DHOORAGHT
Earroo 27 Yn Cheshaght Ghailckagh Mean Fouyir 2002
Chellvane: 834844 Post L: [email protected] Screeu rish: Thie Vaddrell, Cregneash

Ta’n fritlag shoh jus gaase ny share as ny share dagh raiee! Bee oo smooinaghtyn dy nee aashlish t’ayn choud’s bee artyn anaasagh, skeealyn yindyssagh as claare Feailley Ghaelgagh goll er lhaih ayd. As shoh ooilley currit dhyt son costys dy olteynys - bargane gyn ourys erbee. Phillie

Shenn ven seyr dy row, slug ee sheese y quill shoh

Foddee dy bee shoh ymmydoil. Hug Julie lioar dou dy chur y Ghaelg er drane ennoil. Foddee dy vel enn ayds er y vershoon liorish Burl Ives bleeantyn er dy henney (mannagh vel oo ro aeg!).

By ghoillee v'eh, er-yn-oyr dy vel y drane jeant ayns aght er-lheh ta feer chionn sy Vaarle, croghey er ooilley ny fockleyn coheeanagh. Myr shen, s'doillee ta'n cummey dy yannoo arrish jeh sy Ghaelg.

Shenn ven seyr dy row,
slug ee sheese y quill shoh.
Cha s’ayms er yn oyr
slug ee sheese y quill shoh.
Agh foast t’ee bio.

Shenn ven seyr dy row,
slug ee sheese eisht doo-oallee,
Ren kickley as kickley
lesh lurgaghyn toallee.
Sheese lesh y doo-oallee
dy ghoaill y quill shoh -
Cha s’ayms er yn oyr
slug ee sheese y quill shoh.
Agh foast t’ee bio.

Shenn ven seyr dy row,
as slug ee sheese eean.
Cre’n ommidjys jeean,
dy sluggey sheese eean.
Sheese lesh yn eean
dy ghoaill y doo-oallee,
Ren kickley as kickley
lesh lurgaghyn toallee.
Sheese lesh y doo-oallee
dy ghoaill y quill shoh -
Cha s’ayms er yn oyr
slug ee sheese y quill shoh.
Agh foast t’ee bio.

Shenn ven seyr dy row,
as slug ee sheese kayt.
S’mooar va’n spret
dy sluggey sheese kayt.
Sheese lesh y chayt
dy ghoaill yn eean . . .

Shenn ven seyr dy row,
as slug ee sheese moddey.
Va’n beeal eck sheeynt foddey
dy sluggey sheese moddey.
Sheese lesh y voddey
dy ghoaill y kayt . . .

Shenn ven seyr dy row,
as slug ee sheese goayr.
Scoarnagh myr foawr
dy sluggey sheese goayr.
Sheese lesh y ghoayr
dy ghoaill y moddey . . .

Shenn ven seyr dy row,
as slug ee sheese booa.
Cre’n gob mooar dy liooar
dy sluggey sheese booa.
Sheese lesh y vooa
dy ghoaill y goayr . . .

Shenn ven seyr dy row,
as slug ee sheese cabbyl.
T’ee marroo - dy jarroo.


Ta mee fakin ayns Fockleyr Baarle-Gaelg J J Kneen dy vel eshyn coyrlaghey fockley magh ad myr [gor.] as [for.]. Sy trane dy tree lioaryn liorish Shorys y Creayrie er y Ghaelg va goll er loayrt dy anmagh, t'eshyn soilshaghey magh dy vel "goayr" as "foawr" mie dy liooar. Va mee fockley magh eh myr dy beagh eh "fouyr", gollrish yn imbagh, agh shen jeeaghyn dy ve marran ayms. Myr shen, ta "goayr" as "foawr" mie dy liooar . . .

AGH . . .

tra haink mee dy aarlaghey y drane dy chur ny fockleyn Gaelgagh harrish ny fockleyn sy Vaarle, hooar mee magh nagh vel y ronney shen ry-gheddyn sy lioar shoh! Sheese lesh y vooa dy ghoaill y moddey. Cha row goayr sluggit sheese eck dy ghoaill y moddey, she'n vooa ta jannoo y job shen!

Foddee dy bee lioar elley as y clane skeeal ayn sy traa ry-heet, myr shen cha bee eh jummit. Foddee Julie goaill yn ayrn shen, ga nagh vel eh sy lioar t'ec ec y traa t'ayn.

Bobby Bob

Naight er Radio Vannin - 21.8.02

Ny jarrood dy vel y naight shiaghtinoil sy Ghaelg foast ry gheddyn er ynnyd eggey Radio Vannin. Shoh heese sampleyr veih mee er dy henney.

BANK HOLIDAY COURSES IN MANX
The coming weekend sees the latest in the annual festivals of Manx at Cregneash.

Gagh blein nish ta Cruinnaght Chreneash goll er cummal, as bee yn feailley shoh ayn y jerrey shiaghtin shoh çheet. Jesarn, Jedoonee as Jelune - y laa-seyr-banc - bee taishbynyssyn as lessoonyn ayns Gaelg, kiaulleeaght as daunsin Manninagh, chammah as reddyn bentyn rish ny shenn laghyn ayns Mannin. Foddee ynseydee chammah as oaylleeyn goaill soylley jeh shoh. Ta kiare commynyn goaill ayrn ayns reaghey yn immeeaght tree laa shoh - Undinys Eiraght Vannin. Coonseil ny h-Ellynyn, Eiraght Ashoonagh Vannin as Yn Çheshaght Ghailckagh.Ga dy bee ny h-immeeaghtyn taitnyssagh as gammanagh, ta ny fir-reaghee coontey dy nee red trome-chooishagh t'ayn dy chur cultoor dooghyssagh yn Ellan er e hoshiaght.

ISLAND'S ECONOMY IS STILL STRONG
The Treasury's planned strategic review is a chance to focus on steady and sustainable growth.

Ta tarmaynys yn Ellan foast lajer. Ta'n Tashtey kiarail jannoo aavriwnys strateyshagh, vees cur caa dy chruinnaghey stiagh er aase fondagh oddys goll er cummal seose, coardail rish Fer-Coyrlee Tarmaynys y Reiltys, Steven Carse.Yn aght dy jagh kiartaghyn anchasley er coayl syn Ellan er y gherrid, ta shen cur raaue baghtal, ta Mainshtyr Carse gra. Agh ta'n tarmaynys foast gaase dy lajer, as t'eh jeeaghyn dy bee reddyn goll dy mie sy traa ry heet. Ta Mainshtyr Carse credjal dy bee aavriwnys yn Tashtey cur colughtyn 'leagh brash ard' ('high added value') er nyn doshiaght. Agh t'eh gra dy lajer nagh jean shen assee da colughtyn ta failley ram obbreeyn nagh vel cosney wheesh argid.

PROBLEM OF MISSED DOCTOR APPOINTMENTS
The Isle of Man's Health Department is monitoring the United Kingdom's response to the problem of missed doctors' appointments.

Ta Rheynn Slaynt Ellan Vannin freayll rick er yn aght oddys y Reeriaght Unnaneyssit dellal rish y doilleeid jeh sleih nagh vel çheet lesh shilley er fir-lhee ec ny traaghyn reaghit. Ayns y Reeriaght Unnaneyssit, ta shen taghyrt ny smoo na queig millioon jeig dy cheayrtyn gagh blein. She adsyn eddyr shey-jeig as kiare bleeaney jeig as feed dy eash ny fir smessey. Ta ny fir-lhee gra dy vel shoh jummal y traa oc hene, chammah as y traa ocsyn ta dy firrinagh ayns feme jeh cur shilley er fer-lhee. Ayns Mannin, ta ny h-earrooyn bentyn rish y chooish shoh goan dy liooar. Agh ec un ynnyd-slaynt jeh mooadys meanagh t'ad gra dy vel keead traa-reaghit goll er jummal gagh mee. Geoff Newberry, y Reireyder jeh Chied Chiarail Slaynt (Primary Health Care) ayns Mannin, t'eh gra dy vel y chooish goll er resooney.

'FAME' RAISES THOUSANDS AND THE ROOF
'Fame' the musical is being staged at the Gaiety Theatre.

Ta'n cloie-kiaullee 'Fame' er yn ardan ec y Thie-Cloie Gaiety. Hig eh gys jerrey Jesarn. Chammah as sleih goaill soylley jeh, ta'n cloie-kiaullee er chosney argid mooar da sheshaghtyn-giastyllagh eigsoylagh (various) liorish cur caa da'n lught-jeeaghyn argid y chur ec jerrey yn chloie-kiaullee gagh oie. Choud as shoh, t'ad er chosney mysh tree meeilley punt da sheshaght-giastyllagh, goaill stiagh Caarjyn Phaitçhyn Çhernobyl, Saue ny Paitçhyn, Noi-Chahngyr as Thie Ronald McDonald. Dick Ray, Stiuredyer y chloie-kiaullee, t'eh gra dy vel eh braew feeu.

Heiy Oirr ny Gaeil (Argyll) son cur Boayl Oikoil Syrjey da Gaelg ny h-Albey

Lhisagh boayl syrjey er lheh ve currit da’n chengey as cultoor Gaelgagh rere yeearreeyn yn chooid smoo dy heiyderyn hug freggyrt da keishtaghan postagh ayns Oirr ny Gaeil Meanagh.

Ayns y chied keishtaghan postagh myr shoh syn ard shoh, hug Boodeeys Oirr ny Gaeil Meanagh (the Mid Argyll Gaelic Partnership) keishtaghan da 800 thieyn as shen shassoo son sampleyr 10% neureilt veih’n rolley reihyssagh ynnydagh.

Hug 170 dy lieh, as shen mysh 20% jeu ren geddyn yn keishtaghan, nyn vreggyrtyn er ash.

Dooyrt loayrtagh y voodeeys dy row bunnys ooilley ny va currit stiagh ayns foayr jeh:

Cur boayl oikoil syrjey da Gaelg ny h-Albey.

Cur er hoshiaght shennaghys as eiraght ny Gaelgey.

Cur er hoshiaght ynsaghey Gaelg ny h-Albey.

Jannoo shickyr mayrnaght jeh’n chengey as cultoor Gaelgagh ayns Oirr ny Gaeil Meanagh.

Ga dy row 87% jeh’n sambyl neureilt smooinaghtyn dy vel yn chengey as cultoor Gaelgagh bentyn da Oirr ny Gaeil Meanagh, cha row agh 25% smooinaghtyn dy row shoh baghtal sy theihll cadjin, lesh 65% gra dy lhisagh boayl syrjey ve currit da’n chooish.

Dooyrt loayrtagh y voodeeys: "Va faaueyn voue ren goaill ayrn sy chooish goaill stiagh ynsaghey yn chengey ayns ny scoillyn, ymmyd smoo jeant jeh’n chengey liorish loayrtee roish y theay, as ymmyd smoo jeant jeh Gaelg ny h-Albey er fograghyn theayagh.”

"Va 72% ayns foayr jeh eie son ynnyd Gaelgagh, lesh ayrn mooar gra dy yinnagh ad cur shilley er ynnyd myr shoh."

Chammah’s shen dooyrt y loayrtagh: "Cha row cummaltee shickyr er feeuid jeh bishaghey kianlaghyn lesh buill raad va Yernish goll er loayrt; cha row agh 49% smooinaghtyn dy nee feeu yn eie shoh agh va earroo mooar nagh row shickyr."

Ga dy row 82% jeh freggyrtee er chlashtyn mychione y Vod, cha row agh 20% geearree goll . Hoilshee ny freggyrtyn dy row “yeearree niartal” son ynsaghey Gaelg ny h-Albey dy ve aavunnit syn ard, lesh 63% geearree eh ynsit myr y nah chengey ayns scoillyn as 40% geearree ee ynsit ec ro-scoillyn. Hoilshee neesht yn keishtaghan dy row 33% ayns foayr jeh ynsagh lane-Gaelgagh.

Dooyrt Scrudeyr Boodeeys Oirr ny Gaeil Meanagh, Ian Provan, dy dug yn boodeeys coipyn jeh ny freggyrtyn da ram sleih as sheshaghyn, goaill stiagh yn Choonceil Ynnydagh, OAH as OAA (MP as MSP) yn ard, as Shirveishagh son Gaelg ny h-Albey Mike Watson, shirrey orroo dy obbragh er ny cooishyn soilshit.

Dooyrt Mnr Provan : "Ta shin er chur magh mysh 30 screeunyn as s’treisht lhien dy bee ny politickeyryn abyl dy yannoo ymmyd jeh’n fys currit dy yrjaghey boayl jeh’n Ghaelg syn ard shoh."

Phillie

Clasht rish my choraa!

Ta mee prowal dy hymsaghey ooilley gagh cur-magh jeh Coraa Gailckagh, va jeant ayns ny quiegydyn. My vees coip ny ghaa ny lhie ayns nyn loutyn, craplagagh as loau, nagh vel feme eu er ny sodjey, cur-jee eh, ny coip jeh dooys my sailliu. She cur ad ooilley cooidjagh as cur ad magh ayns lioar ta my yeearree. Veagh yn Ghaelg ymmydoil da’n lught-ynsee jiu as ta lioar foddey ny smoo cooie na carnane dy henn veeryn dy phabyr. She my varel dy beagh eh mie dy yannoo yn lioar daa-hengagh, shen dy ghra coip chirrym
jeh’n chur magh bunneydagh as er y cheu elley chyndaays sy Vaarle.

My ta shiu coontey ram jeh Dhooraght as by vie lhiu fakin tooilley sthoo sy Ghaelg, ny jarrood-jee dy vel earishlioar noa sy Ghaelg ry-gheddyn nish enmyssit Coraa ny Twoaie. T’ee ry-gheddyn ec ny Fastyryn Gaelgagh ta goll er cummal er y chied doonaght jeh gagh mee ec Thie ny Gaelgey. Ta caa ayn dy loayrt Gaelg as clashtyn sleih loayrt ry-cheilley assjee. Gagh keayrt ta peiagh ennagh loayrt ny ginsh skeeal sy Ghaelg as nish as reesht bee gamman ayn ass y Ghaelg.

Pawl ap Rhosier

Baelg ny Gaarle?

Bee enney eu er Gaelgeyr yindyssagh ta croo focklyn yindyssagh as shinyn gaavioghey'n çhengey. Smooinee mee dy by vie lesh Gaelgeyryn elley fakin sambil jeh'n obbyr echey. Shoh sambyl ny ghaa: 'ny lhig dooinyn' - 'the lettuces; 'roddanaghey' - 'ratification'; 'keck-roddan' - 'ratchet'.

Tooilley sambil, my sailliu.

Brian Stowell

Cormid-Traa yn Ouyir

She cormid-traa yn ouyir t'ayn nish, traa ta'n ghrian ry-akin rish daa oor yeig ayns dy-chooilley ard er y chruinney. Dy firrinagh, t'ee ry-akin rish beggan ny smoo na shen kyndagh rish yn toilshey tchyndaa beggan choud's t'eh goll trooid yn aer.

Co-leayrtys oikoil, shen yn traa eddyr lhie ny greinney as yn ghrian ve hoght kem jeig fo ooir ny cruinney. Ta'n tammylt hene croaghey er dty arjid er y chruinney as yn imbagh: My hwoaie veih hoght kem as daeed dy arjid, cha nel eh dorraghey dy fud ny h'oie ec shass-greinney souree. Ta Mannin ny soie ec kiare kem jeig dy arjid veih cryss mooar ny cruinney.

Er yn oyr dy vel Mannin kiare kem heear veih Greenwich, ta traa firrinagh ain mysh kerroo oor ny s'anmey na'n traa oikoil.

Ta'n chooid smoo dy Vritaan heear veih'n voayl shen neesht, agh t'ee jannoo ymmyd jeh traa Oarpagh. Myr shen, sy tourey, ta'n munlaa firrinagh ny smoo na daa oor lurg daa oor yeig er y chlag. Foddee dy vel fys eu er hannah, ny foddee nagh vel shiu boirit, my ta.

Markys y Kermitt

Radio Vannin Boght

Va rieau anaase aym er cooishyn-radio as cooishyn-çhellinsh ooilley cooidjagh. Va mee currit da'n Chaggey-Radio eddyr Mannin as Lunnin ayns ny bleeantyn tree feed. As hug mee my ner reeshtagh ayns ny bleeantyn shid, foddey er dy henney, dy vel Manninee feer ghraihagh er cur argid er y chabbyl aggairagh.

Son mee ny ghaa, hass Tinvaal dy dunnal noi niart Hostyn, caggey gys y jerrey son Radio Caroline Twoaie - as ec y traa cheddin soiaghey beg jeh stashoon-radio leighoil v'ayns Mannin hene hannah - Radio Vannin. Cha nel shen slane kiart, er y fa dy ren politickeyryn ennagh ayns Mannin jannoo nyn gooid share dy hassoo noi Lunnin ayns ennym Radio Vannin. Agh bare lesh y chooid smoo dy 'leih screeagh ry cheilley son Caroline, y fer smoo jeh ny stashoonyn-radio-marrey va cur er politickeyryn Sostnagh coayl ram cadley ec y traa v'ayn.

Er aght ennagh, va'n Caggey-Radio ayn bentyn rish Radio Luxembourg, stashoon-radio-traghtee feer niartal va gymskeaylley veih Luxembourg roish as lurg y nah chaggey mooar. She stashoon feer speeideilagh v'ayn ren cosney argid liorish gymskeaylley soilsheenyn son colughtyn. Va sleih geaishtagh rish Radio Luxembour feiy'n Oarpey.

Shen hug er sleih goll rish Mnr Colebourn ayns Mannin smooinaghtyn: cre mysh cur er bun stashoon myr shen ayns Mannin? Agh cha jinnagh reiltys Hostyn lowal shen: dooyrt ad 'She shinyn ayns Lunnin ta stiurey cooishyn mooie son Mannin. She cooish mooie stashoon-radio niartal. Vanninee, jarrood-shiu eh!'

Mysh daeed blein er dyn henney, hug un dooinney Radio Vannin er bun myr stashoon preevaadjagh. Agh haink boiraghyn argidoil er, as chionnee Reiltys Vannin y stashoon veih'n dooinney shoh. T'eh jeeaghyn nagh row fys ec y Reiltys c'red dy yannoo lesh stashoon-radio. As t'eh jeeaghyn nagh vel reddyn er chaghlaa monney neayr's y traa shen.

Hie Manninee dy liooar er cleayney rish kuse dy vleeantyn liorish obbeeys Radio Caroline, agh v'eh fardailagh. Hannee Radio Vannin sy scadoo, goll er dy baccagh kyndagh rish genney argid as genney polasee fondagh. Son tammylt, haink Mannin dy ve yn mean jeh 'The Region', myr va Radio Vannin gra rish ec y traa shen - nane jeh ny sambil share jeh Manninee gra 'Gow-shiu nyn leshtal - cha nel shin ayn.'

As eisht phrow sleih sy Reiltys dy chreck Radio Vannin da Mnr Kreisky. Yindys mooar - shimmey peiagh ren gaccan mychione shoh dy fergagh, as begin da'n sleih shen sy Reiltys y treealtys oc y yarrood (son y traa v'ayn). Agh hannee y noidys noi Radio Vannin. Shen y fa nagh vodmayd ve shickyr dy jean y Reiltys cooney lesh y 'stashoon-radio ashoonagh'. (Agh oddagh booaghyn getlagh tra t'ou er chlashtyn yn Ard-Hirveishagh loayrt mychione y Reeriaght Unnaneyssit myr 'çheer yoarree'.)

Shione dou dy vel ymmodee Manninee (as mish ny mast'oc) jeant corree liorish Radio Vannin - sleih er y radio ta soiaghey beg jeh Mannin, fockley-magh aggairagh jeh enmyn Manninagh, as myr shen foast. Agh shegin dooin toiggal dy vodmayd sharaghey Radio Vannin. My ta shin kinjagh soie er Radio Vannin ta shin cooney lhieusyn ta laccal geddyn rey rish cremeydys jeh sleih berçhagh as niartal. As cha nodmayd croghey er tree pabyryn-naight ta lesh un cholught as eh cosney argid mooar veih'n Reiltys liorish soilsheenyn - bunnys lieh-villioon punt sy vlein, cosoylit rish kerroo millioon sy vlein son Radio Vannin son 'stashoon-radio ashoonagh'! As jeeagh er yn aght ren ny pabyryn-naight soie er Peddyr Karran son briaght feyshtyn lowallagh ayns Tinvaal.

Paart dy veeghyn er dy henney, screeu mee gys ny pabyryn-naight mychione Radio Vannin. Screeu mee dy row eh ommidjagh dy chur kiare cheead meeilley punt da fir-choyrlee son insh stoo bione da sleih hannah bentyn rish y stashoon-radio. Agh chammah as shen, dooyrt mee dy vel eh scammyltagh nagh vel Radio Vannin geddyn argid dy liooar as dy vel Reiltys Vannin cho mee-arryltagh as faitagh dy yannoo stashoon ashoonagh kiart ass. Cha chlou ad y screeuyn - yn ynrican red ren mee rieau cur gys ny pabyryn nagh jagh er clou oc. Va mee er ghra red ennagh ayns foayr jeh Radio Vannin as s'cosoylagh nagh dod ny pabyryn-naight jannoo lesh shen.

Neayr's hooar Norman Radcliffe baase, foddee nagh vel carrey dooie ec Radio Vannin ayns Tinvaal. Oddagh shen ve mie ny sie. Ec y traa cheddin, t'eh jeeaghyn dy vel kuse jeh ny fir-toshee ain currit da'n spoyrt ashoonagh: soie er red erbee va jeant ayns Mannin. As t'eh jeeaghyn dy vel sleih dy liooar (ram jeu ayns y Reiltys?) credjal dy vel Radio Vannin costal rouyr as dy vel y sleih ta gobbraghey da cosney argid mooar. Dy firrinagh, s'ommidjagh yn argid ta Radio Vannin geddyn veih'n Reiltys as s'beg yn argid ta lught y stashoon cosney cosoylit rish y chooid smoo dy stashoonyn elley.

Ta shin ayns feme jeh stashoon-radio ashoonagh ta currit da Mannin, y çhengey as y cultoor. Cha nel shin ayrn jeh 'The North-West'. As cha lhisagh sharvaant theayagh ve yn stiureyder jeh'n stashoon. Ec y traa t'ayn, cha nod Radio Vannin caggey dasyn hene er y fa dy vel eh dy bollagh fo smaght y Reiltys. Lhisagh y stashoon geddyn kaart (charter) goll rish y fer t'ec y BBC dy chur tooilley seyrsnys da.

Tra vees olteynyn Tinvaal resooney'n imraa screeut ec ny fir-choyrlee costyllagh shen, bee gaue ayn nagh vow Radio Vannin yn argid as yn aa-reaghey t'eh ayns feme jeh. Y red smessey oddagh taghyrt, shen dy chur y stashoon da fer preevaadjagh veagh geddyn rey rish ny claareyn-naight as stoo anaasagh as gymskeaylley kiaull car y traa. Cha nhegin da'n lheid taghyrt.

Ta sleih ennagh gaccan mychione ocsyn ta noi cur er bun stashoon-radio tonn liauyr faggys da Rhumsaa. Ta sleih niartal ennagh er chur failt er y treealtys shoh. S'treih yn red eh, agh ta shin jerkal reesht dy bee booaghyn getlagh. Rish tammylt liauyr, cha nel caa erbee er ve ayn dy beagh peiagh erbee abyl stashoon-radio traghtee (commercial) y chur er bun as cosney argid. Shimmey stashoon ta coayl millioonyn gagh blein. Ta shoh kyndagh rish genney argid veih soilsheenyn as boiraghyn politickagh feiy ny cruinney. Fer-toshee treealtys y radio tonn liauyr, dooyrt eh dy beagh stashoon noa myr shoh abyl dy chur millioon punt da Reiltys Vannin gagh blein son jeih bleeaney. My t'ou credjal shen (as v'eh jeeaghyn dy row peiagh ny ghaa sy Reiltys credjal eh), t'ou uss ayns feme jeh lheihys ennagh feer happee.
She yn un skeeal t'ayn bentyn rish stashoon-çhellveeish son Mannin. Ta colught çheet gys shoh as gra dy jean ad cosney ram argid ayns Mannin hene lesh çhellveeish-traghtee! Dy firrinagh, lhisagh shin gobbal eeck son y kied-çhellveeish da'n BBC as 'The North-West' as cur yn argid da stashoon-radio Manninagh. Insh shen da'n oltey jeh Chiare as Feed ayd, my ta'n lheid ayd.

Brian Stowell

Aundyryn y Cheshaght

Bee aundyryn currit magh reeshtagh ec Feailley Ghaelgagh son sleih, sheshaghtyn as Rheynnyn y Reiltys t’er n’yannoo obbyr vie yindyssagh son y Ghaelg. Ta’n ving jannoo briwnys er enmyn as eieyn currit stiagh ec Gaelgeyryn goll rhyt hene. Smooinee er shoh my sailt as my ta sheshaght ny peiagh ennagh er n’yannoo job mie yindyssagh da’n Ghaelg cur dooin fys my-e-chione.

Cur fys dou ec ny enmyssyn thie ec toshiaght Dhooraght roish yn 17oo Jerrey Fouyir er y smooinaght ayd my sailt!

Phillie

Corree Greesit er Genney dy Ghaelg ny h-Albey
ayns Taishbynys son Yn Toolyn (Sweden)

Ta Coonseilee veih Gaeltaght ny h-Albey (the Highlands) er screeu rish y Chirveishagh son Cultoor as Gaelg ny h-Albey Mike Watson gaggyrt veih fys jeh’n oyr nagh row Gaelg ny h-Albey as y ‘cultoor ta cheet lesh’ goit stiagh ayns seyr-greeaght culturoil (cultural extravaganzava) son yn Toolyn, leeidit ec kianoortys ny h-Albey (Scottish Executive).

Ta’n claare kiare-laa ‘Nalbin sy Toolyn’ goaill stiagh taishbynys jeh cultoor noa emshyragh ny h-Albey, caaghyn son bishaghey as cur er hoshiaght turrysaght, co-hirrey golf, troddan doolane curlal (curling challenge match) as sampleyryn jeh bee as jough veih Nalbin.

Dooyrt Mnr Watson; "Ta ‘Nalbin sy Toolyn’ caa mie yindyssagh dooin ny kianglaghyn eddyr Nalbin as nyn nabooyn Loghlinagh y vishaghey.”

Agh va Coonseilee Gaeltaght ny h-Albey boirit dy mooar er y fa nagh row Gaelg ny h-Albey ayrn jeh’n taishbynys as cha nel kianoortys ny h-Albey er ve loayrt rish y choonceil mychione cur er hoshiaght cultoor yn ard ny turrysaght Golf ta gaase syn ard.

She’n chooish cheddin t’ayn ec sheshaghtyn elley ta bishaghey as lhiasaghey y Ghaelg ayns Nalbin. Cha row fys erbee oc er y taishbynys mooar vees goll er cummal eddyr 16^oo as 19^{oo Jerrey Fouyir.}

Dooyrt Coonseilagh Neil Clark, lhiass-chaairliagh jeh’n ving ynsee, cultoor as soccar; "Ta mee goaill yindys mooar dy vel lheid y haghyrt shoh, ta prowal dy chur er hoshiaght cultoor ny h-Albey, goll er reaghey gyn ys currit er ny scansh currit da chengey, cultoor ny kiaull tradishoonagh ny Gaeltaght.

"Ta imraa ayn mychione kiaull tradishoonagh agh cha nel fys erbee currit er’n sorch dy red te. Cha nel peiagh erbee er loayrt rooin er cummey y chooish er chor erbee!”

Dooyrt eh dy vel shoh eer ny smoo thanvaanagh er y fa dy vel yn cheb ec Inverness as ardjyn ny Gaeltaght yn un cheb veih Nalbin son Ard-Valley Culturoil ny h-Oarpey 2008.

Dooyrt Mnr Clark; "She red quaagh t’ayn nagh row cuirrey currit da Coonceil ny Gaeltaght y laue eck y chur stiagh sy chooish ayns aght erbee. Veagh y taishbynys foddey ny share dy beagh Coonceil ny Gaeltaght as Gaelg ny h-Albey goit stiagh sy chooish."

Dooyrt Coonseilagh Duncan Allan, stiureyder jeh Boayrd Turrysagh Gaeltaght ny h-Albey, ta gobbragh lesh Golf ny Gaeltaght ta cur er hoshiaght turrysaght golf, dy row gobbal cooney veih’n Ghaeltaght faghidagh. Dooyrt eh; "Lhisagh shin er ve aynshen kyndagh rish yn Cheb Ard-Valley Culturoil ain as er lhiam pene dy lhisagh yn caairliagh gaccan dy lajer mychione y chooish rish yn chianoortys. Hannah ta Golf Nalbin er chur shilley er yn Toolyn mleeaney cur er hoshiaght ny coorseyn golf ain as ta 25 olteynyn Soolynagh ec yn Choorse Golf Reeoil ayns Dornoch.”

"Shoh soilshaghey magh dooin nagh vel fys ec y laue yesh ny ta’n laue hoshtal prowal dy yannoo as t’eh cheet ass neuarryltys yn Kianoortys dy loayrt rish lughtyn-reill ny theay cheumooie yn chryss veanagh.Ta kianglaghyn lajer eddyr yn Ghaeltaght as Loghlin ass Claare yn Ymmyl Twoaie ta kiangley ry-cheilley baljyn beggey veih’n Ghaeltaght, Loghlin as yn Eeslynn. Ta shin jeean dy liooar dy niartaghey turrysaght eddyr yn daa ard. Ta caarjys mie eddyr yn Toolyn as y Ghaeltaght as veagh yn taishbynys shoh er chur dooin cooney lesh bishaghey as niartaghey shen.”
Phillie

Cooishyn veih’n Eddyr Voggyl

Cre'n aght yiarrin "East View" vrie fer ennagh jeem mychione shen son ennym thie. Ta fys aym dy vel fer goll shiar, cheet niar as ve hiar agh cha nel mee shickyr mychione shoh.

Reayrt yn iar? Reayrt y niar? Reayrt y shiar? Reayrt Hiar?

Pawl

Rere Doolish y Karagher sy lioaran - Enmyn Thie - East View = Reayrt y Shiar

By chair y ghra myrgeddin dy vel ad shoh heese bentyn rish y chooish ry akin syn ’ockleyr echey .

At the east side. - Kione-hiar jeh. Due east. - Shiar jeeragh.
Due east. - Shiar yeeragh. East Africa. - Yn Affrickey Hiar.
East Mann. - Ar Vannin. East wind. - Geay niar.
East of the island. - Cheu hiar jeh'n ellan. From the east.- Niar.
In the east. - Hiar. North by east. - Twoaie gys y shiar.
North north east. - Twoaie shiar hwoaie. South by East. - Jiass gys yn Shiar.
The east country. - Yn cheer my hiar. The East. - Y Niar.
The east wind. - Y gheay niar. The Far East. - Y Niar Foddey.
The east window. - Yn uinnag hiar. To the east. - Shiar.
The East Indies. - Ny hInjyn Shiar.
House facing the east. - Thie as e eddin lesh y niar.
It lies east and west. - T'eh ny lhie sheear as neear.
Steer north-east by east. - Stiur shiar hwoaie gys y shiar.
The coast lies east and west. - Sheear as shiar ta'n slyst ny lhie.
The mountains go from east to west. - Ta ny sleityn roie shiar as sheear.
The street runs east and west. - Ta'n straid sheeynt sheear as shiar.
The wind is in the north-east. - Ta geay niar hwoaie ayn.
The wind is settling in the east. - Ta'n gheay tannaghtyn 'sy niar.
They are coming from east and west. - T'ad cheet niar as neear.
Too far east and too far west. - Rouyr shiar as rouyr sheear.
Too far east or too far west. - Roud sheear ny roud shiar.

Phil Kelly

My she 'View Eastwards' t'ayn, yiarrins 'Reayrt Shiar'. My she 'View set in the East' t'ayn, shen 'Reayrt Hiar'. Ta shin ayns feme jeh coontey baghtal jeh'n stoo shoh!

Brian Stowell

Nagh lhisagh shin gra "reayrt yn hiar" er yn fa nagh vel gleashaght erbee ayn? Cha nel shin goll voish yn voayl ta shin nyn shassoo ayn gys boayl elley. Juan Kodhere

Cre'n aght yiarragh fer:

One ton of that which can be burnt.

Un tonney jeh shen oddys ve lostit? Un tonney jeh shen oddys goll er lostey?
Un tonney jeh ny oddys ve lostit? Un tonney jeh cre oddys ve lostit?

As farbys beg elley:
It causes cancer. Cha noddym feddyn red erbee ayns ny fockleyryn ta lesh y keeayll cheddin as shen dy jeeragh.

Pawl
Shoh aght mie dy ghra 'causes':

'It causes cancer' = 'T'eh giennaghtyn kahngyr.'
'It causes cancer' = 'T'eh oyr kahngyr'

Ta'n lheid ayns 'Cooinaghtyn Manninagh' as ayns yn arrane 'Marrinys yn
Tiger': 'Va shoh daue ard oyr aggle' - Baarle myr 'This caused them a great
deal of fear'.

'One ton of that which can be burnt' - cre mysh 'Un thunney jeh'n lheid
oddys goll er lostey'?

Brian

Dickie Clugaaish - Ree ny h-Unnish!

Va shen yn ennym er my haner. V’eh ard-ghooagh ny mast’oc va gaase unnishyn mooarey as ny unnishyn echey mooar erskyn towse! Foddee nagh vaik shiu caslys jeh sy cholloo “Up the Garden Path” liorish Mike Goldie agh honnick mish eh as leih skeeal ayn bentyn rish my haner.

Va’n far ennym er ‘Ree ny h-Unnish’ mastey ny gareyderyn elley (cha row shen jus syn ellan shoh noadyr). Ta cooinaghtyn aym dy row my haner er ‘Traa Feysht ny Gareyderyn’ er BBC radio 4 as va ard-skeealyn scruit ayns earish lioaryn gareydys mychione ny unnishyn echey.

Bione da ram gareyderyn ard-ghooagh .... Percy Thrower, Geoffrey Smith as y lheid, as va Violet Carsons (Ena Sharples) ny carrey da. Hie ad ooilley dys y gharey echey lesh shilley er ny unnishyn mooarey er-lheh (v’ad cha mooar as dty chione - shiaght punt er trimmid).

Ta cooinaghtyn aym tra hie eh dys taishbynysyn garagh ayns Southport as Chelsea. She briw v’eshyn neesht. Va boayl er lheh ‘sy gharey echey lesh ooir feer dorraghey as menoyragh - bunnys doo va’n ooir shoh as lome lane dy ghianeyn.

Ta cooinaghtyn aym neeshtagh yn souyr fondagh - aalin as millish erskyn insh. Va oijys ny h-ooir feer folliaght as deearree ram slieh fys er oijys er-lheh follit ny h-unnishyn mooarey.

Cha row monney syn oijys edyr. Ny myn ayrnyn v’ayn .. cha row agh fer ny ghaa, shen ooilley! Va mee troggit gee ny unnishyn shen. Dobbree mee dy creoi marish my haner sy gharey. Hooar eh baase tra va mee un vlein jeig dy eash as shen myr ve.

Va cliaghtey aym goll eeastagh marish my haner neesht .... agh bee shen skeeal elley!

Catreeney y Clugaaish

Lioaran Turrysagh 2003 - Focklyn Chyndaait ec Coonceil ny Gaelgey

Questions answered - Feyshtyn freggyrit, Manannan’s magic - Drualtys Vanannan, Big skies - Speyryn mooarey, On track - Y raad kiart, Sea side - Oirr ny marrey, Foot down - Cassyn er cassan, The storytellers - Ny skeealleyderyn, Island hospitality - Feoiltys Vannin, Activity centre - Laare Roortys, Top gear - Ard-gheear, Celtic culture - Cultoor Celtiagh, Great days out - Laghyn mie er bashtal , Wild days out - Laghyn feie, Active days out - Laghyn breeoil, Easy days out - Laghyn soccoil, Isle of Man holidays from £XX - Laghyn seyrey ayns Mannin veih £XX, How to use the website - Ymmydey yn ynnyd eggey, Events calendar 2003 - Taghyrtyn 2003, Choosing your accommodation - Reih dty aaght, Getting here is easy - Aashagh dy heet dys shoh, Getting around the Island - Troailtys mygeayrt Mannin, Tourist information - Fys son turrysee, Failt ort dys Shirveishyn da Kionneyderyn ayns Mannin - Welcome to the Isle of Man Customer Service

Feailley Ghaelgagh 2002
Programme

Saturday 9th
10.00 - 12.30 Information and displays - Strand Centre, Douglas

2.30 - 4 pm Children’s Workshops - PSM Town Hall

8pm - 12pm Giense/Ceili with top Manx traditional musicians
- Cherry Orchard, Port Erin

Sunday 10th
10 am - 4 pm Manx Lessons for Beginners
- Port Erin Youth and Community Centre

Monday 11th
7 - 8 pm Community Concert - St Mary’s Church, Port St Mary

Wednesday 13th
7.30 pm Leaght y Ghaaue by Paul Rogers
- venue to be confirmed

8.30 pm Manx night including drama and quiz
- venue to be confirmed

Thursday 14th
7.30 pm Ned Maddrell Lecture by Prof Colin Baker, member
of the Welsh Language Board. The title of the lecture is
Manx Gaelic and English: Ten Advantages of Being a
Bilingual. This will be a more 'popular' lecture - for a broad
audience. No previous experience necessary!
- Cherry Orchard, Port Erin

9.30 pm Music session - Cherry Orchard, Port Erin


Friday 15th
7.30 pm Gaelic Concert including top performers from
Scotland, Ireland and Mann - Town Hall, Port St Mary
Tickets £5 adults, £3 children

Saturday 16th
12 - 3 pm Food and folk, music and chips! Silverdale Cafe

8pm Giense Mooar - a big ceili with visiting musicians
- Ocean Castle Port Erin.Tickets £5 adults, £3 children

Supported by the MANX HERITAGE FOUNDATION
and the IoM ARTS COUNCIL
Feailley Ghaelgagh 2002
Claare

JESARN 9 oo
10.00 - 12.30 Fys as Taishbynys - Ynnyd Shappal Strand, Doolish

2.30 - 4 sv Keirdlann ny Paitchyn - Halley Baljagh,Purt le Moirrey

8sv - 12sv Giense/Ceili lesh ard-chiaulleyderyn veih Mannin
- Cherry Orchard, Purt Chiarn

JEDOONEE 10 oo
10 sv - 4 sv Lessoon Gaelgagh dausey ta goaill toshiaght
- Ynnnyd Cummaltee as yn Aegid, Purt Chiarn

JELUNE 11 oo
7 - 8 sv Cuirrey Kiaull y Jiass - Keeill Noo Moirrey

JECREAN 13 oo
7.30 sv Leaght y Ghaaue liorish Paul Rogers
- boayl ry-reaghey

8.30 sv Manx night including drama and quiz
- boayl ry-reaghey

JERDEIN 14 oo
7.30 sv Leaght Ned Maddrell liorish Prof Colin Baker, oltey
jeh’n Voayrd Bretnish. Ta ennym y leaght
Gaelg as Baarle: 10 reddyn ayns mie mychione loayrt ass
daa-hengey. Bee shoh leaght so-hoiggalagh vees cooie da
dy chooilley pheiagh my ta fys oc er chengaghyn ny dyn!
- Cherry Orchard, Purt Chiarn

9.30 sv Seshoon Kiaullee - Cherry Orchard, Purt Chiarn


JEHEINEY 15 oo
7.30 sv Cuirrey Kiaull Gaelgagh lesh Kiaull veih Nerin
Nalbin as Mannin - Halley Baljagh, Purt le Moirrey
Tiggadyn £5 sleih aasit, £3 paitchyn

JESARN 16 oo
12 - 3 sv Bee as Beealeydys, Kiaull as Spollagyn! Thie Bee Silverdale

8sv Giense Mooar - lesh kiaull veih Nalbin as Nerin
- Ocean Castle Purt Chiarn. Tiggadyn £5 aasit, £3 paitchyn

#