DHOORAGHT
Earroo 19 Yn Cheshaght Ghailckagh Mean Fouyir 2000

Chellvane: 834844 Post L: [email protected] Screeu rish: Thie Vaddrell, Cregneash

Ta’n sourey er n’gholl shaghey, shoh yn fouyir cur my ner! Myr ta ny duillagyn tuittym veih ny biljyn ta skeealyn boghtey elley tuittym magh ass y cho-earrooder aym. Ta mee gialdin dhyt nagh loayrym mychione troddanyn traauee agh bee fockle ny ghaa scruit aym mychione Mooinjer Veggey as Feailley Ghaelgagh foddee. Ta Brian er screeu paart dy skeet, ta skeeal ny ghaa voish Allen Moore as tooilley voish Adrian mychione PNG. Phillie

Papua New Guinea Reesht

Va mee loayrt riu ayns my skeeal s'jerree mychione my chied shiaghtin ny ghaa ayns Papua New Guinea. Myr va mee gra ve feer scanshoil d’ynsaghey Pidgin my v’ou geearree goll lesh shilley er slieh y theay. Bunnys dagh kione shiaghtin va mee goll dy cur shilley er un lught thie er-lheh. V'ad baghey ayns balley beg cheer enmyssit Moro‚ as v’eh er-gherrey da’n scoill aym. Haink mee dy ve carrey mie da’n ard-er jeh’n valley beg shoh. She dooinney jeeragh as ynrick eshyn as v’eh dy kinjagh jannoo e chooid share dy chur cooney dou tra va feme aym. Ayns y balley beg echey hooar mish y Pidgin as cha noddym jarrood y caarjys as kenjallys echey. As shegin dou gra lheid y feoiltys cha nel mee er nakin roish. Ga dy row y lught thie echey boght v'ad dy kinjagh geddyn mess as lossreeyn er-my-hon.

Nish t’ad gra dy vel ny cummaltee PNG boght. Agh cha nel mee shickyr dy vel mee ayns coardailys rish yn eie shoh ny dyn. Son shickyr cha nel argid dy-liooar ec ny sleih ayns Moro‚ agh cha nel argid dy chooilley nhee. Ta palchey dy argid ec ram sleih ayns Mannin agh jeeagh cho treih as t'adsyn. Myr shoh my ta shin smooinaghtyn mannagh vel argid ec possan dy leih, she boght adsyn, eisht t'adsyn ayns PNG boght. Agh eer nagh vel ram argid ec sleih Moro‚ t’ad berchagh ayns ymmodee aghtyn. T’ad cummal ayns aght tradishoonagh as cha nel ad ooilley geearree berchys as cha nel ad ooilley goit ec argid. Eer dy vel feme oc son argid ry-hoi kionnaghey reis as reddyn nagh vel ad abyl dy geddyn voish yn thalloo oc son yn chooid smoo t’ad coontey dy vel reddyn elley ny smoo scanshoil na shirrey argid.

Ta aigh vie ocsyn ta baghey er y slyst ayns PNG er yn oyr dy vel thalloo mie ocsyn son soiaghey lossreeyn. T’ad cliaghtey soiaghey Yam, sweet potato, Taro as reddyn elley nagh vel ry-geddyn ayns Mannin. Eer nagh nione dou ny lossreeyn shoh roish my hie mee dys PNG lurg tammylt beg va mee gee adsyn myr va mee er ve gee adsyn rish bleeantyn.Tra va mee ayns yn valley beg oc verragh ad paart jeh’n vess as lossreeyn shoh dou. B'laik lhiam ny beeghyn shoh agh shegin dou goaill rish erreish dou gee palchey jeh taro s'yindyssagh nagh vel eh ry-gheddyn ayns Sostyn!!! V’ad jannoo ymmyd jeh’n thalloo oc son chammah soiaghey mess as troggal thieyn. Ta ooilley nyn dhieyn troggit magh ass fuygh feddynit ayns yn keyll. V’ad cliaghtey jannoo ymmyd jeh ram sorch jeh biljyn gollrish coconut, sago as biljyn banana agh lurg shiartanse dy bleeantyn yinnagh mullagh y thie tuittym sheese. Myr shoh begin daue jannoo nyn dhieyn ass y noa. Er y fa shen ta ram jeu laccal dy kionnaghey mullagh yiarn er yn oyr dy vel eh ny s’troshey na mullagh fuygh. Er y hon shen hene shegin daue cosney argid. Agh atreih, cha nel ram argid ry-geddyn voish ny lossreeyn creckit ayns ny margaghyn ayns yn ard-valley.

Ta ram reddyn yindyssagh mychione y sleih ta baghey ayns buill gollish Moro‚ as son shickyr t’ad red beg ny smoo aighoil na adsyn ta baghey feer foddey ersooyl voish yn slyst. Son adsyn ta baghey er-gerrey da ny traieyn ta ram eeast ry-geddyn ayns yn cheayn as ta ram coconut ayns ny keylljyn. Agh atreih , s’goan yn eeast as coconut ta ry-geddyn er ny sleityn. Va carrey mie dou enmyssit Charles as v’eh baghey ayns balley beg cheer er mullagh y cronk mooar. V’eh gobbraghey ec y scoill as v’eh shooyl rish daa oor da’n scoill gagh laa. Cha row ram mess as stoo elley ayns y valley beg ec Charles as va’n lught-thie echey dy mennick ching. Va ram sleih geddyn baase feer aeg as va ram paitchyn croobagh. As jannoo reddyn n’smessey, b’atchimagh dy akin yn sorch dy yeeyl va’n chingys malaria jannoo da’n sleih chammah shenn as aeg. Hooar mee malaria er tree keartyn as cha row mee coontey money jeh. Agh va aigh vie orrym er yn oyr dy row mee abyl dy kionnaghey stoo-lheihys son geddyn rey rish. Agh atreih, hooar ram feallagh aegey baase - as haink ny smoo jeu dy ve feer ching - tra v’ad geddyn malaria as cha row ad abyl dy gheddyn stoo-lheihys dy liooar.

Un sourey dy row va chirmid ayn. S’cooin lhiam nagh row eh ceau rish meeghyn as va ooilley yn faiyr chirrym as loshtit. Agh ny s’messey na shen va bunnys ooilley yn mess marrooit. Va mee cosney argid as oddins kionnaghey reise as stoo elley voish yn shapp agh v’eh feer doillee dauesyn va baghey ayns y cheer. Va paart jeu cheet dys my hie son geddyn ushtey agh lurg tammylt cha row money ushtey faagit aym myrgeddyn. Bwooise da Jee fy-yerrey hoal ren eh goaill toshiaght dy cheau reesht agh erreish da ram sleih er ve ching as faase.

S’treisht lhiam dy vees y reiltys PNG jannoo red ennagh dy vishaghey yn farrys cheerey jeh PNG as hig yn sleih ayns buill lheid y Moro dy ve ny smoo berchagh ayns ny laaghyn ry heet. Ec y chooid sloo t’eh scanshoil dy vel ooilley yn sleih feddyn ushtey glen as bee cooie beaghee. Agh ta mee er loayrt rish ram sleih mychione ny reddyn shoh as t’ad ayns coardailys rhym - son y chooid smoo - nagh vel ad laacal dy geddyn ram argid as ec yn un hraa cur seose ooilley ny reddyn yindyssagh ayns yn cheer oc. Myr va mee gra roie cha nel mee er nakin lhied y kenjallys as caarjys myr honnick mee ayns PNG. Smoo veagh nearey ayn dy jarroo my va ooilley yn caarjys as kenjallys shoh caillt. Ny sodjey cha neeu veg eh geddyn berchys ayns ynnyd jeh yn shennaghys, cultoor tradishoonagh as chengey ain hene. Ny yei shen as ooilley, cha nel argid dy chooilley nhee. Myr va shenn Manninee gra “cha nee eshyn ta red beg echey ta boght, agh eshyn ta geearree ny smoo.”

Adrian Cain

Skeet Daa-hengagh!

Shoh paart dy naight mychione cooishyn Gaelgagh ayns Mannin. Hoshiaght, ta'n Shirveishagh Ynsee, Steve Rodan, er ghra dy vel eh ayns foayr jeh cur er bun unnid ry-hoi gynsaghey trooid Gaelg son paitchyn bunscoill. Foddee dy bee yn unnid shoh sy scoill ec Balley Keeill Eoin tra vees scoill noa troggit (ayns Mean Fouyir 2002). Bare lesh Sheshaght ny Paarantyn yn unnid shoh y ve fo raad ayns Mean Fouyir 2001. By vie lesh stiureyder Eiraght Ashoonagh Vannin thie-tashtee jeh'n diaspora Manninagh y ve sy chenn scoill - chammah as unnid gynsaghey trooid Gaelg as thie-tashtee jeh Tinvaal! By vie lesh politickeyryn ennagh cur thie-tashtee jeh Tinvaal (ny lomarcan) er bun sy chenn scoill. Ta Steve Rodan er ghra dy bee unnid gynsaghey trooid Gaelg ayn 'boayl ennagh' mannagh vees eh sy chenn scoill ec Balley Keeill Eoin.

Some news about Manx language affairs in the Isle of Man. Firstly, the Education Minister, Steve Rodan, has said that he is in favour of establishing a primary school unit for teaching through Manx. Maybe this unit will be in the school at St John's when the new school is built there (in September 2002). The organisation Parents for Manx Medium Education would prefer this unit to be operating from September 2001. The director of Manx National Heritage would like to set up a Manx diaspora museum in the old school - as well as a unit teaching through Manx and a Tynwald museum! Some politicians would like just the Tynwald museum in the old school. Steve Rodan has said that a unit teaching through Manx will be set up 'somewhere' if it isn't sited in the old school at St John's.

Bentyn rish cooishyn ymskeaylley, cha nel Gaelgeyryn bwooiagh dy vel ny claareyn-radio as Gaelg ayndaue ry chlashtyn Jedoonee er y tonn veanagh (AM) ny lomarcan. Shoh feer vie son sleih cheu-mooie jeh Mannin, agh olk son sleih ayns ny buill shen ayns Mannin raad nagh vel AM ry gheddyn. Chammah as shen, s'atchimagh dy vel Kik FM ny lomarcan ry chlashtyn er yn eddyr-voggyl. Cha nel y stoo Gaelgagh (chammah as stoo elley mychione Mannin) ry chlashtyn Jedoonee er radio-strooaney. Smooinee er: kiaull ta ry chlashtyn er keeadyn dy stashoonyn-radio feiy ny cruinney goll er creeley liorish yn eddyr-voggyl ec Radio Vannin feiy ny cruinney as y stoo Manninagh ny host er yn eddyr-voggyl, ga dy vel sleih ayns America Twoaie, syn Austrail, syn Oarpey as buill elley laccal ad! Shegin caghlaa reddyn.

Concerning broadcasting matters, Manx speakers are not pleased that radio programmes with Manx Gaelic content on Sundays are on AM only. This is very good for people outside the Island, but bad for those in the Island living in places where AM cannot be received. As well as that, it's terrible that Kik FM only is on the internet. The Manx language programmes (along with other programmes of Manx interest) on Sundays cannot be heard via streaming audio. Think about it: music which can be heard on hundreds of radio stations round the globe being broadcast world-wide via the internet by Manx Radio while programmes of uniquely Manx interest are not, even though there is a demand from them by people in North America, Australia, Europe and other places! Things have got to change.

Brian Stowell

Vod conneeyn getlagh?

Ta Lynague er yn clyst eddyr Purt ny Hinshey as Skylley Maayl. Ta cassan voish yn raad sheese dys yn traie. Ta mee goaill soylley jeh shooyl ec Lynague. Tra nagh vel yn roayrt lhieent, fodmayd shooyl rish yn traie dys yn eaynin ec Gob y Deigan.

Ta Lynague boayl mie son ny ushagyn. Ta’n feeagh troggal edd er Gob y Deigan bunnys dagh blein. Ta daa-edd piyr dy phibbinyn baney guirragh er Gob y Deigan as, er-lheh, er ny eayninyn inshley eddyr yn gob as yn cassan. Ny keayrtyn, ta mee er nakin daa chaaig ayns shen, neesht.

Hie mee son cosheeaght beg ec Lynague moghrey ennagh ‘sy Vee Luanistyn. Va mee shirrey ny pibbinyn baney aegey er ny eayninyn. Tra va mee shooyl rish y traie, honnick mee shirragh y ree getlagh dys claghyn mooarey ennagh. Va’n shirragh gymmyrkey bee. Haink yn shirragh dys yn thalloo er clagh vooar, agh dettyl eh ersooyl dyn bee. Hie mee dys ny claghyn mooarey as yeeagh mee ec yn bee faagit rish yn shirragh. Va lieh jeh quallian conning ayn.

Ta mee er lhaih ayns lioaryn dy vel shirree y ree gee conneeyn ny keayrtyn. Ny yei shen, er-lhiams dy vel eh red feer neuchadjin. Ta shirree y ree tayrtyn nyn spooilley tra t’ad getlagh. Ta ny shirree cliaghtit rish geddyn nyn mee rish cur rooar neose er ushagyn etlagh. Cre’n aght ta shirragh y ree tayrtyn conning tra t’eh getlagh? Vod conneeyn getlagh, neesht? Foddee dy row yn quallian conning ny hassoo ec mullagh yn eaynin tra va’n shirragh getlagh shaghey. Myr shen, foddee yn shirragh goaill greim er yn chonning. Er-lhiams nagh vel eh dyn gaue son yn shirragh tra v’eh getlagh dy tappee er gerrey da mullagh yn eaynin.

Shiartanse dy vleeantyn er-dy-henney, honnick mee shirragh y ree ny hassoo er eaynin, as v’eh gee gubb. Cha dug yn ghubb shen magh clooie son getlagh, neesht.

Allen Moore

Tra va mee ayns Keighley

Hie mee dys Keighley rish three laghyn ayns Mee s’jerree yn tourey. Tra va mee my ghooinney aeg va mee ec yn Olloo-scoill ayns Bradford. Ta Bradford ard-valley ayns Sostyn twoaie, as ta Keighley balley ec oirr yn cheer faggys da Bradford. Ta jeih as three feed thousane dy leih baghey ayns Keighley. Ta’n chooid smoo jeusyn baghey ayns thieyn troggit jeh claghyn buigh er cheu yn Strah Aire as cheu Glion Worth. Va’n chooid smoo jeh ny obbraghyn ayns Keighley ayns jeshaghteyrys as mwyljyn olley. Nish, ta paart dy leih voish Keighley gobbraghey ayns ard-valjyn gollrish Leeds. Ta Keighley boayl ardghooagh er yn oyr dy vel yn Raad Yiarn Glion Worth goaill toshiaght ayns shen. Ta’n raad yiarn shen goll voish Keighley dys Haworth as Oxenhope. Ansherbee, ta nane jeh ny chynskylyn jeh Keighley dy vel mie er fys da’n sleih pynteragh jeh Purt ny Hinshey. Ta’n chynskyl shen imlagh. Ta’n thie oast "Thie Bane" creck yn lhune "Oasteyr" (Landlord). Ta’n lhune shen goll er imbyl liorish Timothy Taylor ayns Keighley. S’mie yn jough shen!
Ansherbee, ta mee goll er-shaghryn. Dettyl mee er etlan Skianyn Vannin dys Lerphoyll, as hie mee er yn traen dys Leeds. Ta Leeds ard-valley faggys da Bradford. Ta mooarane shappyn ayns Leeds. Va mee goaill soylley jeh jeeaghyn er ny shappyn ayns shen. Ta shapp kiaullee HMV ayns Leeds feer vie. Va mee shirrey kereneenyn CD jeh’n kiaull neuchadjin. Ta mooarane kereneenyn costal bunnys shiaght punt jeig ayns HMV. Share lhiam geddyn kereneenyn jeh kiaull symoil jeh leagh inshley. Myr shen, chionnee mee kereneen rish jeih punt, as t’ad gra rish "Yn Folliaght ny Coraaghyn Bulgeyree". Ta’n kiaull shen feer vie. Foddee dy vel ny arraneyderyn shen ny Caarjyn Cooidjagh jeh’n Vulgeyr!

Ta co-helloodeyrys Pakistaanagh ayns Bradford, as ta ny Pakistaanee jannoo berchagh yn ard-valley. Ta ny thieyn-bee Pakistaanee ayns Bradford feer ardghooagh. T’ad gra thieyn-curree roo. Tra va mee ec yn Olloo-scoill Bradford smoo na feed blein er dy henney, chloie ad kiaull Pakistaanagh er ny kishtaghyn kiaullee ayns paart jeh ny thieyn-curree ‘syn ard-valley shen. Neayr’s yn traa shen ta aght kiaull Aishanagh noa ayns Goal, as t’ad gra Kiaull Bhangra rish. Ta Kiaull Bhangra mestey jeh kiaull tradishoonagh voish yn Phunjab as craa-chiaull. Ta ny kiaulleyderyn Bhangra jannoo ymmyd jeh greieyn kiaullee tradishoonagh Aishanagh, as gitaryn, mair-chlaareyn as yn lheid. Bleeantyn er dy henney, cheayll mee kuse dy arraneyn liorish daa phossan-chiaullee Bhangra, Alaap as Premi. Ghow mee soylley jeh’n chiaull shen, as va mee shirrey kereneenyn jeh’n aght kiaull shen ayns shapp HMV Leeds, agh cha row yn lheid ayn.

Hannee mee ayns Keighley marish my chaarjyn Richard as Tamsin. V’ad marin ec yn Olloo-scoill Bradford. Ta Peter, carrey voish my laghyn scoill, baghey ayns Leeds, as haink eh dys Keighley dy gholl er yn jough marin. Va feysht currit orrym mychione ny kereneenyn CD va mee er chionnaghey. Tra va mee er chur jerrey er loayrt my-chione oc, dooyrt mee, "Agh cha row Kiaull Bhangra erbee ayn." Dinsh Peter dooin dy row e charrey Moggs voish Mwyllin Doo Aah cloie rish tammylt ayns possan-kiaullee Bhangra. Ren ad cloie ec poosey Punjabagh ayns Walsall, ard-valley ayns Mean Hostyn. Hie Peter maroo dy chooney lhieu myr reireyder raad, Roadie ‘sy Vaarle.

Ansherbee, yn laa er giyn, tra va Tamsin ec yn obbyr eck ayns Leeds, hie Richard as mish son cosheeaght ayns ny sleityn eddyr Bingley as Haworth. V’eh cheh! Tra hie shin er ash dys Keighley, va Tamsin er jeet er ash voish Leeds. V’ee er chionnaghey kereneen er my hon ayns shapp chiaullee elley ayns Leeds. Ta’n ennym "Bhangra son yn Theay" er. Raink daa charrey elley, Jon as Ruth, ayns Keighley voish Nalbin, as hie shin dys thie oast ny jees. Tra raink shin er ash voish yn thie oast, chloie shin yn kereneen CD "Bhangra son yn Theay". Chloie shin er ard eh. Dooyrt Richard as Tamsin dooin dy row peiagh ennagh ayns Keighley gaccan er yn oyr dy row ny paitchyn Pakistaanee cloie ‘sy traid! Ta’n straid shen bollagh kyagh, neesht. Er-lesh feallagh joarree-feohder ennagh ayns Sostyn dy vel ny Pakistaanee ginjillaghey yn naboonys. Tra va shin cloie yn kiaull Bhangra er ard, dooyrt Jon dy smooineeagh ny naboonyn dy vel Pakistaanee er gholl stiagh, as foddee dy derragh ad cowrey "Ry Chreck" ‘sy gharey s’niessey dooin!

Allen Moore

Obbyr Vooinjer Veggey

Ta naight anaasagh ec Mooinjer Veggey (Sheshaght Ghaelgagh ny Paitchyn Aegey) as er y fa nagh vel mee er screeu mychione y cheshaght shoh rish tammylt ta mee son screeu nish. Wahll, myr ta fys ayd ta Mooinjer Veggey er n’aase dy mooar nurree. Ec kione yn imbagh souree va ny smoo na tree feed paitchyn cheet gys Mooinjer Veggey, as kiare possanyn ain ayns Braddan, Balley Sallagh, Jorby as Purt Chiarn. Va ny smoo na dussan dy vraane as deiney gobbragh da Mooinjer Veggey, as va argid cheet veih’n Reiltys, co-lughtyn as sheshaghtyn giastyllagh, agh yn chooid smoo dy argid 70% veih paarantyn ny paitchyn hene.

Ec toshiaght blein noa ta caghlaaghyn ayn - ta Mooinjer Veggey er jeet dy ve ny co-lught nish as ny sheshaght giastyllagh recortyssit. Ta ny fir oik foast mish my Chaairliagh, Helen Robinson ny Scrudeyr, as Chris Sheard ny Vac Sporran Onnoroil, as ta tree olteynyn noa ny bing as ad shen Wendy Bolton, Alison Harvey as Sarah Lambden.

Er y fa dy vel Mooinjer Veggey er n'aase ro vooar dooin ta gobbragh nastee da dy reayll rick er ta shalee noa ec y ving dy chur er bun startey slane-traa son oaseir vees cur cooney as ynsaghey da nyn skimmee, jannoo stoo ynsee as currigylym cooie, cur fys as cooney da paarantyn er aghtyn mie son dellal rish nyn baitchey daa-hengagh, as croo co-chlare son troggal argid. Ta shin jerkal rish mooarane mooar dy obbyr veih’n oaseir ynsee as coonee as s’liklee nagh bee dy chooilley red ta shin geearree cooilleenit echey. Eer nagh vel dy chooilley red jeant chelleeragh ta mee shickyr dy jean yn oaseir shoh cur cooney mooar da ynsagh paitchyn aegey trooid Gaelg.

Ta shin feer booiagh dy vel Undinys Eiraght Vannin er ghialdin da Mooinjer Veggey yn chooid smoo jeh’n ‘aill as costyssyn son y chied tree blein jeh’n shalee, as ta co-lught ny ghaa er chur dooin argid dy liooar son cooney lesh y chooish neesht. Ta Mooinjer Veggey shirrey argid son yn shalee shoh veih’n Rheynn Ynsee as BBC ‘Children in Need’ agh choud’s shoh cha nel shin er chlashtyn veg.

Ayns yn RU (UK) as Éire ta argid dy liooar currit da sheshaghtyn ynsee son paitchyn aegey. Dy jarroo ec co-whaiyl Labour Noa shiaghtin er dy henney va eer ny smoo argid chebbit son paitchyn ta tree as kiare blein dy eash. Ta boirrey mooar ec yn Rheynn Ynsee ayns Mannin bentyn rish shoh - cha nee yn ynsagh Gaelgagh ta boirrey er agh ynsagh paitchyn aegey trooid Baarle. Cha nel Mooinjer Veggey shirrey agh mysh £20,000, agh son cur ynsagh da dagh paitchey ny smoo na 3 blein dy eash as roish scoill veagh eh costal millioonyn dy phunt.

She doillee as costallagh dy liooar yn chooish shoh son y Reiltys ain, agh ec traa nagh vel sleih dy liooar ayn son ooilley ny startaghyn ta ry-gheddyn ayns Mannin t’eh scanshoil dy vel buill dy liooar ayn son paitchyn roish scoill. Ta Mannin ayns feme jeh ‘sheshaghtyn ynsee ny paitchyn aegey’ mie as cooie ta paarantyn arryltagh cur nyn baitchey da as myr shen foddee ny paarantyn goaill paart jeh ny ymmodee startaghyn seyr ta faagit follym ec y traa t’ayn.

Phil Gawne

Shooyl Vooinjer Veggey - t’eh jeeaghyn dy vel brock jeant ain reesht. Hed shooyl Vooinjer Veggey er shooyl Jedoonee 8oo Jerrey Fouyir ec 2.30 sa ‘sy cheyll noa ayns Balley Keeill Eoin, ec yn traa cheddin ta Shirveish yn ‘Ouyir goll er cummal - atreih. Wahll, ta Mooinjer Veggey goll shooyl dy hroggal argid son ny possanyn cloie Gaelgagh mygeayrt yn Ellan. Mannagh vod oo cheet shooyl marin cur argid dooin my sailt. Er y fa nagh vel yn Reiltys son cur argid cooie da ynsagh ny paitchyn aegey foast, ta Mooinjer Veggey dy kinjagh shirrey argid dy yannoo shickyr dy bee shirveish kiart as feer jesh currit da nyn baitchyn as paarantyn.

My t’ou geearree cooney lesh obbyr Vooinjer Veggey, tar stiagh lesh Caarjyn Vooinjer Veggey. Yiow uss fys mychione obbyr ny sheshaght dagh raiee as cha nel eh costal agh £10. Loayr rish Helen Robinson son tooilley fys.

Aundyryn Gaelg Vio!

Reesht ta mee guee ort dy screeu rhym ny chellvane orrym ny er Brian as cur fys dooin quoi ta’n reih ayd son ny aundyryn shoh mleeaney.

Ta tree sorch dy aundyr t’ayn:

1. KIONE Y SKER - currit dy bleinoil liorish Treisht Conister, ta’n aundyr shoh son Gaelgeyr t’er n’yannoo obbyr feer speeideilagh son y Ghaelg ayns aght dooghyssagh as bioal. Nurree hooar Bobby Bob John Billy yn aundyr shoh son ooilley yn obbyr jeant echey er y radio as screeu ‘sy Ghaelg.

Ta Leslie Quirk, Juan y Crellin, Joan Caine as Brian Stowell er cosney yn aundyr shoh er ny bleeantyn t’er n’gholl shaghey, son obbyr niartal t’ad jannoo son y Ghaelg. Ny jarrood, yn nah cheayrt t’ou geearree kionnaghey red ennagh er HP, soilshee dty wooise da Treisht Conister, as jean ymmyd jeh ny shirveishyn oc!

2. GAELG VIO - SHESHAGHTYN - ta’n aundyr shoh currit da colught, sheshaght ny rheynn y reiltys t’er n’yannoo ymmyd jeh’n chengey ain myr chengey bio as ayns aght ymmydagh da’n Ghaelg.

Car ny bleeantyn ta Andrew Millichap, Skianyn Vannin, Shoprite as Lught-Reill Ushtey er chosney shoh!

3. GAELG VIO - PEIAGH - Currit er bun nurree, t’eh currit da peiagh ennagh t’er n’yannoo ymmyd jeh’n Ghaelg vio Vannin ayns aght ymmydagh. Chosn Brian Rae yn aundyr shoh yn chied keayrt, eisht yn Aspick as nurree chosn Andy Wint. Ta Andy Wint cur cooney niartal da’n Ghaelg gobbragh marish Brian Stowell er claareyn yindyssagh er Radio Vannin.

GOW BAGHT ! Bee briwnys jeant er shoh ec jerrey Jerrey Fouyir as myr shen ta shin geearree faaueyn voyd roish yn hoghtoo laa as feed Jerrey Fouyir.

Feailley Ghaelgagh

Hed Feailley Gaelgagh er cummal veih’n 11ed - 18oo, Mee Houney, as bee cummey yn ‘Eailley beggan anchasley na ve. Bee cuirraghyn kiaullee, ceiliyn, leaghtyn, sheshoonyn kiaullee as ynsee.

Ta cummey yn ‘Eailley er ve speeideilagh dy liooar car ny bleeantyn shoh chaie agh er lhiam dy vel eh traa nish son caghlaaghyn. Myr shen bee taghyrtyn ‘sy chiaghtin mestit beggan cosoylit rish feaillaghyn elley. Tooilley fys voym er 834844, ny ayns ny pabyryn naight ayns Mee Houney.

Claare yn ‘Eailley

Jesarn 11ed. Seshoon Ynsee ny h-Aegid ayns Doolish, veih 2.30 - 5.00 sa.
Giense Mooar Shenn Oie Houney. Daunsin, kiaull, arraneyn as y lheid. Fir-chiaullee voish Mannin ec yn thie oast Glion Helen (foddee?).

Jedoonee 12oo. Co-whaiyl Gaelgagh ec Halley ny Saasilee (foddee?), Balley Keeill Eoin veih 6.00 - 8.00 sa. Foddee dy bee caa dooin loayrt mychione co-chlare lhiasee Undinys Eiraght Vannin as Eiraght Ashoonagh Vannin.

Jelune 13oo. Leaght y Ghaaue. Nee peiagh ennagh yn leaght shoh y livrey, ec 7.30, boayl ennagh ta ny brastyllyn goll er cummal. Bee yn leaght livreit ayns Gaelg dy bollagh.

Jemayrt 14oo. Semineyr mychione ynsaghey trooid Gaelg - tooilley fys ny s’anmey.

Jecrean 15oo. Oie Ghaelgagh. Dy-chooilley Ghaelgeyr ‘sy theihll ec Ynnyd Bluckan Coshey Skylley Maayl (foddee?), ec 8.00. Kiaull, cooish as boayrd bee.

Jerdein 16oo. Laa Foslee yn Vooinjer Veggey ec Purt Chiarn, 11.00 sv - 1.00 sa.

Jeheiney 17oo. Cruinnaght Ghaelgagh. Cuirrey-kiaullee boayl ennagh nagh vel reaghit, 7.30. Arraneyderyn as fir chiaullee voish Mannin, Nerin as Nalbin.

Jesarn 18oo. Kiaull, Arrane as Bee. Thie Oast ennagh ayns Doolish (foddee?), ec 12.30.
Oie Chiaullee. Kiaull as arrane voish ny cheeraghyn Gaelgagh ‘sy Thie Bane, Purt ny h-Inshey, ec 8.30 sa.

Peiagh erbee ta geearree cooney lesh Feailley Ghaelgagh mleeaney loayr rhym er 834844 my sailt. T’eh feer scanshoil dy vel Feailley Gaelgagh lajer ayn dagh blein dy reayll ayns cooinaght ny politickeyryn dy vel Gaelg vio ayn. Jean dty chooid share dy heet magh gys ooilley ny taghyrtyn as cur wheesh dy chooney da’n eailley as foddee oo my sailt.

Phillie Beg