DHOORAGHT


Earroo 33 Yn Cheshaght Ghailckagh Averil 2004
Chellvane: 834844 Post L: [email protected]
Screeu rish: 45 Astyl y Gharey (Garth Ave), Surby, Rosein IM9 6QZ

Shoh Dhooraght reesht cheet veih’n thie noa aym. S’olk lhiam gra nagh vel mee cummal ayns Creneash nish agh ta thie braew ain ayns Surby. Ta red ennagh jannoo er y cho-earrooder aym noght as cha noddym geddyn rey rish baarnaghy er laue yesh y duillag. Cha sym noadyr cre’n fa ta shen - dy mennick ta ny greieyn jouyllagh shoh craidey orrym. T’ad cloie clickyn orrym nagh lhishagh ve ayn - shen yn ash. S’treisht lhiam dy bee traa aym y voirey shoh y reaghey roish’n nah choip.

Red elley - sy nah choip s’treisht lhiam dy voddym cur diu fys dy liooar mychione stayd oikoil jeh’n Ghaelg ayns ny quaiylyn. Ec y tra t’ayn ta mee smooinaghtyn nagh vel fys kiart ec y Turneyr Theayagh er y chooish shoh. Hem sy chiaghtin shoh cheet ny marranysyn echey y chiartaghey! Phillie

Greinneyder Noa

Smooinee mee dy row shoh ny hraa cooie dy ghra red ennagh mychione yn obbyr ayms. Foddee ta fys eu ooilley hannah dy nee yn Greinneyder noa mish. Ghow mish toshiaght ayns Jerrey Geuree erreish dou v’er n’gobbraghey da Scoill Grammeydys ayns Rhumsaa. Ta fys ayms dy vel aigh vie ayms er yn oyr dy vel Gaelgeryn share ny mish ayn agh nee’m jannoo my chooid share ansherbee.

S’mooar ta’n obbyr ayms dy yannoo as ny keayrtyn cha nel mee shickyr raad dy ghoaill toshiaght. Ansherbee shoh heese red ny ghaa ta mee er ve jannoo as by vie lhiam jannoo sy traa ry heet.

Hoshiaght ta mee er ve screeu artyn dy chur fys mychione y Ghaelg da’n ving brandal. Foddee – gollrym pene- cha nel shiu shickyr mychione y chalee shoh va currit er bun ec ny pabyryn niaght tammylt beg er-dy-henney. Haink yn eie shoh voish nane jeh ny naighteryn ta gobbraghey da’n Vrialtagh.

Smooinee eshyn nagh vel fys ec sleih ayns cheeraghyn elley mychione nyn Ellan. Cha syms cre vees cheet magh ass y chalee shoh agh s’canshoil dy vel oltenyn y ving smooinaghtyn mychione y Ghaleg as lhisagh ve fys oc mychione cre cho scanshoil ta’n Bunscoill da enney Vanninagh.

Screeu mee art da’n Vrialtagh agh er yn oyr dy row eh currit magh ayns ny dulliaghyn jiargey foddee nagh vaik ymmodee Gaelgeyryn eh. Screeu mee eh dy hoilshagey magh da sleih gobbraghey sy Cherroo Argidoil dy vel y Ghaelg foast ayn. Ta yindys aym nagh vel fys ec delleyderyn mychione lhiasaghyn lesh y Ghaelg. Agh ny yei shen as ooilley myr t’ad abyl dy akin dy vel eh feeu freayll bio Chengey ny Mayrey Ellan Vannin (as freayll bio nyn jengey son oyryn culturoil as argidoil) cha bee adsyn noi tooilley argid currit jee. She caggey soilsheydys shoh as t’eh jeeaghyn dou dy vel shin cosney y varriaght - agh dy moal.

Ta fys aym nagh bee ooilley ny Gaelgeryn mayrney fakin mish gobbraghey marish y Cherroo Argidoil as ny keayrtyn cha nel shickyr mee hene. Agh t’ad ayns shoh as choud as ta’d ayn s’canshoil dy vel shin gobbraghey marroo.
Cooish elley nish. Myr screeu mee ayns Fockle sy Cleaysh mee ny ghaa er-dy-henney ta feme ayn son tooilley ynseyderyn as tooilley stoo-ynsee. Ta reddyn cheet lhien nish agh shegin dooin jannoo shickyr dy vel shin abyl dy gholl er ynsaghey y Gaelg ayns ny scoillyn sy traa ry-heet.

S’treisht lhiam dy vod shin cur er bun coorseyn tummey dy chooney lesh ynseyderyn as ta paart dy Ghaelg oc hannah. Myr ta ynseyderyn dy liooar ayn flaaoil sy Ghaelg fod mayd ve shickyr mychione y Ghaelg ayns ny scoillyn sy traa ry heet. Ta feme ayn cour stoo-ynsee dy chur da’n Vunscoill myrgeddyn.

Foddee dy bee Paul as Phillie gra red ennagh mychione shoh agh by vie lhiam cur er sleih dy yannoo red ennagh dy chooney. Ta feme ayn er tooilley stoo-ynsee screeuit ayns Gaelg. Cha nel traa dy liooar ec ny ynseyderyn shoh dy yannoo agh ta fys aym dy vel sleih dy liooar ayn vees abyl dy screeu red ennagh.

Bentyn rish shoh hie chaglym Undinys Eiraght Vannin er cummal shaightin er-dy-henney. Hug mee stiagh sy chaglym shoh trealtyssyn dy gheddyn greim jeh argid cour ny shaleeyn ayms. Choard y ving shoh as myr shoh she argid dy liooar t’ayn nish. Ta paart jeh’n argid shoh currit sy coontys “Writers Fund”. Myr shoh my by vie lhiat screeu red ennagh cha nel shin jerkal rhyt dy yannoo eh nastee. She argid t’ayn as lhig dooin jannoo ymmyd jeh. Myr ta anasse ayd er shoh insh da ny ynseyderyn ec y Vunscoill ny insh dou agh ny ve boirit - cha nel shin jerkal rish stoo keeayllagh jus stoo cooie da ny paitchyn.

Fy yerrey myr ta eieyn erbee ayd insh dou. Myr va mee gra she argid dy liooar t’ayn nish agh by vie lhiam clashtyn voish Gaelgeryn elley mychione shaleeyn er lheh. Cha nel mee shickyr mychione yn aght share dy vishaghey nyn jengey myr shoh s’canshoil eh dy vel sleih elley loayr rhym as cooney lhiam. Shoh my enmys as earroo chellvane.

Manx Language Development Officer
PO Box 17
Purt le Moirrey
IM99 7QJ

Post-l: [email protected]
chellvane 837966/838527 Adrian Cain

Scruteyr Moore

Cheau mee my laghyn seyrey souree 'sy vlein 2003 'sy Spaainey. Va mee ayns Madrid rish tammylt beg. Fastyr dy row, hie mee gys thie bee ayns kerrin faggys da'n vean yn ard-valley. T'ad gra Plaza de Santa Ana rish y çherrin shen, myr ta shin gra "Kerrin Noo Anna." Ta mee goaill soylley jeh ceau traa 'sy çherrin shen er yn oyr dy vel ennaghtyn feer vie ayns shen.

Hoie mee sheese ec boayrd er y çheu mooie jeh nane jeh ny thieyn bee ayns shen. T'ad gra Naturbier rish y thie bee shen er yn oyr dy vel ad gimbyl y jough oc ayns sellar ayns shen. T'ad screeu dy vel ad jannoo ymmyd jeh mynayrnyn dooghyssagh tra t'ad gimbyl y jough. Ta blass mie ec y jough oc.

Ansherbee, tra va mee my hoie çheu mooie jeh Naturbier, ghow mee tastey jeh daa ghooinney cloie kiaull çheu mooie jeh thie bee er gerrey. Va shiartanse caarjyn maroo, three deiney as three mraane, as va ny caarjyn giu Coca-Cola. Chloie fer jeh'n daa chiaulleyder er y viol as ren y dooinney elley cloie er y ghitar as goaill arrane. Ghow mee soylley jeh'n çhiaull oc. Va blayst Balkanagh ec y çhiaull, agh cha row mee shickyr jeh'n çheer cre voish va'n kiaull. Tra va'n dooinney goaill arrane, va paart jeh ny notaghyn craaynagh as feer liauyr. Va mee smooinaghtyn dy row mee er chlashtyn rish kiaull gollrish shen er y radio mysh feed bleeaney er dy henney. Ny s'anmey, va mee currit ayns cooinaght jeh kiaull Bulgeyragh as Masseydoanagh.

Va'n daa chiaulleyder red beg ny dorree na ny Spaainee. Cha row nyn strointeeyn gollrish strointeeyn Spaainagh. Va ny strointeeyn ec ny kiaulleyderyn red beg s'lhea. Cha row y daa chiaulleyder as nyn gaarjyn ard, noadyr. Va mee sheiltyn dy row ny mraane jeeaghyn gollrish shingaaraghyn.

Myr ta mee er screeu, ghow mee soylley jeh'n çhiaull. Tra va mee er gheeck er y choontey aym, hie mee gys thie bee niessey da'n thie bee raad va ny kiaulleyderyn cloie as goaill arrane. Chloie ad rish tammylt sodjey. Va nane jeh ny fieauderyn ec y thie bee shoh gollrish ny kiaulleyderyn, agh v'eh ard as cha row y stroin echey cho lhean as ny strointeeyn oc. Va'n fieauder clamit as paagit rish yn arraneyder, as hie ny kiaulleyderyn as nyn gaarjyn ersooyl.

Vrie mee jeh'n fieauder, "Cre voish ta'n kiaull?" agh dreggyr eh, "Ayns shoh." Tra vrie mee jeh mychione ny kiaulleyderyn, dooyrt eh dy row ad voish ny Steaytyn Unnaneysit. Dooyrt mee dy row y kiaull gollrish kiaull voish yn Europey Çhiar, agh dooyrt eh nagh row. Dinsh eh dou dy row kiaull ennagh ayns thie bee 'sy çherrin sniessey. Ny s'anmey, hie mee gys shen, agh va'n kiaull ayns shen voish Esamble Nuevo Tango (Possan Tango Noa), as va cost entreilys jeh jeih Euro ayns shen. Ren mee smooinaghtyn mychione yn fieauder as ny freggyrtyn shaghnagh echey. Foddee dy row eh smooinaghtyn dy row mee shirrey arreydee anleighalagh. Foddee dy row mee my Scruteyr Moore, myr v'ad gra 'sy Vaarle, Inspector Moore!

Hie mee gys Barcelona laa ny vairagh, agh hie mee er ash gys Madrid shey laghyn ny s'anmey. Hie mee er ash gys Plaza de Santa Ana, as va ny kiaulleyderyn ayn shen reeashtagh. Ny yeih shen, chloie ad kiaull Heear. S'doogh shen!

Allen Moore

Jeelane Marstrander

Va mee lhaih er ynnyd-eggey Phil Kelly art screeut mychione 'Marstrander’s Dagbok’ shen dy ghra 'Jeelane Marstrander’ er y gherrid as va mee coontey
ram jeh. T’eh symoil erskyn towse dy lhaih mychione ooilley ny buill ren
eh troailt mygeayrt as ooilley’n sleih veeit eh rish. Ta Marstrander
screeu ayns aght feer haitnyssagh as aitt as t’eh cur coontaghyn mie jeh
ny karacteyryn veeit eh rish er y turrys echey. T’eh screeut sy ghlare
ghooie echey - Norlannish agh ta Baarle ry gheddyn neesht er yn un
duillag. Shoh diu sampleyr sy Ghaelg ayms:


Haghyr Thomas Taggyrt dy ve ny henn dooinney gennal lesh faasaag vooar
ostyllagh, as ny pheiagh çhengleyragh dy liooar lesh keeall aittys vie er
bashtal. Ta e 'ockley-magh jeeaghyn dooys dy ve fastagh, cha nee sy
Ghaelg ny lomarcan agh sy Vaarle neesht (nagh vel gra monney, my ta,
er-yn-oyr dy vel yn oayllys aym jeh’n Ghaelg bunnys veg). T’eh loayrt dy
thittagh beggan; son shickyrys cha nel ooilley e 'eeacklyn echey, as t’eh
jeeaghyn dy vel paart jeh ny focklyn geddyn festit ayns e 'aasaag. Agh
choud’s ta mish toiggal ta’n Ghaelg echey gyn cron. Dinsh eh dou dy bione
da shiartanse dy arraneyn Gaelgagh jeh’n cheint nagh vod oo aa-raa dy
foshlit. Ta mee lane shickyr dy voddym jannoo ymmyd jeh’n dooinney;
shegin dou freayll eh ayns cooinaght, agh ec y traa t’ayn shegin dou goll
er lesh my cheayrt.


Un red hug orrym dy smooinaghtyn, va shen yn aght ren eh briwnys er row
Gaelg vie ec yn sleih voish v’eh geddyn fys mychione y Ghaelg ny dyn.
Veagh eh briaght jeu Gaelg y chur er focklyn gollrish laghyn y çhiaghtin
as y lhied agh son caslys share y gheddyn jeh’n schlei oc hug eh daue
'raaghyn prowal’. Deearree Marstrander adsyn Gaelg y chur orroo dy
çhelleeragh as eisht veagh fys echey row ad aghtal dy liooar lesh y
chooish ry-hoi ny studeyryssyn echey ny dyn.

Shoh diu tree jeh ny raaghyn va screeut sheese echey ayns e 'dagbok’ as
myr hee shiu, cha nel ad ooilley feer aashagh:

"I would like to go to Douglas tomorrow."

"If you don’t come at once, I shall beat you."

'I would not have beaten him if he were not a bad man’

Hug ad shen orrym dy smooinaghtyn dy vel eh aashagh dy yarrood dy vel shin
ooilley foast gynsaghey Gaelg er yn oyr nagh vel loayrtee dooghyssagh
mygeayrt dy chosoylaghey shin hene marish car y traa. Shegin dooin
cooinaghtyn dy bee red ennagh ry-ynsaghey ain mygeayrt y chorneil son dy
bragh.

Paul Rogers

Diuish ta jeeaghyn er c’red ta shiu gee...

Shoh yn fockle s’jerree er beaghey as slaynt. She feaysley eh yn firriney
y gheddyn lurg ooilley ny studeyryssyn lheeys streeuailtagh shen.

1. Cha nel ny Shapaanee gee monney sahll er chor erbee as t’ad surranse
jeh ny sloo teaymyn-cree na ny Goaldee ny ny Americaanee.

2. Ta ny Mecsicaanee gee ram sahll as t’ad surranse jeh ny sloo
teaymyn-cree na ny Goaldee ny ny Americaanee.

3. Cha nel ny Shapaanee giu monney feeyn jiarg er chor erbee as t’ad
surranse jeh ny sloo teaymyn-cree na ny Goaldee ny ny Americaanee.

4. Ta ny Iddaalee giu mooadyssyn ass towse dy 'eeyn jiarg as t’ad
surranse jeh ny sloo teaymyn-cree na ny Goaldee ny ny Americaanee.

5. Ta ny Germaanee giu ram lhuneyn as gee ram pronnagyn as sahllyn as
t’ad surranse jeh ny sloo teaymyn-cree na ny Goaldee ny ny Americaanee.

EIYRTYS:
Ee as iu red erbee saillt.
T’eh jeeaghyn dy re loayrt Baarle ta’n red ta marroo oo.

Paul Rogers

Daunsin Ceili 'sy Ghalliu

Va Caarjyn Daunsin Ceili Nerin currit er bun ayns 1996 as she yn cheshaght ashoonagh cultooragh arryltagh t'ee son cur er e hoshiaght daunlin ceili Yernagh neuchohirreydagh da sleih jeh dy chooilley sheeloghe. T'ad jannoo shoh liorish reaghey brastylyn daunlin ceili, keirdlannyn, coorseyn ynsee as keimyn son fir as mraane ynsee as oieghyn daunsin ceili enmyssit Feer Cheiliyn. Ta ny smoo na 10,000 peccee dagh blein goaill ayrn ayns taghyrtyn ny sheshaght.

Cha nel agh Caarjyn Daunsin Ceili Nerin ta ny sheshaght ashoonagh gobbraghey er freayll bio daunsin possan dooghyssagh Yernagh as shen daunsin ceili. Ta ny daunsyn shoh goaill stiagh High Cauled Cap, Walls of Limerick, Sweets of May, Eight Hand Reel as daunsyn dy liooar elley. Ta obbyr jeant dy arrylyagh as cha nel yn cheshaght cosney ping veih tashtyn argid cheumooie.

Ta Caarjyn Daunsin Ceili Nerin cur cuirrey diuish ooilley as annase eu er daunsin dooghyssagh ny cheeraghyn Celtiagh dy heet gys nyn gione shiaghtin cummaltagh ashoonagh jeh daunsin ceili Yernagh ayns Colleish Noo Moirrey, Galliu, Nerin veih 6 oo - 8 oo Mee Luanistyn 2004.

Bee aaght ry-gheddyn ayns troggalyn yn ollooscoill. Bee daunsin ceili ayn Feer Cheiliyn, leeaght, shirveishyn crauee as coorse ynsee dauesy ta geearree ve nyn ver ny mraane ynsee. Bee costys neu-gheyr currit er y chione shiaghtin goaill stiagh daa oie L&BT ayns shamyr lesh premee as dagh lhongey as dagh taghyrt ry-gheddyn.

Tooilley fys ry-gheddyn veih'n scrudeyr ashoonagh Eilis Ni Mhearrai, 39 Raad Moyne, Ranelagh, Balley Aah Cleeah 6, Nerin.
www.ceilidancing.com. Chellvane (00353) 1 4982422.

Phil Gawne

Nearys yn tra ren mee goaill toshiaght ayns y startey shoh ta ram sleih er ve briaght jeem (Peddyr Karran son y chooid smoo!) dy reaghey feailley da’n Ghaelg. Fy-yerrey ta red ennagh reaghit-bunnys ansherbee. Hed kione shiaghtin Ghaelgagh er cummal ayns Mee Boaldyn. Gowee ee toshiaght moghrey Jesarn 22 Boaldyn as hig ee gy kione moghrey Jydoonee.

Shegin dou goaill rish nagh vel mee rieau er n’yannoo red ennagh my shoh as er y fa shen ta mee shirrey eieyn as cooney. Ta mee jerkal dy bee brastlyn goll er cummal son y chooid smoo agh bee taishbynysyn ayn myrgeddyn. Bee soilsheen ny ghaa ayns ny pabyryn as foddee dy vodmayd jannoo red ennagh son ‘Shiaght Laa’ as Radio Vannin myrgeddyn. Verrym cuirrey da ynseyderyn gobbraghey ayns Scoillyn Vanninagh er yn oyr dy nee eh scanshoil dy vel fys oc mychione y Ghaelg.

Fy-yerrey hed y cooish shoh er cummal ‘sy halley ayns Dalby as bee shamyryn lhiabbagh ayns y Vallacallin. Ta mee jerkal by bee giense ennagh goll er y oie Jesarn shen as foddee dy bee fir ny ghaa geearree dy hannaghtyn yn oie. Myr shoh nod sleih ginsh dou my by vie lhieu shamyryn ny dyn?

Chellvane orrym er 837966 ny 838527 son tooilley fys.

Adrian

Riddles - William Cashen’s Manx Folk lore
currit magh 1912 (S. Morrison ed.)

Guess c’red t’ort as ny ennee oo ort, cha nee craue nyn grauanyn, ny renaig nyn olt

Ennym dooinney

Kione ny bio ayns beeal ny varroo, Tree cassyn erskyn ny kione,
As daa chass dys y thalloo

Dooinney lesh phot er e chione

Kiare roie, kiare ny hoie, Jees jeeaghyn, jees geaishtagh
jees yeealley yn moddey, As yn moddey geamey

Booa

Myr yeeagh mee harrish boalley chashtal my ayrey
Honnick mee yn marroo cur lesh ny bioee ersooyl

Lhong

Quoid duirn as uiljyn ta er mummig dty vummig,
ben dty shan’er, as dty warreee?

Cha row urree agh daa uillin as daa ghoarn

#