DHOORAGHT

Earroo 29 Yn Cheshaght Ghailckagh Averil 2003
Chellvane: 834844 Post L: [email protected] Screeu rish: Thie Vaddrell, Cregneash

My leshtal nagh vel agh Dhooraght Beg ayns y raiee shoh. Ta mee beggan taroogh prowal dy chosney stiagh ayns ny Kiare as Feed. Ta reihys ayns Rosien er y fa dy ren Pam Crowe cosney stiagh sy Choonceil Slattyssagh. Hig Dhooraght kiart er ash sy tourey. Phillie

Quoi ny Celtiee?

Myr shen, t’eh aashagh dy ghra dy re Bretin, Yn Vritaan, Yn Chorn, Mannin, Nerin as Nalbin çheeraghyn Cheltiagh agh cre mysh Patagonia as Nalbin Noa? Ta’n cheeayllaght shen cooie dauesyn agh cha nel sleih gimraa adsyn myr çheeraghyn Cheltiagh. As ta shen dy my leeideil gys yn ‘eysht smoo - ‘Cre mysh Galicia as Asturias?’.

Gyn ourys va ny Celtiee ayns ny buill shen ec un cheayrt thousaneyn dy vleeantyn er dy henney, gollrish ayns yn Rank, yn Ghermaan as Yn Spaainey neesht. Agh cha nel çhengey Cheltiagh oc. T’ad gra dy vel tradishoon kiaullee as piobyn Celtiagh oc agh cha nel eer cowrey jeh çhengey Cheltiagh er ny çhengaghyn oc jiu. T’adsyn veih fraue Ladjinagh. Ta shenn shennaghys Cheltiagh oc agh vel yn sleih t’ayn jiu nyn Geltiee? Wahll, lhig dou shiuish y ‘aagail lesh shoh: Va ny Celtiee ayns Galicia as Asturias thousaneyn dy vleeantyn er dy henney. Nish ta kuse dy tradishoonyn faagit agh cha nel cowrey erbee ayn jeh çhengey Cheltiagh agh ny yeih shen, ta sleih arryltagh gra Çheer Cheltiagh roo. As eisht ta Sostyn ain. Boayl raad va ram Celtiee thousaneyn dy vleeantyn er dy henney as ta kuse dy tradishoonyn faagit agh cha nel çhengey Cheltiagh ayn. Agh, va Bretnish goll er loayrt ayns Cumbria derrey haink ny Normanee, shen foddey ny s’anmey ny ayns Galicia as Asturias. Ta keeadyn dy enmyn buill veih fraueyn Celtiagh ayns Sostyn m.s. Dover veih ‘Dwfr’ ayns Bretnish (ushtey) as ta çhengaghyn Celtiagh er naagail cowraghyn er y Vaarle. Cre’n fa eisht, ta shin arryltagh gra Celtiee roosyn ayns Asturias as Galicia jus er-yn-oyr dy vel ad cloie ny piobyn, as cha b’loys da peiagh erbee gra Celtiee rish ny Sostynee eer ga dy row çhengey Cheltiagh oc cha nee feer foddey er dy henney as ta studeyrys DNA er hoilshaghey magh dy vel yn chooid smoo dy Hostynee ass sthock Celtiagh ayns ynnyd jeh sthock Germaanagh? C’red ta’n Ghaelg son ‘Band Wagon’?

Pawl ap Rhosier

Naight Radio Vannin

POSSIBILITY OF A 32 MEMBER ELECTED TYNWALD TO BE RE-EXAMINED The House of Keys has accepted the principle that the Legislative Council should be popularly elected.

Ta'n Kiare as Feed er hoiaghey jeh'n phrinsabyl dy lhisagh y Choonseil Slattyssagh goll er reih ec y theay. Billey Oltey Preevaadjagh Edgar Quine, yn oltey jeh'n Chiare as Feed son Ayre, v'eh er ny choardail ec y nah lhaih liorish kiare voteyn jeig noi hoght.

Agh, gyn jerkalys, Steve Rodan, yn oltey jeh'n Chiare as Feed son Garff, hooar eh kied dy chur er e hoshiaght lhiasaghey yinnagh cur erash y treealtys, my vees eh coardit, dy lhisagh y theay reih gagh oltey ass daa-yeig as feed jeu ayns Tinvaal.

Dy firrinagh, yinnagh treealtys Vainshtyr Rodan cur treealtys jeant sy toshiaght ec Victor Kneale, eaar-oltey jeh'n Chiare as Feed son Doolish Heear, ayns ynnyd villey Vainshtyr Quine. Y treealtys haink veih Victor Kneale hoshiaght, v'eh er ny cheau magh ec y Chiare as Feed tra v'eh goll er leeideil trooid Tinvaal liorish Geoff Cannell, eear-oltey son Kione Droghad.

Dooyrt Allan Bell, oltey jeh'n Chiare as Feed son Rhumsaa, dy jinnagh cur lesh stiagh billey elley myr lhiasaghey, dy jinnagh eh chyndaa cooishyn bunraghtoil bun ry skyn. Cha ren y lheid rieau taghyrt roie, dooyrt eh.

Ny sodjey, hirr kuse dy lhiasaghyn er billey Vainshtyr Quine goll gys bing. Myr shen, hie bing lesh queig olteynyn er cur er bun. Ver y ving magh ny briwnyssyn eck roish Mee Averil ayns daa veeilley as kiare.

Lhiasaghey Vainshtyr Rodan, leeidagh shen gys un reihys dy chooilley wheig bleeaney, ayns yn ynnyd jeh reihyssyn scarrit son y Kiare as Feed as y Choonseil Slattyssagh. T'eh gra dy vel y prinsabyl undinagh feer scanshoil. Ayns deynlaght (democracy), sleih ayns reiltys as pooar oc, lhisagh ad goll er reih ec y theay.

Ta Mainshtyr Rodan gra dy derragh y lhiasaghey paart dy leighoilid deynlagh (democratic legitimacy) da'n Choonseil Slattyssagh. Yinnagh eh shaghney streeu as chennid eddyr y daa vanglane.


RAMSEY HEALTHCARE ROW DEVELOPS Leonard Singer says the Health Minister should either resign or find herself forced from office.

Leonard Singer, eear-oltey jeh'n Chiare as Feed son Rhumsaa as oltey jeh'n Choonseil Slattyssagh nish, t'eh gra dy lhisagh y Shirveishagh Slaynt girree ass oik, er nonney lhisagh ee ve currit ass oik kyndagh rish caghlaaghyn ayns shirveishyn-slaynt fud ny h-oie ayns y twoaie. Agh y Shirveishagh Slaynt, Clare y Christeen, oltey jeh'n Choonseil Slattyssagh, t'ee gra dy vel y doilleeid er jeet rish er y fa dy vel fir-lhee ayns y twoaie er nobbal dy obbraghey ayns yn oie arragh.


REACTIONS TO PLANS FOR PORT ST MARY TOWN HALL The Friends of Port St Mary Town Hall want more information about future plans for the building.

Caarjyn Halley Balley Phurt le Moirrey, t'ad geearree tooilley fys veih Barrantee Phurt le Moirrey mychione ny plannyn oc son y troggal sy traa ry heet.

Loayrtagh son ny Caarjyn, Sean Lynch, t'eh gra nagh vel ad noi yn eie jeh troggal noa. Agh t'ad shirrey barrantys dy bee lheid y halley foast ry gheddyn sy traa ry heet.


CIVIL SERVICE 'HEAD-HUNTING' The Council of Ministers is confirming its support for plans to increase the appeal to graduates of entering the Civil Service.

Ta Coonseil ny Shirveishee feeraghey pohlldal plannyn ry hoi cleayney tooilley keimeeyn stiagh sy Chirveish Shivoil. As eshyn cur freggyrt screeut rish feysht va currit er y voayrd ec David Cannan, oltey jeh'n Chiare as Feed son Maayl, ta'n Ard-Hirveishagh Richard Corkill gra dy vel ram obbyr jeant hannah ec yn Oik Skimmee (Personnel Office). T'ad kiarail cur er yn Chirveish Shivoil dy ve smoo tayrnagh da sleih ta laccal coorse-kiartey breeoil.

Chammah as shen, ta Mainshtyr Corkill soilshaghey dy vel Coonseil ny Shirveishee pohlldal as goaill rish y scansh jeh traenal as lhiasaghey skimmee ec Colleish Shirveish Shivoil y Reeriaght Unnaneyssit ec Sunningdale ayns Sostyn.

Brian Stowell

Bretnish: Neose Seose

Ny smoo as ny smoo, ta Bretnish cheet dy ve ny chengey-valley. Agh ec y traa cheddin, ta cowraghyn ayn dy vel ee goll sheese ayns thalloo e dooie, coardail rish earrooyn coontey-pobble 2001. Ooilley cooidjagh, y choreir (proportion) jeusyn ta gra dy vod ad Bretnish y loayrt, shen y choreir syrjey neayrs 1961.

Hoilshee ny h-earrooyn veih'n choontey-pobble dy dooyrt 20.5% jeh pobble Vretyn dy vod ad y chengey y loayrt, cosoylit rish 18.5% ayns coontey-pobble 1991. Hug 28% tick sy chishtey dy ghra dy vod ad Bretnish y hoiggal. Hoilshee shoh dy vel yn earroo dy Vretnisheyryn goll seose son y chied cheayrt ayns keead blein. Agh tra ta'n ymmyd jeh Bretnish girree ayns baljyn as ayns Bretyn yiass, raad haink Baarle stiagh bleeantyn er dy henney, ta ny h-earrooyn soilshaghey dy vel ny Bretnisheyryn goll sheese ayns ardjyn ennagh sy twoaie as sy heear.

Ayns Rhondda Cynon Taf, ta Bretnish ec 12.3%, cosoylit rish 9% ayns 1991. Ayns Caerdydd (Cardiff), ta 10.9% gra dy vel Bretnish oc, cosoylit rish 6.6% ayns 1991. Ayns Gwynedd, ta'n choreir er ngoll sheese veih 72.1% gys 68.7%. Ayns Ceredigion, ta 51.8% gra dy vel Bretnish oc, cosoylit rish 59.1% ayns 1991.

Y fer-shennaghys Bretnagh y Dr John Davies, dinsh eh da BBC Bretyn: 'Ta Bretnish cheet dy ve ny chengey-valley, cha nee chengey-cheerey, as t'ee cheet dy ve ny stroshey ayns buill goll rish Caerdydd. Ayns ny bleeantyn jeih as daeed sy cheead shoh chaie, cha row agh 5% dy Vretnisheyryn cummal cheu-sthie jeh jeih ny feed meeilley veih Caerdydd. Nish, she 10% yn earroo.'

Huw Lewis, caairliagh Cymdeithas yr Iaith Gymraeg (Yn Cheshaght Vretnish), dooyrt eh: 'Ta reddyn anchasley ayns buill anchasley harrish Bretyn bentyn rish pobble as y chengey. Ta pobble Vretyn eginit jannoo reih cronnal: my vees y chengey tannaghtyn er mayrn, shegin da gagh red goll er caghlaa. Shegin dooin goaill rish nagh vodmayd coadey as lhiasaghey Bretnish aght erbee elley agh liorish polaseeyn fondagh vees stiurey cooishyn myr thieys, plannal, staydys, ynsagh as arraghey. Feayslaghyn feayr-chooishagh (half-hearted solutions) as bree currit daue ny veggan as ny veggan, cha vod oo sauail chengey myr shen.'

Dooyrt Rhodri Williams, caairliagh y Voayrd Bretnish: 'Ta fys er ve ec y Voayrd rish bleeantyn dy row yn chengey goll sheese sy heear. Ga dy vel eh scanshoil d'oltaghey yn bishaghey sy jiass, shegin dooin ooilley gobbraghey ry cheilley dy chur sthap er tooilley parail sy heear. Agh ga dy vel myn-chengaghyn goll sheese dy mooar ayns gagh ayrn jeh'n teihll, t'eh cur taitnys feer vooar dooin dy vel Bretnish goll seose.'

Brian Stowell

Cooney ry-hoi pobbleyn Bretnish ayns America Yiass

Ta Quaiyl Ashoonagh Vretin er n’ockley magh dy jed £105,000 (163000 euro) er ceau pohlldal yn Vretnish ayns Patagonia syn Arjenteen. Nee yn argid reaghey argid da fir-ynsee Bretnish veih Bretin gys Patagonia; traenal ynseyderyn Bretnagh ynnydoil as da’n lhiasaghey jeh taghyrtyn cultooragh Bretnagh.

Hig claare dy chooney son y Vretnish as cultoor ta er-mayrn ayns Patagonia, ta feeu £130,000 (202000 euro), gy kione ayns Mean Arree 2003. Ta’n claare er ve roie neayr’s 1997.

Haink ny Bretnee dy vaghey syn ard ayns 1865 as hug ad er bun baljyn lane dy vishaghey ayns shen. She yn Vretnish va’n ard aght commynicaatal, goll er ymmydey son reirey yn ynnyd, lesh yn ynsagh ooilley as shirveishyn sheshoil sy çhengey.

Agh car ny bleeantyn, haink ny smoo as ny smoo sleih as Spaainish oc stiagh syn ard as chaill ram jeusyn jeh sluight Vretin yn çhengey. Neayr’s ny 60yn anmagh, lurg ny ard-’eaillaghyn keead blein, va tooilley sym ayn er y çhengey as va coventyn smoo ayn eddyr Bretin as Patagonia.

Ta’n Whaiyl er ghra dy vel ee lane cooyl yn çhengey ayns Bretin as ren ad fockley magh tooilley argid dy chooney lhee. Agh cre ta ny vondeishyn son pohlldal yn çhengey millaghyn dy veeillaghyn ersooyl?

Ta’n Whaiyl jeean dy lhiasaghey profile eddyr-ashoonagh Vretin as ta ny kianglaghyn eddyr Bretin as Patagonia jannoo berçhagh yn daa heu. “The Patagonian communities are a unique aspect of Wales’s place and role in the world,” dooyrt Jenny Randerson, Shirveishagh ry-hoi Cultoor as Y Vretnish ayns yn fogrey. “This project will offer great opportunities for teachers from Wales to develop their experience and skills in a different setting.”

Ny s’moghey mleeaney, hug Rhodri Morgan, Yn Chied Shirveishagh jeh Quaiyl Vretin shilley er yn Arjenteen as ny baljyn ayns Patagonia, dy hoiaghey ny kianglaghyn eddyr y daa heer ny smoo formoil. Ga dy vel yn Arjenteen ayns mean geyre-ghaue tarmaynagh ec y traa t’ayn, ta shirveishee Bretnagh fakin vondeishyn tarmaynagh foddey ayns lhied yn reaghys.

Bee yn argid ny cooney vie erskyn towse dy ‘reayll yn çhengey bio ayns Patagonia, agh ta Quaiyl Vretin fakin yn argid shoh myr argid baiht vees buinn vondeishyn tarmaynagh ny smoo na vondeishyn çhengagh da Bretin.

Paul Rogers

Cur dty Phaitchey sy Scoill Lane-Ghaelgagh!

Cha nel mee credjal dy vel yn Chaisht bunnys orrin hannah! Laghyn seyrey reesht son ny paitchyn! Lhig dooin jerkal rish emshyr grianagh reesht.

My ta paitchey ayd, as eshyn ny ish aarloo dy gholl gys scoill son yn chied traa syn 'ouyir, t'eh traa dy chur sheese e ennym er y rolley jeh'n scoill faggys dhyt.

Ta paart dy phaarantyn er reih dy lhiggey da nyn baitchyn goll gys y vrastyl lane-Ghaelgagh ayns Scoill Valley Keeill Eoin. Ayns y vrastyl shen, ta ooilley ny lessoonyn jeant trooid Gaelg.

Ta ny paitchyn geiyrt er'n choorse cheddin as paitchyn elley agh t'ad gynsaghey dy loayrt, lhaih as screeu ayns Gaelg. Ta Gaelg ry-akin er ny boallaghyn as mygeayrt y chamyr. Lurg shiaghtin ny jees ta ny paitchyn toiggal Gaelg dy liooar as dy gerrid, t'ad cheet dy ve arryltagh dy chur cheb er loayrt adhene.
Ta'n brastyl shoh foshlit da paitchyn ta cummal boayl erbee er'n Ellan, Gaelgeyryn ny dyn. Fo stiurey yn Rheynn Ynsee as lesh cooney voish Mooinjer Veggey, ta'n brastyl er ve fo raad blein dy lieh ('sy toshiaght ec Scoill Vallacottier, as nish ec Balley Keeill Eoin).

Ta ny paitchyn as paarantyn jeant magh lesh y vrastyl as ta earrooyn gaase. Myr shen, s'mie lhien clashtyn yn niaght s'jerree voish yn Rheynn Ynsee dy gowee brastyl elley toshiaght ayns Meayn Fouyir. Bee shen son ny paitchyn shinney, as adsyn ayns blein jees as tree.

Bee yn daa Vrastyl Lane-Ghaelgagh soit ayns y shenn scoill, ga dy bee ad foast fo stuirey yn scoill noa. Bee'n skimmee Gaelgagh, adsyn ta goll mygeayrt ooilley ny scoillyn gynsaghey Gaelg, gobbraghey veih yn troggal shoh neesht as myr shen, bee Laare Gaelgagh noa currit er bun ayns shen.

My ta peiagh erbee geearree feddyn magh tooilley fys mychione ny brastylyn, as dy jarroo, my ta paitchey ayds as t'ou geearree cur eshyn ny ish stiagh ayns y vrastyl Lane-Ghaelgagh, chellvane er Annie Kissack, er 834844, ny post-l [email protected] son cooish veg ny son reaghey daayt son cur shilley er y vrastyl chadjin.

Annie Kissack

Bee Ammyr-Chellveeish Gaelg Albinagh Creeley Harrish y Reeriaght Unnaneyssit

Ta reiltys y Reeriaght Unnaneyssit er chur kied dy chur er bun ammyr-chellveeish vees currit da'n Ghaelg Albinagh. Bee shirveish Ghaelagh noa er ny chroo lesh pooaraghyn d'obbraghey ammyr bunearrooagh (digital) oddagh creeley fud y Reeriaght Unnaneyssit. Va shoh er ny oltaghey ec sleih ta gobbraghey son y Ghaelg Albinagh. Dooyrt ad dy row shirveishee-reiltys ayns Lunnin er chur chaghteraght cronnal gys Sheckterys Nalbin (Scottish Executive) dy lhisagh adsyn cur tooilley argid son y chengey.

Calum Mac Donald, yn MP son ny h-Ellanyn Heear, dooyrt eh: 'Ta shoh ny red feer vooar son creeley Gaelagh. Fy yerrey hoal, bee sheshaght ain oddys goardaghey claareyn dy ve jeant, jannoo ny claareyn as creeley ad dy jeeragh. As foddee yn cheshaght noa foast gobbraghey marish creeleyderyn elley, casley rish y BBC, myr ta taghyrt nish.' Dooyrt eh dy noddagh ammyr-chellveeish vees currit da'n Ghaelg Albinagh ve creeley cheu-sthie jeh queig bleeaney. Chammah as shen, dooyrt Mnr Mac Donald: 'Er lhiam dy vel currym kiart er yn Checkterys Albinagh nish dy chur erash yn argid ghiar ad veih'n Ghaelg Albinagh ayns ny jeih bleeaney t'er ngoll shaghey.'

Tra hug reiltys y Reeriaght Unnaneyssit magh e villey (bill) noa cour eddyr-insh (communications), v'eh er ny hoilshaghey eisht dy row ad kiarail cur shirveish Ghaelagh noa er bun. Nee yn billey shoh croo arreyder noa son ooilley yn ym-ysseraght (media) as bee yn arreyder shen enmyssit Ofcom. Bee offish ec Ofcom ayns Nalbin.

Brian Stowell

Coardit ec Coonceil ny Gaelgey

The New Noble's Hospital - Thie-Lheihys Noa Noble, Our New Noble's Hospital - Y Thie-Lheihys Noa Noble Ain. Bentyn rish y fer jerrinagh, bare lesh y Choonceil: 'Our New Hospital' - 'Y Thie-Lheihys Noa Ain'.

Va Julie Matthews shirrey cadjiney (standardising) ny focklyn Gaelgagh t'er 'pentagon', 'hexagon', a.m.s. Geiyrt er faaue voish Adrian Pilgrim, choard y Choonceil ny focklyn shoh:

kerrin, queigin, sheyin, shiaghtin, hoghtin, nuyin, jeihin, un-jeigin, daa-yeigin.... a.m.s.

Va Joan Caine shirrey yn Ghaelg er :

Brastyllyn Lheiltyssagh - Keep Fit Classes,
I guess that is right - Ta mee sheiltyn dy vel shen kiart, Have a guess! - Cur çheb er!

#