DHOORAGHT
Earroo 20 Yn Cheshaght Ghailckagh Jerrey Geuree 2001

Chellvane: 834844 Post L: [email protected] Screeu rish: Thie Vaddrell, Cregneash

Anmagh dy lhie as anmagh girree, anmagh screeu er dty hon Dhooraght nurree.Ta mee goaill nearey goaill rish shoh agh va Dhooraght dy bollagh jarroodit aym roish y Nollick. Myr shen ta'n raiee shoh cheet dhyt mee anmagh. Gow my leshtal. Heese ta mee er aa-chlou stoo veih’n eddyr voggyl chammah’s skeealyn elley ta er ve currit dou car ny meeghyn shoh chaie. Phillie

Baase Illiam Mac y Teyir - 21oo Mee ny Nollick 2000

Hie Manninagh elley harrish y cheim tra va Illiam Mac y Teyir er ny oanluckey ayns ruillick Keeill Yurby lurg shirveish ghiare ‘sy chabbal ec Gat ny Geinnee.

Va Illiam 89 bleeaney d’eash, as ga dy row eh beaghey ny lomarcan ‘sy thie hene cha row slaynt feer vie echey rish tammylt. Ny yei, va dy kinjagh failt vooar orroosyn va cur shilley er.

Hooar Illiam yn Ghailck echey voish Will Wade, Gat ny Geinnee, tra v’ad lhaih cooidjagh ass y Vible Chasherick. Haink eh-hene dy ve ny phreachoor Saasilagh as v’eh mie d’ockley magh ass y chronnag ec shirveishyn Gailckagh. Keayrt dy row, tra va mee my hoie ‘sy cheeill marish Illiam Pat y Radlagh ec shirveish ennagh, dooyrt eh, “Tra ta Illiam fosley e veeal, she shenn Will Wade t’ayn!’

Ga nagh row Illiam soiaghey jeh monney co-loayrtys, va foast graih echey er enmyn buill as shennaghys yn ard echey hene, as screeu eh lioaran ass y Vaarle, ‘The Natural History of Sandygate.’ Kuse dy vleeantyn er dy henney ren mee coip jeh da Thie ny Gaelgey.

Va Illiam ny Vard cheerey, as screeu eh lioar elley jeh daaneyn chroo eh car ny mlein enmyssit, ‘The Manxland Muse.’ She Baarle ooilley t’ayn, agh un hymn chyndaait hug y Ghailck ass lioar hymney Saasilagh, ‘Hark the Gospel News is Sounding!’ va ny lhaih ec y chirveish oanluckee.

Va Illiam ayns yn R.A.F. car y chaggee myr meoir-shee, jannoo shirveish ass yn Ellan ayns buill joarree goll-rish Aden eddyr 1940 as 1945. Lurg cosney ‘n seyrsnys echey hooar eh obbyr marish R.C. Cain as co-lught, Thalhear, ayns Doolish, rish ymmodee bleeantyn. Tra haink yn chooish shoh dy ve doont, hie Illiam harrish gys ‘Gellings Foundry.’

Ren eh beaghey ayns Doolish as goll dy valley ec kione ny shiaghtin. Tra v’eh orrym goll hug Doolish gagh fastyr Jesarn, harrin ny whaiyl Illiam ec y Vungalow markiaght er yn L.E. Velocette echey as gimmeeaght lesh y Twoaie. Va craa laueyn eddyr ain hene!
Va graih ec Illiam er e Skeerey hene as y Credjue Saasilagh. Cha row eh ny ghooinney griaghtagh edyr. Myr shen, tammylt er-dy-henney, hug mee heiss da ayns my ghleashtan gys Radio Vannin, raad ren eh recortys jeh cabdil ny ghaa Noo Ean. Treishtym vees blass ny cheerey shid foast ayn dauesyn ta geiyrt orrin.

Er yn oyr dy row ny bayryn shliawin as sniaghtey ny lhie orroo, cha row monney dy ‘lieh ec yn oanluckey. Va daa Ghaelgeyr ayn, Walter y Chleree as mish mastey ny h’ammyssee.

Juan Mac Nellein

Yn Aspick Ninian as ny Maarlee

Va Ninian ny vochilley ny ny aspick er yn agglish ayns Gallabhagh. Ta Gallabhagh ayns Nalbin Yiass, faggys da’n Ellan Vannin. Yinnagh eh guee er Jee dy mennick ayns ooig er lheh faggys da’n traie, as yinnagh eh leeideil ny monnaghyn echey as ad cur ooashley da Jee ayns Taigh Mhàrtainn. Yinnagh eh goll magh er y cheer dy mennick dy chooney lesh y sleih va cummal ‘syn ard shen dy choadey ad.

Un laa, hug Ninian keayrt er gowaltys, boayl va maarlee er jeet yn oie roie, as cliwenyn as skynnaghyn oc, prowal geid yn ollagh. Va aggle er yn phobble shoh dy darragh ny maarlee reesht as ren ad guee er Ninian tannaghtyn maroo.

Roish my jagh Ninian dy lhie, ghow eh yn baghyl echey as hayrn eh kiarkyl er y thalloo mygeayrt y croa, boayl veagh yn ollagh ceau yn oie. As ny yei shen, erreish da v’er n’ghoaill e phadjeryn, hie Ninian as ny caarjyn echey dy chadley.

Ayns trimshey dorraghey ny hoie haink ny maarlee er-ash steetyn dy kiune gour yn ollagh. Va skynnaghyn oc as v’ad aarloo marroo peiagh erbee veagh prowal cur sthap roo.

Agh tra ren y chied vaarliagh goll harrish y cowrey va jeant ec Ninian er y thalloo, ghooisht y tarroo. Ren eshyn gennaghtyn soar joarree as hoie eh er y chied vaarliagh. Hug y maarliagh eab er roie ersooyl agh ghow y tarroo eh ayns ny eairkyn mooarey echey as cheau eh er y thalloo eh, sthampey eh fo ny crubbyn echey. Cheau ny maarlee elley nyn armyn voue as roie ad ersooyl as cha daink ad er-ash rieau.

Tra dirree Ninian ‘sy voghrey hooar eh y maarliagh va gortit as hug eh lesh eh dys y vannishter, dy chooney lesh cheet my laue.

“Ren Jee,” as Ninian, ceau sheese shiu as eisht hug eh dty laynt er-ash dhyt.”

Seán Ó Brádaigh

2
Skeeal yn Jeshaghteyr

Va’n dooinney shoh ny Yeshaghteyr. Un laa v’eh goll sheese y bayr, tra loayr rannag rish. “Cur paag dou,” dooyrt y rannag, “as bee’m caghlaait my ven-phrinse aalin.” Ghow yn jeshaghteyr y rannag as ren eh cur ee ‘sy phoggaid echey.

Dyllee y rannag ayns ard choraa “My nee oo paagey mee as my vees mee caghlaait my ven-phrinse nee’m fuirraghtyn mayrt cour shiaghtin.” Ren yn jeshaghteyr goaill y rannag ass e phoggaid, ren eh mongey urree as ren eh cur er-ash ‘sy phoggaid ee neesht.

Dyllee y rannag dy treih “My nee oo paagey mee as my vees mee caghlaait my ven-phrinse nee’m fuirraghtyn mayrt son dy bragh as nee’m red erbee s’mie lhiat.” Ren yn jeshaghteyr goaill y rannag ass e phoggaid, ren eh mongey urree as ren eh cur er-ash ‘sy phoggaid ee reesht.

“Cre ta jannoo ort? Dooyrt mee dy row mee my ven-phrinse aalin, dy jeanym fuirraghtyn mayrt as dy jeanym red erbee s’mie lhiat. Cre’n fa nagh jean oo paagey mee?” dyllee y rannag. Dreggyr yn jeshaghteyr r’ee “Jeeagh, she jeshaghteyr mish. Cha nel traa aym ceau rish myrneen. Agh rannag ta abyl taggloo, shen skeeal elley!”

Seán Ó Brádaigh

Feyshtyn er yn Eddyr Voggyl

Heese ta mee er aa-chlou dauesyn nagh vel er yn eddyr voggyl paart dy haghteraghtyn ta ry-gheddyn veih yn phossan, ny rolley, GAELG.

Beagh eh kiart dy screeu "Ta mee dyn vakin ad" son "Ta mee fakin ad"? Ta fys aym dy vel Goodwin gra dy beagh "Ta mee dyn vakin" yn aght kiart dy ghra eh, agh cha nel shen aghtal vel shin loayrt mychione "shin, shiu ny ad". Er lhiam dy vel mee er vakin "Ta mee dyn vakin ad" lesh yn far ennym ec y jerrey sy Vible, agh, cha nel mee lane shickyr. Ga dy vel yn chooid smoo dy 'leih gra "ta mee fakin ad" as shen mie dy liooar son loayrt, ta'n chooish shoh cur sym orrym as by vie lhiam clashtyn ny ta sleih smooinaghtyn my-e-kione.

Gura mie eu.

Pawl ap Rhosier

3

Freggyrt:

Dy niarragh peiagh ennagh dou yn raa shen, yinnin coontey jeh myr "Cha nel mee fakin ad".

Er lhiam dy vel oo cheet er "Ta mee dy nyn vakin"

Tra ta baghtallys orroosyn / erriuish / orrins ta "nyn" currit er, t'eh kiart dy liooar agh ta keayrtyn elley nagh vel eh cho aashagh as shen.

Ga dy vel yn chooid smoo dy leih gra "Ta mee fakin ad" 'sy laaghyn t'ayn jiu, cha nel "ta mee dy nyn glashtyn" as y lhied Gaelg ny Bible my ta as, myr t'eh imraait ayns Goodwin, va sleih dy liooar foast jannoo ymmyd jeh'n aght shen tra v'eh jannoo ny lessoonyn shen.

Er my hon hene, ta ram keayrtyn tra ta'n aght shinney foddey ny smoo cooie da my hengey as my chleaysh. Myr sampleyr, share lhiam "ta mee dy dty hoiggal" as " t'eh dy my 'akin," ny, "ta mee toiggal oo," as "t'eh fakin mee."

Ta fys aym nagh vel yn aght shoh goll er ynsaghey myr "Gaelg ny laaghyn t'ayn jiu" agh ta gaaue ayn dy jeanmayd yn loght cheddin myr ta jeant lesh y Vaarle my neemayd gra "shoh yn aght stundayrt as ta reddyn elley neu-chiart."

Red beg elley bentyn rish "sintacks". T'eh doallee dy liooar geddyn greim er yn ymmyd jeh "dy" kyndagh rish yn Vaarle as yn "infinitagh" ny T'eh doallee dy liooar greim y gheddyn er .....

I am going _to_ go = Hem / nee’m goll
I would like _to_ go = By vie lhiam goll.

I did that (in order) _to be_ certain - Ren mee shen _dy ve_ shickyr
I would like _to_ do that (in order) _to be_ certain - By vie lhiam jannoo shen dy ve shickyr.

Is that the right way _to_ say that? = Vel shen yn aght kiart shen y ghraa?

Markys y Kermitt

Oieghyn Gaelgagh

Ta Oieghyn Gaelgagh foast bio er yn ellan. Cha nel thousaneyn dy Ghaelgeyryn cheet magh foast agh car y vee shoh chaie ta mee er ve magh pynteragh as geddyn yn skeet ooilley veih dussan dy Ghaelgeyryn ec y chooid smoo, ayns Purt le Moirrey, Balley Chashtal as Rhumsaa.

Va oie Ghaelgagh yindyssagh ain ayns Purt le Moirrey ec y Nollick as myr shen ren mee gialdin dou hene dy raghin gys Oie Ghaelgagh ny ghaa dagh mee. Ta oie Ghaelgagh dagh Jerdein mysh 9.30 ayns y Vrittannia, Rhumsaa (loayr rish Markys y Kermitt ny Jamys y Cowle) as oie Ghaelgagh elley dagh chied Jerdein ‘sy vee ayns y Loghlinagh, Balley Chashtal, mysh 9.00.

4
Soo ny h-oarn

Er-lesh mooinjer ny cheerey Skeerey Maghal as paart dy chummaltee Balley Rhumsaa dy nee Rachel Looney va keayrt dy row baghey marish yn dooinney eckish, Yuan, ayns skeerey maghal, gimbyl soo ny h-oarn. Va Juan Looney jeh shenn lught-thie va feallee gra - 'Looney Yack' raue.

Hug Juan as Rachel er bun 'Y Yernagh' - (The Hibernian) mysh 1837. Va'n ennym shoh er ny choyrt er er yn oyr dy row lught-thie Rachel nyn Yernee er ennym - 'Kione Jiarg' (Redhead). Va mwarree Yuan jeh sluight Albinagh, v'ad gra Kelvin raue as v'adsyn jannoo dellal dy-liooar ayns Rhumsaa eer roish my row 'Y Chialg Vooar' ayn.

Va'n Hibernian er ny hroggal er gerrey da Strooan ny h-Aah Niee. Va thie imbyl echey neesht as dy jarroo ta coontey ayn dy row Rachel gimbyl soo ny h-oarn aynshen. Ny yeih cha row ee rieau goit son shen y yannoo er chor erbee. Cha lhiass dhyts er y fa shen ve ro voirit mychione y ven Hostynagh shen ish va craidey mysh ny Manninee as gyn cur clashtyn dy row soo ny h-oarn goll er imbyl rieau ayns Mannin ayns traaghyn t'er n'gholl shaghey.

Cha lhisagh shin ve mee-chredjuagh bentyn rish shenn skeealyn ny beealleydys er yn oyr nagh vel lane coontey jeu ry lhaih ayns lioaryn. Cooinee-jee er un red elley y wooinney - erreish da'n 'chialg vooar' y ve ayn, haink genney agglagh stiagh ayns Mannin jeh dy chooilley chooid heihllt cur lesh bea creoi da ooilley ny cummaltee Vannin. Shegin dooin cooinaghtyn neesht dy row Albinee as Yernee dy-liooar baghey ny mast ny Manninee as veagh kuse jeu slane tushtagh as lesh saase oc cour gimbyl soo ny h-oarn ny poteen.

S'leayr dou dy vel y ven Hostynagh shen v'ou loayrt rhym mychione tammylt beg er dy henney, beggan almoragh as meehushtagh jannoo briwnys er y chooish shoh as jeh'n aigney nagh row y lheid ayn er yn oyr (myr ta mee er screeu hannah) nagh vel y lheid ry gheddyn ass lioaryn. Soilshym hood un red elley eisht scuirrym screeu magh tooilley mychione y chooish shoh.

Tra va mish ayns my h-aegid va dooinney dy row baghey ayns Rhumsaa, va'n sleih y valley gra 'B Lindsay' rish. Ta mee er chlashtyn dy ren eh keayrt dy row goaill ayns laue ymmyd y yannoo jeh 'pot ghoo' as va 'poteen' er ny imbyl echeysyn. She fardailys smoo sy theihll shoh wass gyn dy chur geill ennagh da beealleydys cheer erbee. Cha derrin dy-bragh my varrant hene ayns ooilley ny ard-scoillaryn rahoil edyr, dy jarroo, cha jinnin mooin er kuse jeu dy beagh adsyn slane er aile!!

Blein Vie Noa Erriu,

MacCowle

Scruit liorish Jamys rish Markys y Kermitt er lhiam.

5
YN PHOT GHOO

Er hoh hood fockle ny jees jeh shen ny ta mee er chlashtyn bentyn rish yn Phot Ghoo v'ec daa vraar er ny enmys Kraayl (Kneale) as adsyn baghey ayns "Jorby veg ny screb" 'sy nuyoo keead jeig.

V'ad dy-mennick jannoo dellal mie da ny h'Albinee, agh un cheayrt tra v'ad er-chee goaill traie er-gerrey da Keeill Choobragh t'ayns cheer ny h'Albey va ny meoiryn custym ny lhie cooyl-chlea orroo, as dar ny niaughyn, ghow ad greim shickyr er nane jeusyn as va'n dooinney boght er ny choyrt stiagh ayns pryssoon. Agh ren y fer elley jeu chea roish as chosne eshyn hoal gys Mannin reesht.

Shegin da er ve fo lane aggle er son cha duirree eh rish foddey gys hie eh roish gys Yn Erin cour follaghey eh hene nagh beagh ny Sostnee greim y ghoaill ersyn. Ta mee er chlashtyn dy ren eh roshtyn da'n Chorkee raad cheau eh ny laghyn echey ayns eebyrtys.

Ny yeih shen as ooilley ghow eh ayns laue dy chur er bun thie imbyl ayn shen as dy jarroo haink reddyn lesh dy-mooar as ta fou foast ayn dy vel yn thie imbyl shen foast ayn ny laghyn t'ayn jiu as ta ny Yernee gimbyl soo ny h'oarn ayn t'ad gra 'Paddy' rish (t'eh feer vie neesht, ta mish slane giallit da). Foddee dy lhisagh eh ve er ny enmys 'Kraayl' quoi ec ta fys?

Scuirrym nish, agh share dooys gra - my she breag ta mee ginsh dhyt, she breag va inshit dou!!

MacCowle.


Myr dooyrt Jamys, my she breag shen, she breag v'inshit da agh foddee ny Yernee ronsaghey magh shennaghys y thie sheelee "Paddy" dy by vie lhieu. Mannagh vel ennym Kneale ry-gheddyn 'sy chennaghys shen, cha nel eh soilshaghey magh dy nee breag t'ayn, agh my t'eh ry-gheddyn, fodmayd v'eh bunnys shickyr dy vel yn clane skeeal ny skeeal firrinagh. Markys

Coonceil ny Gaelgey

Ta Coonceil ny Gaelgey gobbragh dy trang (wahll, t’ad foast bio ec y chooid sloo) croo focklyn Gaelgagh noa as cur Gaelg er enmyn buill rheynnyn y reiltys as reddyn myr shen. Ec y chaglym shoh chaie va’n Choonceil resooney rolley ny bun-stooghyn kemmigagh va chyndaait ayns Gaelg liorish Brian Stowell.

Ren Brian goaill rish nagh row eh feer phreaysagh yn rolley shoh y yannoo agh v’eh jeant echey hannah son peiagh ennagh va shirrey eh. Va’n chooish shoh ymmydit liorish y Choonceil son resooney magh yn aght vees focklyn noa goll er croo. Va’n Choonseil scoltit eddyr adsyn va geearree geiyrt er aght crooee va cur scansh da shennaghys focklyn as reillyn shickyr as adsyn va geearree croo focklyn dy tappee va jeeaghyn kiart myr focklyn Gaelgagh. Chossyn y lught s’jerree.

6
Jeeill Apag

Ghow mee yn skeeal shoh veih shenn charrey as co-obbree aym, Eric, dooinney lome lane dy skeealyn feer as quaagh.

“Vel fys ayd” dooyrt eh, “tra va mee ayns my aegid, hie mee-hene as daa pheiagh elley marym ersooyl dys y lhuingys traghtee. Cha nhione dou cre haink er y jees elley, agh hooar mee-mee hene er lhong ooill shiaulley noon as noal veih Sostyn gys Santa Cruz as er-ash.”

“Shegin dou gra va shoh feer dree feiy yn laa as fud ny h-oie. Va fys orrin dy beagh fo-vooiraneyn foast shiaulley mygeayrt y cheayn agh va shin aighoil nagh ren fo-vooirane rieau cheet orrin. Aght erbee, kyndagh rish ny fo-vooiraneyn, va ymmodee drillyn baatey jeant liorin ayns dagh purt choud’s ta cooinaghtyn aym. Oddins jannoo shen as doalanagh orrym. Yn ynrican red nagh row jeant myr cliaghtey va shen yn cowrey rauee. Va shoh sheid giare er y feddan bree, agh cha row eh rieau jeant ‘sy phurt er y fa dy bee ny skimmeeyn elley ‘sy phurt ooilley mestit chammah’s yn lught-reill phurt.”

“Ec y traa shoh, va nane jeh’n skimmee ren kionnaghey apag as ghow eh er boayrd eh. Vrie shin jeh cre’n fa ren oo geddyn apag? Dreggyr eh dy bee eh red ry-yannoo tra ta shin er y cheayn. Ansherbee shen myr ve as va’n chooish as yn apag jarroodit ain.”

“Haink yn laa shiaullee orrin reesht as hie shin ersooyl keayrt elley gys Sostyn. Va shin ayns emshir braew rish tree ny kiare laghyn as eisht ren eh caghlaa gys drogh earish, feayr as fliugh. “

“Un oie, ec jerrey yn arrey aym, hie mee gys my lhiabbee myr va mee cliaghtey jannoo. Va’n lhong goll myr ve dy kinjagh er e coorse as lurg tammylt choud’s lhie mee my chadley cheayll mee ec mean oie screeaghyn giarey cheet veih’n feddan bree er y funnyl.”

“Ersooyl lhiam seose ny aaraghyn gys lout-eaghtyr mooie. Hass shin aynshen, feayr as fliugh, as lieh coamrit, agh cha row fo-vooirane ry-akin. Haink y captan magh ass y dorrys lesh focklyn corree as niartal cheet veih e veeal. Dooyrt eh rooin “ghow greim er yn apag shoh!”

“Honnick shin apag goll laue lurg laue er y lanyarn feddan. Veih’n thie stiuree dys y funnyl lunjeaney choud’s v’eh goll, as feddan sheeaney lesh gagh lunjean. Ghow shin yn drogh yantagh shoh as hug shin eh fo-voayrd. Ta mee credjal dy row yn apag creckit er thalloo chelleeragh lurg shoh.”

“Lurg shen haink foghrey veih’n chaptan gra - cha nel cretoor erbee lowit er y vaatey aym arragh!” “Row shen skeeal firrinagh?” vrie mee jeh. “S’feer eh” dreggyr eh. As shen myr ve.

Alick Kissack