, choud's ta fys aym, cha nel agh ny thieyn oastey ta bishaghey liorish nyn obbyr. Yioym rish dy vel lessoonyn braew er ve ynsit 'sy jiass rish tammylt foddey er lheh ny brastyllyn Ballabeg va currit er bun ny smoo na jeih bleeantyn er dy henney, agh cha nel monney taghyrtyn elley er jeet lhien.

Wahll, nish ta caa dooin shen y chaghlaa. Hed chaglym er cummal Jemayrt, 6oo Jerrey Souree ec Thie Vaddrell, Cregneash mysh 8 sa dy eddyn magh yn aght share y chooish shoh y chur fo-raad. S'treisht lhiam dy bee 'possan Gaelgagh ny jiassee' currit er bun vees reaghey taghyrtyn Gaelgagh (shooylyn, leaghtyn, cuirraghyn kiaullee, seshoonyn as y lheid), taghyrtyn ry-hoi troggal argid son y Ghaelg as foddee freayll 'thie y Ghaelg' (my yiarragh Gaelgeyryn lhisagh fys share y ve oc) ayns y jiass. Chellvane orrym er 834844 my t'ou geearree tooilley fys mychione y chooish.

Phillie

Coon lesh Mooinjer Veggey my sailt!

Va Mooinjer Veggey currit er bun ayns 1996 as t’ee er ve feer speeideilagh neayrs shen cur y Ghaelg er hoshiagh as streeu dy jeadagh moggyl dy possanyn roie-scoill Ghaelgagh y chroo ayns Mannin.

Er-lesh Mooinjer Veggey dy lhisagh caa ve currit da dagh paitchey ayns Mannin goll gys lheid y phossan-cloie bishagh Vraddan. Agh, mannagh vod Mooinjer Veggey baarail tooilley argid son moylley as soilsheeney yn chooish eck, ynsaghey ny obbreeyn eck as croo stoo ynsee Gaelgagh er lheh cha jean obbyr Vooinjer Veggey bishaghey dy mie.

Cha nel olteynys Caarjyn Vooinjer Veggey agh costal £10 dagh blein. Myr shen cre’n fa nagh jean oo as dty chaarjyn cheet dy ve nyn oltey as cur cooney braew da obbyr scanshoil Vooinjer Veggey. Nee dagh oltey geddyn kiare coip jeh ‘skeet’ dagh blein, as lhiantag gleashtan.

Cur dty ennym, enmys thie as £10 da Helen Robinson, Scrudeyr, 5 Pretoria Terrace, Balley Keeill Eoin.

Tar stiagh lesh Caarjyn Vooinjer Veggey my sailt as freill y Ghaelg bio!

Yn Whallag

Va'n obbyr ec Ballaskeig goll er dy dunnal, agh ny cheayrtyn tra cheauagh eh dy trome doaltattym, beign dooin cur seose nyn obbyr as goaill fastee ec y Whallag. Fastyr dy row tra va'n lheid shen ayn, va shin ooilley ec y Whallag as dooyrt Eleanor, "Bee red ennagh er-lheh eu son mrastyr-beg jiu; mill er nyn boddash." Eisht deam magh y chenn ven, "mill er poddash. Cha geayll mee rieau jeh jummalys yn lheid shen, cre voish haink yn mill ansherbee?" "Bee dty host vummig dooyrt Eleanor, "S'lhiams eh; haink Will as Peddyr dys shoh moghrey jiu lesh costrayl veg dy vill, myr gioot er son aym.”

Cha row fys aym dy row shelleigyn ec Fred Shimmin, agh dooyrt ny guillyn dy row nyn ayr er droggal shellanyn rish foddey dy hraa, ayns shelleigyn jeant ass fainaghyn dy huggane troggit myr baskad lesh farkyl er-mullagh jeh. Va ny shelleigyn er nyn goyrt lesh seose dys y clieau dy goghe ny shellanyn yn mill-freoaie; agh rish kuse dy vleeantyn s’goan va’n mill, ta dagh sourey er ve ro hirrym as feayr, as hooar ymmodee shellanyn baase "

Eisht dooyrt mee, "ta mee er chlashtyn, dy voghe Vainshter y Thie baase, dy beign da fer elley ginsh y drogh naight da ny shellanyn liorish goll dys y chelleig as crankal er y skelloo three keayrtyn as gra "t'eh hene marroo," as verragh ny shellanyn freggyrt ayns skianys . Mannagh beign shen er ny yannoo, ragh ad ooilley ersooyl as cha darragh ad er-ash reesht. Row fys eu dy row mill as kere-volley er nyn goyrt ersooyl dys Sostyn rish keeadyn dy vleeantyn? Va'n mill er ny chreck da ny deiney as mraane ooasle, as y kere volley er ny choyrt gys ny maynee dy yannoo cainleyn mooarey son ny kialteenyn as ny ard-chiambleyn. Tra va yn Kionfenee Fairfax er yn Ellan shoh, hug eh ram mill dys y ven-seyr echey ayns Sostyn, c'red t'ou smooinaghtyn jeh shen?" S'feer shoh, va feeackle villish eck.

Gow my leshtal agh cha noddym cur diu tooilley jeh’n skeeal shoh er y fa nagh vel yn coip aym glen as cha nel coip creoi jeh ayms dy chooney lesh kiartaghey ny marranyn. Bee yn chooish shoh kiartit aym son yn raiee cheet. Hee’m shiu ec y Chruinnaght!

Lhiats ‘sy chooish, PHILLIE

Ayns mee s'jerree yn Ouyir, tra d'aase ny laghyn ny s'girrey, feayr as fliugh, cha row mee dy mennick ec y Whallag as cha row monney obbyr goll er ec Ballaskeig, agh shimmey oie veagh sleih nyn soie ayns nyn dhieyn marish caarjyn as naboonyn mygeayrt y chiollagh, lesh aunlyn er y voayrd as conney aittin lostey er yn aile, geaishtagh rish shenn skeealyn as goaill arraneyn lesh y charr cloieit er y feddan, mannagh beagh fiddler nyn mast'oc.

Dy mennick veagh skeealyn agglagh goll er insh, jeh ny ferrishyn mie as sie, jeh'n phynnodderee mitchooragh, y tarroo-ushtey as y buggane foawragh lheid ny skeealyn as verragh atchim as craa er ny paitchyn tra hie ad dy lhie.

Lheid y fastyr Jesarn dy row, as va mish ec y Whallag marish y lught-thie mygeayrt y chiollagh, as dooyrt y chenn ven, Bnr. Keniagh, dy baillee ginsh dooin skeealyn mychione ny traaghyn creoie as agglagh va er yn Ellan roish my row ee ruggit, skeealyn cheayll ee voish e mwarree as sleih elley.

"My chaarjyn deyr," dooyrt ee, "ta shin coontey dy vel bioys feer chreoi dooinyn ta baghey heose ayns shoh; s'firrinagh shen dy liooar, agh cha lhisagh shin gaccan. Lhig dooin cur nyn mwooise da Jee dy vel slaynt as niart ain dy yannoo nyn obbyr laaoil, as dy vel shin geddyn beggan dy vee voish laa gys laa, as dy vodmayd cooney lesh naboo ayns chingys as seaghyn.”

Ta mee nish kiarail dy loayrt riu mychione b'loys mastey ny Manninee-cheerey mysh keead blein roish my vaik mee soilshey'n laa va traaghyn creoi agglagh ayn as beign da sleih gleck as caggey dy tannaghtyn bio. Va chingys, gorley, accrys, guin as baase y cronney laaoil son keeadyn jeu.

"Cha raink ymmodee feallee gys shey-jeig bleeaney as feed dy eash, er yn oyr dy row ram paitchyn geddyn baase lesh y ghruight, yn trak, as dourinyn elley, as va tooilley jeu geddyn baase lesh gorley-shymlee as y volgagh-vrock. Cha noddagh agh ny fir stroshey freayll bio. Cha row agh kuse dy 'lr-lhee er yn Ellan ec y traa shen, as ny fir-lhee v'ayn, cha row ad beggan share na buichooryn, as fir-obbee lesh ny pishagyn oc.

"Dy yannoo reddyn ny s'messey, car shiartanse dy vleeantyn, va ny Sounaghyn fliugh as feayr, as ren y fouyr failleil; cha row arroo ayn dy yannoo arran as poddash. Cha row eeast ry-gheddyn noadyr, as myr ta fys eu, ta'n skeddan lorg y vea oo-chor;~ rleh ~n arran; as va'n sleih goll nesu. Va ar~Js as accrys gimmeeaght er feiy ny h'ellan, faagail toyrt-mow as traartys nyn yei.

Eisht dinsh Bnr Keniagh kys begin da ny eirinee coonrey ny cretooryn oc, ollagh, kirree, mucyn, as eean, son arroo, as beign dauesyn, nagh row cretooryn oc shooyl ny cruink as ny magheryn dy helg lesh ribbaghyn son conning, mwaaee, as beiyn feie elley. Dy beagh arkan-sonney er ny hayrtyn ayns y ribbey, veagh eh-shoh fuinnit ayns jaggad dy chray, as tra veagh y chray brisht, veagh yn crackan tuittym ersooyl lesh y chray, as ta'n eill feer vie dy ee; gollrish feill-vuc.

Shimmey dooinney bailloo faagail yn ellan, agh cha dod ad goll; cha row argid oc dy eeck da'n chaptan son y thurrys er y cheayn, as v’adsyn va gobbraghey er y thalloo kianglit rish ny mainstyryn oo derrey Laa Houney, as cha row ny fir-obbree share cooney ny smoo ny kiare pingyn gobbragh jeih ooryn 'sy laa.

D'insh Bnr Keniagh eisht skeeal agglagh as graynoil mychione lhong-hiaullee haink stiagh ayns y phurt ec Doolish, as ren y captan chebbal turrys seyr lesh bee as jough da fer erbee dy row arryltagh dy gholl gys Barbados as gobbraghey ayns ny keylljyn-shuggyr rish queig bleeaney. Veagh yn 'aill jeih puint 'sy vlein son deiney as hoght puint son guillyn. Beign daue cur nyn enmyn gys conaant dy hirveish rish queig bleeaney, as eisht veagh ad seyr dy gholl boayl erbee ballloo; cheb cleaynagh rish deiney debejagh!

Va’n lhong shenn as broghe, as y fuygh aynjee lieh-loau; va'n lheead eck mooar, as yinnagh ee shiaulley feer dree. Ny-Yeih, hie shey jeig as feed deiney as guillyn ersooyl urree, agh cha row ad er nyn vakin arragh.

Feed blein ny lurg shen, haink Manninagh er-ash veih America gra dy row eh fer jeusyn hiauill ersooyl myr eebyrtee dys Barbados, as dinsh eh skeeal agglagh, jeh'n thurrys er y lhong-hiaullee as gobbragh ayns ny keyll~yn shugyr. Dooyrt eh dy dooar ymmodee jeu baase er y lhong, kyndagh rish drogh-earish, chingys-marrey, obbyr chreoi as dewilys ny skimmee, as doagan trooid bee loau, gyn glasseraght erbee, as va nyn girp ceaut harrish-boayrd gys ny sharkaghyn.

Haghyr yn lheid cheddin eo Barbados; cha row agh lieh-dussan dy gheiney faagit bio tra haink ad gys kione ny queig bleeaney jeh nyn gonaant, kyndagh rish drogh-vee as dewilys, aa y chiassaghey kinjagh agh ,'ad nish seyr, agh cha bailloo shiaulley er y cheayn reesht; bare lhieu yn thalloo chirrym, my shoh hie ad gys America, yn ayrn enmyssit 'Sostyn Noa', as hoie ad seose ayns shen myr fir-cheirdee as marchanyn, as haink dy chooilley nhee lhieu; v'ad foddey s'berchee na’n sleih ayns Ellan Vannin.

Oddagh fer briaght cre'n fa nagh ragh Manninee elley g'eiyrt orroo dys America dy chosney argid mie? Lurg ny skeealyn atchimagh as graynoil jeh'n thurrys er y lhong, cha nhyrrys dy duirree ad ayns America, cheer ny fir seyrey agh cha jagh ymmodee Manninee ersooyl er y cheayn derrey va ram bleeaney er n'gholl shaghey as va ny lhongyn troggit ny share, ny s'tappee as smoo soaillagh, eisht hie tooilley sleih gys cheeraghyn elley er feiy ny cruinney, dy scapail veih'n vondiaght as boghtyn,. ayns shoh.

B'leayr da Eleanor dy row e moir gaase skee, as dooyrt ee, “Lhig dooin nish goaill nyn shibbyr, as cur bwooise da Jee nagh vel shin rieau er hurranse lheid y torchagh as aOCrJs.”

Choud's va shin ec y voayrd, dooyrt Chalse, "Rish keeadyn dy vleeantyn, ta ny Manninee er ve qyr iir-vondiaght, treih as boght, fo reill Chiarnyn n' h'ellan. S'anvennick haink fer jeu dy chur shilley er yn Ellan as dy akin cre'n aght va'n sleih beaghey; by chummey daue shen, va’n jollys oc erskyn insh; hrog ad keeshyn er dy chooilley nhee as hug ad fir-oik Sostnee dy haglym ny keeshyn. Keayrt ny ghaa dirree magh ny Manninee nyn 'oi as d'obb ad dy eeck red erbee, agh ve ny sidooryn er nyn mustyral dy ghoaill ny leeideilee as dy cheau ad ayns y Chashtal Rosien, as va nyn ge.raghey feer trome.

Myr hooill mee thie yn oie shen, va mee smooinaght er y fuygh cour mullagh thie Ballaskeig. Va palchey dy fuygh liauyr, lajer as trome dy liooar ny lhie ec y Whallag dy yannoo cheuaneyn (purlins) agh beign dou reaghey marish y taauedayr dy ghiarrey ny ribblasyn (rafters) er yn ooig-saaue ayns Ballasallagh, as ad Y y=~Trkey gys kione y vayr er y chaar-laadee-chabbil. Ec y traa ,'ayn, va ooilley yn fuygh er ny haaue er yn ooig saaue; va ymmodee seiyr-thie as Ooig-Saaue beg oc, lesh saaue mysh shiaght trieyn er lhiurid lesh un dooinney er mullagh y darrag as fer elley heese fo. Va ny deiney heose aighoil' agh va'n fer boght fo ayns yn ooig er ny phlooghey lesh joan-haaue, agh nish as reesht yinnagh ad caghlaa ynnydyn.

Va ooigyn-saaue smoo ec ny marchanyn, lesh saaue hoght trieyn er-lhiurid as trie er lheead ec y vean, lesh doarnane mooar ec dagh kione, ?yr shoh dy voddagh daa ghooinney gobbragh cooidjagh er mullagh y darrag as daa ghooinney elley ayns yn ooig foue; obbyr feer chreoi as dree.

Ta mee credjal dy row yn chied saaue-runt er ny yannoo ayns y vlein 1700 liorish Sostnagh, agh va ny Sostnee ro anmagh - va'n eie dy tappee er ny ghoaill seose liorish ny mwyllinyn ayns Canada as America, as dy gerrid v'ad jannoo ymmyd jeh saaueyn-runt hoght trieyn tessyn as greienyn bree gimman ad.

Ta shenn wyllin-ushtey boayl ennagh ayns Skeerey Maayl gobbragh saaue-rea, liauyr' gleashaghey noon as noal tessyn y darrag, as ta shenn wyllin elley ayns Skeerey Marooney lesh y queeyl fo-halloo as er ny imman liorish kiare cabbil er nyn ghreighey rish croan as shooyl runt mygeayrt, as ta'n saaue goll noon as noal ayns yn aght cheddin, agh t'ad ro ghree as cha nel niart dy liooar ayndoo. Share lesh ny seiyr-thie geddyn nyn vuygh-hroggal er ny ghiarrey er y saaue-ooig.

B'laik lhiam jerrey y chur er mullagh y thie Ballaskeig, agh ta shin i~irraght rish sclateyn; ga dy beagh ad er y voayl, s'doillee as dree yn obbyr dy hionney ad gys ny slattyn. Ta ny sclateyn Manninagh beg as coon, lesh un towl ayns y chione, as shegin da kibbin-fuygh ve jeant as er ny choyrt trooid towl ayns y clat. Ta aggle orrym nagh bee Ballaskeig er ny choodaghey harrish derrey'n Blein Noa.

Myr dimraa mee roie, neayrs hooar Bnr. Shimmin baase ec y Rheeast, ta Eleanor er ve feer chenjal da Fred Shimmin as e ghuillyn' Illiam as Peddyr; t'ad genmys ee Naunt Eleanor, as veagh ad ec y Whallag bunnys dagh laa ~Jr harragh ad veth~n sooill' eisht yioghe ad bine dy vainney BS meer dy arran corkey derrey harragh yn ayr oc thie voish yn obbyr echey.
~ ~ ~ H A L L A ~ oheo t c.

Fastyr jea haink ny guillyn dy jeeragh dys y Rheeast, er yn oyr dy row fy. b~ie oc dy beagh Naunt Eleanor ayns shen. Daa cheayrt 'sy chiaghtin ragh ee dys y Rheeast dy aalaghey lhongey shoh cour Fred as e ghuillyn, as v'ee 3~nno; shen tra haink Illiam as Peddyr stiagh ayns y thie-mooar, as rote Peddyr dys Eleanor dy gheddyn nuiddraghys voee, as dooyrt eh, "T'ad gra dy bee Jerdein shoh cheet Oie Houney, as Jyheiney Laa Houney, as bee yn scoill dooint. "S'feer shen, as nagh bee daunse as giense ec y Thie-Scoill Oie Houney?" vrie Eleanor orroo, "Bee,” dreggyr Illiam," agh hedmayd er ny thieyn dy aaloayrt 'Hop tu naa', agh cha nel shin ro hickyr jeh'n slane drane".

Eisht dooyrt Eleanor, "Tra va mee aeg, va fys mie aym urree, gow shiu toshiaght as higgym stiagh tra vees shiu chionnitn. As haink ny guillyn harrish ny focklyn; Hop tu naa, noght Oie Houney; Hop tu naa, mairagh Laa Houney. Hop tu naa, Kellagh as Kiark. Hop tu naa, Shibbyr y Gounee. Hop tu naa, Cre'n gauin gowmayd? Hop tu naa, yn gauin beg breck. Ruitt ny guillyn nyn lheayst, as haink Eleanor stiagh leah tooilley smoo, as hug Illiabs kione urree lesh Hop tu naa, Three Kirree Keeir. Hop tu naa, Va ec Illiam yn Oe. My ta shiu cur veg dou, Cur dou eh nish, Son ta mish laccal goll thie lesh Soilshey yn Eayst. 'Hop tu naa'.

V'ad ooilley garaghtee, eisht dyllee Eleanor magh, "Shee bannee mee, bee yn V r eu thie as cha bee jinnair aarloo. Shegin dou jannoo siyr, agh traa elley inshym diu tooilley cliaghtaghyn jeh ny shenn laghyn ayns Ellan Vannin".

Ta dooinney gobbragh marish Fred Shimmin ec y quarral er y Clieau~clagh - hryal, as ta'n ennym echey Ned Quayne veih croit beg faggys da Kerrookeyl. Er-lhiam dy vel y boayl enmyssit Ballarhennee. '

Nish ta mac ec Ned Quayne as Juan ta'n ennym echeysyn, clagh y tooill da'n ayr echey, er yn oyr dy vel Juan ny scoilliar mie erskyn towse as chossyn eh ynnyd seyr ec y Scoill 'Grammar' ayns Ballacashtal, raad dynsee eh ny shenn ghlaraghyn Laddin as Greagish chammah as lioaryn ny ughtaryn as bardyn Sostnagh, as haink Juan dy ve mie-ynsit as flaaoil ayns ooilley jeu. Myrgeddin, fakin nagh row yn Ghailck Vanninagh er ny ynsaghey ayns ny scoillyn, dynsee eh da-hene dy lhaih as screeu e ghlare ghooie hene, veih ny lioaryn va ry gheddyn ec y traa shen, Yn Lioar Phadjer, Lioar ny Kiare Hostyllyn, as ny s'anmee yn clane Vible Chasherick. B'yindyssagh va'n tushtey as ynsagh echey'

Tra daag Juan yn Ard-scoill, hie eh myr prindeis da leighder ayns Ballacashtal as va dagh nhee cheet dy mie lesh. quoi ec ta fys? Laa ennagh, oddagh eh cheet dy ve ny vriw; Agh veih reddyn ta mee er chlashtyn, cha der yn Briw dy kinjagh briwnys 'cho jeeragh as ta'n chraue-drommey ny lhie ayns mean y skeddan'. Ta'n Briw feer chreoi er y drogh-yantagh boght, agh foayral rish ny kimmee berchagh.

Ta Juan as e ven-carrey ayns y cheshaght-chiaullee ec Keeill Halow, as dagh Doonaght t'ad goaill yn Chreestiaght; myr shoh ta Juan as yn saggyrt aeg nyn gaarjyn mie, as ny cheayrtyn veagh taggloo as cooish eddyr oc, mychione giootyn mooarey Yuan ayns scoilliarys.

Haink y laa tra vrie yn saggyrt aeg jeh Juan, "Vel oo rieau er smooinaght, er goaill oardagh-casherick, dy ve dty haggyrt gollrhym pene?" Agh dreggyr Juan, "Och, cha nee, my charrey, cha noddym jannoo shen edyr. Ta nee my scoilliar kiart dy liooar, agh cha nel y gioot aym dy phreacheill aghterbee, cha noddym gra dy vel mee er chlashtyn yn eam, myr ny ostyllyn er keayn Galilee. Ta oyr elley ayn Phaal, ta my chree soit er y leigh as laa ennagh ta mee treishteil dy gheddyn poost; cha derrin er my ven jannoo farrysthie er lheid y faill voal as ta ny saggyrtyn geddyn ec y traa t'ayn. Nagh bee oo mollit kyndagh rhym, lhig dooin tannaghtyn nyn gaarjyn firrinagh as shickyr.

Va Paal myngearay as dooyrt eh, "Yuan veen, lhig dooin jarrood y clane chooish, agh cha nhegin dhyt jarrood dy heet as cur shilley orrym traa erbee; bee failt gennal ort as oddagh oo lhaih dou veih ny Sushtallyn ass y Ghreaglah".

Gyn ourys, va Ned Quayne mollit tra nagh baillish Juan goll son saggyrt. Er dy lhing yn Aspick Wilson va'n Cheeill as y ving Chillagh cho niartal bunnys as Chiarn ny h'Ellan hene, as hug cummaltee ny skeerey arrym as ammys da ny saggyrtyn. Agh, foddee dy vel Juan er nakin y cheu elley jeh'n chooish nagh row ny saggyrtyn red beg share na feallee elley, as nagh row paart jeu cooie dy phreacheil as saggyrt lostey-lhome er peiagh (peccagh?) elley.

Laa chaie beign dou goll dys y vargey ayns Ballacashtal, agh cha row monney cooid ry-chreck, as s'goan va feallee mygeayrt. Va drogh earish ayn, fliugh, sterrymagh as feer feayr; myr shoh hie mee stiagh ayns thie-lhionney faggys da'n Chashtal dy hiow mee-hene lesh bine dy rhum. Va kuse dy gheiney elley sthie, as dooyrt fer jeu, "Moghrey mie Yoe, s'anvennick heemayd uss ayns y voayl shoh; nagh vel oo gobbragh jiu?" Yeeagh mee mygeayrt-y-moom ayns y lieh ghorraghys, as honnick mee eeasteyr ny ghaa nyn soie ayns y chorneil, as hie mee tessyn dy loayrt roo.

Va fer jeu Bob Creer veih Ronague, ny ghooinney aeg, liauyr as toallee, lesh sooillyn geayr as cho gorrym as keayn sy tourey. "Moghrey mie ayd, Bob", dooyrt mee, "Cha nel mee er nakin uss neayrs hie Benainshter Shimmin er oanluckey, as v'ou gymmyrkey y choir-verriu marish fir elley veih'n Rheeast dys y Cheeill. Cre'n aght ta reddyn mayrt?”

“Fuirree ort Yoe, s'cummey shen", dooyrt Bob, "Va mee briaght ort cre'n oyr nagh row shiu gobbragh jiu"? Hug mee my leshtal da, gra dy beign dou cheet dys y vargey dy gheddyn cooid-cheirdey, agh bare lhiam ve gobbragh ayns y toalt ec Balladoole, na shooyl ny straidyn ayns lheid y drogh earish shoh. "Foddym toiggal shen," dooyrt Bob, "as shen yn oyr ta shinyn goaill fastee ayns shoh. Cha nodmayd goll eeastagh, as ansherbee, ta'n imbagh-eeastee bunnys ec kione. Bare dooin stowal nyn lhieenteenyn, teid as cullee elley, as tayrn y baatey heese er y chladdagh derrey hig yn Arrag reesht, eisht goll thie as jannoo obbyr er y thalloo tra vees eh chirrym dy liooar".

Eisht vrie mee jeh, "Row imbagh mie ayd ec yn eeastagh myleeaney, Bob"? As dreggyr eh, “castrecair, Yoe; cha nodmayd gaccan, agh s'coan ta boiddagh as eeast glass elley, agh ta mee credjal dy row Yernee er nyn vakin geeastagh er yn ahlley ain-hene. Drogh orroo! Ny Yernee braddagh, breagagh myr v'ad rieau." Ny yeih, va palchey eeastyn elley ny sniessey da'n traie, er-lheh iebeigyn, as booise da Jee va ram skeddan as brick ry-gheddyn; myr shoh, cha lhiass dooin goll accryssagh choud as vees skeddan-aailley ayns y tubbag.

"Ta'n eeastagh foddey share na ve ayns lhing nyn shenn ayraghyn keead blein er dy henney. Vel fys ayd dy dug yn Aspick ooilley yn eeast cheet stiagh 'sy phurt fo jaghee-killagh, as va ny eeasteryn keoie as jiarg corree agglagh?

Eisht dinsh Bob Creer jeh'n errey trome va er coyrt er ny eeasteyryn. Va briw-marrey er ny phointeil liorish Chiarn ny h-Ellan dy haglym keeshyn, as va'n briw-marrey shoh goaill keesh elley er e hon hene; myr shoh, dy jinnagh ny eeasteyryn geeck jaghee ny killagh, veagh yn trass ayrn jeh'n lught oc aaillt. Cha nyrrys dy row ad fargagh as dwoaieagh er ny saggyrtyn.

Va irree-magh er feiy ny h-Ellan as dobb ad dy eeck y jaghee-killagh. Va'n currym er ny choyrt er ny saggyrtyn dy haglym y jaghee, as v'ad gaccan dy sharroo nagh row monney argid na eeast ry-gheddyn , dyn wooise da baggyrtys as oassid.