DHOORAGHT

Earroo 4 Yn Cheshaght Ghailckagh Mee ny Nollick 1996

'Sy Chamyr Aarlee

Sollaghyn.

(Bee Shenn Vannin.)
S.Mylvoirrey, Purt ny h-Inshey.
"Dy yannoo mess dy hollaghan, gow lane bowl ny jees dy veinn corkey. Cur y veinn ayns pot-oghe ny ayns pan er yn aile as freill chyndaa y veinn gys te creoit ayns y cullyr ruy. Eisht cur y veinn ayns claare; cur sollan as pibbyr lesh cramman dy eeym ayn dy chur blass er. Eisht cur ghaa ny tree dy vowlyn jeh anvroie ny broit harrish y veinn, as chyndaa as mestey eh gys t'eh lhiantyn dy-cheilley ayns crammanyn. Eisht lhig da shassoo son tammylt; eisht lhieen seose y claare lesh vroit gys t'eh thanney dy liooar dy ve shirveishit magh ayns plateyn er y voayrd. Ta shoh lhongey follan son deiney."

Carroo Fuinnit.

Mr W.J.Cain, Doolish.
1 charroo.
2 lane-spein-boayrd dy chinniegyn arran.
1 lane-spein-tey dy pharslee myn-ghiarrit.
1 ooh veg.
1 awnse dy eeym.
1/4 pynt d' ushtey.
Minniag dy lossreeyn villish.
Pibbyr as sollan.
Glen, screeb as niee yn eeast; jean pronney marish y chooid elley jeh ny reddyn er-lhimmey jeh'n eeym, as cur shoh stiagh 'syn eeast as whaal seose eh. Cur eh ayns claare-stainney smarrit dy mie, deayrt yn ushtey mygeayrt-y-mysh as cur yn eeym er y vullagh ayns meeryn veggey. Lhig da fuinney mysh un oor.

Puiddin Ooh.

Bnr Camaish, Purt ny h-Inshey.
2 ooh.
Pynt dy vainney millish.
2 cappan dy flooyr.
Red beg dy hollan.

Mest ad dy-cheilley gys t'ad ooilley fud-y-cheilley, as gyn crammanyn; eisht kiangle eh seose ayns aanrit, faastit ass ushtey cheh, as spreiht lesh flooyr. Cloie son oor, as ee lesh aunlyn millish.

Aunlyn millish. Thannee daa lane spein jeh'n tooslagh (heose), lesh daa naggin dy vainney millish. Cur huggey un awnse dy eeym as milljee eh lesh shugyr. Lhig da cloie rish un vinnid.

Hooar mee ny eieyn lhongee shoh voish lioar enmyssit 'Manx Cookery Book of Favourite Dishes' clouit 1908, as reaghit liorish Sophia as Louisa Morrison. Aynjee ta cabdil mychione bee Vannin, as yn ayrn smoo j'ee scruit ayns Baarle as Gaelg. Ta marran ny ghaa er ve kiartit aym (er lhiam!) as s'treisht lhiam dy vel shen cooie diu.

1

Draneyn as Arraneyn

Hooar mee ny focklyn shoh voish peiagh ennagh, traa ennagh. Cha's aym nish quoi v'eh ny cuin v'eh, agh shoh ny focklyn.
Chirree Dhooey
Chirree dhooey, nagh vel ollan eu?
Vainshtyr, Vainshtyr ta cooid veg
Cooid son y vainshtyr as cooid son y ven
As cooid son y ghuilley beg ta baghey er shen.

Tree Lughee Doal
Tree lughee doal, tree lughee doal,
Jeeagh orroo roie, jeeagh orroo roie,
V'ad cloghey geiyrt er ben eirinagh,
Va giarey nyn fammanyn faasaagagh,
Nagh vaik shiu rieau red cho yindyssagh
Myr tree lughee doal.

Ayns Manjoor Yn Ollee
Ayns manjoor yn ollee, ayns ynnyd jeh clean,
Hug nyn Jiarn Oikan Yeesey E chione beg as veen
Yeeagh rollageyn soilshey er y voayl v'eh ny lhie,
Chaddil Chiarn Oikan Yeesey er y choonlagh dy mie.

Ta Yeesey er ny ghoostey, gyn keayney erbee,
Ec coraa ny ollee ta g'eamagh son bee
Ta mee guee ort Hiarn Yeesey, jeeagh orrym veih Niau
As tannee dy-kinjagh marish ooilley sheelnaue.

Tannee marym Hiarn Yeesey, faggys dou dy bragh beayn,
Dty ghraih dy ve orrym trooid ooilley my laghyn,
As bannit ta ny paitchyn fo coadey dty ghraih,
Derrey veesmayd ayns Niau mayrt dyn goll arragh veih.

Ta mee cur my wooise dasyn ren screeu ny focklyn heose. As nish, carvalyn elley er ny hyndaa ass chengaghyn elley.

Nollick Ghennal diu ooilley
Nollick Ghennal diu ooilley,
Nollick Ghennal diu ooilley,
Nollick Ghennal diu ooilley
As Blein Vie Noa.

Quoi ta'n lhiannoo aalin?
Quoi ta'n lhiannoo aalin
ayns y vanjoor ny lhie?
Quoi s'lesh eh?
Nagh jesh eh?
T'eh ny lhiannoo beg meen.

She Yeesey yn lhiannoo aalin
As eshyn ny lhie ayns manjoor.
Ta Yeesey lhiams
ta Yeesey lhiats
Ree ny ree'ghyn, Mac Yee.
2

MOOINJER VEGGEY

Cliaghtey Aile

1. Cliaghtey tra vees fys ayd dy vel aile 'sy thie.

Cur smaght er ny paitchyn chelleeragh.
Cur ny paitchyn lhiat fo coadey dys y voayl mustyr 'sy voayl cloie.
Fow magh vel ny paitchyn ooilley er ve coontit 'sy voayl cloie, as cur fys da'n 'er-oik aile toshee.
NY LHIG DA PEIAGH ERBEE GOLL STIAGH 'SY THIE, AS NY IMMEE STIAGH OO HENE, DERREY VEES KIED CURRIT DHYT VEIH'N CHIRVEISH MOOGHEY AS SAUAIL.
NY FUIRREE DY HYMSAGHEY'N CHOOID AYD NY COOID NY PAITCHYN ER Y RAAD MAGH.

2. My vees aile feddynit ayd:

TREIG YN THIE CHELLEERAGH.
CHELLVANE ER Y CHIRVEISH MOOGHEY AS SAUAIL, EARROO 999. TA CHELLVANE AYNS HALLEY ENTREILYS Y SCOILL. CUR YN ENMYS SHOH DAUE:

'BRADDAN SCHOOL LODGE, BRADDAN SCHOOL.'

Bee shoh ymmydagh diu my vees aile ec Mooinjer Veggey yn nah cheayrt ta shiu ec nyn dhie oc.Ta coip jeh'n chowrey shoh ayns Gaelg as Baarle ry-akin er cooyl ny dorrysyn ec Thie Vooinjer Veggey, Braddan.

Morte d' Arthur

Liorish Tennyson, chyndaait gys y Ghailck.
Yn nah ayrn.

Eisht dirree Bedevere dy tappee's roie
Dy ghastey lheimyragh ny dreemyn, as huitt
Mastey ny shiunyn mooar, as ghreim eh yn cliwe
As wheeyl dy niartal, cheau eh; Va'n doagan mooar
Tendreil y yannoo ayns sollyssid ny h'eayst.
As chentyn runt mygeayrt, dettyl eh ayns arc
Orraghit myr rimmeig, jeh Lossan y Twoaie
Ry-akin raad ny inshyn riojit gheuree craa
'Syn oie, lesh feiyryn ard ny marrey hwoaie.
Myr shoh, ayns chent, huitt sheese Excalibur :
Agh roish my venn eh'n eaghtyr, dirree roih
Coamrit ayns sheeidey bane, druiagh, yindyssagh,
As haare eh liorish holt, as chrie eh mygeayrt
Tree keayrt, as hayrn eh fo eh ayns y logh.
As dy ghastey hie'n fer elley gys y Ree.

Eisht loayr Ree Adha, tayrn ny s'chee e ennal :
"Nish heeym veih dty hooillyn d'el yn obbyr jeant,
Loayr magh; Cre t'ou er chlashtyn as er nakin?"
3
As freggyrt ren dy ghastey Bedevere:
"Y Ree, ghooin mee my hooillyn, er aggle yinnagh
Ny claghyn lhiettal my chooish; son cha naik mee rieau,
Cha vaikym boayl erbee, gys yiowym baase,
Ga veign bio choud as troor dy gheiney bioyr,
Lheid y mirril mooar as y holt ayns shid.
Eisht lesh daa laue cheau mee eh 's wheeyll eh ;
Tra yeeagh mee reeshtagh, cur my ner, va roih
Coamrit ayns sheeidey bane, druiagh, yindyssagh,
Haare eh liorish yn holt, as chrie eh mygeayrt
Three keayrt, as hayrn eh fo eh ayns y logh."

As ren Ree Adha freggyrt, tayrn ennal creoie:
"S'faggys my chione; te traa dy veign ersooyl.
Jean lhean dty gheayltyn dy ghoaill seose my hrimmid,
Ymmyrk mee gys yn oirr, agh t'aggle orrym
Ta'n lhott er'n gheddyn feayr, as yiowym baase."

Loayrt shoh veih'n paymad, dirree eh dy lieh
Dy dree, lesh guin, lieh-lhie er e roih'
As jeeaghyn trimshagh, lesh sooillyn gorrym lhean,
Myr ayns co-caslys. Ersyn Bedevere
Hug graih lesh arrys, trooid e yeir,
As baillish eh er loayrt, agh foast cha dooar eh goan.
Eisht goaill kiarail, as croymmey er un ghlioon,
Harrish e ghaa gheaylin, hayrn eh e laueyn lag,
As girree, dymmyrk eh trooid y rullic eh.

Agh, myr v'eh shooyl, va'n Ree pandoogh dy creoie,
Myr fer ta gennaght tromlhie er e lhiabbee
Tra veagh'n thie lane balloo. Myr shoh dosnee'n Ree,
Myntaggloo jannoo ayns e chleaysh, "Jean siyr,
Er-lhiams d'el eh ro anmagh's yiowym baase!"
Agh jimmee y fer elley bieau, veih dreeym gys dreeym,
Coamrit lesh e ennal, as jeeaghyn, myr v'eh shooyl
Ny smoo na dooinney er ny croink 'sy rio.
As cheayll eh 'n diunid er-gooyl, as yllagh ard
Roish; deiyr e smooinaght hene eh gollrish sleean.
Harmane e eilley chirrym ayns ooigyn feayr,
As skortyn gennish, 's ooilley kiare as jesh
Y fingan dhoo, tarmane mygeayrt, myr hoie eh
E chassyn er gib jeh creg feer shliawin; feiyral
Birragh-bwoailt lesh crankal boynyn steillyn,
As doltattym, cur my ner yn logh sheer-rea!
As gloyryn foddey eayst y gheuree.

Eisht honnick ad, kys haink ayns shilley barge,
Dhoo myr cooat oanluckee, veih oaie gys jerrey,
Foue; myr v'ad goll sheese, hug ad my ner
D'row laareyn ooilley chiu lesh feallagh stoamey;
Goon dhoo, breid ghoo, myr ashlish, 's lioroo shoh
Three ben-rein lesh atteeyn airh; as dirree voue
Un eam er-creau, hug er ny rollageyn meekey.
As myr dy beagh eh un choraa, angaish
Dy ghobberan, gollrish geay ta screeagh
Fud ny h'oie 'syn eaynagh, raad nagh jig un 'er,
Na daink eh, neayr's hie'n seihll shoh wass er croo.
4
Eisht ren y Ree tassane: "Cur mish 'sy varge,"
As haink ad gys y varge: Ny mraane-rein shen
Heeyn magh nyn laueyn, goaill yn Ree, lesh jeir.
Agh ish, va girree ny s'liaurey na caagh elley,
As s'bwaaie, hug ish e chione ny lhie er e glioon,
As feasley e vayrn myn-vrisht, as chiow e laueyn,
As dyllee er ry-ennym, gaccan ard
As faarney jeiryn sharroo noi e oaie,
Schimmeigit lesh fuill ghoo: va 'e eddin bane
As gyn-daah, gollrish yn eayst ta fiojit,
Bwoailt lesh goull ny h'Arragh oor my-hiar,
As ooilley yn eilley lhurgagh spreiht lesh bineyn
Veih'n chah; as ny skeogyn gial as sollysagh
Va jannoo e vaaish dy yeeagh' myr irree ny ghreiney,
Ard veih'n stoyll reeoil, - V'ad chirrym lesh joan;
Er-nonney cass't ayns gib, as croghey lag,
Mestit lesh yn aase ard-ooasle va chemmal e veillyn.
Eisht, gollrish colloo lhieggit, lhie yn Ree:
Cha nee myr'n Adha shen, lesh shleiy ec fea,
Veih jilg gys bayrn, - rollage dy chaggey-cloie,
Lhiggey tessyn y vagher ec Camelot, as hoiagh er
Roish sooillyn ny mraane-ooasle as ny Ree'ghyn.

Eisht dyllee ard as daaney Bedevere:
"Y Hiarn as Ree, cre'n ynnyd hem's nish
Dy cheiltyn jeh my hooillyn as my ghruaie?
Son heem's nish dy-feer baase ny shenn-irriney."
Tra hug dagh moghrey lesh ard-taghyrt ooasle
As hug dy chooilley haghyrt lesh ard-chright.
Cha nel y lheid er ve neayr's lheeid yn soilshey
Ny shanst'ryn crauee marish gioot jeh myrrh;
As nish, ta'n slane Boayrd Runt dy bollagh lheieit,
Va keayrt cochaslys jannoo'n theihll shoh trean,
As mish, y fer s'jerree, gimmeeaght gyn sheshaghtyn,
Ta laghyn grouw mygeayrt y moom, as bleeantyn,
Mastey fir elley, joarree, 's smooinaght noa."

Eisht dreggyr Adha veih'n varge dy dree:
"Ta'n chenn reill caghlaa, cur ynnyd gys y noa,
'S ta Jee cooilleen' Eh-hene ayns shimmey aght
Er-aggle vhill un chliaghtey mie yn seihll.
Gerjee uss-hene; cre'n gerjagh t'aynyms nish?
Ta my vioys ec kione; as ooilley shen t'aym jeant
Dy jean Eh aynsyn-hene sheer-ghlen, agh uss,
Mannagh vaik oo my eddin arragh, gow
Padjer er my hon. Ta tooilley liorish padjer jeant
Na'n seihll shoh smooinaght' er. Lhig da'n choraa ayd
Girree myr farrane er son aym oie as laa.
Son kys ta fir ny share na kirree 's goair
Ta boand'rys bea ghoal cheusthie jeh nyn gione,
My shione daue Jee, agh nagh drog laue ayns padjer
Nyn son hene, as son oc ta gra roo carrey?
Myr shoh, ta'n slane seihll runt, ayns dy chooilley aght
Kianglit lesh geuley airh mysh cassyn Yee.
Agh nish, Slane Lhiat, Hem's er thurrys liauyr
Maroo shoh t'ou fakin, - my hem dy feer -
(Son t'ooilley m'aigney bodjallagh lesh dooyt,)
5
Gys y ghlion inshey jeh Avilion,
Ayns shen cha duitt ny frass, ny sniaght' ny rio,
Na choiee sheidey gaal; agh t'ee ny lhie
Ayns lheeantyn dowin, slanejeant, lesh faaieyn vess,
As lhaggyn biljagh, chroonit lesh faarkey souree,
Raad yiowym couyral jeh my lhottyn gyere."

Shoh dooyrt eh, as y barge lesh maidjey-raue as shiaull,
Eisht ghleash veih'n oirr, myr ollay cleeauit lane,
Ta goaill un charval feie roish e baase,
T'ee craa e clooie ghlen, as goaill yn roayrt
Lesh cassyn dhoo. Rish tammylt liauyr hass Bedevere
Aa-vioghey cooinaghtyn, gys va'n barge
Jeeaghyn myr cron dhoo noi oirr y vadran.
As er y logh ren keayney lheie ersooyl.

Juan y Geill, Colby, Y Chaisht, 1981.

Screeuyn voish y 'Mona's Herald'

Ta'n screeuyn shoh goit voish yn 'Heral' va clouit er y chiaghtoo laa as feed, Mee ny Nollick, 1833.

PLEDEILYS EDDYR DAA VANNINAGH DOOIE.

[Juan as Illiam meeiteil.]
Juan - Tou cheet.
Illiam - Ta. Tou uss cheet neesht.
J.- Ta moghree fihn ayn.
I.- Ta shen ayn, agh ta tra mie rastagh harrish ain.
J.- Ta dy jarroo. Geayll oo jehn lhong va trait laa chaiee mooie jeh kione Yerby?
I.- De ve shicker, - nagh row eh sy fabyr.
J.- Cren pabyr tou us goaill?
I.- Ta ga na three jin goaill yn Heral eddyr shin; as shimmey oor plesal te cur orrin ceau; te cur shiaghe yn traa, chouds te ginsh jeh ny reddyn ta goll.
J.- Ta Juan Bowyr as mee hene goaill y Sun eddyr shin. Taa wite pleat jeant ayn er y gherrid shoh my chione y Chiare-as-Feed - wite jinglerys.
I.- Hoh! Ommijys leh - jus ryd dy lieeneyn duillag.
J.- Ta ny smoo na shen ayn. Vell oo toiggal ad?
I.- Tad mie doillee lhiam ny cheayrtyn, fooast strow hene dy vel me laanvie.
J.- Insh dou cre tan fogle lhiauyr shen meanal, Rebrezentashyn. Tad gusal mennic eh, agh cha vel y cheeall my chione cre te meanal.
I.- Cha sayd cre Rebrezentashyn! Tou dty voght glen ny yei, mannagh sayd cre Rebrezentashyn. Jeeagh sy Dicksinnerry, ghooinney, as yiow jeeragh eh. Vel Dicksinerry ayd - foddee nagh vel - yeeaseeyms nane dhyt.
J.- O ta shann unnane aym ny lhie er y latt ayns shen sthie, agh ta ny duillaggyn eic faggys ooilliu reabit assjee; agh yioym un ogle aynjee fooast - nee un duillag shen.*
I.- Cre shiu dhyt boirey? Injyms mee hene dhyt, ghooinney. - Rebrezentashyn - ta shen fer shassoo ayns ynnyd fer elley. Tan Heral shassoo er dy lhisagh sleih jannoo leighyn dy phlesal ad hene, cha nee fagail dan Kiare-as-feed ad. As dy jarroo ta mish me hene goaill toshiaght dy leaystey red beg bentyn daue. Nagh beagh eh foddey share dooin stroak ve ain ayns ny cooseilyn oc? Shen myr tadyr ayns Sosthyn. Ta dagh skeerey cur stiagh dooinney ayns yn ynnyd oc; dooinney rheit lioroo hene. As nagh mie veagh eh dy voghe shin kied voish y Ree dy rei dooinney ayns y skeerey ain, fer veagh toiggal feme y skeerey, as myr shen veagh fondagh dy charail leighyn fondagh dooin.
J.- Cha vel mee gobbal. Nish hene tad taggloo jeh gobbal kied da ny hirrinee ta shin ayn cur
6
pudaasyn ass cheer; as ta fys mie ain ooilliu er dy vel shoh ryd feer neuchreeney; son cren phrice yiow nish er yn arroo? As cren aght nee yn Thennys y maal? Er son feme cha bee ayn; yiow main palchey voish Nolbin, as shen ayns tra giare, lhig da gennid ve ayn na dyn; agh ta fys ain er un red, bee curnaght voish ny cheernyn mooie lieeney stiagh orrin, as freayll sheese price yn arroo myr boallagh eh. Myr shen nagh bee chynce eddyr faagit dooin.
I.- Tan irrin ayd. Craad yiow sleih argid ec y tra tayn dy eek ny feeaghyn bleeaney oc ? Agh bee eh ny share da ny leighdaryn.
J.- Wahll, wahll, cha vel shoh agh un ryd ny yei, agh shimmey ryd tayn.
I.- Shohn whashtyn, vel eh lowal dan Chiare-as-feed janoo leigh erbee fegooish consent y theay? Ernonney lhig daue ve rheit liorish y theay, as eisht veagh dagh skeerey as chynce eikey son cairys; son oddagh ad eisht janoo stiagh rish y dooinney mooar oc hene er dy choilliu oyr jeh egin foshlit na feme erbee oddagh ve reaghit liorish leigh noa.
J.- Veagh shoh resoonagh, dy ghra yn chooid sloo jeh. Agh cre shiu taggloo? Cha vow mayd nyn aigney!
I.- Kys sayds son shen? Foddie dy now.
J.- Beggan! Tan Kiare-as feed as sneih currit orroo, as tad gra dy vel ad corree, as dy vel paart jeu hene scrieu ayns y Sun cha keoi as dy beagh ad dy feer baanrit.
I.- Cha voddyms credjal shen - ta sins smoo ayndoo na dy ghoaill olk rish yn irriney, shickyr. Ta fys mie oc er nagh re noi oc hene myr deiney erlheh tan chooish bentyn, agh daue myr Khingleeidee yn theay, as shen y fa cha vel eh agh quashtyn ta bentyn da resoon chadjin, chamoo vel eh madyr erbee dauesyn agh dys vondeish y cheer; cheumooie jeh shen, dy beagh ad currit ass oik mairagh veagh eh dys y vondeish oc hene, son haueagh eh cost daue cha nee beggan, goll dys Balleychashtal myr whilluen goar dys bwoaillee. Ec y chooid smessey veagh ad myr vadyr - as eer bentyn da nyn oashley oddagh eh ve ny share, son oddagh ad, whillin as ta feiu, ve rheit ass y noa. As lurg ooilliu quoi sfondagh veagh son y visnis nad hene.
J.- Cha sayms bwo, agh hee main cre jir yn Heral tra hig eh. Ta mish coondey lane jehn Heral. Ta mee treeall goaill eh son y nah raie. Yeeasee oo dou eh, as yeeasyms y Sun dhyts. Bee plea dewil goll son shiaghtinyn.
I.- Dyn dood cha vod ad ve feeagh.
J.- Tou us er cheu yn Heral.
I.- Ta mee goaillrish dy vel, as cha nee fegooish resoon. Ta ooilliun sleih son eckey. Eie stiagh myr tou goll shiaghey, as jeeaghyms dhyt ee.
J.- Feer vie, my vees tra aym neem gyllagh er raad bac.
*Va Fockleyr Cregeen er chee goll er clou ec y traa va'n screeuyn shoh screeuit.

My wooise mooar da Eiraght Ashoonagh Vannin as Shorys y Creayrie

son cooney lesh y chooish shoh.

Ta 'Kione Jiarg' er chosney 'Kione y Sker' myleeaney.

Hooar Leslie Quirk (far-ennym Kione Jiarg) 'Kione y Sker 1996'. Myr ta fys eu hannah, ren Conister Trust plc gialdyn dooin paart dy argid dagh vlein dys jerrey yn thousane bleeaney shoh, son aundyr bleinoil. Ta'n aundyr shoh (Kione y Sker) currit da peiagh erbee ta jannoo, ny ta er n'yannoo, obbyr foaysagh da'n chenn ghlare ain.
Bea Leslie - Haink yn clein echey ass Purt ny h-Inshey, as va ram Gailck ec y warree echey. Va enn echey er Padjer y Chiarn ass y Ghailck roish ass y Vaarle! V'eh ruggit er 30oo, Mean Fouyir, bunnys 82 bleeaney er dy henney, as va far-ennym echey 'Kione Jiarg'. Va braar echey 'Kione Dhoo' as shuyr echey Noreen. Hooar 'Kione Dhoo' baase lurg y chaggey agh ta Noreen foast bio as beaghey ayns 'Thie Corrin', Purt ny h-Inshey.
Va'n ayr echey er y cheayn, as haink eh dy ve 'Ard Vainsteyr' ayns bree as shiaull. V'eh gobbraghey da'n cho-lught 'Blue Funnel' as shiaulley ass Lerphoyll. Myr shen v'eh er Leslie goll gys y vun-scoill ec Crosby, er-gerrey da Lerphoyll rish tammylt. Lurg kuse dy vleeantyn hie'n clein Quirk er-ash dys Ellan Vannin, as v'eh er Leslie goll gys y scoill ec Ree Illiam.
7
Cha ren eh coontey monney jeh er chor erbee!
V'eh troggit lurg shen ec Ballan'Ayre as va 'Kione Dhoo', 'Kione Jiarg' as Noreen gobbragh myr nyn n'eirinee, Noreen freayll rick er ny kiarkyn. Tra v'ad ec Balla n'Ayre va Gaelgeyryn foast er mayrn ayns Purt ny h-Inshey as er y cheer as va sym mooar er Leslie, e vraar as e huyr er y Ghailck. Hie ad gys y vrastyl ec Caesar Cashen (va ruggit as troggit ayns Dalby). Myrgeddin, haink ad nyn guaiyl sleih elley as sym oc er y Ghailck - Markys Braide, ChalseMooar y Craine, Illiam y Radlagh, Walter as y lheid. Roish y chaggey, hie Leslie, Chalse, Markys as Illiam y Radlagh gys yn Erin as daa-wheelyn oc, as va turrysyn yindyssagh er y raad gys Kione Saile as baljyn elley er y Jiass. Keayrt elley hie Leslie as Illiam Mac y Teiyr gys Co. Fermanagh er y Twoaie. Haink sym er Leslie er Yernish. Chammah as shen, hie eh gys y Vretyn, raad v'eh gobbraghey rish kuse dy vleeantyn, as haink sym er er y Vretnish!
Phoose Leslie Ealish lurg y chaggey as eer myr shen hie ad er turrysyn cooidjagh gys y Nalbin as Nerin. Tra hooar Ealish baase, bunnys daa vleeaney yeig er dy henney, va Leslie faagit ny lomarcan ayns Purt Chairn as lane arryltagh dy chooney lhien ec Thie ny Gaelgey, va currit er bunec yn earish shen, as shinyn shirrey er Wardoon.. T'eh foast beaghey ec y chenn thie-oast, 'Y Dhonnag' as gobbragh da'n chengey.
Va Leslie ny eirinagh ayns Balla n'Ayre as lurg shen Balla Wattleworth, agh haink argid dy ve goan as ve ersyn gobbragh er ymmoddee reddyn. Rish tammylt v'eh gobbraghey da Doug Faragher gimman car-laadee son y cho-lught echey. Va ram caarjys eddyr Leslie as Doug neayrys y traa shen, as ta Leslie foast jannoo e chooid share dy chooney lesh Shoyagh, ben-treoghe Doug.
Cha row Leslie son tummey stiagh dy dowin ayns grammar agh va, as ta, lane fys as sym echey er fockley magh chengaghyn. Ta graih echey er focklyn, eer focklyn Baarlagh! T'eh ny spotcheyr agglagh, as t'eh dy kinjagh jannoo spotch jeh chengey erbee as dy mennick jannoo brock jeu!
Juan y Crellin