DHOORAGHT

Earroo 23 Yn Cheshaght Ghailckagh Jerrey Fouyir 2001
Chellvane: 834844 Post L: [email protected] Screeu rish: Thie Vaddrell, Cregneash

Er hoh dhyt Dhooraght reeshtagh. Earroo 23 - shen bunnys shey bleeaney er dyn traa va’ chied choip currit magh. Car ny shey bleeaney shen ta ymmodee cooishyn mooarey er daghyrt vees, ny t’er ve scanshoil da shickyrys traa ry-heet y Ghaelg. Mysh mee er dy henney ta mee smooinaghtyn dy dooar y Ghaelg ny barriaght smoo rish daa cheead blein tra doshil yn Rheynn Ynsee as Mooinjer Veggey yn chied vrastyl lane Gaelgagh. Ta’n brastyl shoh fo raad nish as nuy dy phaitchey aynsyn - reeshtagh ayns Mannin ta paitchyn gynsaghey chengey ny mayrey ‘syn aght dooghyssagh!! Phillie

SHENNAGHYS NOA VANNIN

By vie lhiam gra fockle ny ghaa mychione y Studeyrys-Shennaghys Noa va currit magh er-y-gherrid. Ta’n lioar shoh enmyssit ‘The Modern Period 1830-1999’ as t’eh yn chied lioar jeh quieg vees currit magh. Tra hooar mee magh mychione yn lioar shoh-lhiah mee art ayns Yn Brialtagh Ellan Vannin ayns Mee Avril er-lhiam.

Va mee er my ghreesaghey dy lhiah eh as dy ‘eddyn magh tooilley fysseree mychione ny reddyn haghyr ayns Mannin ayns yn daa cheead bleeantyn t’er n’gholl shaghey. Agh shegin dou goaill rish dy row mee mollit as son yn chooid smoo cha ren mee coontey money jeh. Va mee jerkal rish lioar mychione ny Manninee agh t’eh jeeaghyn dou nagh vel yn lioar shoh mychione ny theay agh mychione ny reiltee Vannin.

Tra ren mee cur jerrey er y lioar cha row mee er n’geddyn magh tooilley mychione ny va my hennayraghyn smooinaghtyn as gennaghtyn agh mychione ny va goll er ayns yn ardwhaiyl as Kiare as Feed. Son shickyr she doilleeid t’ayn er yn oyr nagh vel cho wheesh dy recortyssyn ayn mychione y theay as reddyn bentyn rish y reiltys as s’cosoylagh nagh row eh fo ny ughtaryn dy yannoo shennaghys mychione ny manninnee ad hene.

T’eh daa ughtar jeh scansh kianglit rish yn liooar shoh as t’ad ny neesht gobbraghey ayns Lerpool. Foddee dy vel shen yn oyr dy vel ad jannoo ymmyd jeh’n fockle ‘mainland’ ooilley y traa. As ta mee goaill rish dy vel mee geddyn corree tra ta mee fakin yn fockle shoh. Agh ny s’messey na shoh shen yn aght ta ny ughtaryn smooinaghtyn mychione ny ta goll er ayns Mannin nish.

My t’ou laccal dy lhiah lioar scruit liorish ughtaryn ta gaggan dy cremeydagh mychione reddyn arganagh ta cheet gy kione ayns Mannin yn laa t’ayn jiu cha nel shoh yn lioar diu. Son yn chooid smoo t’ad ooilley ayns foayr jeh yn kerroo argid as cha nel ad boirit mychione yn earroo dy leih ta cummal ayns Mannin nish as kyndagh rish vees shoh jannoo jeeyl da’n chymmyltagh as ny boodeeysyn Vanninagh.

Va yindys orrym dy lhiah ny cabdilyn mychione shennaghys ny hagglish. Agh cre’n fa va palchey er ny screeu mychione yn nuyoo keead jeig agh cha row fockle screeut mychione ny t’er n’gholl er ayns y feedoo keead.

T’eh bunnys yn un red mychione yn cloudeyrys as radio as yn ard-obbrinys. Palchey screeut mychione traa foddey er dy henney agh s’goan ve fockle y lhiah mychione ny feed bleeaney t’er n’gholl shaghey. S’cosoylagh nagh row traa dy liooar ec ny ughtaryn dy eddyn magh tooilley fysseree mychione ny reddyn shoh. Agh mannagh row traa dy liooar ayn dy yannoo shoh cha lhisagh ad er chur magh y lioar myr t’eh. Agh mannagh row eh yn oyr shoh foddee dy row ad boirit mychione screeu mychione reddyn arganagh.

Agh shegin dou goaill rish dy vel red ny ghaa jeh anaase as scansh ayns yn lioar. Ren mee goaill soylley jeh shennaghys ny obbreeyn (Labour History) as myr screeu yn ughtar jeh’n cabdil shoh cha nel monney er ve er ny screeu mychione yn shennaghys shoh roie.

Va yindyssagh orrym dy lhiah ny va ny fir-obbreeyn gleck dy vishaghey nyn vioys as cre’n sorch dy leih va gobbraghey dy yannoo shoh. As dooys va’n cab shoh mychione ny Manninnee as shen yn oyr smooinnee mee dy row shoh jeh scansh.

S’bastagh nagh row lioar share screeut, lioar mychione ooilley yn boghtynid as ny doilleeidyn ayns Mannin nish as kys va ny Manninnee dooghyssagh jannoo nyn gooid share harrish ny bleantyn dy choadey yn cheer oc. Fy-yerrey, t’eh jeeaghyn dou dy nee shennaghys Anglo-Manninagh t’ayns yn lioar shoh as my ta shin laccal dy ‘eddyn magh mychione shenn smooinaght ny Manninee as chammah’s shen ny t’ad shirrey nish, eisht she ny smoo obbyr t’ayn dy ve jeant foast.

Adrian Cain

Shegin dou goaill rish dy vel mee slane ayns coardailys rish Adrian er shoh. Haink mee dy ve feer chorree tra va ny ughtaryn screeu mychione Mannin myr v’ee ny cheer elley - v’eh cheet dou dy lajer nagh row yn lioar shoh scruit son Manninee.

Va mee lhag-chreeagh tra lhaih mee mychione ny doilleeidyn ayns ny 70yn as 80yn neesht. Va’n ughtar soilshaghey magh nagh ren eh toiggal pian ny Manninee ‘sy lhing shen as dy row eh soiaghey beg jeh ny ashooneyryn ren streeu noi oc va prowal ny Manninee y chur fo chosh. Phillie

Focklyn ynsee veih Coonceil ny Gaelgey

Possanyn Paarantyn as Lhiannoo - Parent and Toddler Groups, Possan Cloie - Playgroup,
Ro-Scoill - Pre-School, Lane Gaelgagh - Manx Medium, Lhiannoo - Infant,
Bun Scoill - Primary School, Scoill Ard - Secondary School,
Ynnydeyr-ynsee - Supply Teacher, Ynnydeyraght - Supply (cover)

Nostradamus as yn trass chaggey mooar

Feie ny laaghyn shoh chaie, cheayll mee as lhaih mee kuse dy leih jannoo ymmyd jeh raaghyn Nostradamus dy hoilshaghey magh dy vow yn trass chaggey mooar toshiaght sy vee shoh.

Inshym diu son shickyr dy nee boghtynid shoh. Ta daa lioar aym screeuit ec sleih va jannoo studeyrys er cooishyn Nostradamus as cha nel red erbee ry-akin bentyn rish y chooish shoh roin. Dy firrinagh, lurg lhaih mee fer jeu hug ny ronnaghyn bunnydagh ayns, ta mee slane shickyr dy vel dy-chooilley red erbee screeuit ec y dooinney shen ny spotch.

Haink sym er ny ronnaghyn Nostradamus roish yn Nah Chaggey tra va ny Nazeeyn jeeaghyn orroo dy gheddyn fogreeaght ass jeu. Shoh yn traa cheddin ren ad studeyrys er faishnys rollageagh agh cha row ad cho currit da'n chooish as ta paart dy leih coontey. Ansherbee, va sleih croutagh chyndaa kuse dy ronnaghyn ayns aght hoilshagh magh dy darragh lesh ny Nazeeyn yn trass reich.

Ec y traa cheddin, va ny Sostynee jannoo ymmyd jeh sleih elley dy screeu far-ronnaghyn "Nostradamus" dy hoilshaghey magh ny Nazeeyn ayns aght elley. Ta mee breaw shickyr dy vel kuse jeh ny "fadeyryssyn" veih'n traa shen foast goll er insh sy laaghyn t'ayn jiu!

Ny yei shen as ooilley, cha nel mee gra nagh nod shoh ve toshiaght drogh-chooish (agh jarrood-jee Nostradamus!) Ta ny Steaytyn Unnaneysit g'aarlaghey ad hene son caggey mooar, agh cha nel ad shickyr quoi vees ny noidyn daaue! As ta'n moddey ught oc, Tony Blair, slane jeant magh nish ta red ennagh yn sym ain y ghoaill veih chingys yn ollee!

Agh dy firrinagh, ta mee trimshagh as boirit tra ta mee dy nyn glashtyn loayrt mychione jannoo caggey son seyrsnys as y lhied. C'woad dy leih gyn loght, mraane as paitchyn ny mastoc, vees marrooit my bee accrys-folley ny Steaytyn Unnaneysit saiagh? Cre'n aght vees ad ny share n'adsyn smoosh ny etlanyn?

Ta'n jarroo-raa oc "Ta shin cur nyn dreisht ayns Jee". T'eh my chooinaghtyn hene dy dooyrt Jee nagh darragh eh Soddom as Gommorah mow dy beagh un phieagh ayn-jeu dyn loght. Er lhiam pene dy vel shen gra dooin nagh vel eh rieau kiart cur baase da un phieagh dyn loght er leshtal erbee.

Ta ny SU gra dy der ad loght er peiagh erbee ver fastee daausyn ta ny SU cur loght er (my vees ad kiart ny dyn - cooinee-jee er y traa lhig ny SU bleastyn er thie-obbree va jannoo medshin ayns Sudan). Nish, lhig dooin smooinaghtyn er dooinney ennagh as yn ennym er Augustus Pinochet. Va'n Spaain shirrey eh son
cur baase da ram Spaainee as cha nel monney ourys ain dy row eh cur baase da thousaanyn dy leih tra va'n Chillee fo'n smaght echey. Ny yei shen as ooilley, ta reillyn ayn dy endail adsyn dyn loght as cha row reiltys Tony Blair arryltagh cur seose yn carrey mie shen da possan ennagh dy vloody joareeyn.

Lhissagh da Tony Blair ve booisagh son dy bragh nagh row eh ny SU hirr er Pinochet as nagh vel yn Reeriaght Unnaneyssit ny cheer-voght gyn niart-breneenagh: Veagh ny reillyn ceauit dy jeeragh magh ass yn uinnag.
Dy yannoo shickyr nagh jean rourey sleih briaght er y fa t'eh er y cheer vooar shoh goll staigh lesh etlanyn as roggadyn noi slieh dyn monney er-lhimmey jeh gunnyn-laue, ta buggane-doo noa goll er creeley - caggey bea-oaylleeagh! Honnick mee
caslys ayns pabyr-naight ennagh hoilshaghey magh lhiass-sidoor Mericaanagh cur far-eddin er e eddin noi pishoon. V'eh yn sorch dy ar-eddin ta shin jannoo ymmyd jeh tra ta shin slaa peint. Vel shen goaill yn mooin ny vel shen goaill yn mooin?

By vie lhiam screeu tooilley, agh t'eh orrymnish jannoo shickyr nagh vel Islaamee fo my lhiabbee my jem my lhie.

Markys y Kermitt

Hooar mee shen heose as shoh heese veih’n phossan resoonaghey GAELG ta ry-gheddyn er yn eddyr-voggyl - shoh cooish eddyr Markys as Pawl y Vretnagh.

Cooish veih’n eddyr-voggyl

Mychione 'share dou goll', nagh vod shen cheet er 'I'd better go'?? Ny vel mee smooinaghtyn mychione 'bare dou'? (is fhea/rr dom/domh) T'eh croaghey er y "chonteks". Dy chur Gaelg er "I might as well go (because it's not worth staying)," yiarrin, "share lhiam faagail," (I prefer to leave) agh dy chur Gaelg er "I might as well go (because it might be worth going)" yiarrin, "Foddee dy b'eeu eh goll." (Perhaps it will be worth going).

Yn anchaslys eddyr s'xxxx lhiam as s'xxxx dou.
(Choud's ta mee dy hoiggle, ansherbee)

S'mie lhiam - I like
S'mie dou - it's good for me
Share lhiam - I prefer
Share dou - it's better for me
S'cummey lhiam - I don't have a preference
S'cummey dou - it dosen't affect me
Share lhiam lhune agh share dou ushtey
- I prefer ale but water is better for me
B'are lhiam dyn troggal yn thie shen agh by gummey dou
- I would prefer that building not to be built but it won't affect me
Share dou jough gyn shugyr agh s'cummey lhiam
- drink without sugar is better for me but I'm not bothered.

Tooilley veih Coonceil ny Gaelgey

Choard bing ny Coonceil ny focklyn shoh heese ec e chaglym s’jerree.
Bayr Yude Noo - St Judes Road Division (i.e. Government) - Fo-Rheynn
Works Division - Fo-Rheynn Obbraghyn

Chammah’s adsyn heose choard y ving dy lhisagh reih ve ayn son ny earrooyn eddyr 30 - 90 dy yannoo aashagh maddaght son ny paitchyn ‘sy Vrastyl Lane Gaelgagh. Choard shin dy bee ny earrooyn heese crooit ec Brian ymmydoil dy liooar:
30 - tree-yd 70 - shiaght-yd
40 - kiare-yd 80 - hoght-yd
50 - queig-yd 90 - nuy-yd
60 - shey-yd

Chyndaays jeh daanyn John Donne liorish Bobby Bob

Blein ny ghaa er dy henney, ren mee çhyndaays jeh kuse dy ghaanyn scruit ec John Donne. Myr dooyrt mee ec y traa ren mee yn obbyr shen, as lhaih mee magh ny fockleyn ayns Claare ny Gael ec y traa shen, cha nel mee gra dy re daan t’ayn ayms 'sy Ghaelg, er-chor erbee. Cha nel mee agh cur y Ghaelg, gyn fockleyn co-heeanagh ny towse dy hrimmid kiart, er y vun jeh ny daanyn, choud’s ta mee toiggal eh.

Agh myr ta fys eu, shen yn red scanshoil mychione bardaght. Ny keayrtyn, ta ny smoo na un chooish ry-gheddyn çheusthie jeh un ’ockle ny un raa, as t’eh fo’n ughtar çheet er dagh cooish ta fo eaghtyr ny fockleyn. Ga dy vodmayd çhyndaa raa Baarlagh ayns un aght gys y Ghaelg, cha nodmayd soilshaghey magh dagh faaue as sannish ta ry-gheddyn ’syn aght v’eh jeant hoshiaght ec yn ughtar.

As cha nel shen dy ghra dy row dagh faaue as dagh sannish ayns keeayle yn ughtar tra va’n obbyr jeant. Ta reamys da’n lhaihder ronsaghey stiagh ’syn obbyr, as foddee dy vel cooishyn ry-hoiggal ec y lhaihder, gyn yss da’n ughtar hene.

Ta ny cooishyn shoh ooilley jannoo seose y doilleeid lesh bardaght, as shen yn oyr ta mee gra nagh vel shoh bardaght 'sy Ghaelg, cha nee agh raaghyn 'sy Ghaelg ad ta aa-reggyrt red ennagh jeh’n daan ’syn aght v’eh scruit sheese ec John Donne.


1. 'Y Moghrey Mie'

Ta mee gindys, dy jarroo, cre ren uss as mish
Derrey va graih ain. Nagh row shin çharbaait derrey’n traa shen?
Agh ren shin jiole er eunyssyn ny çheerey, myr paitçhyn?
Ny ren shin strinnoogh, as shinyn ayns lhiaght ny shiaght cadleyderyn?
Shen myr ve: agh shoh jeant seose jeh dagh ooilley yeearree taitnyssagh.

My vaik mee rieau aalid erbee
Va mian lhiam er, as hooar mee eh, cha nee agh ashlish jeeds v’eh.

As nish, moghrey mie da nyn anmeenyn doostey,
Ta freayll arrey, yn derrey yeh er y jeh elley, cha nel er coontey jeh aggle;
Son ta graih cur smaght er yeearreeyn er shillaghyn elley,
As ta jannoo yn clane teihll ayns un çhamyr veg.
Lhig da ronseyderyn-marrey t’er ngoll da seihllyn noa;
Lhig da sleih elley caslyssyn çheerey, t’er soilshaghey magh seihll er seihll:
Lhig dooinyn goaill yn un teihll: fer ec dagh fer jin, ta jannoo seose fer ny lomarcan.

Ta my eddin ayns dty hooill; ta’n fer ayds çheet rish 'syn 'er ayms,
As ta creeaghyn firrinagh baghtal ry-akin ayns ny eddinyn shen.
C’raad fodmayd feddyn daa lieh-chruinney share
Gyn y twoaie gyere ny’n sheear ta goll fo?
Cre erbee ta goaill baase, cha row eh mestit dy corrym.
My vees yn daa ghraih ain goll myr nane, ny uss as mish
Cur graih ’syn un aght, nagh vel fer laggaghey, cha jig baase er fer erbee.



2. 'ARRANE'

Immee as gow rollage ta tuittym,
Jean torragh fraue y vandrag,
Insh dou c’raad ta ooilley ny bleeantyn t’er ngoll shaghey,
Ny quoi ren scoltey cass y Jouyl,
Ynsee dou yn aght dy chlashtyn moidynyn marrey ta goaill arrane,
Ny dy chummal jeem gah y troo,
As fow magh
Cre yn gheay
Vees cur er y hoshiaght inçhyn ynrick.

My vees oo oayllagh rish shillaghyn quaagh,
Reddyn ta follit tra jeeaghyn orroo,
Markee rish jeih milley laa as oie,
Derrey vees eash ceau sniaghtey dy ‘olt bane ort;
As uss, tra hig oo er-ash, nee insh dou
Mychione ooilley ny yindyssyn quaagh haink ort,
As loo
Nagh vel boayl erbee
Raad ta cummal ben firrinagh as aalin.

My vees oo feddyn y lheid, cur fys dou,
S’millish va lheid y Phirgrinys.
Agh ny yei, ny jean shen, cha jinnins goll,
Eer dy daink shin nyn guaiyl ec y nah ghorrys;
Ga dy row ee firrinagh tra haink uss ny quaiyl,
As dy tannys ee, derrey screeuys oo dty screeuyn,
Agh ny yei,
Bee ish
Foalsey, roish dooys çheet, rish daa ny tree.”

3. 'SHASSOOAGHT (SHEERID) NY MREIH'

Nish t’ou er chur graih orrym rish un clane laa,
Mairagh tra nee uss faagail, cre nee uss gra?
Nee uss gra dy row breearrey jeant dy feer roish nish,
Ny nee uss gra nish
Nagh vel shin nish ny fir va shin?
Ny, breearaghyn va jeant ayns aggle arrymagh
Jeh Graih as y jymmoose echey, dy vod peiagh erbee shaghney adsyn?
Ny, kiart myr ta baaseyn feer feaysley bannishyn feer,
Myr shen ta conaantyn eddyr graihderyn, cosoylley roo,
Kiangley agh derrey ta cadley, caslys jeh baase, feaysley ad?
Ny, cur oyr son dty yeearree hene,
Er-yn-oyr dy vel eh foyd caghlaa, son dty 'oalsaght; ayds
Cha nel raad erbee elley agh foalsaght dy ve feer?
Ommidan fardailagh noi ny kialgyn shoh, foddyms
Jannoo arganeys, as cur laue yn eaghtyr , dy row mee arryltagh,
Agh ta mee gobbal jannoo shen,
Son roish mairagh, foddee dy jeanyms smooinaghtyn myr shen neesht.”

Bobby Bob

Feailley Ghaelgagh 2001

10 oo - 17 oo Mee Houney - ayns Purt ny h-Inshey

Jesarn 10oo
11 sv - 2 sa Bwaag fys as beggan dy chiaull- Laare Shappal yn Strand, Doolish
2 sa - 4 sa Bwaag fys as beggan dy chiaull- Thie Vanannan, Purt ny h-Inshey
8 sa - 12 sa Giense/ceil Hop tu Naa - Arthur Caley Giant Band as caarjyn
- Creg Malin, Purt ny h-Inshey

Jedoonee 11ed
7.30 sa Cuirrey kiaull Manninagh - halley ry-reaghey

Jelune 12ah
7.30 sa Cuirrey kiaull ny paitchyn - Ard-Chiamble, Purt ny h-Inshey

Jemayrt 13oo
Choud’s shoh - veg ayn!

Jecrean 14oo
8 sa Oie Ghaelgagh goaill stiagh cloie, kiaull as reddyn myr shen - Thie Oast Tinvaal, Balley Keeill Eoin

Jerdein 15oo
7.30 sa Leaght Ned Maddrell - liorish Dr Art Hughes, Ollooscoill y Ven-Rein, Beeal Feirshtey - Halley Leaght yn Scoill Ard, Purt ny h-Inshey.
9.30 sa Seshoon ny cheeraghyn Gaelgagh - oie kiaullee ayns Purt ny h-Inshey

Jeheiney 16oo
7.30 sa Cuirrey kiaull ny Gaeljee - Halley Cooinee yn Cheead Blein, ‘sy Phurt

Jesarn 17oo
12 - 2 sa Bee as kiaull, arrane as spollagyn! ‘Sy Thie Oast Marine
2 - 3.30 sa Keirdlanyn arrane as kiaull Gaelgagh. ‘Sy Thie Oast Marine
8 sa Giense ny Gaelgeyryn - Calor Gas Ceilidh Band as nyn gaarjyn
veih Nalbin as Nerin - Creg Malin, Purt ny h-Inshey

Bee tooilley fys ry-gheddyn dy gerrid ayns y Vrialtaght as ny pabyryn naight elley.

Tar gys yn ‘Eailley my sailt. T’ee reaghit er dty hon!

Ta mee son troiddey paart jiu nish. Dy mennick agh ny Feaillaghyn t’er n’gholl shaghey ta mee smooinaghtyn “c’raad ta ny Gaelgeyryn as olteynyn ny Sheshaght Ghailckagh?” Ta fys mie aym nagh mie lesh dy chooilley pheiagh theiyn oastey ny kiaull tradishoonagh ny reddyn elley myr shen, agh ta ram taghyrtyn reaghit son yn Eailley as ec y chooid sloo bee un red cooie dhyt.

Aundyryn ny Sheshaght

Bee aundyryn currit magh reeshtagh ec Feailley Ghaelgagh son sleih, sheshaghtyn as Rheynnyn y Reiltys t’er n’yannoo obbyr vie son y Ghaelg. Cur fys dou roish yn 15oo Jerrey Fouyir er y smooinaght ayd my sailt! PHILLIE

#