DHOORAGHT
Earroo 18 Yn Cheshaght Ghailckagh Mean Souree 2000

Chellvane: 834844 Post L: [email protected] Screeu rish: Thie Vaddrell, Cregneash

Cre’n fa nagh voddym rieau cheet da’n obbyr shoh gyn driss? Reeshtagh ta Dhooraght cheet diu as mish roie mygeayrt myr quaillag as thoyn gorrym echey gyn traa dy yannoo shoh dy kiart.

Wahll, she Dhooraght beg cheet hoods ‘sy vee shoh agh s’treisht lhiam dy vel eh anaasagh dy liooar. Ny jarrood dy vel mee dy kinjagh shirrey artyn son y raiee shoh. Ta’n laa jerrinagh son Dhooraght ayns y Vean Fouyir shoh cheet traa erbee sailt! Phillie

Papua New Guinea

Ta Phil er briaght jee’m dy loayrt riu mychione y traa cheau mee ayns Papua New Guinea. Ny smoo ny tree bleeantyn er-dy-henney daag mee Sostyn lurg va mee er ve gobbraghey ayns shen rish queig bleeaney. She Fer-ynsee mish as va mee er ve gobbraghey myr Fer-ynsee ayns ard-scoill ayns Lunnin niar. Agh atreih va mee er jeet dy ve red beg skee lesh my obbyr as bea ayns y ‘smook mooar.’

Shegin diu ve smooinaghtyn cre'n fa dy reagh mee dy gholl dys PNG. Wahll, hirr mee obbyr lesh yn reagheydys enmyssit VSO. She possan arryltagh adsyn as t’ad cliaghtey ceau arryltee dys cheeraghyn boghtey harrish yn aarkey.

Lurg va mee er n’gholl son quaaltys screeu adsyn dou dy row mee er ve reiht dy gholl ersooyl agh cha row ad shickyr raad va mee goll. Agh lurg tammylt beg cheayll mee dy row caa aym dy gholl gobbraghey myr Fer-ynsee ayns ard-scoill ayns PNG. Nish ta fys eu dy vel ny Manninee er ve scarrit as skeabit harrish eaghtyr y teihll ayns ny laaghyn ta er n’gholl shaghey. Agh cha nel mee shickyr my ta Manninagh ny ghaa rieau er ve baghey ayns PNG ny dyn. Myr shoh ec y toshiaght cha row fys aym mychione PNG - agh s’mooar va’n fys ec my huyr er yn oyr dy dreggyr ee nagh nee canniblee adsyn traa dooyrt mee ree dy row mee son gholl dys PNG!!!

Well, nish ta mee ayns sauchys reesht er-ash ayns Sostyn - cheer red beg quaagh gollrish PNG er lhiam - as foddym gra nagh vaik mee canniblee erbee as mish ayns PNG. Agh cheayll mee skeeal ny ghaa mychione y chooish shoh, agh ny smoo er shoh ny s’anmey.

Nish va’n mummig aym red beg seaghnit tra hooar ee magh dy row mee son gholl dys cheu hoal jeh’n teihill. Nish mac shiaulteyr mish as ga nagh vel mee shickyr mychione reddyn bentyn rish yn keayn, shegin dou er n’eiraghey lurgaghyn my ayrey. Agh dod my vummig fakin dy row my aigney jeant as eer nagh row ee er-chee fakin mish rish tammylt liauyr er lhiam by row moyrn eck dy row mee son jannoo lheid y obbyr.

Fy-yerrey-hoal haink yn laa son gholl. Va turrys liauyr aym, ny smoo na kiare ooyrn as feed, agh ‘sy voghrey er y jeihoo laa Mee s’jerree y gheuree 1997 rosh mee PNG. Va mee marish daa arryltagh elley as haink shin nyn guail fir oik VSO va baghey ayns Port Moresby - ard valley PNG. Va shin ooilley tannaghtyn rish y chied daa hiaghtin ayns yn ard-valley d’ynsaghey ny smoo mychione y cheer. Va shin ooilley er clashtyn dy nee Port Moresby ny boayl agglagh. Dy row eh lane dy kimmee as dy row eh red beg gaueagh dy gholl mygeart er ny straidyn ny lomarcan. Dy jannoo ec y toshiaght va 'curview'‚ ayn as cha row shin abyl dy gholl magh voish nyn dhie oast voish nuy er y clag ayns yn oie derrey y madran. Cha row shin ayns gaue as cha row aggle orrym agh v’eh aashag dy akin nagh row ram skibbyltee boghtey ayns PNG. Lurg tammylt hooar mee magh cre'n fa dy row wheesh dy doilleeidyn ayns y cheer shoh agh eer nish cha nel mee toiggal cre shegin dooin jannoo dy eaysley part jeh ny doilleeidyn shoh.

Myr dooyrt mee roie va shin tannaghtyn ayns Port Moresby dy feddyn magh mygeayrt shennaghys, cultoor as tradishoon PNG. Agh ny smoo scanshoil na ooilley shoh dynsee shin 'tok pisin' (piggin)‚ nane jeh ny chengaghyn ta goll er loayrt ayns shen. Shegin da ve fys ec paart jiu dy vel ymmodee chengaghyn loayrit dagh laa ayns PNG. Er-lhiam dy nee ny smoo na hoght keead as cha nel agh tree millioon dy leih ayn! T'ad gra dy vel paart jeh ny chengaghyn shoh cho anchasley rish y cheilley myr ta Baarl cho anchasley rish Sheenish. Dy jarroo faggys da’n ard-scoill aym va daa valley beg cheer ayn as cha row agh lieh meeiley eddyr oc agh t'ad loayrt daa hengey neuchasley. T'ad gra dy vel nane jeh ny buill shoh er jeet voish ny sleityn ymmodee bleeantyn er-dy-henney as hug ad lhieu nyn jengey hene. Va ny studeyryn ec my scoill mie ynsit ayns daa ny tree chengaghyn elley chammah’s Baarl as Tok Pisin.

Agh cre voish haink Pisin? Wahll, t'ad gra tra haink ny coloineyderyn da PNG cha row ad abyl dy loayrt rish mooinjeryn ny cheerey er-yn-oyr nagh row ad toiggal chengey ny cheerey as kindagh rish ren ny coloineyderyn as mooinjeryn ny cheerey goaill toshiaght dy croo y chengey noa shoh.

Ec y toshiaght cha row ny coloineyderyn coontey money jeh’n glare noa as v’ad cliaghtey gra dy nee glare ommidjagh ish. Agh nish t’eh er jeet dy ve feer scanshoil as my by vie lhiat loayrt rish y theay shegin dhyt gynsaghey ‘tok pisin', as cha nel ee cho aashag as jinnagh oo credjal. Nish t’ad loayrt y glare shoh trooid magh PNG as myrgeddin ayns The Solomon Islands as Vanuatu. Er my hon hene haink mee dy ve flaaoil ayns Pisin as va fockle ny ghaa jeh chengey elley bione dou myrgeddin agh shegin dou gra nagh vel ad feer ymmydoil ayns Sostyn!! Agh tra va mee ayns PNG v’eh yindyssagh dy ve abyl dy soie sheese ayns thieyn ny sleih as loayrt riu ayns nyn glare hene. S’doogh lhiam gra dy vel paart jeh ny shenn chengaghyn goll sheese y lhiargagh nish as ta paart jeu bunnys marroo. Agh ta ymmodee sleih jannoo nyn gooid share dy aavioghey ny chengaghyn shoh as s’treisht lhiam dy vees caa oc gaase ny s’troshey ayns ny laaghyn ry-heet. Va possan killagh gobbraghey ayns balley beg faggys dou as v’ad prowal dy aavioghey nane jeh ny chengaghyn shoh. V'ad red beg quaagh er y fa dy row ad credjal son cooilleeiney goo Yee dy nhegin daue chaghlaa y vible chasherick ayns dy-chooilley ghlare sy theihll - obbyr liauyr ayns PNG!! As ga nagh vel mee ayns coardailys rish dy-chooilley nane jeh ny eieyn oc er lhiam dy row ad jannoo obbyr yindyssagh son sleih PNG.

Ta mee foast screeu as loayrt rish carrey ny ghaa voish PNG as myr shoh ta mee abyl dy yannoo studeyrys jeh’n Tok Pisin foast. As S’treisht lhiam dy vel whilleen chengaghyn goll er loayrt ayns y cheer yindyssagh shoh ayns ny laaghyn ry-heet myr t’ayn nish.

Adrian Cain

S’treisht lhiam dy jig tooilley screeunyn veih Adrian er ny haghyrtyn yindyssagh echey ayns PNG.

Raad erbee cheauys oo eh, hassys eh!

Ta mee shickyr dy vel fys ec paart jiu er y raa shoh heose. Er lhiam pene dy vel ‘Traa dy liooar’ ny share son raa ashoonagh Vannin, agh foddee nagh lhisins gra shen!

SOILSHEY BEG

"She gleashtan jesh t'ayn dy jarroo." Choard mee rish. Ren ee stiurey myr red ennagh vio, ren ee gimman syn aght dooghyssagh. Foddee, v'ee cretoor vio syn irrin. Ga dy row yn gleashtan woish ny 60yn, cha row agh daa ny tree red shen ry
loayrt.

Jiarg. Cre v’eh mychione gleashtanyn as yn daah jiarg? Va'n cooid mooar jeh ny gleashtanyn jiargey, er-lheh ny gleashtanyn tappee. Va'n gleashtan shoh jiarg. Cre'n fa? Red ennagh sexual? Agh v'ee noi thie lheeah groamagh. Cre mychione naboonyn? Beeagh ad ooilley gimman Ford Fiestaghyn, Sierraghyn, as gleashtanyn elley beg bolvaneagh. As cha nhyrrys, dy row yn tutlerys gaase:

"C'raad ta'n argid cheet voish?"

"Cre'n fa?... vel feme echey son gleashtan tappee?"

Well, ta'n freggyrt aym. Cha row eh ayns ny thieyn-oast son bleeantyn, va eaddagh Oxfam er, as chum eh gagh ping dys yn traa shen. Chur eh kere as clout er yn ghleashtan gagh laa as lurg shen v'ee aarloo. Chionnee eh gagh ayrn, gagh red. Dooyrt eh gyn stad ad ny ayrnyn ry-yannoo. ‘Sy vuillagh jeh’n gleashtan va soilshey beg brisht croghagh magh marish streng beg.

As hyndaa eh dys moyrnagh. Ren eh gimman trooid yn stayd-baghee, myr ree, crieagh e laue da gagh nane aalin.
Un laa, ghooisht eh as fo'n uinnag, va'n gleashtan fastagh as neu-vio. Agh er yn cheu elley, va screeu gial "Snob". Agh va peint aashagh dy gheddyn voee.

Tra elley, daag eh yn gleashtan ayns mean y valley as hie eh er ash dys y ghleashtan gyn kione-soilshaghyn. Hie eh gys shapp raad dooyrt yn fer-creck dy row ad ny kione-soilshaghyn jerree veih'n strane shen. "Ta mee boght nish," smooinee eh, as hie eh er-ash dy valley.

Cha row bee erbee ‘sy thie echey. Smooinee eh mychione Chinese (takeaway?) y oardagh, agh cha row yn argid echey. Cha row red ry-yannoo, agh gheddyn bee veih'n ard-vargey. As va inneen feer vlasstal ec yn voayrd-coontee - Catreeney, Emily ny foddee Moirrey.

Tra v'eh ayn, honnick ny shenn mraane eh, as gow ad toshiaght er coloayrtys. Foddee eh gleashtan y kionnaghey agh v'eh ayns Shoprite. Nagh quaagh eh? Nish va'n inneen ec yn voayrd-coontee jeeaghyn er.

"Ta caa aym noght," smooinee eh. Dooyrt eh ree dy row eh girree goll magh maree, as dooyrt ee dy jarroo. "Ta mee goll tayrn noght," smooinee eh.

Agh cre'n aght v'eh son goll magh gyn argid? Yn gleashtan! Yn jeshaght ghraihagh! Va'n doagh lane as ren ad gimman dys yn voanee. By taittin lhee dy chooilley red! Yn Jeshaght Vannit! V'ad nyn lhie er yn jeelt liauyr. Gow eh toshiaght cur paag er yn roih eck.

"...Soilshey beg..." "Cre?" "Jeeagh! Ta dty streng croghagh magh!"

Yernagh ennagh ny Albinagh foddee.

Hooar mee shoh veih Yernagh ennagh er yn eddyr voggyl. Cha ren mish toiggal yn bun jeh noadyr agh cha nel yn Gaelg echey ro olk.

Ny h-Ellanyn Blascaaidee as Creneash

Hed kione shiaghtin dy haghyrtyn yindyssagh er cummal eddyr Jeheiney yn 14oo as Jedoonee 16oo Jerrey Souree. Hig possan dy Yernee dys Mannin son cloie kiaull, daunsin as goaill arrane. Ta shin geearree Gaelgeyryn dy heet gys ny cooishyn shoh, ayns Creneash fastyr Jedoonee eddyr 12 as 4 sa er lheh, dy cummal seose cultoor as kiaull Gaelgagh ec Creneash, Jedoonee 16oo Jerrey Souree. Ta mee geearree reaghey taghyrtyn dy liooar vees soilshey magh berchys nyn gultoor goaill stiagh kiaull, daunsin, arraneyn as skeealyn eddyr 12 as 4 sa.

Ta'n taghyrt shoh reaghit lesh cooney vooar veih Mann 2000 as Yn Cheshaght Ghailckagh as hig possan beg dy Yernee veih'n sheear (faggys da ny h-Ellanyn Blascaaidee) dy chooney lesh y chooish. Taghyrtyn elley vees goll er cummal, ad shen ceili beg 'sy Vallacallin Jeheiney 14oo, seshoon kiaullee ec y Thie Bane Jesarn 15oo as ceili mooar Jedoonee ayns soalt mooar Chreneash. Lesh cooney Yee bee traa yindyssagh ain. Loayr rhym er 834844 son fys. Phillie