Er hoh diu nyn nah choip jeh
S'treisht lhiam dy bee ny skeealyn as artyn shoh anaasagh diu.
She mish yn reagheyder jeh'n lioaran shoh, as ta mee dy kinjagh shirrey
er skeealyn, naight as artyn er e hon. Cur dou Gaelg erbee my sailliu as
verrym stiagh eh ayns yn nah choip. Bee feme aym er stoo dy ve currit dou,
Phil Gawne, Cooil Bane, Cregneash son Dhooragh yn ouyir, roish jerrey Mee
Luanistyn.
Shegin dou cur my wooise dauesyn ta er cur stoo dooys son yn chied as yn
nah choip jeh Dhooraght. Gura mie eu!
Noddee as yn tead ymmydoil.
Yn chooid s'jerree.
"Va shen jeant dy mie, Noddee" dooyrt Tessee. "By vie lhiat
cheet dys my hie son tey as sooghyn thallooin?" "By vie, y Hessee"
dreggyr Noddee. "Ta feme aym er aash, dy jarroo." "T'eh
orrym cur lhiam Mnr Jumbo veih'n stashoon ny s'anmey."
Er yn 'astyr shen, hug Noddee lesh dy valley Mnr Jumbo. "Gura mie
mooar ayd, Noddee," dooyrt Mnr Jumbo, "By vie lhiam uss dy chur
cooney dou dy anlughtey my scudlagh." Ta mee cliaghtey cooney lesh
my hroailtee dy anlughtey" dooyrt Noddee.
Hrog Noddee scudlagh Vnr Jumbo magh ass e ghleashtan, as hug eh eh cheu
mooie jeh'n thie echey. Agh tra hyndaa eh mygeayrt, va'n gleashtan echey
er n'ghoaill toshiaght dy ghleashaghey dy moal sheese y raad. "Atreih!"
dyllee Noddee. "My ghleashtan!"
"Cha hionn mee dy kiart yn glackan, gyn dooyt," dooyrt Noddee
boght. Cha row fys echey c'red dy yannoo. She red mie v'eh dy row fys ec
Mnr Jumbo er. Ghow eh greim er y tead va foast sleaydit veih cooyl gleashtan
Noddee, as lhiett eh eh veih rowlal ersooyl. "Lhisagh oo kiangley
eh rish yn chroan-hoilshee," dooyrt Mnr Jumbo.
"Gura mie eu, Vnr Jumbo," dooyrt Noddee. "Nee'm . . . nee'm
ymmyd jeh my head ymmydoil.Ver shen sthapp er choud's gowysmayd magh yn
scudlagh eu ta foast ayn." "Gura mie ayd, Noddee," dooyrt
Mnr Jumbo. "Verrym dhyt tree skillinyn. Jees son yeeasagh dty ghleashtan,
as nane son yeeasagh dty head"
"Gura mie mooar eu, Vnr Jumbo," dooyrt Noddee. "Tree skillinyn,
s'aighoil mish." Lheim Noddee stiagh 'sy ghleashtan echey, as ghow
eh toshiaght er imman ersooyl, gra "Oie vie, Vnr Jumbo." "Cum
ort thootchey, Noddee!" dyllee Mnr Jumbo, agh cha geayll Noddee eh,
as hannee eh gimman.
Va'n gleashtan foast kianglit rish yn chroan-hoilshee! "Noddee, trooid
er-ash!" dyllee Mnr Jumbo, myr huitt yn croan-hoilshee dy feiyral,
"trooid er-ash!" Cha dod Noddee clashtyn veg kyndagh rish yn
'eiyr va'n croan-hoilshee jannoo. "Ta mee gindys cre oddys yn sheean
shen y ve ?" smooinee eh rish hene.
Choud's v'eh gimman trooid Balley Gaih, honnick Noddee Mnr Plod. "Foddee
dy vod eh ginsh dou cre ta'n sheean shen," smooinee eh. Agh choud's
v'eh gimman shaghey, ren yn croan-hoilshee Mnr Plod y lhiggey. "Oof
! Noddee !" dooyrt Mnr Plod dy creddagh.
"C'red ta foue, sheer tayrn croan-hoilshee cooyl eu er yn oie?"
vrie eh dy loghtal. "Shee bannee mee!" dooyrt Noddee, "ta
shen jeeaghyn gollrish y croan-hoilshee ta cheu-mooie jeh thie Mnr Jumbo!"
"Kys 'sy theihll chiangle eh eh-hene rish yn ghleashtan eu?"
vrie Mnr Plod. "Wahll, va mee cooney lesh Mnr Jumbo dy ymmyrkey yn
scudlagh echey," hoilshee Noddee. "Ghow my ghleashtan toshiaght
dy rowlal ersooyl, as begin dou kiangley eh rish yn chroan-hoilshee s'niessey
lesh yn tead ymmydoil aym."
"Nagh feer quaagh yn skeeal shen, Noddee?" dooyrt Mnr Plod, as
eshyn grouigey. "Shegin dhyt cur lhiat mish dys thie Vnr Jumbo, as
ayns shen, foddym briaght jeh vel firrinys erbee ayns y skeeal shoh!"
Va Mnr Jumbo ny hassoo cheu-mooie jeh'n thie echey, cummal doagan. "S'doogh
lhiam cur stiagh ort, cha anmagh er yn oie, Vnr Jumbo," dooyrt Mnr
Plod. "Ta mee kinjagh aarloo dy chooney lesh ny meoiryn-shee, Vnr
Plod," dreggyr Mnr Jumbo.
"Vel eh kiart dy ren Noddee kiangley yn gleashtan echey rish y chroan-hoilshee
shoh, choud's v'eh cur cooney dhyt dy anlughtey dty scudlagh?" vrie
Mnr Plod. "Ren dy jarroo!" dooyrt Noddee, "lesh yn tead
ymmydoil aym!" "Vel yn skeeal shoh firrinagh?" dooyrt Mnr
Plod. "Ta," dreggyr Mnr Jumbo, "shen yn oyr smooinee mee
dy re my churrym eh dy hassoo ayns shoh lesh my ghoagan derrey haink peiagh
dy chooney lhiam."
"Ta shen jarrooaghey dty skeeal. Foddee oo cur heiss dou dys stashoon
ny meoiryn-shee. Oie vie, Vnr Jumbo," dooyrt Mnr Plod myr v'ad gimman
ersooyl. "Yarrood oo yn croan-hoilshee y eaysley!" dyllee Mnr
Jumbo, agh v'eh ro anmagh. "Shee bannee mee. Ta mee sheiltyn dy bee
eh orrym dy hassoo aynshoh laa lurg laa, oie lurg oie, shiaghtin lurg shiaghtin,
mee lurg mee, blein lurg blein . . . . " dooyrt eh rish hene.
Choud's v'ad gimman er-ash dys stashoon ny meoiryn-shee, woaill smooinaght
er Mnr Plod doaltattym. "Noddee, cha nel oo er veaysley y croan-hoilshee
shen foast!" "Cha dimraa oo eh rhym," dooyrt Noddee as eh
mongey.
"Drogh er! Ta mee sheiltyn nagh noddym troiddey oo myr shen,"
dooyrt Mnr Plod. "Cha nod, ta fys aym!" dooyrt Noddee, as eshyn
garaghtee. "Ny bee imnea ort, Vnr Plod. She tead feer ymmydoil t'ayn
dy jarroo!"
Screeuit ec Stewee as Brastyl Adrian.
Ta Mooinjer Veggey sheshaght noa currit er bun ayns Mee Boaldyn. Ta yeearree
vooar yn cheshaght dy chur er bun possanyn cloie as scoillyn paitchyn raad
vees Gaelg yn chengey ynrican hed er loayrt. Ta'n lheid shoh jeant hannah
ec ny Yernee as ny Albinee, as t'adsyn feddyn dy vel ny paitchyn as daa
hengey oc jannoo foddey ny share na adsyn as un chengey oc. Ta ny paitchyn
ynsit 'syn aght shoh ny smoo flaaoil ayns Baarle na ad nagh vel agh Baarle
oc. Ny smoo na shen ta ny paitchyn as daa hengey oc gynsaghey mychione
nyn eiraght Ghaelgagh, as foddee ad loayrt as dellal rish y cheilley ny
share na paitchyn gyn Gaelg.
Beemayd ayns feme jeh cooney ny Gaelgeyryn dy beemayd cooileeney nyn yeearree.
Ta shin shirrey dy debijagh er Gaelgeyryn erbee vees arryltagh dy chooney
lesh yn chooish shoh. Ta shin geearree fer ny ben ynsee dy ve ny leeideilagh
jeh'n phossan shoh, queig lieh-laghyn dagh shiaghtin as mysh daeed shiaghtin
'sy vlein. S'treih lhiam gra nagh vodmayd chebbal ram argid da'n leeideilagh
foast. Dy jig jeih paitchyn dagh shiaghtin bee argid dy liooar ain son
cur 6.00 dagh oor da'n leeideilagh; s'treisht lhiam dy jig ny smoo na jeih
agh cha noddym gra dy shickyr. Bee yn possan shoh goaill toshiaght ayns
Mean Fouyir, queig lieh-laghyn dagh shiaghtin, as bee eh cummit ayns Doolish.
My vees shiuish abyl dy chooney ny dy ve dty ynseyder, cur fys da Helen
Robinson 801925, ny dooys Phillie Gawne 834844.
ENNYM GAELGAGH ENNYM ELLEY ENNYM YN UGHTAR CLOUDEYR ISBN
Y Cassan follit The Secret Path Nick Butterworth Collins 0-00664505-4
Y Possan Sauail The Rescue Party Nick Butterworth Collins 0-00664376-0
Lurg Y Sterrym After The Storm Nick Butterworth Collins 0-00664252-7
Oie 'Niaghtee Dy Row One Snowy Night Nick Butterworth Collins 0-00664318-3
Rosamund Reeoil The Tough Princess Martin Waddell Walker 0-74451226-3
Y Moddey Keyrragh The Silly Sheepdog Heather Amery Usborne
Tootagh
Laa Seyr Y Phishin Kitten's Day Out Heather Amery Usborne
Y Garran Noa The New Pony Heather Amery Usborne
ENNYM GAELGAGH ENNYM ELLEY ENNYM YN UGHTAR CLOUDEYR ISBN
Y Goayr Granganagh The Grumpy Goat Heather Amery Usborne
(Ny 4 lioaryn heose ry gheddyn ry cheilley myr 'Even More Farmyard Tales'
0-74601416-3
My Lioaran Jiarg/Gorrym/Geayney/Bwee/Dhone (5 lioaranyn) Dathanna
Treasa Ni Ailpin An Gum
Mac Y Vochilley The Shepherd Boy Kim Lewis Walker 0-74451502-5
Eayn Ealee Emma's Lamb Kim Lewis Walker
Caillag Flossie Kim Lewis Walker
Y Chied Nollick Ec Breck Spot's 1st Xmas Eric Hill Puffin 0-14050551-2
Topsy As Tim Ec Yn Ard-Vargey
Topsy As Tim At The Supermarket J as G Adamson Penguin 0-21692857-5
T&T Garraghey Thie T&T Move House J&G Adamson Penguin 0-21692851-6
T&T Goll Snaue T&T Go Swimming J&G Adamson Penguin 0-21692460-x
Noddee As Yn Tead Ymmydoil Noddy And The Useful Rope BBC 0-56336887-x
Pingu As Ny Gaihaghyn Brisht Pingu And The Broken Toys BBC 0-56340439-6
Moogheyder Sam As Y Thooilley Fireman Sam And The Flood
Alison Boyle Heineman CN3096
Thunnag, Yn Eirinagh Farmer Duck Martin Waddell Walker 0-74453660-x
Caarjyn Cooidjagh All Together Now Nick Butterworth Collins 0-00198134-x
Yn Corys Ynsee Oxford The Oxford ReadingTree Roderick Hunt Oxford U.P.
0-19916136-4
(Keim 5)-6 lioaryn (listed below)
Yn Ogher Obbee The Magic Key
Ny Roosteyryn Marrey Pirate Adventure
Y Billey Dragane The Dragon Tree
Mwarree Gran
Cashtal Ny Buitchyn Castle Adventure
Ayns Y Sniaghtey Village In The Snow
Shelg-Hashtee Harree Harry's Treasure Hunt S. Thraves Collins 0-001360043
Ector Er Y Traie Helping Hector Gus Clarke Andersen 0-86264536-0
Contoyrtyssyn Ealish Ayns Cheer Ny Yindyssyn
Alice in Wonderland Lewis Carroll Brimax 0-86112457-x
Aedan Apag Mici Moncai Mairead Ni Ghrada An Gum
Paaie as e Poagey Máire agus a Mála Máiréad
Ní Ghráda AnGúm
Loayr rish Chris Sheard (801586), ny Phil Gawne (834844) my t'ou laccal
ny fockleyn Gaelgagh son ny lioaryn shoh heose. Ta ny fockleyn clouit er
pabyr lhiantagh ry-hoi festal stiagh harrish ny fockleyn ta 'sy lioar hannah.
Kionnee yn lioar as shir orrin son y Ghaelg. Ta'n chooid smoo jeh ny lioaryn
ry gheddyn ayns coodaghyn boggey as cha nel y Ghaelg feer chostallagh noadyr.
Ta shin cur nyn milley booise dauesyn ta er chooney lesh ny chyndaaghyn
heose.
Chris Sheard.
C'raad va uss ruggit, ghooinney?
Va mee ruggit as troggit ayns thie mooar er Kione Ghoolish. Er lhiam
dy row eh troggit ry-hoi fer-lhee as yn lught-thie echey, agh 'sy lhing
ayms v'eh thie-aaght. V'eh er y raad gys thie stoamey 'Fort Anne', as va
reayrt yindyssagh voish, tessyn keayn Ghoolish. Ayns ny laghyn shen va
Doolish boayl aalin, as va nyn dhie ain lum-lane dy skibbyltee boghtey;
dy jarroo, car y tourey v'eh orryms cadley ayns y chamyr-chlea! (S'doogh
lhiam yn foaynoo t'er Doolish nish.)
Aght erbee, kuse dy vleeantyn er dy henney ghow mee toshiaght er ynsaghey
yn Ghaelg as ghow mee greim urree. Va reih raa ayms ... "Va mee ruggit
as troggit." Lurg tammylt v'eh foym ynsaghey yn Ghaelg da studeyryn
noa. Hug mee feyshtyn orroo gollrish... Cre'n ennym t'ort? C'raad t'ou
cummal? C'raad v'ou ruggit? C'raad t'ou gobbraghey? .. as y lheid.
Dreggyr ad rhym, ta'n ennym orrym Moirrey, Juan, Peddyr as enmyn elley,
eisht, ta mee cummal ayns Balley Chashtal, Purt ny h-Inshey, Purt Chiarn
as buill elley; as va mee ruggit ayns Doolish, -ayns Doolish, -ayns Doolish!
Smooinee mee er y chooish shoh rish shallid, eisht dooyrt mee roo, "S'quaagh
eh, nagh nee? Ta shiu ooilley baghey ayns ardjyn anchasley jeh'n Ellan,
agh va dagh ooilley pheiagh ruggit ayns Doolish!" Chelleeragh, lesh
un choraa bunnys, dreggyr ad rhym, "Agh va shinyn ooilley ruggit 'sy
thie 'Jane Crookall'."
Screeuit liorish Pamela Parkes.
Nish ta'n sourey ayn, fy yerrey hoal, s'mie lhiam shooyl magh er y cheer.
Lurg shiaghtin my hoie roish my cho-earrooder, ta mee ayns feme jeh aer
ghlen. Myr shen, va mee booiagh dy liooar, shiaghtin er dy henney, tra
cheayll mee voish Radio Vannin dy bee Jesarn braew grianagh ayn, as cha
row red erbee elley aym dy yannoo.
Shen y fa ghooisht mee moghey 'sy voghrey, as hie mee dys Balley Chashtal
er y chied varroose voish Doolish. V'eh bunnys shiaght er y chlag tra va
mee my hassoo ayns Kerrin y Vargee, smooinaghtyn cho kiune v'eh. Voish
yn chashtal, hie mee rish Awin Rosien, shaghey yn shenn Abban Rosien dys
Glion Silverdale, geiyrt er yn shenn raad dys Rhumsaa as yn Twoaie Vooar
(yn Bayr Milley Bleeaney). Va ny thunnagyn foast nyn gadley tra ren mee
shooyl shaghey er baare ny hoardaagyn-chass aym. Eisht v'eh orrym shooyl
er y raad seose dys Balley Moddey. Honnick mee fogrey ginsh mychione BSE,
agh va ny booaghyn jeeaghyn keeayllagh dy liooar dou. Ren ad ooilley geiyrt
orrym, as va mee booiagh tra raink mee giat y vagher.
Lurg Keeill Noo Markish v'eh orrym shooyl er ny raaidyn reesht. S'bastagh
eh nagh vel ny smoo dy chassanyn ayns yn Jiass, agh foddee nagh mie lesh
ny eirinee sleih goll rhym pene voish yn ardvalley stravaigey mygeayrt
ayns ny magheryn oc. Ec Shenn Cheeill Varooney, ghow mee my aash rish tammylt.
She boayl sheeoil yindyssagh shen. Ooilley mygeayrt va blaaghyn feie ry
akin. Ghow mee padjer, cur booise da Jee son yn cheer yindyssagh shoh.
Ec Balley ny Croshey, hie mee stiagh 'sy chapp, dy chionnaghey 'berreenyn
Jaffa' as jough vioyral. Va ben y chapp yn un pheiagh ren mee loayrt rish,
yn laa shen.
Goll my hwoaie reesht voish Balley ny Croshey dys Boayldyn, daase yn cheer
ny s'aaley as yn ghrian ny s'choe. Tra ren mee roshtyn Keeill Abban, va
my chooat as my ghansee ayns my phoagey as va mee er n'ee ooilley ny 'berreenyn
Jaffa'. Eisht hie mee er y vayr ghlass (t'eh ny sloo glass nish, er y fa
dy vel Boayrd Raaidyn Mooarey Ellan Vannin er ve gobbragh er y gherrit)
my heear jeh Beinn-y-Phott as eisht sheese dys yn chenn droghad ec cass
Sniaul. Ta reayrtyn yindyssagh ayns ny ardjyn shoh. V'eh cho kiune dy dod
mee clashtyn ny ushagyn getlagh 'syn aer, as ny mwaaee roie shaghey.
Agh v'eh orrym drappal seose reesht, shaghey yn shenn woaillee kiarkylagh
as Sniaul hene dys Park ny Eairkan. Ghow mee yindys mooar dy row sleih
baghey as gobbragh er y thalloo shoh ayns ny laghyn ta er n'gholl shaghey.
Shegin da shen er ve bioys doillee dy jarroo. Doaltattym, va reayrt yindysagh
ayn. Honnick mee yn Twoaie Vooar, as Nalbin neesht. Choud as va mee shooyl
sheese cronk Skyal dys Rhumsaa, cheayll mee sleih cloie bluckan peint ayns
y cheyll, agh cha vaik mee ad, ny adsyn mish booise da Jee.
Raink mee Rhumsaa mysh lieh lurg tree 'syn astyr, ghow mee cappan dy chaffee
ayns shen as haink mee er ash dys Doolish er y tram lectragh. V'eh er ve
laa yindyssagh, caa mie dy hayrn ennal, dy eaishtagh rish yn gheay, dy
hooyl queig meeiley as feed, as dy loayrt rish Jee. S'quaagh eh nagh row
peiagh erbee elley er y chassan, yn laa shen. Foddee dy jeanym meeiteil
rish peiagh ennagh yn nah cheayrt. Foddee dy nee uss vees eh!
Peddyr Hayhurst.
She Phil Kelly vees yn Oaseir Gaelgagh noa, tra ver Brian Stowell yn startey
shen seose 'syn ouyir. Moylley as soylley dhyt, Phil!
Myr ta fys eu hannah, ren Conister Trust plc gialdin dooin paart dy argid
dagh vlein dys jerrey yn thousane bleeaney shoh, son aundyr bleinoil. Ta'n
aundyr shoh (Kione y Sker) currit da peiagh erbee ta jannoo, ny ta er n'yannoo,
obbyr foaysagh da'n chenn ghlare ain. Nee Eaghtyrane, Caairliagh, Screeudeyr
as Tashteyder yn Cheshaght Ghailckagh reih peiagh ennagh son 'Kione y Sker'
mleeaney. Cur fys daue, roish Jerrey Fouyir, er peiagh erbee ta shiu coontey
dy ve ny chooneyder ooasle da'n Ghaelg. Screeu ny chellvane rhym ny rish
yn Screeudeyr, as abbyr rooin 'Quoi', as "Cre'n fa', agh myr dooyrt
mee roish Jerrey Fouyir.
Hooar Juan y Crellin yn aundyr 'Kione y Sker' nurree, as she reih mie v'eh.
Wahll, ta Juan er ve smooinaghtyn er cummal fastyr obbree mleeaney. Ta
'Fastyr Obbree' laa mooie er y cheer son possan beg dy Ghaelgeyryn as Studeyryn
as bit beg dy obbyr ry yannoo oc. Cha nel Juan cur fys dooin foast cre'n
obbyr ry yannoo, agh dooyrt eh dy vel boayl chirrym, as cooie da pairkal
ny gleashtanyn reihit echey son yn astyr shoh. Bee tooilley fys currit
diu ayns Dhooraght yn Ouyir.
Bee yn Paggad Bree shiaulley gys Divlyn Jerdein, yn nah laa as feed, Luanistyn
(22.8.96), ec hoght 'sy voghrey (8 am), as er-ash er yn laa cheddin ec
shey 'syn astyr (6 pm). Er lhiams dy vodmayd ceau laa braew Gaelgagh yn
laa shen my vees possan beg jin goll. Bee eh costal 31.00 y pheesh, as
15.50 son paitchyn. Cur fys dou my t'ou geearree cheet.
Ta shin ayns feme agglagh jeh feeshanyn (videos) Gaelgagh son paitçhyn
aegey. Oddagh shin jannoo feeshanyn dooin hene aashagh dy liooar, agh veagh
y gaue ayn nagh jinnagh paitçhyn (as sleih elley?) coontey monney
jeu. Ta'n chooid smoo dy phaitçhyn fakin stoo er y chellveeish ta
jeant er aght feer vie. Er y hon shen, cha mie lhieu stoo ancheirdagh (amateur).
Agh jannoo feeshan profeshoonagh, ta shen feer chostal. Bare dooinyn goaill
feeshan ta jeant hannah as cur Gaelg er. Agh cre mysh coip-chiart? Tra
ren shin shirrey er sleih hoshiaght beagh kied currit dooin dy chur Gaelg
er feeshanyn jeant hannah ayns çhengaghyn elley, v'ad bunnys lhiggey
er nagh ren ad clashtyn y feysht.
Fy-yerrey, va anaase ec Comataidh Telebhisean Gàidhlig (Bing Çhellveeish
Albinish) er y chooish. Yn caairliagh jeh'n ving shen, John Angus McKay,
v'eh ec y Feailley jeh Filmyn as Çhellveeish Cheltiagh ayns Bretin
myleeaney. Ta John Angus ny ghooinney feer scanshoil er y fa dy nee eshyn
y fer ren cosney jeih millioon punt gagh blein veih reiltys Lunnin son
claaryn-çhellveeish ayns AlbinIsh.
Ec y feailley shen, dooyrt John Angus dy by vie lesh çheet dys Mannin
dy loayrt rish ny Manninee mychione feeshanyn as çhellveeish.
Ec y jerrey jeh Mee Boaldyn, haink John Angus McKay dys Mannin marish Margaret
McKelvie jeh CTG. Va Albinagh elley maroo, Inneen Ross, ta heose rish bioid
(animation). As haink fer elley neesht, Christian le Bras veih'n Vritaan.
Ta colught beg ec Christian ta jannoo filmyn as feeshanyn ayns Britaanish.
Goll rooin hene, cha nel monney argid echey as, er y hon shen, by vie lesh
cur Britaanish er feeshanyn profeshoonagh.
Va çhaglym ec Scoill Stondane eddyr Manninee, Christian as y troor
Albinagh. V'ad shoh ny Manninee: Phil Gawne, Charles Guard, Peter Karran,
OKF, as Brian Stowell. Ren yn çhaglym goll dy mie as t'eh shickyr
dy vowmayd kied dy chur Gaelg er feeshanyn va jeant ayns Albinish. Schlei
er-lheh t'ayn, cur çhengey elley er fillym ny feeshan ta jeant hannah
ayns çhengey elley. Er yn oyr shen, sleih ta jannoo yn obbyr shoh,
shegin dauesyn goll er ynsaghey hoshiaght.
Y laa lurg yn çhaglym, hug ny h-Albinee as y Britaanagh shilley
er thie Duke Video, fo stiurey Charles Guard. Va ny goaldee jeant bwooiagh
ec ny culleeyn honnick ad, agh, dy firrinagh, yn obbyr ta shinyn shirrey,
bee eh jeant ayns thie Charles Guard raad ta culleeyn yindyssagh echey.
Bee feeshanyn Gaelgagh ymmydoil da sleih aasit chammah as dauesyn aeg,
choud's nagh vel oo sonnaasagh! Ec y traa cheddin, cha nhegin dooin jarrood
dy vel eh orrin feeshanyn 'yannoo da sleih aasit neesht. As cha nhegin
lhiantyn rish feeshanyn profeshoonagh car y traa.
My t'ou laccal goaill ayrn syn obbyr shoh, insh da Phil Gawne, Chris Sheard
ny Brian Stowell. Erskyn ooilley, ta shin shirrey 'coraaghyn' son feeshanyn
da paitçhyn aegey.
Hooar mee cuirrey dy gholl dys co-haglym ayns Mee Vayrnt ayns Bretin. Va'n
co-haglym shoh mychione gynsaghey myn-çhengaghyn Oarpagh (European)
da sleih aasit. Va'n co-haglym reaghit ec y Workers' Educational Association
(WEA) ayns Bretin jiass myr ayrn jeh obbyr VisioNet. Mannagh vel oo er
chlashtyn mychione y WEA hannah, foddee dy jean oo smooinaghtyn dy vel
eh ny heshaght chummynagh! Cha nel shen kiart noadyr. Ta'n WEA ny heshaght-ynsee
sy Reeriaght Unnaneyssit ta gobbraghey rish ymmodee blein, reaghey brastyllyn-oie
ayns ram cooishyn son sleih aasit.
VisioNet, shen co-heshaght-ynsee va currit er bun er y gherrid ec y WEA
ayns Bretin, Sostyn as Nerin twoaie, chammah as sheshaghtyn-ynsee sy Danvarg,
yn Toolyn (Sweden) as Norlann (Norway). By vie lesh VisioNet cur er e hoshiaght
lhiasaghey sheshoil (social development) liorish caaghyn-ynsee (learning
opportunities).
Y red va rieau boirey er ynseyderyn, ta shen: cre'n fa nagh vel ynseydee
ennagh gynsaghey? Shoh feysht ta doillee agglagh as cha nel freggyrt aashagh
ry-gheddyn. Erskyn ooilley, va'd ard chooish ec yn cho-haglym ayns Bretin
ayns Mee Vayrnt: cre'n fa nagh vel monney ynseydee ayns brastyllyn son
sleih aasit gynsaghey dy mie? Ta'n doilleeid shoh ry-gheddyn fud y theihll,
ayns gagh çheer.
Foddee dy vod Ynsagh Siyrit cooney lhien. Dean (aim) y cho-haglym ayns
Bretin, va shen dy hoilshaghey magh saase-ynsee (teaching method) ta enmyssit
Ynsagh Siyrit ('suggestopedia', ny 'accelerated learning', ny 'super learning').
Son y chooid smoo, ta'n saase shoh croghey er:
ec y toshiaght, ynseydee çheet dy ve ayns stayd kiune as taitnyssagh
liorish kiaull kiunaghey as roortys corpoil ta goll rish Yoga
goaill ymmyd jeh skeeal anaasagh/symoil dy ynsaghey yn çhengey
kiaull kiunaghey ry-chlashtyn 'çheu-heear' jeh ny lessoonyn
dyn insh da ynseydee dy jeeragh dy vel ad jannoo marranyn
reaghey yn brastyl dy ve 'y giense share sy valley'
Ta Ynsagh Siyrit prowal dy ghoaill ymmyd jeh fys noa mychione yn aght ta
ny h-inçhyn ain gobbraghey. Ta anchaslyssyn eddyr sleih. Share lesh
paart jin geddyn fysseree trooid ny sooillyn. Share lesh kuse elley dy
'leih geddyn fysseree trooid ny cleayshyn. As share lesh sleih elley geddyn
fysseree liorish jannoo reddyn, liorish aghtey corpoil. As sleih elley
foast, share lhieusyn mestey aghtyn sooilley, aghtyn eaishteeagh (auditory)
as aghtyn corpoil. Myr shen, share çhebbal ny tree aghtyn da sleih
ta gynsaghey çhengey noa.
Fysseree roshtyn ny h-inçhyn, cha nel shen yn un red as gynsaghey.
Mannagh vel oo jannoo eab breeoil dy chiangley focklyn noa lesh jallooyn
ny focklyn ta stoyrit ayns ny h-inçhyn ayd hannah, cha jean oo gynsaghey.
Dy h-undinagh, ta daa heu ec ny h-inçhyn. Ta'n çheu yesh
dellal rish soyllaghyn (patterns), jallooyn, kiaull as y slane reayrt (overall
picture). Ta'n çheu hoshtal dellal rish focklyn, mynscrutaghey (analysis),
resoon as oardaghyn (sequences).
Ta sleih ennagh currit da mynscrutaghey. S'mie lhieu tashtey fys ny veggan
as ny veggan, croghey er çheu hoshtal ny h-inçhyn. Sleih
elley, share lhieusyn geddyn y slane reayrt. Dy mennick, ta lheid y sleih
shoh gynsaghey dy mie liorish jannoo reddyn, croghey er çheu yesh
ny h-inçhyn. Ta'n çheu yesh gobbraghey ny smoo tappee na'n
çheu hoshtal. Ta'n çheu yesh croo soyllaghyn as gobbraghey
lesh jallooyn, kiaull as ellyn.
My t'ou geaishtagh rish arrane, ta çheu hoshtal dty inçhyn
cur geill da ny focklyn as ta'n çheu yesh cur geill da'n chiaull.
Ta'n daa heu gobbraghey ry-cheilley. Shen y fa dy vel oo dy mennick gynsaghey
ny focklyn jeh arraneyn ny sassey na reddyn elley. As s'cooin lhiat ny
focklyn. Er yn aght cheddin, t'eh ny sassey dy ynsaghey focklyn (çheu
hoshtal) tra t'ad goll er ynsaghey liorish jallooyn (çheu yesh).
Er y hon shen, share goaill ymmyd jeh kiaull, skeealyn as jallooyn. Ta
Ynsagh Siyrit geearree greinnaghey ny h-inçhyn ooilliu, cur er daa
heu ny h-inçhyn gobbraghey ry-cheilley.
Paart jeh ny reddyn ta ostyllyn Ynsagh Siyrit preaçheil, t'ad slane
noi ram reddyn ta goll er ayns ny scoillyn. Myr sampleyr, t'eh jeeaghyn
dy vel sleih dy liooar gynsaghey ny share my t'ad gleashaghey mygeayrt.
As ta sleih ennagh gysnaghey dy mie choud's t'ad gee red ennagh. As t'eh
jeeaghyn dy vel oyr corpoil ayn nagh vod ynseydagh cur freggyrt my t'eh/ee
agglit ec yn ynseyder ny ec red erbee: ta'n aggle dooney sheese paart jeh
inçhyn yn ynseydagh as nee yn ynseyder fuirraghtyn son dy bragh
son yn ansoor kiart!
S'aashagh gra dy vel Ynsagh Siyrit fassan noa elley. Son shickyrys, cha
nel y saase shoh cooie da dy chooilley ynseyder ny da dy chooilley ynseydagh.
Agh oddagh eh cooney lesh y Ghaelg as sheeu dooin prowal eh.
Brian Stowell
Bee Radio Vannin gymskeaylley ram lessoonyn voish Bun-Choorse Gaelgagh
(v'ad ayns y phabyr-naight, Yn Manninagh Seyr ). Bee ny lessoonyn
goaill toshiaght Jelune, y chied laa jeh Jerrey-souree 1996, ec 11.25,
15.30 as 22.30 (ooilley Lessoon1). Bee Lessoon 2 ry-chlashtyn ec ny traaghyn
cheddin Jecrean, y treeoo laa jeh Jerrey-souree, as bee Lessoon 3 ry-chlashtyn
ec ny traaghyn cheddin reesht Jeheiney, y wheiggoo laa jeh Jerrey-souree.
As reesht:
Jelune, 1.7.96: Lessoon 1 ec 11.25 as 15.30 as 22.30
Jecrean, 3.7.96: Lessoon 2 ec 11.25 as 15.30 as 22.30
Jeheiney, 5.7.96: Lessoon 3 ec 11.25 as 15.30 as 22.30
as myr shen foast son 26 shiaghtin (78 lessoonyn ooilley cooidjagh).
Va ny lessoonyn recortyssit liorish Paaie Carswell, Dave Fisher, Fiona
McCardle as Brian Stowell, lesh cooney Roy Macmillan. Bee Radio Vannin
jannoo kishteenyn jeh ny lessoonyn. Cha nhione dooin ny leaghyn foast.
Eddyr ny lessoonyn, bee Radio Vannin creeley 'Raa yn Laa' Jemayrt as Jerdein
ec ny traaghyn cheddin (11.25 am, 3.30 pm as 10.30 pm). Bee 'Raa yn Laa'
goaill toshiaght Jemayrt, y nah laa jeh Jerrey-souree 1996, goll er son
26 shiaghtin.
Cooinee dy bee Bob Carswell creeley Traa Dy Liooar Jemayrt 18.6.96
as Jemayrt 9.7.96 ec 8 pm.
My ta eieyn ayd son claaryn-radio, insh da Audrey Ainsworth ny Bob Carswell
ny Sue Jaques ny Brian Stowell. Cooinee dy vel argid ry-cheau ec Bing Ymskeaylley
Gaelgagh.
Ta gleayshaght ny Gaelgey reesht dobberan kyndagh rish coayl 'nane jeh
ny loayrtee s'flaaoil jeh'n Ghaelg Vanninagh, Markys y Braide, hooar baase
dy doaltattym ny chadley er y cheyoo laa jeig Mee Boaldyn, as eshyn kiare
feed bleeaney as queig d'eash.
Cha nel fer ny ghaa foast er-mayrn ren toshiaght y ghoaill er ynsaghey
Gaelg cho foddey er dy henney as ren eshyn. Dy jarroo, she Harry Kelly
hene dynsee Markys y Ghaelg voish lurg 1930, as s'feer vennick boallagh
eh faagail yn ovish1 echey ec kione laa obbree as
goll er e ghaa-wheel veih Doolish gys Creneash dy haggloo rish Harry as
myr shen dy ynsaghey yn chenn ghlare. By chooin lesh fastyr dy row, tra
hie eh stiagh ayns thie thooit Harry, dy row mysh tree shenn deiney elley
'sy thie hannah as adsyn ooilley taggloo cooidjagh rish Harry 'sy Ghaelg,
agh by hreih eh nagh dod eh veg y hoiggal jeh nyn goloayrtys ec y traa
shen. S'goan va'n Ghaelg ry-chlashtyn mastey cummaltee Chreneash ny lurg
shen.
Tra v'eh foast ny ghooinney aeg, hroailt eshyn as tree caarjyn elley, Leslie
y Quirk, Chalse Mooar y Craine as Illiam y Radlagh, gys Nherin dy chur
shilley er ardjyn ny cheerey raad hie Gaeilge er loayrt, as she er daa-wheeyl
hie ad trooid y clane cheer, jannoo ymmyd jeh'n Ghaelg Vanninagh dy loayrt
rish ny Gaelgeyryn ayns shen. Screeu Markys coontey gagh laa jeh'n turrys
as shen ny haghyr rish ny troailtee.
Tra haink yn Nah Chaggey Seihill, va Markys currit ersooyl gys Gibraltar,
as veih shen ren eh co-screeu ayns Gaelg rish e chaarjyn va faagit er yn
Ellan. S'mirrilagh eh dy dug fir-scroodee Sheshaght-Chaggee Hostyn kied
dasyn screeunyn y chur er-ash gys Mannin 'sy chengey whaagh shoh, fakin
dy row ourys ec ny fir-oik er red erbee va scruit ayns chengey nagh hoig
ad.
Dobbree Markys myr cleragh ayns ovish yn Ard-vaylee H. Percy Kelly rish
ymmodee bleeantyn, dy jarroo derrey dirree eh ass obbyr 'sy vlein 1972.
Er-coontey jeh'n obbyr echey v'eh reiht dy hyndaa gys y Ghaelg gagh blein
rish bunnys lieh cheead-blein giare-chummey ny leighaghyn ragh er fockley
magh gagh Laa Tinvaal er y Chronk ayns Balley Keeill Eoin. Agh she mastey'n
chenn feallagh hene va bun y Ghaelg echey ry-gheddyn ny smoo na ayns y
ghlare scruit, as shimmey lioar ren eh lhieeney car ny bleeantyn lesh ny
focklyn as raaghyn hooar eh veih ny shenn loayrtee tra v'eh cur shilley
orroo ayns nyn dhieyn, son va Markys mie er bashtal son screeu sheese red
erbee dy by noa da.
Ga bare lesh eh-hene y reayl ersooyl veih chaglymyn Gaelgagh as nyn lheid,
v'eh rieau goaill taitnys ayns loayrt mychione as ayns y Ghaelg, as s'dowin
va e hushtey j'ee. Tra erbee harragh peiagh gys e ghorrys as Gaelg echey,
verragh eh failt mooar er, son v'eh ny ghooinney feoiltagh, kenjal, imlee.
Shimmey oor anaasagh cheau John Wright as mish marish heose-greeishyn ayns
e hamyr studeyrys, lhaih yn Vible Ghaelgagh, resooney magh cooishyn doillee
bentyn rish y chengey as gynsaghey focklyn neuchadjin voish, as shimmey
cappan dy hey as brishtag hug e ven Rene dooin dy voddagh shin tannaghtyn
lesh yn obbyr vie!
Dooinney as Gaelgeyr niartal va Markys, as bee e chaarjyn ny s'boghtey
n'egooish. V'eh ny lhoob scanshoil 'sy gheuley ta kiangley yn shenn sleih
as Gaelg oc rooinyn ta bio ayns lhing aavioghey'n chengey. Cha bee e lheid
arragh ny mast'ain. Sollys Yee dy row er e annym ooasle.
Da e ven-treoghe Rene, e vac as inneen as e vooinjer ta shin cur ny co-ennaghtyn
s'ynrick ain.
Adrian Pilgrim
1 'office' (used in C19 newspaper article) = Fr. bureau, Ger. Buro (not
synonymous with oik = 'office' in the sense of 'post','position')
'censors'