DHOORAGHT

Earroo 31 Yn Cheshaght Ghailckagh Jerrey Fouyir 2003
Chellvane: 834844 Post L: greinney@enterprise.net Screeu rish: Thie Vaddrell, Cregneash

S’mie dy vel wheesh dy Ghaelgeyryn abyl as arryltagh artyn y screeu son y fritlag shoh. Reeshtagh ta Dhooraght lane dy voghtynid as ard-lettyraght as s’treisht lhiam dy vel red ennagh aynjee ta feeu lhiat.

Phillie OKF

Skeealyn voish Zealan Noa

Daag my naim Ellan Vannin as Purt Le Moirrey sy vlein 1951. V’eh er jeet er-ash voish yn armee lurg jannoo e hirveish ashoonagh y vlein roish shen. Rish tammylt v’eh gobbraghey myr groceyr ayns Purt Le Moirrey agh atreih cha row reddyn cheet lesh as cha row y cheet stiagh echey bishagey. Shoh va ny laaghyn traa nagh row monney obbyr ry-gheddyn ayns Mannnin as va ymmodee sleih faagail Mannin ry-hoi geddyn aaght-bea share ayns cheeraghyn elley. Smooinee my naim dy b’vie lesh shirrey obbyr liorish geddyn kied dy arraghey-magh dys Australia. As ayns 1951 daag eshyn as carrey echey Ellan Vannin. Ec y hoishaght v’ad gobbraghey da ny gowaltysn kerragh ayns Queensland as shegin dou goaill rish dy row yindys orrym clashtyn rish ny skeealyn haink magh ass ny cliaghtaghyn shoh. Ansherbee fy-yerrey ren ad reaghey dy yannoo reddyn anchasley. Hannee carrey my naim ayns Australia agh daag my naim dy hirrey obbyr ayns Zealan Noa. V’eh poosit ayns shen as t’eh er ve gobbragey ayns shen neayrys y traa shen (t’eh ny haaue nish). Er-y-gherrid v’eh er-ash ayns Mannin lesh shilley orrin.

Haink eh marish e vac, Stuart. Un laa dy row va shin ooilley loayrt mychione cultoor Vanninagh as mychione nyn eabyn dy aa-vioghey y Ghaelg. Wahll va Stuart loayrt mychione e phaitchyn. T’an poosey ec Stuart brisht nish agh un cheayrt dy row v’eh poosit rish ben Vaori. Cha row chengey Vaori ec e ven traa v’ad poosit agh ren ee goaill toishaght dy gynshaghey y shenn glaare dooghysagh Zealan Noa. Lurg tammylt hie nyn baitchyn dy scooil Vaori raad va’d abyl dy gynsaghey y chengey. Va Stuart ginsh dou dy vel ad flaaoil ayns Maori nish agh son yn chooid smoo cha nel ad loayrt y glaare. T’ad olteynyn jeh possanyn kiaullee tradishoonagh as possanyn elley kianglit seose lesh cooishyn Vaori as shoh y traa t’ad loayrt y chengey. Va Stuart gra, ec y hoishaght, dy row ymmodee sleih slane noi Maori as eabyn eigsoylagh ee dy aa-vioghey, agh nish ta sleih goaill rish dy vel y ghlare shoh scanshoil da enney noa Zealan noa.

Foddee ta’n skeeal shoh cowraghey magh dooin cre vees gollrish y Ghaelg ayns ny laaghyn ry-heet. Cha vod shin jerkal dy akin y Gaelg goll er loayrt ayns straiddyn Ghoolish gagh laa agh foddee nagh vel shoh scanshoil. Cha vod shin jannoo red erbee mychione speeideilys Baarle agh lhisagh shin ooilley ve abyl dy reayll ayns nyn inchyn daa horch dy hengey. Chengey eddyr-ashoonagh gollrish Baarle as chengey ynnydagh gollrish Gaelg. S’yndyssagh dy akin dy vel ny cummaltee dooghysagh ayns Zealan Noa er ve speeideilagh ayns aa-vioghey nyn glaare. Fodmayd ooilley ve maynrey mychione shoh as fodmayd jannoo ymmyd jeh shoh myr sampleyr mychione ny reddyn dy ve jeant cour nyn jengey ayns ny laaghyn ry-heet. Va doillee dy liooar ayn ayns Zealan Noa as va traaghyn ayn tra nagh row reddyn jeeaghyn ro vie agh liorish jeeaghyn da sleih cre cho scanschoil va nyn jengey daueyn v’ad abyl dy yannoo shickyr ny laaghyn ry-heet son Maori. Er-lhiam dy vodmayd jannoo y un red.

Adrian Cain

Turrys A.S.B. Davies gys Mannin ayns 1948

Bee fys ec Gaelgeyryn er ny skeealyn Gaelgagh braew shen hug A.S.B. Davies magh mysh lieh-cheead blein er dy henney. Er y gherrid, hooar Yn Çheshaght Ghailckagh çhaghteraght veih mac Vainshtyr Davies, Gareth, dy vriaght row anaase ain er kionnaghey lioaryn Gaelgagh v'ec yn ayr echey tra v'eh er mayrn. Agh ta doilleeid ayn: bare çhaglym-lioaragh A.S.B. Davies y reayll ry cheilley ooilley cooidjagh. As t'eh jeeaghyn dy bee shen taghyrt. Ta lioaryn ayns gagh çhengey Cheltiagh sy çhaglym as veagh eh olk eh y vrishey seose.

Çheu-mooie jeh shen, ta Gareth Davies er chur hym art va screeut ec yn ayr echey sy vlein 1948 son y Bulletin of the Board of Celtic Studies. Ta'n art shoh (çhyndaait veih Bretnish) mychione shilley hug A.S.B. Davies er Mannin ayns Mee Luanistyn1946. V'eh gindys quoi va'n peiagh s'jerree nagh row Baarle echey/eck. Hooar Henry Jenner, dooinney mooar y çhengey Chornagh, 109 dy leih ayns 1874 nagh row Baarle oc. Mysh y traa cheddin, screeu fer enmyssit Jenkinson dy row daa ven nagh row Baarle oc cummal ec y Ghlion Mooar. Smooinee Jenkinson dy row ad shoh ny Gaelgeyryn s'jerree nagh row Baarle oc. As heill yn Olloo John Rhys dy nee Bnr Keggin voish Creneash va'n peiagh s'jerree dyn Baarle ayns Mannin. Gow dty reih, my ta.

S'cosoylagh nagh vowmayd magh dy bragh quoi va'n peiagh s'jerree dyn Baarle ayns Mannin. Screeu A.S.B. Davies dy row cooinaghtyn ec Ned Maddrell er shenn chubbyl enmyssit Keggin ayns Creneash. Va'n ven Charlotte Christie roish my row ee poost. V'ad cummal ayns thie thooit er y çheu jeh'n raad goll gys Cronk ny Arrey, as cha loayragh agh Gaelg. Tra hug y fuinneyder shilley orroo gagh shiaghtin, va Ned cur Baarle er Gaelg y ven son y fuinneyder tra v'ee 'geeck' son yn arran lesh oohyn - s'goan va'n argid ec y traa v'ayn. Va shoh mysh shey feed blein er dy henney.

Ayns 1946, ren A.S.B. Davies coontey mysh feed dy loayrtee dooghyssagh: hug eh adsyn sy 'chied vrastyl'. Sy 'nah vrastyl', hug eh shenn sleih (60 - 80 blein dy eash ayns 1946) va clashtyn Gaelg goll er loayrt ayns ny thieyn oc tra v'ad nyn baitçhyn. V'eh jeeaghyn dy row ad toiggal ny v'ad clashtyn, agh cha ren ad rieau loayrt Gaelg. Ny yei shen, va raaghyn as focklyn Gaelgagh oc, as ny keayrtyn dod ad coontey ayns Gaelg.

Sy 'trass vrastyl', hug A.S.B. Davies sleih mean-eashit as sleih saa v'er nynsaghey Gaelg veih loayrtee dooghyssagh. Va Mnr Davies goaill yindys dy row dy liooar jeu shoh loayrt Gaelg dy kiart as dy flaaoil, lesh y fockley-magh kiart. Screeu eh dy row ad toilliu arrym son shoh. Va'n 'chiarroo vrastyl' jeant ass sleih va gynsaghey Gaelg. Va kiare brastyllyn Gaelgagh ayns Mannin ayns 1946: daa vrastyl ec Juan y Gell ayns Doolish, brastyl ec Captan Kinley ayns Purt ny h-Inshey, as fer elley ec Ned Maddrell as Juan y Gell ayns Purt le Moirrey. Chammah as shen, va paart dy leih prowal d'ynsaghey fegooish ynseyder. Çheu-mooie jeh Mannin, va brastyllyn Gaelgagh ayns Lerpoyll as Lunnin. Va shirveishyn-killagh Gaelgagh goll er cummal kiare keayrtyn sy vlein. Bentyn rish cur magh lettyraght Ghaelgagh, cha row reddyn mie noadyr ayns 1946. V'eh feer doillee geddyn lioaryn Gaelgagh erbee, noa ny aa-laue. Screeu Mnr Davies dy row ad creeley Gaelg er y radio ny keayrtyn 'kuse dy vleeantyn er dy henney', as dy row ad creeley sharmanys Tinvaal gagh blein. Ta shen anaasagh dy liooar. As ta shin feer wooisal son yn obbyr vooar ren Mnr Davies son y Ghaelg.

Brian Stowell

Naight Radio Vannin - 1.10.03
Shoh heese ry-gheddyn er ynnyd eggey Radio Vannin.

PENSIONER CLEARED OF MANSLAUGHTER
High Bailiff Michael Moyle said there was no prima facie evidence to put Mr Moore on trial.

Richard Benedict Moore, tree feed as nuy-jeig dy eash, v'eh currit ass e lieh dy ren eh marroo Maureen Fox, hoght-jeig as feed dy eash, va feddynit marroo ec y Thie-Oast Mannin ayns Doolish y çhiaghtoo laa as feed Jerrey Fouyir nurree. Agh ec Thie ny Quaiyllyn ayns Doolish fastyr jea va Mainshtyr Moore lhiggit jeh as seyrit. V'eh ny eeasteyr veih'n Daingean (Dingle) ayns Nerin ta ny
haaue nish.
Dooyrt yn Ard-Vaylee Michael Moyle nagh row feanish prima facie ayn dy yannoo cooish-leigh noi Mainshtyr Moore. Dooyrt y leighder echey, Pamela Pringle, dy row e lught-thie jeant feer wooiagh lesh shoh. Dooyrt ee dy row yn cliant eck er ghra car y traa dy row eh oney as dy row cairys jeant nish.

Yn credjue ec Mainshtyr Moore as e lught-thie ayns coarys-leigh cairagh ayns Mannin, v'eh er ny niartaghey. Dooyrt inneen Vainshtyr Moore nagh dod focklyn soilshaghey yn aght v'ee gennaghtyn.


PLANNING OFFICER WAS UNDER NO PRESSURE TO APPROVE MOUNT MURRAY DEVELOPMENT
Colin Magee played purely an 'administrative role'.

Colin Magee, eear-offishear plannal, t'eh er ninsh da Bing Reirey as Stundayrtyn Olteynyn y Chiare as Feed nagh row eh fo traastey as eshyn jannoo briwnys jinnagh eh lowal plannyn ny dyn da'n lhiasaghey-thieyn arganeagh ec Cronk Murray. V'eh scrudeyr y ving-phlannal eddyr nuy cheead jeig, kiare feed as shey as nuy cheead jeig, kiare feed as nane-jeig. Ren eh goaill rish dy ghow eh ayrn breeoil ayns ny h-immeeaghtyn, agh myr reireyder ny lomarcan, dooyrt eh.

Ta'n Ving jeant ass tree olteynyn jeh'n Chiare as Feed: David Cannan (Maayl), David Anderson (Glion Fabey) as Quintin Gill (Rosien). T'ad jannoo briwnys row Allan Bell connaasagh mychione y Chiare as Feed as eshyn cur ad er shaghryn ayns nuy cheead jeig, kiare feed as daa-yeig, coardail rish Commishoon Brialtys Chronk Murray.

Dinsh Mainshtyr Magee da'n Ving, 'Cha nel cooinaghtyn feer vie aym, agh ta mee credjal dy row mee lowal da lhiasaghey-turrysid ny lomarcan, cha nee skeym-thieyn.'

Ren y Ving çheet er screeuyn veih nane jeh fir-lhiasee Chronk Murray, Gary Spence. Dinsh eshyn da Mainshtyr Bell dy jinnagh eh cur lesh y skeym treeallit erash gys Nerin mannagh jinnagh y Rheynn Turrysid pohlldal y çhalee lesh toyrtyssyn, er nonney geddyn rey rish lhiettrimys va cur sthap er lhiasaghey-thieyn ec yn ynnyd. Ny s'anmagh sy vlein shen, hie ny conaantyn-plannal er caghlaa dy lowal da lhiasaghey-thieyn.

NEW DAY CARE CENTRE PROPOSED FOR BRADDAN
The proposed site is Braddan Road, on land adjacent to Leece Lodge.

Ta ynnyd noa ry hoi kiarail-laa goll er kiaddey son y Strang ayns Skeerey Vraddan.Ta yeearreydys er ny chur roish son yn ynnyd, veagh jeeaghyn mysh sleih aegey, seose gys hoght bleeaney jeig dy eash.

She Raad Braddan yn ynnyd treeallit, er thalloo faggys da Thie Leece. Veagh carlann ayn, as veagh thalloo goll er cummey. T'ad jerkal dy beagh yn obbyr er jeet gys jerrey sy vlein daa veeilley as queig. Ta laue sy phlannal er ve ec Trevor Noden, Fer-Toshee Shirveish Paitçhyn. T'eh gra dy vel eh feer treishtagh dy vow yn skeym kied-plannal.


STEAM PACKET REVIEW LIVERPOOL SERVICE
The Steam Packet is to offer daily services to Liverpool, at least up until
Christmas.

Bee yn Paggad-Bree çhebbal shirveishyn laaoil gys Lerpoyll, er y chooid sloo derrey yn Nollick. Lurg shen, nee ad scrutaghey yn earroo dy leih ta goaill ymmyd jeh ny shirveishyn. Bee ny shirveishyn shoh goaill toshiaght ayns Mee Houney lesh y lhong 'Ben Seyr Vannin' ('Lady of Mann'), vees çheet erash veih shirveish-souree ayns ny h-Ellanyn Asoar roish foddey. Loayr Hamish Ross, Stiureyder-Reirey yn Phaggad Bree, mychione shoh.

Brian Stowell

‘Sy vee shoh çheet hig feailley Ghaelgagh – yn ‘Chooish’. She feailley ny çhengaghyn Ghaelgagh eh as smoo trimmid er y Ghaelg Vannin. Mleeaney, myr bleeantyn chaie, bee cuirrey chiaull ny Gailjee er Je hEiney, 14oo Souin ‘syn Laare Ellynyn Phurt Çhiarn ec 21:30 craad hig arraneyderyn as kiaulleyderyn veih Mannin, yn Alban as yn Erin.

Ta ben aeg çheet veih’n Erin ass Inish Eer, ny hEllanyn Aran – Lasairfhíona Ní Chonaola. Ta Lasairfhíona ‘ny arraneyder sean-nós (shenn-oash) as t’ee çheet dy ve feer chadjin mygeayrt yn Europey nish. Ga dy vel yn aght eck ‘sy çhenn-oash dy dowin, ta cummaght chiaull co-emshiragh urree neesht.

Kiangle: http://homepage.eircom.net/~seannos/Biography.html

T’eh tammylt braew er dy henney nish neayrs va Máire Breatnach er ve er yn Ellan ain. V’ee cliaghtit çheet gys Yn Chruinnaght ‘sy ‘80yn cloie er y viol as t’ee mie booiagh çheet er ash reesht. Gyn ourys, ta shinnyn feer wooiagh ish çheet neesht! Hig fer maree Niall Ó Callanáin as eshyn cloie er y vouzouki.

Kianglyn: http://www.mairebreatnach.com/
http://www.nialloc.com/

S’treisht lhien dy jig Arthur Cormack veih’n Albin neesht agh ta shin foast fuirraghtyn rish Arthur feeraghey shoh. Va Arthur er yn Ellan kuse dy vleeantyn er dy henney ec yn ‘eailley Isle of Music ayns Purt ny hinshey. T’eh ny arraneyder Ghàidhlig as oltey y phossan Cliar. Ta Arthur gobbragh dy chreoi da’n Ghàidhlig neesht as t’eh ny stiureyder Fèisean nan Gàidheal (feaillaghyn Gaelg agh ny h-Albey) as bee yn cheayrt echey feer ymmydoil dooin ta mee shickyr!

Kiangle: http://www.scotlandcreates.com/cliar/biogs.htm

Ny jarrood jee laaghyn ny feailley Cooish – Jecrean, 12oo – Jesarn. 15oo Mee Houney 2003. Bee tooilley fys ry gheddyn er Radio Vannin as ayns ny pabyryn naight ayns tammylt beg ry heet as veih Phil Gawne 834844.

Peddyr Cubberley

Lettyraght yn Chruinnaght 2004

She "Fraueyn" ta'n vun-chooish da'n obbyr son Lettyraght yn Chruinnaght 2004. Ta cuirrey er ughtaryn smooinaghtyn er y chooish shen as toiggal ee ayns aght erbee by vie lhiu. S'kiart dy mie jeeaghyn er y chooish dy jeeragh ny dy lhiattagh - cha nel un aght ynrican ta kiart da ughtaryn.
Dy jarroo, shoh caa da ughtaryn cur yindys er ny lhaideryn liorish screeu mychione y chooish shoh, "Fraueyn", ayns aght anchasley ta prowal ny eieyn t'oc hannah, as foddee dy screeu 'sy Ghaelg ayns aght ta cur er ny lhaihderyn jeeaghyn er y ghlare as ny fockleyn as raaghyn ass y noa.

Ta tree ayrnyn da Lettyraght yn Chruinnaght 2004 -

(a) skeeal : jeh mysh queig milley fockle;
(b) daan arraneagh : lesh queig ronnaghyn ec y chooid sloo;
(c) haiku.

Mleeaney, va caa da ughtaryn screeu reayrt giare jeh queig cheead fockle ec y chooid smoo. Agh nish ta caa daue sheeyney magh as jannoo ymmyd jeh jeih filley y towse shen ayns screeu skeeal jeh mysh queig milley fockle. Mleeaney, ga dy row ayrn da daanyn, cha row cummey er-lheh reaghit da'n obbyr shen. Agh son 2004, she daan arraneagh ta fer jeh ny cummaghyn reiht. As she haiku ta'n fer elley.

Ta haiku ny daan voish y Çhapaan, as cha nel agh shiaght shillabyn jeig ayn. Va tradishoon mastey ny Shapaanee screeu daanyn, agh cha nel haiku er ve ny chummey er-lheh agh rish mysh cheead dy lieh vlein. Haink y haiku magh ass tree aght screeuee tradishoonagh 'sy Çhapaan.

(1) Va ny Shapaanee screeu daan giare as treead-nane shillab ayn v'ad gra 'tanka' rish. Haink ny tree linnaghyn ec toshiaght y tanka dy ve feer scanshoil.


(2) Va daan enmyssit 'renga', va sorçh dy strane dy ronnaghyn. Rish y chied ronney v'ad gra 'hokku'. Beggan er veggan, haink y hokku dy ve yn ayrn smoo scanshoil da'n daan, as va bun ny chooish sheelit ayn. Fy yerrey hoal, cha ren ad ymmyd jeh ronnaghyn elley y renga, as va'n hokku shassoo ny lomarcan.

(3) Va daan enmyssit 'haika', as she daan giare aitt eh. Va'n haika jeant seose jeh shiaght shillabyn jeig.

Mysh mean y nuyoo cheeadoo jeig, va shiartanse dy ughtaryn sy Çhapaan screeu daanyn beggey ayns tree linnaghyn, gollrish ny tree linnaghyn ec toshiaght y tanka, ny gollrish hokku ec toshiaght y renga, agh gyn ny ayrnyn elley dy chroo tanka ny renga kiart. Myr shen, she daan giare jeh shiaght shillabyn jeig v'ayn, agh cha nee haika eh, er-yn-oyr nagh row eh aitt. T'eh jeeaghyn dy row ad jannoo ymmyd jeh ny fockleyn 'hokku' as 'haika' as ren ad croo fockle noa da'n chummey noa dy ghaan shoh, y haiku.

Ta haiku jeant seose jeh shiaght shillabyn jeig ayns tree linnaghyn: queig shillabyn 'sy chied linney; shiaght shillabyn 'sy nah linney; as queig shillabyn reesht 'sy linney jerrinagh. Dy tradishoonagh, va haiku çheet er imbagh er-lheh, agh dy mennick cha row agh leeid da'n imbagh
ayn. Ta brishey (caesura) ec jerrey y chied linney ny ec jerrey y nah linney, as shen scarrey y haiku ayns daa ayrn. Ta'n daa ayrn çheet er yn un chooish (cochianglt dy cadjin rish y theihll dooghyssagh), agh ayns aght beggan anchasley veih my cheilley. Ta'n nah ayrn cur eie noa da'n lhaihder ny da'n er-eaishtee er y chooish ta'n ughtar çheet er 'sy chied ayrn.

As myr prowaltys, sorçh dy haiku ta'n eh shoh. Ta shiaght shillabyn jeig ayn, rheynnit 5/7/5 eddyr tree linnaghyn; t'eh çheet er yn Ouyr; t'eh çheet er y theihll dooghyssagh; as foddee dy vel eh jeeaghyn er y vun-chooish rere daa eie ta beggan anchasley. Ny smoo na shen, foddee dy vel red ennagh elley ry-lhaih, mychione feiyr as atçhim, mychione niart y jantagh, er un heu; as er y çheu elley, mychione surransee ta balloo, ny foddee dy vel shinyn bouyr da'n aghin oc. Ny foddee dy vel shen boghtynid dy dowin! Ec y chooid sloo, shoh diu y haiku boght shen:

S'feiyral ta'n gheay;
ta'n duillag goll lesh y troa
gyn sheean erbee.

Bobby Bob Carswell

"Horace as Taarnagh" (rere Horace, Odeyn, 1, 34)

Shoh vershoon sy Ghaelg jeh'n daan va scruit sy Vaarle ec Seamus Heaney, agh v'eshyn geiyrt er Ode sy Ladjin scruit ec Horace! Screeu Heaney y daan shoh lurg taghyrtyn y 11ed Mean Fouyir 2001 ayns ny Steatyn Unnaneysit dy America.


Foddee red erbee taghyrt. Vel fys ayd er'n aght nee Jupiter
son y chooid smoo fuirraghtyn er ny bodjallyn çhymsaghey
roish da ceau y tendreil echey? Myr te, kiart nish,
ren eh cur er y chaart-taarnagh as ny cabbil echey lhiggey

tessyn y speyr cleeir gorrym. Ren eh cur er craa y thalloo
as yn ooir plooghit fo, yn Awin Styx,
ny strooanyn cassey, slyst yn Eearvooir hene.
Foddee red erbee taghyrt, foddee ny reddyn syrjey

ve currit bun ry skyn, aggle ve currit orroosyn ayns buill ard,
ammys orroosyn v'ad jeeaghyn neose er. Ta Fortan as gob shleeuit eck
jannoo rooar neose, tayrn scred ass yn aer, jannoo gamman jeh
raipey veih tappagyn, lhiggey daue tuittym boayl erbee.

Ta'n thalloo lhiggey lesh. Ta trimmid ny speyryn
girree neese veih Atlas gollrish farkyl coirrey,
ta claghyn vullee scughey, cha nel veg aa-hoiaghey dy kiart.
Ta leoie ny cruinney as sporragyn-aileagh jannoo dorraghey y laa.

Bobby Bob Carswell

Breid Gheuree

As shoh diu y daan va scruit ec Paaie as va currit stiagh da Lettyraght yn Chruinnaght mleeaney -

Nish ta'n sniaghtey bog
As ta ny ushagyn getlagh
Laa airh as gorrym
ta geearee ve Arragh.
Ta'n laagh lheeah
Ny lhie er y thalloo,
Boayl ta ny ollee,
Bunnys cho lheeah,
Sheeyney nyn skianyn
Myr coodaghyn-vullee.

As dagh ooilley red ratçhal
Cour y ghib er,
Barney'n speyr ghorrym
As barney'n ghrian airh
Tayrn er y traa shen
Tra nee bleaystey ny gib
As sperriu streeuagh
Gamylt 'sy joan neesht
As bee ollee baney
Ry-akin reesht.

Paaie Carswell

Reejeraghyn y Voayrd Cruinn
veih Monty Python and the Holy Grail

Mygeayrt y Voayrd Cruinn
Ta shin sluggey feeyn as lhune
Ta shin daunsey ram
Gee palchey spam As pronnagyn as bagoon
Ta shin niartal, braew as dunnal
Ayns Camelot ta shin cummal

Ta shin coontey ram jeh daunsey
Ta’ eaddagh ain feer stoamey
Agh shymmey drane ta ayns arrane
Ta foddey veih so-chiaulley
Ayns Camelot ta shin graihagh
Er Opera Idaalagh

Ayns caggey ta shin abyl
Slane indefatigabyl
Eddyr shaleeyn trean, ta shin goaill arrane
Jannoo arrish jeh Clark Gable
Ayns cooyrt yn Ree Art

Ta shin ooilley gee feill-vart

Chyndaait ayns Gaelg liorish Paul Rogers

Cooish 2003

Ny jarrood dy bee Feailley Ghaelgagh ny ‘Cooish’ myr t’ee enmyssit nish goll er cummal ayns beggan ny smoo na mee. Shoh heese paart jeh ny taghyrtyn vees goll er haghyr.

Jecrean 12 oo, 7.30sa - Leaght Ned Maddrell liorish Taidhg Ó hIfearnáin, Ard-Leaghteyr y Ghaelg Yernagh, Olloo Scoill Luimnigh

Jerdein 13 oo, 7.30sa - Leaght y Ghaaue liorish Annie Kissack, Oaseir Ynsee Vooinjer Veggey, as Oie Ghaelgagh goaill stiagh cloie as keishtaghan, Halley ny Balley Beg, Balley Sallagh.

Jeheiney 14 oo 7.30sa - Kiaull ny Gael ayns Laare Ellyn, Phurt Chiarn

Jesarn 15oo, 9sa - Seshoon Kiaullee (Thie Oast ennagh sy jiass - tooilley fys ny sanmey)

Lhaih shiu beggan mychione ny kiaulleyderyn vees cheet syn art scruit liorish Peddyr. Cha bee yn Chooish cho mooar as va’n ny feaillaghyn Gaelgagh agh s’treisht lhiam dy bee ee speeideilagh dy liooar. Cha nel wheesh dy hraa er ve aym mleeaney yn Chooish y reaghey as shegin da my wooise mooar ve currit da Bill, Breesha as Peddyr son nyn obbyr ooilley.

Phillie Gawne OKF

#