DHOORAGHT

Earroo 25 Yn Cheshaght Ghailckagh Mee ny Mannan 2002
Chellvane: 834844 Post L: [email protected] Screeu rish: Thie Vaddrell, Cregneash

Ta’n Vayrnt chionney as y nah vee fanney, as ny jarrood, yn faiyr hig magh ‘sy Vayrnt hed stiagh ‘syn Averil. Mannagh vel shen dy liooar dhyt, share craght ve er y cheer na Mee ny Mannan cheet stiagh meein. Roish my nee oo ceau yn fritlag shoh ersooyl gra dy vel Phillie ass e cheayll v’ad shen raaghyn creeney bentyn rish Mayrnt, ny Mee ny Mannan, hooar mee veih’n ‘ockleyr. Hoig mee yn nah er mie dy liooar as yn trass foddee, agh cha syms noadyr er bun yn chied er. Phillie
 
 

Er 24oo Jedoonee Toshiaght Arree, va giense ayn ayns Thie ny Gaelgey, Balley Keeill Yood. Ren ny smoo na jeih as feed dy lieh goaill boggey jeih loayrt Gaelg, cloie kiaull as daunsey lesh y Calor Gas Ceili Band, gee beggan dy vee as giu ram jough!

By vie lhien cur cuirrey diu ooilley dy heet gys Thie ny Gaelgey er y chied Jedoonee jeh gagh mee. Ta failt er Gaelgeyryn (flaaoil as toshiaghteyr), kiaulleyderyn as daunseyryn dy heet as cur bree ayns Thie ny Gaelgey, t‚eh er ve ny chadley son traa foddey!

Dy by vie lhiu jannoo oraid yiare, lhaih skeeal ny red ennagh cur fys dooin. Cur shiu lhiu beggan dy vee as jough my sailliu! Bee yn nah Chruinnaght 7oo Jerrey Arree (Mee Averil) ec jees er y chlag.

Cum seose y Ghaelg ayns Thie ny Gaelgey!

Chell: 880698
Post-l: [email protected]

Simone as Paayl

Ny jarrood:

YN CHRUINNAGHT - 20oo - 27oo Jerrey Souree
CRUINNAGHT CHRENEASH - 24oo - 26oo Luanistyn
FEAILLEY GHAELGAGH - 9oo - 16oo Mee Houney
 

Ta ushag 'sy laue chammah's jees 'sy thammag - A bird in the hand is as well as two in the bush.
Cheayll mee veih ny ferrishyn eh - A little bird told me.
Eean bwoalley ny skianyn echey - Bird beating its wings.
Ta ushag 'sy laue chammah as jees 'sy thammag - Bird in the hand is worth two in the bush.
Eean shooyl - Bird of passage.
Ushag ta troggal e clooie - Bird that fluffs up its feathers.
Fer arrey ein - Bird-watcher.
Ushagyn combaasal mygeayrt - Birds circling around.
Ein spooilley - Birds of prey.
Cur yn arran creoi da'n eeanlee - Give the stale bread to the birds.
Lhig da dagh ooilley ushag guirr e hoohyn hene - Let every bird hatch her own eggs.
Looran - Nimble bird.
Gooillian - Rising up as birds.
Ushag y chur neose - Shoot a bird.
Ushag chiaullee - Singing bird.
Eean thie - Tame bird.
Haink yn ushag neose er mullagh y thie - The bird alighted on the roof of the house.
Ving yn ushag mee - The bird bit me.
Haink yn ushag neose er y vanglane - The bird descended on the branch.
Dettyl yn ushag mygeayrt oc - The bird flew around them.
Ta'n eean myr e ghooie my vees clooie er e chione - The bird is like his species if there's down on his head.
Hoie yn ushag er y villey - The bird settled upon the tree.
Va'n ushag mingeraght - The bird was biting.
Ta ny hushaghyn kiaulley - The birds are singing.
Eeanlee yn aer - The birds of the air.
Yn woirrinagh - The hen bird.
Va niart dy eeanlee 'sy vagher - There was a big crowd of birds in the field.
Ta eean y ghob jiarg mooie jiu - It's frosty today, ie. Jack frost is out today

Phil Kelly
 

Ren shin aa-yeeaghyn er ny earrooyn heese as v’ad caghlaait myr shoh:
30 - treead 70 - shiaghtad
40 - kiare-ad 80 - hoghtad
50 - queigad 90 - nuyad
60 - sheyad

Parent and Toddler Groups - Possanyn Paarant as Lhiannoo, Junior - Poinnar, Baby - Babban, Nursery - Oikanagh (a), Brastyl Oikanagh (n), Junior School - Scoill Phoinnaragh, Substitute - Ynnydeyragh, Supply Teacher - Ynnydeyragh-ynsee, paper clip - greimmeyder pabyr, rubber band - boandey rubbyr, bulldog clip - greimmeyder duillagyn, clip board - boayrd greimmeyder, hole punch - tholleyder pabyr, post-it notes - duillagyn chaghteragh, reinforcing rings - kiarkil niartee,
stapler - steebleyr, staple - steebyl

Ren shin shareaghey un ‘ockle ta ry-gheddyn ayns Fockleyr Doolish y Karagher as va shen ‘paper weight’. Choard shin ‘tromman pabyr’ ayns ynnyd jeh ‘tromman pabyragh’.

Va focklyn elley currit dooin liorish Joan chyndaait myr shoh:
adrenaline - adrenaleen, an announcement - fockley magh, bandage - kianglane, aroma therapy - lheihys soar, acupuncture - lheihys doralm, reflexology - teaystey coshey, design - cummey (shoh croghey er y vun), three course meal - lhongey tree coorse, architect - fer chiaddee troggalyn, ny ard-vasoonagh

Hooar mee cuirrey veih Art Hughes, ren cur Leagh Ned Maddrell ayns Mee Houney 2001, dy gholl gys Beeal Feirshtey ayns Toshiaght Arree dy loayrt mychione y Ghaelg ayns Mannin ec y traa t'ayn. Lurg tammylt, hoig mee dy beagh shoh ayrn jeh 'scoill-gheuree', as dy beagh y scoill-gheuree hene ayrn jeh cheb Veeal Feirshtey dy ve enmyssit 'Ard-valley Oarpagh jeh Cultoor' sy vlein 2008. Yn cheshaght ta reaghey yn cheb, t'ee enmyssit 'Soylee Beeal Feirshtey 2008'. Dooyrt Art rhym dy row yn cheshaght-reaghee prowal brishey magh ass scarreydys (sectarianism) as dellal rish y daa hradishoon ayns Nerin twoaie as tradishoonyn elley. V'ad geearee soilshaghey nagh vel aignaghyn coon oc ayns Nerin twoaie.

Tra raink mee purt-aer Veeal Feirshtey, veeit Mairtin Mac Cathmhaoil rhym. Ta Mairtin gobbraghey da Bunscoil Mhic Reachtain ayns Beeal Feirshtey. Ny s'anmagh, hie Art Hughes marin dy gheddyn jinnair sy thie-oast raad va mee tannaghtyn. V'eh aitt dy liooar, er y fa dy row ad shirveishagh jinnair er lheh son Laa Valentine. Va shinyn tree deiney mastey ram cubbil aegey!

Goll rish ymmodee immeeaghtyn myr shoh, va ny shlee na un pheiagh reaghey cooishyn ec yn un cheayrt as cha row ad loayrt eddyr oc hene. Myr shen, hooar mee magh dy beigns ayns daa voayl ec yn un cheayrt ec 7 pm yn oie lurg Laa Valentine: ayns thie y BBC, goaill ayrn ayns claare-radio, as ayns Cashtal Veeal Feirshtey, geaishtagh rish leaght veih Tom Paulin. Cha jagh mee gys y BBC as deaisht mee rish Tom Paulin. She bard eshyn as t'eh ny leaghteyr ec Ollooscoill Oxford. T'eh currit da Nerin, erskyn ooilley Nerin twoaie. Ta Paulin dy mennick goaill ayrn ayns claare ny cremeyderyn ayns 'Newsnight' er BBC 2 oie Jeheiney. Ayns y leaght echey, v'eh loayrt mychione cultoor Veeal Feirshtey. My t'ou er ngeddyn fys er yn ard-valley shoh veih'n chellveeish ny lomarcan, bee oo kinjagh kiangley Beeal Feirshtey lesh baase, dunverys as scarreydys. Agh, myr va Tom Paulin soilshaghey, ta shennaghys elley ec yn ard-valley. Beggan ny smoo na daa cheead blein er dy henney, shimmey peiagh v'ayns Beeal Feirshtey va smooinaghtyn er aght seyr as crootagh. Va'n Ravloyd Frangagh (French Revolution) er chur er ymmodee sleih dy smooinaghtyn dy dowin mychione cooishyn y teihll, as va sleih dy liooar myr shen ayns Beeal Feirshtey. Ren paart jeh ny smooinaghtyn shen cur ny Yernee Unnaneyssit (United Irishmen) er bun. She ny Protastoonee ayns Nerin va cur pobblaghtys Yernagh er bun. As va sleih jannoo reddyn ayns Beeal Feirshtey - lhongyn, erskyn ooilley. Ec jerrey e leaght, ren Tom Paulin guee dy noddagh paitchyn veih'n daa heu ayns Nerin twoaie goll er ynsaghey ayns ny scoillyn cheddin, syn ynnyd jeh scoillyn scarrit. As ren eh soie er y scrutaght 11-plus myr red agglagh ta scarrey sleih. (Nagh vel shin aighoil ayns Mannin!)

Va ceilidh lurg leaght Tom Paulin. S'mie lesh ny h-unnaneyseyryn soilshaghey yn jarroo-enney (identity) oc myr Albinee Ullee (Ulster Scots). Va fer jeh shoh, Willie Drennan, goaill arrane as kiaulleaght marish yn inneen echey sy cheilidh shoh. Ghow Lilis O Laoire arrane - bee cooinaghtyn ec Manninee er yn arraneyder yindyssagh shoh. As va 'skeealee' ayn: Gearoidin Bhreatnach, loayrtagh dooghyssagh ass Dun na nGall, va ginsh skeealyn tradishoonagh ayns Yernish. Y laa er giyn, va tooilley leaghtyn ayn. Loayr Mary Burgess (veih Ollooscoill Notre Dame ayns Chicago) mychione politickaght chultooroil ayns Beeal Feirshtey roish as lurg da Nerin goll er rheynn. V'ee loayrt mychione ny stereotypes va jeant: ny Yernee Gaelagh - goit sy Choleayrtys Celtiagh, currit da ellynyn, dyn ymmyd ayns cooishyn-obbyr: ny h-unnaneyseyryn - coontey veg jeh ellynyn, gobbraghey car y traa, mie lesh argid. Ayns shoh wass, cha row eh myr shen noadyr. Dooyrt Mary Burgess dy row Protestoonee scanshoil ayns twoaie Nerin va gobbraghey son pobblaghtys Yernagh. Agh, er y fa nagh row ad nyn stereotypes, s'beg y stoo screeut ta ry gheddyn my nyn gione (ayns y twoaie ny ayns y Phobblaght). As ta'n stoo mychione unnaneyseyryn groamagh nagh vel coontey veg jeh ellynyn er nyannoo jeeyl dy liooar da ny h-unnaneyseyryn hene. Loayrtagh elley, va shen Henry Patterson veih Ollooscoill Ullee. V'eshyn loayrt mychione politickaght - y skian toshtal ayns Nerin twoaie. V'eh smooinaghtyn dy row jeeyl jeant ec Coardail Jeheiney Caisht. T'eh jeeaghyn dy vel y coardail loayrt mychione 'unnaneyseyryn' as 'ashooneyryn'. Mannagh vel oo dty unnaneyseyr ny dty ashooneyr, t'ou ayns possan jeh fir 'elley'. Myr shen, ta gaue ayn dy bee politickaght Nerin twoaie riojit myr t'eh nish son traa foddey. Cha nod 'politickaght chiart' cheet rish - ta shen dy ghra, y skian jesh noi'n skian toshtal. Agh kuse dy 'leih va geaishtagh rish Henry Patterson, v'ad smooinaghtyn nagh row reddyn cho olk as shen. Va mish hene loayrt mychione y Ghaelg as cha dod mee clashtyn y leaght mychione 'Ulleeish' ('Albinish Ullee', y chengey Ulster Scots). Shimmey spotch ta goll mygeayrt mychione y chengey shoh, agh ta sleih dy liooar arryltagh dy ghra dy nee red fondagh t'ayn. Haink y scoill-gheuree gy kione lesh ceilidh elley. Va kiaulleeaght as daunsin feer vie veih Nalbin (ny Albinee Ullee) sy cheilidh shoh. Agh t'eh jeeaghyn nagh vod ashooneyryn Yernagh jannoo lesh ooilley yn stoo shoh. Va shin goll er bouyraghey ec drum mooar Lambeg tra hass ashooneyr seose as dooyrt ee dy cooyrtoil 'Gow-shiu my leshtal' roish my jagh ee magh. Haink ee erash tra va'n drummeragh shen jeant!

Brian Stowell
 

Va kione ny shiaghtin mie ain ayns mean y vee shoh ec y Vallacallin, Delbee. Hie shoh er reaghey liorym pene lesh cooney vooar veih Peddyr Karran, Caarjyn ny Gaelgey as Undinys Eiraght Vannin. Hannee hoght dy Ghaelgeyryn as studeyryn ec y Vallacallin car kione ny shiaghtin as haink ny smoo na jeih dy studeyryn dys ny brastyllyn Jesarn.

Adsyn va goaill toshiaght er y Ghaelg va ynsit liorish Paayl y Vretnagh as dooyrt dy row yn coorse feer vie er nyn son. Adsyn as beggan dy Ghaelg oc hannah hie ersooyl lesh tooilley. Va ram Gaelg goll er loayrt as er clashtyn - va Oie Ghaelgagh Jeheiney, ren Stieuee Bennett leeideil yn cheshaght er shooyl braew heese gys Traie Vane as er ash, as va seshoon kiaullee yindyssagh ayn Jesarn lesh mysh feed dy ‘ir as mraane kiaullee as arraneyderyn.

Gura mie mooar eu ooilley ren cheet ny cooney lesh y chooish, as s’treisht lhiam dy bee lheid y haghyrt shoh goll er cummal reeshtagh.
Phillie
 

Hooar mee ad shoh heese veih Peddyr Shimmin. Er lesh dy nee ad shoh ny gienneydaghyn ooilley ta ry-gheddyn ayns Gaelg. Gyn ouyrys s’goan ta’n lheid shoh ayns y Ghaelg cadjin ta goll er loayrt ayns Mannin ny laghyn shoh, agh er lesh Peddyr dy lhisagh shin gynsaghey ad as jannoo ymmyd jeu ny s’menkey.