DHOORAGHT

Earroo 3. Yn Cheshaght Ghailckagh Mean Fouyir 1996

Er hoh diu Dhooraght reesht! Hooar mee yn screeuyn heese veih Roger Sims mysh mee er dy henney. She Ard Lioarlannee yn Thie Tashtee eshyn as t'eh ny charrey mie da'n Cheshaght as cooishyn Gaelgagh. T'eh arryltagh dy chur artyn ny screeunyn dooin veih lioarlagh y Thie Tashtee son dagh coip jeh Dhooraght 'sy traa ry-heet. Ta mee cur my wooise mooar da Roger as Eiraght Ashoonagh Vannin son cooney ry-heet.

Hooar mee yn screeuyn shoh voish Shorys y Creayrie neesht, as screeunyn elley veih. She Shorys va'n fer ren cur fys dou dy row y lheid shoh ry akin ayns y Thie Tashtee, ayns pabyryn naight yn nuyoo cheead-blein jeig. Dooyrt Shorys "Myr nee oo fakin, t'ad goaill ymmyd jeh'n chopyl (copula) mennick dy liooar ayns aght dooghyssagh as ayns aght feer Ghailckagh. Shen sorch dy Ghailck va goll er loayrt as goll er screeu ec y traa shen ayns Mannin, chammah's y laa jiu ayns Nherin as ayns Nalbin."

Ta'n Ghaelg 'sy screeuyn shoh lettrit magh er aght quaagh agh ta mee lane shickyr dy bee eh anaasagh dy liooar diu. Wahll, ta'n roie-skeeal shoh gaase ny smoo na'n screeuyn heese. Er hoh diu yn screeuyn.

Dys Editor yn Mona Herald.Yn Hoghtoo Laa, Mee Luanistyn,1834.

Vainshtyr,

- Readal yn pabyr eu yn chiaghtin chaie, hug me my ner Skylee-meal prentit ayns letteryn moarey, as va red ennagh raait my choie geal ayns Glen-willyn; agh er yn ore nagh vel monna schoil aym, chammoo ta me toiggal Baarle down ny grammar, ghow me ayns laue dy ghoal jurna, dy gheaghyn cre ny naightyn yiou as cre yinnin fagin.

Hoshiaght vegin me eck Doolish, as hink me shaghey yn Inn moar yllit Cashtal Mona, as er yn ore de re pire dy caranyn va er my casen gow me nearey dy gholl stiagh. Hink me chelleragh dys Kione Droghad, as blaik Ihaim yn keil no feer vie; ren me passal ny claghyn scelt, va jeeaghyn feer curious. Cheet shaghey Keil Lonnan, cha blaik Ihaim eh chamma as Keil Conaghyn. Briagh jeh ny mineryn eck Laxay son geal, cha dooar me coontey erbe agh jeh mine ergit. Cheet er my yourna eck Dreem-yn goshteg, hie me gys yn Rhenney, rad whoar me jough dy feen jeant jeh freagh, as ve feer vie. Hink me eisht dys thie Hom Bane, yn shen sunder, as veh insh dow de row eh mish three-feed blein ayns yn offish shen, -teh jeaghyn feer moal, agh still cooinaghtyn vie. Voish shen hie me dys Chibbyr Vaghal, as hug me lesh laane boddeil jeh ushtey marym; as veih shen hie ne dys cell Boggane Moar Gob-ne-scoot. Veh gaol e aash, as deelle me da, as hie shein cooidagh sheghey tie Bill Ungeon as mulleyen ne Clyvane dys hink shein dys billey bailiff ayn garey John Yuan Rutchard, raad hooar sheen palchey bee voish ny ferrishyn. Va sheen ooilley feer curdit, as hooar shein cable e feish, as hie shein just cha tappee as yn ghea dyn Crammag. As ghoinne veen, cren spoart va ain, as clappal bassan, as feen, as liggar, as tankaryn argit! Hink shein voish Crammag dys Eary Kelley, ayns un vinnid, raad veit shein Balla-w----, as hoar shein palceey dy podasyn as brick awin, eisht cheet dys mullagh slue ne farane, honnic shein kialteenyn yn thooie---keil Veal as cabbane bweach voar Ballyre, as honnic shein ymmodee chraghyn eck droghad ooa Glenwillyn. Eisht goll shaghey thei Juan Jairg hug shein shilley er mullagh Cronk Urley, raad vad claghtey fockley leighyn noa. Va shein nish feer toolitt, as hink shein dys yn boal vad er cloie son geal, liorish thie Jonny Sayle. Ayns shen veeit shin rish Hermit ta beaghey ayns Snawl, as hug eh red ennagh dou dy chur fo my choine dy dreamal cren ash dy gheddin geal. Ren me cordail rish yn ordys echey as tan dreamal ooilley aym ayns me chione.

Er yn ore nagh vel me abyl chynda e dys Baarle me hene tryme de geddin paagh ennagh ne janno shen as hee shieu eh ayns yn Heral yn chiaghtyn shoh cheet son teh ooilley mychione geal. Er my yurnna cheet dys Doolish, cross yn clieu, hink yn Boggane moar as yn Hermit marym dys Chibbyr-Slue-ny-maggle, as us shen scrieu yn Hermit yn dreamal.

La Mairgey Laxey, 1834. ILLIAM DHOON



Gaelg currit da Shoprite.

Hooar mee screeuyn voish yn cho-lught ta dellal rish ny soilsheanyn ec Shoprite, shirrey Gaelg er ny raaghyn Baarlagh heese voym. Vrie mee jeh Adrian Pilgrim as hug eh dou yn Ghaelg heese, as hug mee eh da'n cho-lught. Ta mee geearree clou ayns Dhooraght dy chooilley raa ny fockle noa, ta jeant myr shoh. My ta red erbee jeant ayds cur fys dou, as verrym eh ayns Dhooraght.

Why Pay More - Cre'n Fa Eeck Ny Smoo.
Lower Prices, Bigger Selection Guaranteed - Priosyn S'inshley, Raane Reih Smoo Fresh Marketplace - Margey Lesh Cooid Oor.
Serving Mann- Shirveish Mannin.
High Quality - Mieys Ard.
Low Prices - Priosyn Injil.

KIONE Y SKER

Ta'n aundyr shoh (Kione y Sker) currit da peiagh erbee ta jannoo, ny ta er n'yannoo, obbyr foays agh da'n chenn ghlare ain. Cur fys dou, roish Jerrey Fouyir, er peiagh erbee ta shiu coontey dy ve ny chooneyder ooasle da'n Ghaelg. Screeu ny chellvane rhym ny rish yn Scrudeyr, as abbyr rooin 'Quoi', as 'Cre'n fa', agh myr dooyrt mee roish Jerrey Fouyir.

Morte d' Arthur liorish Tennyson, chyndaait gys y Ghailck.


Eisht feiy'n laa ren feiyr'n cagee rowl
Ny mast' ny sleityn rish y vooir gheuree,
Derrey va'n Boayrd Ree Adha, fer lurg fer,
Er duittym ayns Lyonnesse mygeayrt nyn Jiam
Ree Adha; eisht, er-yn-oyr v'eh ny Ihottey dowin,
Hrog seose dy ghastey Bedevere yn Ree,
Ard Vedevere, fer s'jerree jeh ooill ' e Chrightyn,
As dymmyrk eh gys keeill eh, rish y vagher:
Va'n Charree brisht, as Crosh ny vrishey neesht,
Shassoo er meer dhoo dy halloo Ihome;
Er derrey heu faarkey, as er'y cheu elley
Hoie ushtey mooar, as va'n eayst lane.
Eisht loayr Ree Adha rish y Bedevere:
"Nee eiyrtys yn laajiu feasley slane
Yn commeeys share jeh Crightyn ard-ghooagh
Jehsyn ta'n seihll freayll goo. Lheid y saveen
T'ad cadley, ny deiney bynney lhiam. Er-lhiam
Nagh der nayd arragh, ec traa erbee ry-heet
Taitnys da'n annym lesh taggloo jeh aghtyn ooasle,
Shooyl mygeayrt ny garaghyn as plaaseyn
Jeh Camelot, myr ayns ny laghyn roish-nish.
Ta mee stroiet liorish'n sleih ren mee croo,
Ga dy loo Merlin dooys dy darrins er-ash
Dy reillkeayrt elley; agh Ihig da ve, cre vees!
Ta mee bwoailt dy dowin trooid my chione,
Dy n'egooishcooney, cha vaikyms'n irree-laa:
Er-y-fa gow uss nish yn cliwe Excalibur,
va my voyrn, son t'ou cooinaghtyn cren aght
Ayns ny shenn laghyn, mun-laa souree, ren roih
Girree seose magh ass mean y logh
Coamrit ayns sheeidey bane, druiagh, yindyssagh,
Greimmey yn cliwe, as kys dymmyrt mee tessyn.
As ghow mee eh, as er cheau eh gollrish Ree:

As raad erbee veem inshit ayns arrane,
Ayns traa ry-heet, bee shoh neesht er ny hoiggal.
Agh nish ny jean cumrail, gow uss Excalibur
As ceau eh foddey magh ayns mean y logh:
Freill arrey gyere, as cur lhiat fockle hym."

Eisht dreggyr Bedevere dy daaney rish,
"Cha nel eh kiart Y Ree, dt'aagail ayns shoh,
Dty lomarcan, gyn cooney, as stroietayns dty chione;
Yinnagh red beg skielley rish fer va ny Ihottey,
Foast, neems dty aghin lesh slane tappeeys;
Freillym arrey gyere, as verym Ihiam fys hood.

Shoh grait, ghow eh kesmad veih'n chabbal stroiet,
As ayns rehollys, tessyn boayl ny ruillic
Raad lhie ny craueyn trean jeh fir roish nish,
Shenn chrightyn, as geay-varrey harroo goaill arrane,
Bing's feayr, lesh floagyn-chesh, goaill kesmad sheese
Er cassanyn camstram, as gib ny creggyn creoie
Haink eh er eaghtyr sollyssagh ny logh.

Eisht hayrn eh magh yn cliwe Excalibur,
As er-y-skyn, tayrn eh, va'n eayst gheuree
Soilshagh y chemmal jeh bodjal liauyr, roie eh
As glistral gyere lesh rio noi'n chione,
Son veek ooill'n holt lesh diamonyn:
Thousaneyn drillin topaz's obbyrjacinth
Jeh cliegeenyn schleioil. Vlake eh c'houd er
Dy row e hooillyn dollit ny-neesht, myrhass eh
Ny 'Ihiam-lhiat', rheynn yn aigney skibbylt
Er-chee dy cheu, agh fy-yerrey er-lesh
Sh'are faagail Excalibur ny keill't
Ayns shen, ny mast ny clioagagh crontagh lane
Va feddan' creoie as chirrym mysh yn oirr.
As jimmee eh er-ash dy dree da'n Ree.

Eisht loayr Ree Adha rishyn Bedevere:
"Vel oo er n'yannoo m'eilkin hug mee dhyt?
Cre shen t'er nakin's c'red er clashtyn"
As dreggyr Bedevere dy daaney rish:
"O, cheayll mee thaaish y ribley ayns chuirtlagh
As'n ushtey shliee dy feie mygeayrt y chreg."

Rish loayr Ree Adha, neealloo as treih:
"T'ou uss er vrah dty ghooghys as dty ghoo
Dyn 'y choyrt sheer-reggyrt myr va cooie rish
Dty loo dy ammys 'na gollrish Cright ard-ooasle,
Son cowrey smoo shickyr v'er'n eiyrt edyr feiyr
Na coraa, er nonney gleashagh ayns y logh.
Ta shoh red scammyltagh, son fir d'insh breag;
Agh nish, gueeym ort, immee dy tappee reesht,
Myr t'ou ennoil as deyr, as jean yn nhee
Doardee mee; jeeagh, as cur Ihiat fockle hym."
Eisht jimmee Bedevere, keayrt elley magh
Tessyn y ghreeym, as hooyl eh rish y logh,
Coontey mynclaghyn druightoil, smooinaght` dowin:
Agh tra honnick eh y yindys jeh yn holt
Kys joarree as schleioil ve jeant, woaill eh
E vassyn cooidjagh, as dyllee eh lesh jeir:

"As my dy feer ceauyms yn cliwe ersooyl,
Dy jarroo nhee gyn-leagh, as feeu ard-gheill,
Dy beagh eh caillt myr shoh dy bragh veih'n theihll,
Oddagh 'er choyrt taitnys gys sooillyn ram deiney.
C'red mie hig eiyrt er shoh? my veagh eh jeant ?
Cre'n skielley neujeant? Skielley dowin dyn cur biallys,
Neayrs ta biallys y raane dy reill.
Beeagh eh mie dy chur biallys, my veeagh yn Ree briaght
Dy chur-rish nhee neu-foaysagh noi'hene?
Ta'n Ree aslaynt, as cha nhione da c'red t'eh jannoo.
Cre'n recortys na cre'n freiltagh jeh'n Hiarn
Beeagh gys traa ry-heet, agh ennal follym
As fouaghyn jeh ourys? Agh dy beagh eh freilt
Stoyrit ayns thie ennagh hashtee jeh Reeghyn trean
Oddagh fer jeeagh er, ec far-chah dy armyn,
Loayrt, "Shoh cliwe Ree Adha, Excalibur,
Jeant ec voidyn lomarcan ny logh;
Nuy blien v'ee jannoo eh ny soie ayns ny lhig
Ny mast' ny bunyn follit jeh ny chroink."
Myr shoh loayragh shenn slieh ayns traa ry-heet
Gys ooilley'n cumaltee, dy chosney arrym.
Agh c'wooad d'onnor, as lane ard-ghoo va callit?"

Shoh loayr eh, mestit lesh e chorvian-hene
As cheill eh reesht Excalibur yn nah cheayrt;
As cheimyragh dy dree eh gys yn Ree.

Eisht loayr Ree Adha, tayrn e ennal hrome:
"Cre t'ou er nakin? na cre t'er chlashtyn neesht?"
As freggyrt ren dy ghastey Bedevere:
"Cheayll mee'n ushtey shliee mygeayrt y chreg
As ribley liauyr va mastey cuirtlagh niee."

Rish dreggyr yn Ree Adha, correejiarg,
"Ah, neuvaynrey, foalsey's neuchenjal te'
Dyn ooashley, cree hraitooragh! Ugh, atreih!
Ta pooar jarrood y Ree ta geddyn baase,
Ny lhie treoghit jeh yn pooar ayns e hooillyn
Ren loob e aigney, s'leayr dou cre t'ou uss,
Son t'ou fer s'jerree jeh my chrightyn share
Ayn harragh nyn guail ny oikyn jeh ooilley.
As yinnagh oo my vrah son y holt gyn leagh,
Edyr veih saynt jeh airh, na gollrish 'neen
Preisal gyn-tort taitnyssyn ny hooill.
Foast yinnagh ferfailleil ayns currym daa cheayrt
As trass cheayrt harragh eh lesh; nish, immee Ihiat,
Agh mannagh cheauys oo Excalibur,
lrreeym seose as dty varroo lesh my laueyn."

Juan y Geill, Colby, Y Chaisht, 1981.

Hooar mee shoh voish Audrey Ainsworth. Verrym yn nah ayrn jeh shoh ayns yn nah choip jeh Dhooraght.


Fastyr Obbree

Hed fastyr obbree er cummal ec Balley Keeill Yude fastyr Jesarn, yn nah laa yeig, Jerrey Fouyir, voish 230 er y chlag. Bee yn startey ain Ihiggey er biljyn shellee as ad y ghiarey ayns kiappyn beggey ry-hoi lostey 'sy chiollagh. Foddee adsyn as thieyn oc gyn towl-jaagh ayndaue, cur ayns poagaghyn ny happyn ry-hoi nyn gaarjyn.

Cur lhiat:
Shenn eaddagh as braagyn.
Saaue ny corran ny red ennagh ymmydoil.
Cappan, as greim dy ee.
My loshtys yn aile bee tey dy liooar ayn!

My vees boirey ayn mychione yn emshir, chellvane er Juan 880386 eddyr 12 as 1.00 er y chlag.

Juan y Crellin


Quoi vees Reih Bleeaney Vananan?

Ta'n ving eu geearree veue enmyn jeh persoonyn t'er n'yannoo obbyr vie son cultoor Vannin. Eisht vermayd ennym roish y ving ta reih Reih Bleeaney Vananan. Cur fys da'n Scrudeyr.


Feailley Gaelgagh

Ta claare yn 'eailley bunnys reaghit ain nish. Son shickyrys bee tooilley fys ry-gheddyn veih ny pabyryn naight as yn radio mysh shiaghtin ny ghaa roish yn 'eailley, as foddee dy bee yn claare caghlaait bit beg car ny meeghyn shoh cheet. Er hoh diu yn claare my t'eh ec yn traa t'ayn.

Jesarn 2300, Mee Houney. Fastyr Ynsee Aeglagh Vannin. Bee shoh caa da'n aegid dy ynsaghey aghtyn kiaullee yn theay Vannin, tradishoonagh as noa-emshyragh. Hed shoh er cummal ayns Doolish (boayl ennagh!), as nee Greg Joughin as yn 'Possan Mollag' freayl rick er shoh. Foddee dy bee cuirrey kiaullee as kiaull Vannin noa-emshyragh 'syn astyr beg geiyrt er shoh, agh cha nel shoh reaghit dy shickyr foast.

Jedoonee 2400. Forum Gaelgagh. Bee caa dooin loayrt ry-cheilley mychione y Ghaelg, as resooney magh cooishyn scanshoil dooin. S'treisht lhiam dy loayree shin mychione daa chooish: Gaelg 'sy traa ry heet, as Coorseyn as aghtyn noa son ynsaghey sleih aasit. Cha nel boayl erbee reaghit foast, agh bee shoh soilshit ayns y Chloudeyrys.

Jemayrt 2600. Laa foshlit Mooinjer Veggey. Bee caa da'n theay cur shilley er yn obbyr vie jeant ec Mooinjer Veggey.

Jecrean 2700. Oie Ghaelgagh. Dy-chooilley Gaelgeyr 'sy theihll ec Ynnyd Bluckan Coshey Skylley Maayl. Kiaull, cooishyn as boayrd bee.

Jerdein 2700. Leaght Ned Maddrell. Nee Shorys y Creayrie yn leaght myleeaney ec yn Thie Tashtee, Doolish. Loayree eh mychione 'Parail as aa-vioghey y Ghaelg'.

Jeheiney 2800. Cruinniaght Ghaelgagh. Cuirrey kiaull ec y Thie Tashee. Possanyn kiaullee voish Mannin, Nerin as foddee Nalbin.

Jesarn 2900. Kiaull, Arrane as Bee. Thie oast ennagh ec traa jinnairagh
.
Giense Mooar. Daunsin, kiaull, arraneyn as y lheid. Arthur Caley as Ceoltoiri Rossa ec Thie oast Glion Helen. Ta ram sheshaghtyn er gialdin dooin argid. Ta Undinys Eiraght Vannin, Coonceil ny h Ellynyn, Eiraght Ashoonagh Vannin, Conister Trust plc, as Colught Paggad Gaal Ellan Vannin er gialdin dooin ny smoo na keead punt (dagh fer jeu)! Hig Ceoltoiri Rossa gys yn 'eailley, voish Beeal Feirshtey, as foddee dy jig ben voish Nalbin neesht.


Vel Geek-Gock ayd?

'Geek-gock' (ny 'gic-goc'), foddee dy row shen yn ennym v'ec ny shenn Yernee er yn torch dy hengey v'ec ny Goal-Ghaeil - y sleih Loghlinagh-Gaelagh va loayrt Yernish va fo smaght y chengey Loghlinagh. Ta dooinney enmyssit Nicholas Williams smooinaghtyn dy daink y Ghaelg ain hene veih 'geek-gock' va goll er loayrt ayns Mannin. Daa vlein er dy henney, va lioar vooar mychione Yernish currit magh. Ta'n lioar shoh ayns Yernish as t'ee enmyssit 'Stair na Gaeilge' ('Shennaghys Yernish'), as screeu Nicholas Williams y cabdyl mychione y Ghaelg t'ayns y lioar shoh. Sy chabdyl shoh, ta Williams screeu: 'S'leayr dy vel chengey Vannin ny sorch dy Yernish, agh eer my ta shin shaghney cooish yn aght-screeuee er-lheh, shegin dooin goaill rish dy re sorch quaagh dy Yernish t'ayn'. T'eh jannoo list jeh ny troghyn (traits) Manninagh raad nagh vel yn Ghaelg goll rish Yernish ny Albinish. Shoh kuse jeh ny troghyn listit ec Williams:

1. Jannoo faase yn anchaslys eddyr corocklyn 'keyl' (slender consonants) as corocklyn 'Ihean' (broad consonants).
2. Bentyn rish enmyn (nouns), geddyn rey rish gagh tushal (case), er-lhimmey jeh'n ennymnagh (nominative).
3. Geddyn rey rish caghlaa yn chied lettyr jeh focklyn coardail rish reillyn Gaelagh. 4. Coayl y breear seyr (autonomous verb).
5. Goaill ymmyd feer vennick jeh 'jannoo' myr breear-coonee (auxiliary verb).
6. Shaghney ymmyd y chobbyl (copula).

Ta troghyn elley listit ec Williams nagh vel imraait heose. T'eh goaill rish dy vel ny troghyn shen ooilliu ry-gheddyn ayns fo-ghlaraghyn Gaelagh hoal as wass ayns Nerin as Nalbin. Agh cha nel ooilliu ny troghyn ry-gheddyn ayns un fo-ghlare ny lomarcan, mannagh vel y fo-ghlare shen marroo ny er raad y vaase. Ayns y Ghaelg, ta ooilliu ny troghyn ry-gheddyn ec yn un cheayrt, as cha nee cowraghyn y vaase t'ayn. Coardail rish Williams, shen yn aght lesh y Ghaelg: v'ee rieau myr shen neayr's haink ee rish. As, coardail rish Williams foastagh, she yn chenn Loghlinish ren jannoo er y chengey Ghaelgagh, cha nee y Baarle. Er y fa dy re chengaghyn Teutonagh y Loghlinish as y Baarle, s'doillee feddyn magh cre'n chengey va jannoo er y Ghaelg.

Red mooar t'ec Nicholas Williams, shen y cummey neu-Ghaelagh t'ec Gaelg dy liooar t'ayns y Lioar Phadjer, chyndaait dys Gaelg ayns Ihing Phillips. Eer ec y toshiaght jehn'n chiaghtoo eash jeig, ta'n Baarlaghys cadjin dy liooar sy Lioar Phadjer, ga nagh row Baarle erbee ec y chooid smoo jeh cummaltee Vannin ec y traa shen. Cre'n aght oddagh shen y ve? Ta Williams smooinaghtyn dy re 'Loghlinaghys' v'ayn sy toshiaght, as cha nee Baarlaghys.

Shoh meer elley jeh argane Williams. Ghow ny Loghlinee toshiaght dy hoie er Mannin ec jerrey y hoghtoo eash. Abbyr dy row kuse dy Loghlinee cummal ayns Mannin mysh y traa 830 AD, as abbyr dy row ad loayrt Loghlinish ny lomarcan son daa heeloghe, as ad cur enmyn Loghlinagh er buill ayns Mannin, myr Laksaa, Rhumsaa as myr shen. Foddee, sy treeoo heeloghe dy Loghlinee ayns Mannin (mysh 900-930, abbyr), ghow ny Loghlinee toshiaght dy ynsaghey yn chengey Vanninagh (Yernish v'ayn). Ghow mec ny Loghlinee toshiaght dy phoosey rish mraane yn Ellan, as inneenyn ny Loghlinee dy phoosey rish deiney yn Ellan. S'cosoylagh dy row ny h-inneenyn Loghlinagh cliaghtey loayrt Yernish ayns thieyn ny deiney oc, agh Yernish lesh blass Loghlinagh as lesh ny marranyn veagh ec Loghlinagh. Er yn aght cheddin, deiney Loghlinagh va poost rish mraane Gaelgagh, veagh ny deiney shen loayrt Loghlinish rish ny paitchyn oc. Agh veagh ny mraane loayrt Yernish rish ny paitchyn paart jeh'n traa ec y chooid sloo. As dy beagh sharvaantyn ec ny mraane, veagh ad loayrt Yernish eddyr oc hene as rish ny paitchyn. Veagh ny paitchyn gaase seose as Yernish oc mie dy liooar, agh Yernish fo smaght Loghlinish.

Lurg tree sheeloghyn, foddee dy row tree chengaghyn goll er loayrt ayns Mannin: Yernish, Loghlinish as Yernish Loghlinit. Y sleih nagh row agh Yernish 'chiart' oc, she sleih boght v'ad, y sleih nagh beagh ny Loghlinee soiaghey veg jeu. Agh y sleih as Yernish Loghlinit oc, v'ad shoh nyn sleih-mooinjerey da ny Loghlinee, as va pooar as staydys ec ny Loghlinee. Myr sheo, veagh staydys ec Yernish Loghlinit as ny veggan as ny veggan veagh ee cosney y varriaght harrish Yernish ghlen'.

T'eh jeeaghyn dy dynsee Loghlinee Nalbin as Nerin, Yernish ec y traa cheddin as adsyn ayns Mannin, as veagh Yernish Loghlinit ocsyn neesht, voish Steornavaie gys Limmeragh. Ta shenn teks ec ny Yernee veih'n jeihoo eash, Airec Menman Uraird Maic Coisse, ta gimraa gíc-goc Gallgaidhel. S'liklee dy row ad cheet er 'beealeraght (prattle) ny Goal-Ghaeil' beealeraght ny Loghlinee Gaelagh. Ayns Nalbin as Nerin, va Yernish abyl dy 'luggey seose y Yernish Loghlinit. Agh cha dod shen taghyrt ayns Mannin as haink Yernish Loghlinit ayns Mannin dy ve Gaelg Vanninagh, coardail rish Nicholas Williams.

Gyn ourys, foddee sleih dy liooar gra boghtynid rish obbyr Williams bentyn rish y Ghaelg. Agh she stoo anaasagh t'ayn son shickyrys. Rish foddey dy hraa ta mish boirit ec yn aght ta'n chenn Ghaelg jeeaghyn cho Baarlagh. Cha nel mee gra dy vel shen ny red scammyltagh noadyr, as cha nel mee boirit mychione 'glennid' y chengey. Shoh yn ard chooish reeshtagh: ayns 1600 cha row monney Baarle ec ny Manninee. Myr shen, cre'n aght va'n stoo Baarlagh shen ry-akin sy Ghaelg screeut? Gyn ourys, ta paart jeh'n Vaarlaghys cheet dy jeeragh veih teksyn Baarlagh as, ayns y toshiaght, cha row y Baarlaghys shen ec y theay. Agh daink 'Baarlaghys' elley liorish Loghlinaghys? Row Yernish ayns Mannin 'jeant aarloo' ec Loghlinish da'n Vaarlaghys keeadyn dy vleeantyn lurg Ihing ny Loghlinee ayns Mannin?

Ta kuse jin slane skee jeh'n ooashley ta currit da ny Wiggynnee car y traa as yn aght ta neu-nhee dy mennick jeant jeh eiraght ny Celtee ayns Mannin. Haink ram jeh'n aigney shen veih kynneeaghys (racism) haink rish sy nuyoo eash jeig. Agh foddee dy vel paart jeh'n chynneeaghys shen er jeet marish geek-gock ny Manninee! Foddee dy vodmayd gra rish Caarjyn ny Loghlinee dy vel shin loayrt chengey Loghlinit as dy bee ad coontey ram jin eisht.

Brian Stowell Mean-fouyir 1996