DHOORAGHT


Earroo 5 Yn Cheshaght Ghailckagh Mayrnt 1997


Mayrnt
"Ta'n Vayrnt chionney as y nah vee fanney."
"Yn faiyr hig magh 'sy Vayrnt hed stiagh 'syn Averil."
"Share craght ve er y cheer na Mee ny Mannan cheet stiagh meein."
Ta 'Mee ny Mannan' ennym elley currit er y vee shoh.


Sheshaghtyn Celtiagh Dy Liooar!


Vel fys ayd er ooilley ny sheshaghtyn Celtiagh t'ayn? Cha nod shen y ve. S'cosoylagh dy vel oo er chlashtyn mychione yn Cohaglym Celtiagh (cultooroil) as y Commeeys Celtiagh (politickagh). As s'cosylagh nagh vel oo er chlashtyn veg mychione sheshaghtyn elley ta gobbraghey dy jeean son ny Celtiee voghtey. Agh t'ad ayn, my ta, t'ad ayn kiart dy liooar.

Cre mysh Sheshaght Filmyn as Çhellveeish ny Celtiee? Shoh sheshaght dauesyn ta jannoo filmyn as feeshagyn ayns ny çheeraghyn Celtiagh. Goll rish y Cohaglym Celtiagh, t'ad reaghey feailley dagh blein ayns nane jeh ny çheeraghyn Celtiagh coardail rish rolley ta reaghit rolaue. Nurree, va'n 'eailley ayns Bretin, as mleeaney bee ee ayns y Chorn. Cha bee ee ayns Mannin er y fa nagh vel çhaghter Manninagh er bing yn çheshaght. Ny smessey foast, cha row Mannin eer ry-akin er y chaslys-çheerey sy lioaran va currit magh ec yn çheshaght nurree!

Tra phrow Scoill Ard Phurt ny h-Inshey dy gheddyn feeshag Vanninagh taishbynit ec Feailley 1997, cha ren shen taghyrt. Hoshiaght ooilley, va'n 'eeshag currit maroosyn veih'n 'ard Albinagh'. Eisht, va 'rouyr feeshagyn' çheet veih'n 'ard Albinagh' dy lowal da'n fer Manninagh goll er taishbyney. Er y chooid sloo, bee Lhiass-Ard-Ynseyder y scoill ard stiurey seshoon-obbree ec yn 'eailley mleeaney.
Mannagh vees 'fo-strughtoor fillym as ymskeaylley dy liooar'('sufficient film and broadcasting infrastructure') ec Mannin, ta bing yn çheshaght shoh gra, bee eh doillee geddyn çhaghterys ashoonagh da Mannin er bing Sheshaght Filmyn as Çhellveeish ny Celtiee. Gyn ourys, cha nel monney fys ec y sleih shoh er Mannin. Agh ta'n niart ocsyn as mannagh vees Manninee jannoo red ennagh cha beemayd cosney veg.

Sheshaght Cheltiagh elley, shen Pobblyn Celtiagh. Va shoh currit er bun ayns Nerin dy hayrn ry-cheilley thieyn-tashtee as ynnydyn-eiraght ayns ny çheeraghyn Celtiagh. Son y chooid smoo, ayns y toshiaght, va Tara co-obbraghey marish Machynlleth as geddyn cooney veih sheshaght elley ayns Manchuin. Va ynnyd-eiraght ayns Nerin twoaie goaill ayrn neesht, agh cha row monney graih eddyr twoaie as jiass sy skeeal shoh.

Ga dy vel Pobblyn Celtiagh kiarail cur cultooryn Celtiagh er nyn doshiaght, t'eh jeeaghyn dy vel ad creck 'eiraght' as cooid 'eiraght' erskyn dagh red elley. Red argidoil vees ayn. Ta Pobblyn Celtiagh er phrowal dy hayrn Mannin stiagh syn obbyr, agh cha nel Eiraght Ashoonagh Vannin jeean er chor erbee. Va un çhaglym ec Pobblyn Celtiagh ayns Thie-Tashtee Vannin kiart dy liooar, agh cha daink red erbee beayn ass bentyn rish Mannin. T'eh jeeaghyn nagh vel Eiraght Ashoonagh Vannin shirrey son lheid y cho-obbraghey shoh.

Nish, ta Pobblyn Celtiagh kiarail sheeyney yn obbyr oc dys y çheer vooar Oarpagh. Er y gherrid, ta sleih er doiggal cre cho niartal as ta eiraght ny Celtiee er y çheer vooar. Chammah as shen, t'eh anaasagh dy vel Pobblyn Celtiagh er reaghey çhaglym sy Chorn ec yn un traa as
1
Feailley Filmyn as Çhellveeish ny Celtiee. Ta Coonseil Chountee y Chorn goaill ayrn sy çhaglym shoh, dy chur turryssid chultooroil er e toshiaght.

As ta feedyn dy heshaghtyn Celtiagh elley ayn, feiy ny cruinney. Chammah as çhengaghyn, shennaghys as politickagh, t'ad currit da kiaulleeaght, daunsin as dy chooilley nhee oddys oo smooinaghtyn er. Bee tooilley jeu çheet roo liorish yn Eddyr-Voggyl. Ayns America erskyn ooilley, sleih ta beggan keoi (ny ass nyn geeall dy bollagh, foddee), t'ad goaill ymmyd jeh'n 'ockle 'Celtiagh' ny smenkey as ny smenkey. Myr sambyl beg jeh shen, va fer ennagh ayns California cliaghtey cur hym earishlioaryn dy 'idraghtyn (to prove) dy daink çhengaghyn sleih dooghyssagh America veih ny Celtiee.

Son y chooid smoo, cha nel fys erbee ec ny h-olteynyn jeh un çheshaght dy vel ny sheshaghtyn elley ayn. Ta peiagh ny ghaa sy Chohaglym Celtiagh gaccan dy lajer dy vel shin ayns lheid y stayd shoh. Agh shen yn aght, as foddee dy vel eh slayntoil myr shen. Caghlaa y raa creeney Yernagh, 'Cha nel sheshaght Cheltiagh myr yn çheshaght ayd hene'.

Brian Stowell

Sittyr y choyrd-oard as sittyryn elley ayns lught-thie ny sittyryn-coyrd.
Hooar mee shoh voish Séan Brádaigh, as hooar eshyn eh voish dooinney enmyssit Jirí Klenha va cloie sittyr er droghad ayns Praag, Yn Checkoslovak. Cha sym cre voish hooar yn cloieder sittyr eh.

Ec toshiaght y cheead, roish my row recortyssyn, jyskyn cumir as radioyn ayn, cha dod oo clashtyn kiaulleeaght mannagh row uss berchagh dy liooar dy eeck da ny fir-chiaullee ayd hene! Hug shoh er sleih gynsaghey dy chloie greieyn-kiaullee, ny dy ghoaill arrane, as shimmey oie vaynrey va ceaut as sleih kiaulley.

Son shickyrys, cha nel schlei-chiaullee mooar ec dy chooilley pheiagh, as myr shen va greieyn-kiaullee ayn va aashagh as tappee dy ynsaghey dauesyn nagh row bannit lesh schlei. Nane jeh ny greieyn shen, shen yn sittyr-coyrd ny yn sittyr Americanagh. Anchaslys eddyr shoh as sittyr classicagh, shen dy vel pabyryn dy ve currit fo ny strengyn lesh ponkyn dy yeeaghyn dhyt cre ny strengyn dy phluckey. Goll trooid ny ponkyn ta linney, ta goaill toshiaght lesh side dy yeeaghyn y raad dhyt as eh cowrit lesh earrooyn dy hoilshaghey magh ny coyrdyn cooie.

Ta sorchyn anchasley jeh ny sittyryn shoh ry gheddyn as ad mooar ny beg, lesh cummaghyn anchasley, lesh strengyn-bingys ta unnaneagh ny dooble, lesh lieh-hoanyn ny fegooish oc. Ta'n earroo dy 'trengyn-bingys croghey er yn torch dy hittyr. Ta keint neu-chramp jeh'n torch undinagh goll er jannoo 'sy Ghermaan y laa t'ayn jiu.

Greie shareit dy chaghnoil, shen sittyr y choyrd-oard, ny Mynvandalyn Fischer. Ta'n ennym shen ersyn er y fa dy vod ny bwoaillaghyn-oard bieau sheeanal myr mandalyn. V'ad jannoo y greie shoh roish y Chied Chaggey Mooar. Shiartanse jeu va jeant, v'ad goll rish pianney beg (y claasagh-pianney), ny eer co-ghreie lesh y veer-coyrd jeh sittyr sniemmit lesh ny coshallyn as builg-heidee jeh harmonium. Ayns mynphiannaghyn-sittyr, oddagh oo goaill magh y boayrd-mair as pluckey y greie lesh dty veir. Tra va'n greie goll er cloie, va'n boayrd-mair jeant fondagh lesh daa 'reeney dy lhiettal skirraghtyn.

Sorch elley, y Claasagh-Viol, ersyn va bow ymmydit dy chloie y carr as va coyrdyn goll er mairaghey er yn aght cadjin. Va coyrdyn arpeggio ec ny sittyryn-claasagh Aeoleeanagh, lesh far-chlaasagh laue as boyrd-laue fuyghagh oc lesh lhiettalee felt ry-hoi mooghey sheean ny strengyn neu-chooie.

2
Shimmey cummey as shimmey mooadys t'ec sittyryn ny oardyn obbrinagh, lesh, ny fegooish lieh-hoanyn. Ocsyn ooilley va sheeyney dy ghaa hoghtagh as co-kiaull dy choyrdyn arpegiotit. Eer ad shoh, va pabyryn oc lesh kiaull theayagh dy lhiggey dauesyn nagh row heose lesh y chiaulleeaght ad y chloie. Ren Paul Reissner y greie shoh y haraghey ayns 1919 dy lhiggey da cloie er rybban va bwoaillit lane dy huill myr organe-barril. Va'n sittyr Triola shoh goll er jannoo voish 1920-25.

Er y fa dy nee seihll elley t'ayn nish ta goll dy tappee, goaill arrane as cloie y sittyr, ta'n ynnyd oc er ny ghoaill liorish yn chellveeish, radio as cloieder-recortys. Ta dooghys kiaulleeaght y phobble er ny chaghlaa as s'lesh lught y jeeanid kiaulleeaght y theay. Nish, ta ny greieyn braew shoh er n'gholl magh ass as ta'n chooid smoo jeu coontit dy ve shenn as quaagh.

Y doilleeid obbree smoo hug orroo goll sheese y liargagh, shen dy vel feme ayn dy hioonaghey ram strengyn car y traa, erskyn ooilley er y fa dy vel y sheean dooghyssagh (cronnal as cruinn) croghey er chioonaghey ta slane kiart.

Y greie shoh ren y recortys shoh, ta 92 'treng echey, as foddee eh tannaghtyn ayns chioon my t'eh goll er cloie son shiartanse dy ooryn gyn scuirr.


Oaseir Lhiasee - Screeuyn voish Peddyr Karran OKF.



Shoh screeuyn voish Peddyr Karran, va currit magh da ny sheshaghtyn, possanyn as brastyllyn Gaelgagh er y cheyoo laa as feed, Toshiaght Arree. Nagh vel y Ghaelg echey feer vie!

Mysh shiaghtin er dy henney ec Thie Chibbanagh, y Braaid, hie chaglym er cummal ry-hoi loayrt mychione crooaght startey noa son Oaseir Lhiasee. Haink Joan Caine, Peter Karran OKF, Phillie Kelly, Brian Stowell as Phillie Gawne gys y chaglym as va un aigney oc dy beagh lheid y startey shoh feer foaysagh da'n chengey ain. Choard y chaglym dy lhisin screeu rish dy chooilley heshaght as possan Gaelgagh, cur fys daue mychione briwnys as coyrle y chaglym, as shirrey orroo dy chur dou nyn smooinaght as coyrle oc er y chooish.
Shoh briwnys as coyrle y chaglym:

1. My saillin lhiasaghey yn chengey ain as greinnaghey sleih dy yannoo ymmyd jeh'n Ghaelg er fud ny cheerey ain, shegin dooin cur er bun startey noa dy chooney lesh ooilley ny possanyn, sheshaghtyn, sleih as Rheynnyn y Reiltys ta cur eab er bishaghey y Ghaelg.

2. Cha row ourys erbee ec y chaglym dy vel obbyr dy liooar ayn son tree ny kiare Oaseiryn Lhiasee gobbraghey dy jeean lane emshyragh lhiasaghey ny cooishyn Gaelgagh er son dy bragh, agh s'baghtal dauesyn v'ec yn chaglym dy begin dooin troggal ram argid boayl ennagh. Dy firrinagh cha nodmayd jerkal rish ny smoo na 5,000 dagh blein son yn obbyr shoh. Myr shen, lhisagh shin shirrey argid dy chur da Oaseir Lhiasee nee gobbragh shey ooryn jeig dagh shiaghtin ec y chooid sloo, as nee cosney 5,000 dagh blein, lesh bargane-faillee rish daa ny tree bleeaney. Dy beagh yn startey shoh vondeishagh da'n Ghaelg yinnagh shin smooinaghtyn er mooadaghey yn traa nee'n Oaseir gobbragh dys slane shiaghtin.

3. Haink daa choyrle ass nyn smooinaght ain er y chooish smoo doillee, as shen quoi vees yn Oaseir freggyrtagh da.
  1. Lhisagh bing ve cummit ass sleih voish dy chooilley heshaght as possan as anaase oc er y chooish, as nee y ving shoh freayll rick er yn Oaseir. Va'n chaglym coontey dy beagh lheid y ving shoh feer vie ry hoi soilshaghey dy chooilley smooinaght jeh ny sheshaghtyn Gaelgagh, agh er lhien dy beagh gaue ayn dy beagh lheid y ving ro veydlagh as dy jinnagh yn Oaseir ceau e hraa dellal rish y ving gyn traa dy obbraghey er cooishyn Gaelgagh.
  2. Lhisagh yn Cheshaght Ghailckagh ny Caarjyn ny Gaelgey (as adsyn ny sheshaghtyn Gaelgagh smoo) freayll rick er yn Oaseir. Cha beagh smooinaghtyn jeh dy chooilley heshaght
3
soilshit cha mie, agh cha beagh yn Oaseir kianlt seose lesh rheynneydys (bureaucracy) noadyr.

4. Ta gaue ayn dy derragh yn Oaseir eab er obbraghey er rouyr dy chooishyn as cooilleeney veg, mannagh beagh claare-obbree shickyr currit da. Choard y chaglym dy lhisagh yn Oaseir gobbraghey er daa chooish vooar bentyn rish lhiasaghey y Ghaelg. T'ad shoh:

A) Ynsagh da sleih aasit as paitchyn roish scoill, goaill stiagh:
- cur cooney dauesyn ta cummal brastyllyn fastyr, coorseyn kione shiaghtin, coorseyn laa as y lheid; cooney lhieu lhiasaghey as jannoo coorseyn noa as stoo noa son ny coorseyn;
- soilshaghey as cur er yn un cheim ny brastyllyn, coorseyn as taghyrtyn;
- reaghey semineyryn, leaghtyn as coorseyn-ynsee son fir as mraane ynsee ta geearree jannoo foays da nyn schleiyn-ynsee as chengagh;
- cooney lesh Mooinjer Veggey cur er bun possanyn ayns buill elley er yn Ellan as cooney lhieu jannoo stoo ynsee son nyn bossan;
- cur fys mychione staddyssaght, keeayl chionnit ny Yernee as ny Albinee, as skeealyn elley ymmydoil dauesyn ta greinnaghey yn Reiltys dy vooadaghey yn earroo as sorchyn dy choorseyn Gaelgagh son sleih aasit as paitchyn.
B) Toshiaghey, cummey as troggal argid, goaill stiagh:
- toshiaghey as soilshaghey Gaelg vio da'n Reiltys, delleyderyn as theay Vannin:
- toshiaghey as soilshaghey Gaelg Vannin er fud ny cheeraghyn Gaelgagh elley, as ronsaghey shaleeyn eddyr Gaelgagh co-eeckit;
- shirrey argid voish delleyderyn, sheshaghtyn giastyllagh, Reiltys as sheshaghtyn eddyr-ashoonagh, myr sampleyr Oik Oarpagh ny Myn-Chengaghyn;
- cur cummaghyn myn as faaishnysyn mychione dy chooilley chooish bentyn rish lhiasaghey y Ghaelg. Myr shen beemayd ooilley gobbraghey er cooishyn cosoylagh, mannagh beemayd gobbraghey er ny cooishyn cheddin. Veagh cummaghyn-lhiasee myn feer ymmydoil tra yinnagh yn Oaseir, ny peiagh erbee elley, shirrey argid 'sy traa ry-heet.

Shimmey cooish-lhiasee Ghaelgagh elley oddagh shin smooinaghtyn er, agh er lesh y chaglym dy bee ynsagh, as toshiaghey as soilshaghey, ny cooishyn lhisagh yn Oaseir Lhiasee gobbragh er ec y toshiaght.

Gura mie eu son smooinaghtyn er y chooish shoh. My ta coyrle erbee eu er ny eieyn shoh, cur-shiu fys dou roish yn chiaroo laa, Mee Averil, my sailliu. Hed chaglym elley er cummal er yn chied laa jeig, Mee Averil, ec Thie Chibbenagh, as neemayd resooney magh yn chooish shoh ec yn chaglym shen. Tar-shiu gys y chaglym my ta shiu geearree cooney lesh y chooish shoh.

Peddyr Karran, OKF.


Yn Chaglym Manninagh, 27oo, Mayrnt, 1914.
Hooar mee fys mychione y nah chruinnaght jeh'n Cheshaght Ghailckagh voish art beg v'ayns Brialtagh Vannin. Hug Illiam Kelly fys dou dy row y lheid ayn.

Hie ee er cummal ec Thie-ee Vac Allister, Straid Victoria, Doolish. Gow ee toshiaght lesh lhongey beg as va shoh yn Kaart-Bee:
Sollaghyn; Arran Curnaght; Arran Corkey; Arran Praase; Arran Oarn; Caashey; Bonnag dy Churranyn; Berreen Rass; Smuir Smeyragh; Binjean; Cooish as Jaagh.

Va shoh Ordyr yn Ghiense - "Arrane Ashoonagh dy Vannin," ooilley; Goan liorish Mainshtyr y Chaglym, Mnr H.Percy Kelly; Arrane, "Juan y Jaggad Keeir," Benainstyr-aeg Vanda Quayle; Arrane-jees, "Ellan Vannin," Benainstyryn Curleod as Royston; Cooish, Yn Fer-lhee Marshall as Mainstyr Dodd; Cochiaull, "Ta Traa Goll Thie," Ny Paitchyn; Arrane, "Yn Vannish Vanninagh," Mainstyr H.P.Kelly; Goan, Mainstyryn J.Moore as William Cowley;
4
Arrane, "Illiam Dhone," Benainstyr-aeg E.Creen; Toyrtyssyn da ny Paitchyn, Mainstyr G.F. MacLucas; Arrane, "Yn Dhreem Lang," Mainstyr Illiam y Cubbon; Arrane-jees, "O Halloo nyn Ghooie," Benainstyryn Curleod as Royston; Arrane, "Marish ny Fiddleryn," Mainstyr Juan y Creen; Arrane, "Mannin," Mainstyr Rickard Lace; Cooish as myr shen liorish yn Cheshaght voish Purt ny h-Inshey, Benainstyr S.Morrison, Benainstyr Corkill, Mainstyr Cashen, Mainstyr J. Moore, as Benainstyr-aeg Quirk; Arrane, "Mona Machree," Mainstyr S.Cubbin; Taggloo, Mainstyryn Juan y Creen, Illiam y Kissage; Arrane ny Keltyn, Ooilley.
Shoh paart dy goan v'ayn:

Araid y Chaairliagh - Mraane ooasle as gheiney seyrey, ta mee feer wooiagh dy vel eh er ve kiarit ec yn cheshaght vanninagh, dy chummal giense-kiaullee elley myleeaney. Haink yn chied veeiteil ain nurree lhien dy mie, as nee shiuish va kion-enish ec y traa shen freill ayns cooinaght dy row eh yn yeearree ain dy jinnagh yn chooish shoh cheet dy ve co-chruinnaght bleeaney. Te cur taitnys dou noght dy akin sheeloghe aeg nagh vel eh jarroodit, as dy vel ad dy gheddyn leaghyn son yn schlei oc ayns ynsagh yn ghlare vanninagh. She ayns ny paitchyn dy vel yn jerkalys ain son ny traaghyn ta ry-heet, as my neemayd failleil dy chuirr ayns ny aignaghyn oc yn rass mie, cha bee eh traa foddey derrey vees yn ghlare ain jarroodit as meeiteilyn myr shoh ooilley-cooidjagh ec kione. Shegin dou gra myr-geddin dy vel meeiteil jeh'n keint shoh ooghyr vie da nyn gaarjyn aegey. Ta caa oc noght dy chlashtyn chengey ny mayrey Ellan Vannin veih ny meillyn ocsyn va cliaghtey dy yannoo ymmyd jeh veih nyn aegid myr nyn ynrican aght dy loayrt ry-cheilley. Cha row rieau caa lheid shoh aympene dy heey gys meeiteil raad va Gailck er ny loayrt, as nee yn sleih aeg gyn dooyt cooinaghtyn er fastyr myr shoh, as nee ny lessoonyn t'ad ginsagh nish tannaghtyn foddey ayns ny aignaghyn oc. Ta paart jeh nyn shenn carraghyn ersooyl eer er-dyn nurree, as ta mee shickyr dy vel shin ooilley feer trimshagh son baase jeh Mainstyr Cain ren wheesh dy chooney lhien er yn oie giensal shen. Shegin dou cur booise diu son cuirrey mee reesht dy ghoaill yn stoyll-drommey. Ta mee coontey eh onnor mooar as bare-lhiam dy veign ny s'cooie er y hon. Ta'n kaart-kiaullee liauyr as bee shiu goaill foddeeaght dy chlashtyn yn feallagh ta cheet my-yeih, er-lheh ny shenn caarjyn ain ta er jeet raad liauyr voish Purt ny h-Inshey dy ve marin.
Ta mee geearree da'n cheshaght Vanninagh bea liauyr as aigh vie.

Araid Venainstyr Morrison - Te feer taitnyssagh dy ve ec giense Manninagh dy chlashtyn yn chenn ghlare Gaelgagh loayrit, as harrish ooilley shen dy akin ny paitchyn ny vud ain _ te jeeaghyn nagh vel yn ghlare goll dy gheddyn baase foast.
Ta mee shickyr dy vel shuish paitchyn er n'ghoaill lanetaitnys ayns ny lessoonyn Gaelgagh eu, as lhisagh shiu ve moyrnagh dy vel enn eu er red ennagh jeh glare nyn ayraghyn dooie. Te er ve chengey Edard Christian, as Illiam Dhone, as ooilley ny Manninee dooie - ard as ynsit, ayns ny laghyn ta er gholl shaghey, as ta shiu ny share dy vel enn eu er y ghlare.
Ta shin ooilley ayns shoh jerkal dy jig shiu er nyn doshiaght lesh yn ghlare derrey vees shiu slane ynsit, as jannoo ooilley ny oddys shiu dy ynsaghey eh da paitchyn elley tra nee shiu gaase seose dy ve mraane as deiney.

Araid Venainstyr Corkill - Te cur lane taitnys dou dy ve ayns shoh noght, as dy akin whilleen er jaglym cooidjagh dy chooney lhien dy reayll seose yn chenn ghlare ain hene. Tra ta ny sleih aegey as ny paitchyn streeu dy gheddyn greim er, lhisagh shin jannoo ooilley ny oddys mayd dy chooney lhieu as greinagh ad er nyn doshiaght. Foddee eh ve foast myr cliegeen aalin mysh y wannal oc nagh vod ve goit voue. Ta dy-chooilley ashoon moyrnagh jeh glare yn cheer eck hene. Cha der mayd geill da ny floutyn ta shen geddyn noi yn Gaelk. Adsyn ta ceau ad cha nod ad loayrt yn ghlare ad hene, as cha vel ad laccal feallagh elley dy loayrt eh. Ta lane reddyn jeant nish nagh vel ymmydoil ny vondeishagh. Ta'n ghlare Ghaelgagh yn toghyr ta ny shenn ayraghyn ain er n'aagail dooin nagh vod ve goit voin. Lhig dooin, eisht, jannoo ooilley yn siyr oddys mayd dy gheddyn voish ny sleih shinney, roish my jed ad roue, yn sheean cair dy loayrt eh. Un cheayrt te caillit ta cailt son dy bragh. Te nane jeh ny reddyn s'doillee da ny ynseyderyn nish dy chur yn Clayst cair er y ghlare dy loayrt eh. Agh lesh meenid as jeeanid ta mee jerkal dy vow mayd yn varriaght.
Ta nyn garrey Gaelgagh ren arraneys as kiaulleeaght dooin ayns shoh blein er-dy-henney ersooyl harrish yn awin. Ta nane lurg nane goll roue, as yn Gaelk cair goll maroo. Nagh lhig
5
dooin ve lhag-chreeagh agh goll er nyn doshiaght derrey vees ooilley yn obbyr cooilleenit. Nee mayd eisht faagail yn obbyr da ny feallagh elley dy reayll seose as dy ynsaghey yn ghlare da ny sheeloghyn ta ry-heet.

Benainstyr Corkill ABOO !
"Juan as yn dooinney marrey," liorish Caesar Cashen.
 Mysh keead blein er-dy-henney va dooinney ayn as yn ennym echey Juan. As hie eh dys yn traie dy yeeaghyn son partanyn, as myr v'eh ronsagh fud ny creggyn haink dooinney marrey seose ass yn ushtey rish lhiattee yn creg. Dooyrt eh rish Juan, "Cur partan dou?" "Cha derym partan dhyt, edyr," dooyrt Juan, "t'ou abyl tayrn palchey partanyn dhyt hene." "Cha vel," dooyrt yn dooinney marrey, "cha nel mee abyl dy hayrn nane meehene." As dooyrt yn dooinney marrey rish Juan, "My ver oo partan dou, cha bee oo dy bragh baiht ayns yn 'aarkey choud as vees oo er thalloo chirrym."
As laa-ny-vairagh hie Juan gys yn eeastagh ayns y baatey beg echey, as tra v'eh er-jeet dys yn aahley-eeastee, cheau eh yn aker magh as ren eh yn chord shickyr, as hoie eh sheese ayns y vaatey dy gheddyn y rimlagh aarloo as ny duggannee* bitit. Haink yn dooinney marrey cheddin seose dys mullagh yn ushtey ec lhiattee yn baatey, as dooyrt eh:
"Yuan, Yuan! T'ou er-choayl dty cheeayl ta mee shein."
As dooyrt Juan, "C'red ta jannoo ort nish?" As dooyrt yn dooinney marrey, "T'ou er cheau yn aker magh as t'eh er-jeet sheese trooid yn chimlee aym ayns yn rhum aarlee. Te ny share dhyt, Yuan, dy pluckey yn aker seose as arragh bit beg, as my nee oo jannoo shen yiow palchey yeeast."
As ren Juan shen y yannoo, as hooar eh palchey yeeast. As va Juan as yn dooinney marrey ny reih chaarjyn rieau lurg shen. Shen jerrey yn cooish. *Ny dooanyn.

Araid Vainstyr J.J. Kneen - My, - Te cur lane taitnys dou dy hassoo kiongoyrt rish yn chaglym shoh fastyr jiu dy ghra fockle ny ghaa ayns shenn glare ny ayraghyn ain.
Shoh yn nah chaglym bleeaney t'er ve ain, as ta mee dy-jarroo treishteil nagh bee eh yn fer s'jerree.
Neayr as yn traa shoh nurree, t'er ve ymmodee caghlaaghyn. Ta ymmodee caarjyn er n'gholl dys y cheer shid veih cha nel troailtagh erbee cheet reesht. Ta un shenn carrey er n'aagail shin va marin nurree, yn chenn bard yindyssagh shen, Mainstyr Illiam y Cain. Shimmey keayrt tra va mee guilley beg ta mee er n'eaishtagh rish kiaulleeagh arraneyn Gailckagh as cloie er yn greie chiaullee echey. Agh ta eshyn as feallagh elley ersooyl, as ny doarlishyn ta faagit oc, cha bee ad dy bragh reesht er ny lhieeney.
Myr shen ta'd goll, nane lurg nane elley, as cha nel feallagh erbee dy ghoaill ny buill oc: Agh, vel ad marroo? cha nel, ta'n meeiteil shoh feanish bio dy vel ny spyrrydyn oc foast cummal as gleashagh mast 'ain.
Nish, lhig dou gra fockle ny ghaa mychione yn obbyr aym pene. Myr ta fys eu, ta mee er ve g'ynsagh yn Ghailck ayns Doolish nish son tree geuraghyn, as te cur taitnys vooar dou dy yannoo cre erbee foddyms dy hauail yn chengey ain voish slane toyrt-mow. Tra ta mee fakin ny ynseydee aym goaill ayrn ayns yn chaglym shoh ta mee g'ennaght nagh vel yn obbyr aym ayns fardail. Ta Miss Myl-y-woirrey as feallagh elley gobbragh ayns y vagher cheddin, as bannaght Yee er yn obbyr oc!
Neayr as ghow yn Cheshaght Ghailckagh toshiaght, t'ee er chooilleeney mooarane, as ta foast mooarane fuirraght son jannoo. Shen-y-fa, lhig dooin ooilley ve er-nyn-gosh as jannoo! Lhig dooin g'ynsagh da Manninee nagh vel chengey ny mayrey oc red lhisagh ad ve rearit jeh, agh nane jeh ny eiraghtyn s'ooasle ta Jee er chur daue! Cheer erbee ta lhiggey da'n chengey ashoonagh eck geddyn baase, t'ee scuirr dy ve ashoon. Shen-y-fa, lhig da'n kionghraue ain y ve, "Yn sleih ain, yn cheer ain, yn chengey ain!"
Ta shin er chlashtyn fastyr jiu paart dy arraneyn millish ayns yn chenn glare ain - arraneyn, ny ta mee treishteil nagh jean rieau geddyn baase, choud as nee ny tonnyn as faarkaghyn niee ny traieghyn jeh Ellan Vannin, as yn ghrian soilshean er ny sleityn gorrym kayeeagh eck as ny glionteeyn aalin glass eck.
Ta mee booiagh dy akin nagh vel ny caarjyn ain ayns Purt-ny-hinjey er yarrood shin.
Cre cha maynrey as gennal ta dy-chooilley pyagh jeeaghyn lurg ny beeghyn blastal Manninagh,
6
yn kiaulleeaght villish, ny cooishyn, as yn feailley dy reddyn mie elley t'er ve ain. As eisht, cha nhegin dou jarrood yn carrey gennal ain ayns y stoyl-drommey mainstyr yn chaglym - ta slane sleih aynhene, as t'er ve freayll arrey harrish yn giense lesh sooill ayroil car yn astyr.
S'mie fakin whilleen eddinyn dy chaarjyn ayns y chamyr, as te yn bwooishal as padjer jeean aym dy bee mayd ooilley spaarit dy akin ymmodee chaglymyn elley gollrish yn nane shoh.
Nee lheid yn fastyr shoh tannaght ayns yn chooinaght ain choud as beemayd bio, as higmayd ooilley thie noght maynrey as booiagh, jeeaghyn er-y-hoshiaght dys y chaglym s'niessey lesh ennaghtyn dy voggey as dy haitnys.


Illiam Dhone

Shoh yn araid livreyit aym er Laa Illiam Dhone.

Gura mie mooar eu ooilley son cheet gyshoh reesht ayns cooinaghtyn jeh Illiam y Christeen - Illiam Dhone. S'feer scanshoil eh dy vel shin meeiteil ry-cheilley ec y chronk shoh dagh vlein dy hoilshaghey da theay Vannin yn scansh ta shin cur da bea Illiam Dhone.

Cre'n fa ta shin cur moylley da bea as dellalyn miey Illiam Dhone, as quoi v'eh?

Wahll, va clein Christeen kianlt seose lesh reiltys as leighyn Vannin rish keeadyn dy vlein. V'ad gobbraghey marish chiarnyn Vannin agh cha yarrood ad theay Vannin. Ta'n arrane 'Baase Illiam Dhone' soilshaghey dooin ny va sleih'sy lhing Illiam Dhone coontey jeh -

"V'ou dty Resour Vannin ard-ghooinney ny cheerey,
V'ou gowit son dooinney seyr as dooinney creeney," as ...
"V'ou laue yesh yn Earley as sooill yesh y theay,
As ta dty vaase Illiam Dhone brishey nyn gree."

Foddee nagh row Illiam Dhone ny Ashooneyr agh son shickyrys v'eh ny Vanninagh dooie. V'eh ny ghooinney mie as ooasle, agh dou hene she yn dellal mie ren eh ta'n red smoo scanshoil. Cha dooar eh baase kyndagh rish e vieys as dooieys; hooar eh baase kyndagh rish yn dellal va jeant eddyr ny Cromwellianee as eh-hene ass lieh ny Manninee. Foddym gra shen gyn ourys erbee agh t'eh ny snoo doillee dy feddyn magh row yn dellal jeant ec Illiam Dhone mie ny sie son nyn ashoon ain.

Cha nel screeuaght dy liooar ain dy ve shickyr er y chooish shoh, agh ta'n chooid smoo jeh'n screeuagh jeeaghyn dou dy ren Illiam Dhone sauail Mannin myr ashoon seyr. Mannagh row Illiam Dhone er n'yannoo yn dellal mie va jeant echey, s'lickly dy beagh ram Manninee as ny thieyn as thalloo oc er ve currit mow. Ec y chooid sloo, veagh ny shenn leighyn as cliaghtaghyn Vannin, as quaiyl Tynvaal er ve stroit dy bollagh as caghlaait gys aghtyn Sostyn. Ta mee cliaghtit rish gaccan noi'n reiltys ain, agh t'eh foddey ny share dou dy ve my Vanninagh fo reill da Tynvaal na fo smaght reiltys y Reeriaght Unnaneyssit.

Shen y fa dy vel mee gaase corree nagh ver yn reiltys ain sarey magh gra "ta'n laa hooar Illiam Dhone baase laa seyr ashoonagh kyndagh rish yn dellal mie jeant echey." Ghraih Yee, mannagh row Illiam Dhone er n'yannoo yn obbyr v'eh, cha beagh quaiyl Tynvaal ny reiltys ashoonagh Vannin ayn 'sy lhing ain shoh. Ta'n reiltys ain ny smoo boirrit er aghtyn as cliaghtaghyn reiltys yn R.U. dy chur scansh da nyn ashoon ain-hene er-lhiam. Ta mee briaght jeh ny Olteynyn Tynvaal reeshtagh, "Cur er bun laa seyr oikoil ayns cooinaghtyn jeh Illiam Dhone." T'eh feeu ny smoo na uinnag ghaahit ayns shamyryn Tynvaal nagh vel?

Ta ronney elley ayns yn arrane Baase Illiam Dhone dy naillym ginsh diu -
"Myrgeddin ny dunveryn hug Illiam mow,
Nyn dhieyn as nyn dhalloo as nyn ennym ren loau,
Son lheie ad ersooyl myr lieh-rio ny h-oie,
As ta dty vaase Illiam Mooar brishey nyn gree."
7
V'eh foddey ny s'assey da noidyn Illiam Dhone dy choyrt eh gy baase, na v'eh son Illiam Dhone dy ghellal rish noidyn Stanlagh Mooar. Reeshtagh, ta fir ouryssagh gra dy ren eh yn dellal dasyn hene as y clein echey, agh eer dy row shen kiart, va fys echey cho scanshoil as dangeyragh va'n raad reih eh.

Streih lhiam gra dy vel shinyn gollrish noidyn Illiam Dhone. Ta shin fuirraghtyn er cooishyn cheet dy ve shickyr as sauchey roish my ta shin arryltagh dy chooney lhieu. Ta shin ny smoo boirrit mychione nyn mea ain hene, nyn dhieyn as nyn dhalloo, na cliaghtaghyn as cultoor Vannin.

Mannagh vel ny smoo jin gobbraghey da as cooney lesh ny cliaghtaghyn Vannin as streeu rish boirraghyn as cumraileyderyn yn cultoor ain, son shickyrys bee foill baase yn cultoor er yn lhing ain shoh. Beemayd lhiggey da noidyn Illiam Dhone cosney, as nee nyn dhalloo as nyn ennym lheie ersooyl myr lieh-rio ny h-oie.


Gow my leshtal son ooilley yn retrick shen, agh shen myr dooyrt mee ec cronk Hango myleeaney.

Screeu mee rish yn Ard-shirveishagh as vrie mee jeh, cre'n fa nagh vel reiltys Vannin jannoo veg ayns cooinaghtyn jeh Illiam Dhone. Hooar mee screeuyn er-ash veih oik yn Ard-shirveishagh, as dooyrt yn scrudeyr echey dy row Coonceil ny Shirveishee er loayrt mychione yn chooish shoh, as reaie ad dy lhisagh Tony Brown OKF shirrey er quaiyl Tynvaal dy chur er bun bing reiht dy ronsaghey y chooish. Foddee dy jean eh shen ayns y vee shoh.

Philip Gawne.


Commishoon Beeal-Arrish Nerin


Ta'n Cheshaght gaarlaghey nish dy chur obbyr Commishoon Beeal-Arrish Nerin ayns cooinaghtyn ayns 1998, lieh-cheead blein lurg y traa va'n obbyr jeant. Ta Eiraght Ashoonagh Vannin slane arryltagh dy chooney lesh y chooinaght shen. Er y hon shen, by vie lesh Eiraght Ashoonagh Vannin clashtyn voish peiagh erbee oddys cur cooney, liorish ginsh skeealyn mychione obbyr y Chommishoon, cur er eeasaght stoo va ymmyd goit jeh 'syn obbyr, ny er aght erbee vees cooney lesh y chooinaghtyn shoh. Cur-shiu fys, my sailliu, da Eiraght Ashoonagh Vannin, ny dou er 834844.

Ta Eiraght Ashoonagh Vannin er reaghey dy chummal taishbynys er y chooish shoh car y touree. S'treisht lhiam dy vodmayd ceau baght er yn obbyr scanshoil jeant ec Commishoon Beeal-Arrish Nerin da theay Vannin. My ta shiu geearree tooilley fys mychione eieyn ny sheshaght son y chooinaght shoh loayr rhym er yn earroo heose.


Dhooraght?


C'red ta shiu coontey jeh Dhooragh? Vel shiu smooinaghtyn dy vel eh mie ny sie, ro vooar ny ro veg, lane dy voghtnid? Cre mychione cur art ny ghaa stiagh ayns Baarle as Gaelg? Vel eh feeu cur er bun 'duillag ny boirraghyn Gaelgagh eu?' - boayl t'adsyn mie ynsit er y Ghaelg soilshaghey dooin aghtyn dy vishaghey nyn n'Ghaelg ain. Cur fys dou my sailliu!

Ta mee foast slane bwooiagh dy gheddyn artyn son Dhooraght screeut liorish Gaelgeyr erbee. S'goan ny screeudeyryn, s'treih lhiam gra!


8