DHOORAGHT

Earroo 6 Yn Cheshaght Ghailckagh Mean-Souree 1997


Chaglym bleinoil cadjin


Hie chaglym bleinoil cadjin ny Sheshaght Ghailckagh er cummal Mee Averil ec Thie ny Gaelgey, St Judes. Va ny smoo na daeed Gaelgeyryn er n'yingey ad hene stiagh 'sy thie.

Ta dagh caairliagh jeh'n Cheshaght Ghailckagh eignit ass oik lurg daa vlein liorish bunraght ny Sheshaght, as myr shen loayr yn Caairliagh, Phillie Gawne, rish yn chaglym son y traa s'jerree rish blein ny ghaa, bwooise da Jee! Hug yn clane chaglym moylley da Leslie Quirk ren cosney yn Reih Bleeaney Vannanan as Kione y Sker mleeaney, as da Audrey Ainsworth, Scrudeyr ny Sheshaght rish mysh queig blein as feed, ren irree ass y startey shen.

Hug Tashteyder ny Sheshaght Ghailckagh, Peddyr Hayhurst, coontyssyn son y vlein ec kione er 31d, Mayrnt, 1997. Va cosney y vlein mysh tree keead punt jeig as feed as jeih as daeed.

Ec y Reihys, hooar Fiona McArdle obbyr y chaairliagh, Brian Stowell y scrudeyr, Peddyr Hayhurst y tashteyder as ta Bernard Caine foast nyn eaghtyrane. Ta daa oltey noa er y ving, Phil Kelly yn Oaseir Gaelgagh, as Peddyr Halsall,ayns ynnyd jeh Paul Kelly as Bobby Bob. Gura mie eu Paul as Bobby Bob son yn obbyr jeant eu.

Ec kione y chaglym va ny fainaghyn currit magh. Hooar shiaght studeyryn jeig nyn vainaghyn argid, as kiare studeyryn nyn vainaghyn airhey. Hug yn Eaghtyrane, Bernard Caine ny fainaghyn magh as dooyrt eh "Ceau eh lesh moyrn" rish dagh ooilley studeyr.

Fainaghyn Airhey

- Marilyn Brown, Rosemary Derbyshire, Juan y Moddey as Peddyr Halsall.

Fainaghyn Argid

- Sharon Christian, Caroline Helps, Jonathon Ayres, Diane Williamson, Ian Williamson, Alan Williamson, Ray Taubman, David Callin, Peter Shimmin, Ralph Lowey, Sally Peers, Steven Blackburn, Stephen Hurst, Robert Radcliffe, Simon Collister, Wendy Hurst as Mary Sharpe.

Moylley as soylley dauesyn ooilley!


Araid y Chaairliagh


Gura mie eu son cheet. She laa trimshagh dou jiu er y fa dy vel mee eignit ec bunraght yn Cheshaght dy chur seose obbyr y chaairliagh. Bee tooilley traa ayms dy yeeaghyn er 'Coronation Street as Eastenders' nish! Ta mee er n'ghoaill taitnys ass jannoo yn obbyr as s'treisht lhiam dy vel mee er chooilleeney paart jeh ny reddyn ta shin geearree son y chengey ain. Shegin dou cur my wooise da'n ving son ooilley yn obbyr vie jeant oc, agh erskyn shen as ooilley lhig dooin cur nyn mwooise da Audrey ta cur seose obbyr y Scrudeyr lurg mysh queig bleeaney as feed. Gura mie mooar eu Audrey!

Yn vlein t'er n'gholl shaghey -

Cha noddym gra ny smoo na Leslie Quirk Reih Bleeaney Vannanan as Kione y Sker. Moylley da Leslie, Manninagh dooie, carrey mie dooin as da'n Cheshaght Ghailckagh.

Hie Feailley Ghaelgagh er cummal ayns Mee Houney. Hooar yn Cheshaght cooney voish Undinys Eiraght Vannin, Eiraght Ashoonagh Vannin, Coonceil ny h-Ellynyn, Conister Trust plc as Colught Paggad Gaal. Haink possan beg dy Yernee gys yn 'Eailley as ren Shorus y Creayrie leaght mie y livrey mychione 'Parail as aa-vioghey y Ghaelg'. Va'n Feailley speeideilagh er-lhiam, agh ta eie ny ghaa aym son lhiasaghey y Feailley myleeaney.

Hie forum Gaelgagh er cummal ayns Feailley Ghaelgagh, as shoh paart jeh nyn mriwnyssyn.
1. Cur er bun ny aa-vioghey Sheshaght ny Ynseyderyn Gaelgagh. Nee yn Cheshaght shoh niartaghey ny kianglaghyn eddyr ny brastylyn Gaelgagh, as reaghey coorseyn as chaglymyn son fir as mraane ynsee dy haraghey ny aghtyn ynsee oc.
2. Croo tooilley taghyrtyn Gaelgagh. Cha nel eh feeu gynsaghey mannagh vees caa ayds dy loayrt ee.
3. shirr er yn Reiltys dy yannoo tooilley obbyr son y Ghaelg.
Ta coipyn jeh'n skeeal ren cheet veih'n forum ry-gheddyn voym, as veih Peddyr Hayhurst. Gura mie mooar ayd Pheddyr son jannoo yn obbyr shoh.

Mooinjer Veggey. Va'n possan shoh currit er bun ayns Mee Boaldyn, nurree. Ta daa phaitchey yeig cheet nish as ta tooilley er chur nyn enmyn da Mooinjer Veggey son y vlein shoh cheet.
Ta ny paitchyn er ve cheet nish er dyn Jerrey Geuree, as lurg daa vee, ta paitchyn va gyn fockle erbee dy Ghaelg, toiggal as loayrt paart dy Ghaelg. Ta ymmodee draneyn as arraneyn ynsit oc hannah, as t'eh jannoo foays da my chree dagh traa ta mee goll gys shenn thie scoill Vraddan as fakin as geaishtagh rish ny paitchyn. S'feeu dagh ping ta shin er chur da'n phossan shen.

Shoh ny dooyrt Benainshtyr Corkhill ec yn nah Haglym Vanninagh. "Tra ta'n sleih aeg as ny paitchyn streeu dy gheddyn greim er y Ghaelg, lhishagh shin jannoo ooilley ny oddysmayd dy chooney lhieu as greinnagh ad er nyn doshiaght. Foddee eh ve foast myr cliegeen aalin mysh y wannal oc nagh vod ve goit voue."

Er lhiam dy row Bnr Corkhill kiart. Ta mee guee er dagh Gaelgeyr dy loayrt rish ny paitchyn as Gaelg oc as cur ny caaghyn cheddin dauesyn ta shiu cur da sleih aasit. Ta'n obbyr jeant ec yn sleih aasit feer vie as scanshoil dooin, agh mannagh vow ny paitchyn greim er y Ghaelg, cha bee chengey ny mayrey Ellan Vannin bishaghey, lhiasaghey ny bio.

Ta daa aigney ec olteynyn yn Cheshaght Ghailckagh as, dy jarroo, ooilley ny Gaelgeyryn ec yn traa t'ayn.T'adshoh: Gaelg myr chengey vio ta bishaghey as bentyn da'n lhing ain jiu, as Gaelg myr chengey eiraght ta anaasagh dooin agh bentyn rish yn shennaghys ain. Ta'n chied aigney yn aigney aym, as t'eh ny smoo scanshoil dou na'n aigney elley. Ta fys aym dy vel paart dy leih smooinaghtyn dy vel mee ass my cheeayll; er lhieu dy dooar Gaelg Vannin baase as cha nod oo aavioghey red marroo! Ta paart dy leih smooinaghtyn dy vel eh aggairagh dy hirrey er yn reiltys son argid as cooney lesh cooishyn Gaelgagh. Ta eer ny smoo Gaelgeyryn smooinaghtyn nagh lhisagh Gaelgeyr erbee geddyn argid son obbyr Ghaelgagh - 'ta'n Cheshaght Ghailckagh as ny Gaelgeyryn er n'yannoo obbyr vie nastee rish bunnys keead blein nish as ta'n Ghaelg foast ayn!'

S'feer shen agh ta lhing noa ain ayns Mannin jiu, as fodmayd jerkal rish stayd share son y Ghaelg.Ta'n Reiltys ny smoo arryltagh dy chooney lesh cooishyn Gaelgagh na v'ee rieau, agh shegin da peiagh ennagh loayrt rish ny Rheynnyn reiltys cooie as ny olteynyn Tinvaal cooie. Veagh ymmodee reddyn elley jeant ec yn Reiltys (Tinvaal as ny Barrantee) dy beagh traa dy liooar ain dy hirrey orroo. Eer nagh vel traa ain dy yeearree er'n reiltys son dy chooilley red ta shin laccal as ta aashagh jeant eck, ta'n reiltys jannoo dy mie. Shegin dooin cur nyn mwooise mooar da'n Reiltys er lheh son obbyr yn Rheynn Ynsee ta lhiggey da paitchyn gynsaghey
2
Gaelg, as Undinys Eiraght Vannin ta cooney lesh Mooinjer Veggey, Feailley Ghaelgagh as cooishyn Gaelgagh elley. She obbyr scanshoil ta jeant ec y Reiltys son traa ry-heet y Ghaelg, agh ta'n obbyr shoh ny sloo na'n obbyr ta jeant ayns ny cheeraghyn Gaelgagh elley. Ta Rheynnyn jeh Reiltys ayns Nerin (jiass as twoaie) as Nalbin, ta dellal rish cooishyn Gaelgagh er lheh, as adsyn cur ny smoo argid da dagh Gaelgeyr ayns nyn jeer, na'n Reiltys ain cur da nyn n'Ghaelgeyryn ayns Mannin. S'bastagh nagh vel yn Reiltys ain cur wheesh dy argid dooin as Reiltys Nalbin ny Nerin, agh shoh ny s'messey tra ta shiu clashtyn ny symmyn jeant ec Comunn na Gaidhlig. T'ad er choontey ooilley yn argid bentyn rish Gaidhlig ta'n Reiltys er chur stiagh as er n'ghoaill magh ass poggadyn ny Gaelgeyryn ayns Nalbin, as ta cosney trome glen ec y Reiltys. Lhisagh shoh ve chaghteraght noa focklit magh ec yn Cheshaght Ghailckagh - "Ta'n Ghaelg corrym rish argid trome!" Ta'n lhing noa toiggal stoo myr shoh, er lhiam.

Ta caaghyn erskyn towse 'sy lhing jiu dy hoshiaghey Gaelg Vannin roish y theay. Ta cloudeyrys, radio, chellveeish as yn eddyr-voggyl, ny smoo as ny smoo arryltagh as aarloo dy ghoaill Gaelg, dy hoshiaghey ee, dy feddyn magh my-e-kione as dy vishaghey ee. Reesht shegin dooin jannoo ymmyd jeh ny caaghyn ta currit dooin my ta shin geearree yn chengey ain dy ve bio as feeu lesh theay Vannin, agh reesht cha nel traa dy liooar ec Gaelgeyryn dy liooar shoh y yannoo. Mannagh jeanmayd cur tooilley fys roish y theay mychione Gaelg, yn chengey ashoonagh ain, as cooney lhieu ta geearree gynsaghey, cha nodmayd cosney yn cooney oc. Mannagh jeanmayd shen cha jean y Ghaelg ain bishaghey.

Myr dooyrt mee roiee, ta daa aigney ec ny Gaelgeyryn 'sy lhing shoh. Ta Gaelg myr chengey eiraght, anaasagh dooin agh bentyn rish yn traa er n'gholl shaghey ain hannah, agh my vees Gaelg bio, lane dy vree as bentyn rish yn traa t'ayn as yn traa ry-heet, shegin dooinyn ta geearree shen jannoo yn obbyr ta mee er loayrt mychione noght.

Ayns y choip s'jerree jeh Dhooraght, lhaih shiu screeuyn voish Peddyr Karran OKF, shirrey er startey noa dy ve currit er bun. Oaseir Lhiasee myr dooyrt eh. S'treisht lhiam dy jig yn eie shoh lesh Peddyr, agh eer dy beagh lheid yn Oaseir shoh gobbragh dagh laa 'sy chiaghtin veagh foast ram obbyr faagit er nyn son. Er lhiam pene dy jinnagh Oaseir Lhiasee croo ny smoo obbyr na yinnagh eh cooilleeney.

Wahll, ta rour dy focklyn focklit magh ayms nish. Myr lhaih shiu ayns Dhooraght shoh ny focklyn dooyrt JJ Kneen ec yn nah haglym Vanninagh. "Neayr as ghow yn Cheshaght Ghailckagh toshiaght t'ee er chooilleeney moorane, as ta foast moorane fuirraght son jannoo. Shen y fa, lhig dooin ooilley ve er-nyn-gosh as jannoo!"

Gura mie mooar eu.

Phillie Gawne.


Ny Boteilyn

- liorish Martina Preuss
Yn geurey shoh chaie ren red ennagh quaagh taghyrt dou.

Lurg cliaghtey yn cheshaght chiaullee ain hie paart jin dys yn thie lhionney son jough. Agh va mee eignit dy 'aagail lurg oor dy hraa foddee, er y fa dy row mee er n'ghialdyn da Silvia dy hooyl thie maree. Cha row ee agh queig bleeaney jeig dy eash as myr shen v'ee eignit dy ve er-ash ayns yn thie roish traa anmagh. Tra va shin roshtyn dys yn thie eck, bunnys, dooyrt Silvia "Cre mysh bine beg?" Ta shapp peeitsey ayn faggys da'n thie as ayns yn chapp shoh foddee oo kionnaghey jough neesht. Er y fa nagh row agh un ghless lhionney iut aym 'sy thie lhionney as
3
cha row red erbee iut ec Silvia, dooyrt mee "Mie dy liooar." Ta enney ec Silvia er shellooderyn yn chapp as myr shen cha row eh feer ghoillee edyr dy gheddyn jough.

Eisht va shin nyn shassoo ayns y raad as va shin giu nyn lhune ain as loayrt ry-cheilley. V'eh aitt dy liooar. Ren dooinney quaagh ennagh shooyl shaghey ain son red gollrish tree keayrtyn. Ren shin fakin eh agh cha row shin cur arrey erbee da.

Lurg lieh oor dy hraa foddee, va'n lhune iut ain as v'eh foin goll dy valley. Daag shin ny boteilyn follym nyn shassoo ayns y raad. (Cha nel mee jannoo red myr shen dy cliaghtagh!)

Cha row shin er-hooyl agh kuse dy stundayrtyn tra cheayll shin fer ennagh gra nyn gooylloo "Cur-jee lhiu ny boteilyn eu, my sailliu." Cre ayns niurin t'eh geearree, va mee smooinaghtyn, agh cha dooyrt mee agh "Mie dy liooar." Ren shin chyndaa mygeayrt as shooyl er-ash dys y voayl raad daag shin ny boteilyn. Ren yn dooinney shooyl geiyrt orrin. Ren mish as Silvia loayrt ry-cheilley myr nagh beagh red erbee er-daghyrt. Agh phrow mee dy chur cooinaghtyn er yn stoo ren mee gynsaghey er ny choorseyn hene-coadey. Ren mee doarnyn jeh ny laueyn aym 'sy phoggaid as va ooilley ny muskylyn aym chionn erskyn towse. Cha row mee gennaghtyn feer sauchey as yn dooinney shen shooyl nyn yei!

Tra ren mee croymmey sheese dy gheddyn ny boteilyn dooyrt yn dooinney red ennagh as cha nel cooinnaghtyn aym er. Agh dooyrt mish "Cha nel shen bentyn rhyts er chor erbee." Er shen hug eh e laue ayns yn phoggaid echey as hooar eh magh caart ennagh as dooyrt eh "Ta shoh bentyn rhyms mie dy liooar. She Meoir-shee mish!" Haink yindys mooar orrin dy dooghyssagh. Cha row eh jeeaghyn gollrish meoir-shee noadyr. Tra v'eh er chee cur er-ash yn caart echey 'sy phoggaid dooyrt mish "Fuirree minnid." Ren mee goaill greim jeh'n chaart as yeeagh mee er. "Cha sym nee firrinagh ny dyn yn caart shoh." Dooyrt eshyn "kiart, agh ny jean boirey. Cha bee red erbee taghyrt diu." Eisht ren eh gearree fakin ny caartyn enney ain. Cha row caart enney marym agh va caart studeyr marish Silvia. Ren yn dooinney jeeaghyn er yn chaart as dooyrt eh "Ruggit 'sy vlein 1980? Ta shen dy gra dy vel uss queig bleeaney jeig dy eash...." Shen ooilley! Tra v'eh er chee goll ersooyl dooyrt mee rish myr spotch "Ta shin goaill arrys jeh shoh nish." Dooyrt eshyn "Mie dy liooar. Slane lhiu," as hie eh ersooyl. As va shin garaghtee as garaghtee.

Cullee Ashoonagh Vannin Noa


Jemayrt, yn nah laa as feed, Mee Averil, va Cullee Noa Vannin currit da'n Whaiyl Vannin. Va jesh-chliaghtey ayn as ren yn Lhaihder Juan y Crellin yn araid shoh heese y livrey.

Vainstyr Y Eaghtyrane
Foddey er dy henney, ayns lhing ny Reeghyn Loghlinagh, va scape Vannin as ny h-Ellanyn, birling ny lhie ayns shee, as yn shiaull echey fillit dy-chionn er y clatt. Agh ayns y treeoo cheead jeig, va ny tree cassyn currit ayns ynnyd jeh'n lhong er scape Ree Vannin.

Ta kuse dy leih gra dy daink yn cowrey shoh veih'n ghrian hene - Yn Cowrey Triskele b'lesh ny shenn ashoonyn Celtiagh. Ta ny tree cassyn ry-gheddyn chammah ayns Ellan Sicily, agh ayns y voayl shen, ta kione Vedussa ny hoie ayns y cheshvean.Tra chossyn yn lught Stanley Reiltys Vannin, ren ad goaill rish ny tree cassyn son y chowrey dauesyn hene.

Va feme ain er caghlaa er y chullee ashoonagh , er yn oyr nagh row yn Lion as yn Unicorn cooie da'n laa t'ayn jiu. Bare dooin er y fa shen croo cullee noa as cowraghyn aynjee bentyn da'n Ellan shoh. Bee'n chullee shoh noa nish ry-akin 'sy chamyr shoh, fastyr jiu.

Hee shiu daa eean er y chullee noa, shirragh er y cheu hoshtal, as feeagh er y cheu yesh. Ta'n shirragh eean ooasle, as hug ny Manninee "Shirragh y Ree" er, er yn oyr dy row daa jeu currit (Ta jerrey yn art shoh ry gheddyn er duillag 7)
 4

Cullee Ashoonagh Vannin Noa

(jerrey jeh'n art va goaill toshiaght er duillag 4)
da Ree Hostyn, myr tortys, er laa y chrooinaghey echey. Va'n Ree jannoo ymmyd jeu ry-hoi yn chelg, as dy jarroo, cha nel shirragh s'tappee ayn.

Ta'n feeagh eean jeh beeal-arrish,feiy ny Cruinney bunnys, as t'ad coontit dy ve creeney, as niart obbeeys oc. Ta shenn raa ain, "Cur meer da'n eeagh as hig eh reesht." Va ny Loghlinee coontey mooar jeh, er lheh, yn Jee Odin, myr t'eh ry-akin er ny croshyn Manninagh.

Ta nyn yees jeh ny eeanlee shoh, ry-akin er yn Ellan, mastey ny sleityn, as brooghyn ny marrey. T'ad shoh son shickyrys eeanlee dooie! Beemayd soiaghey jeh'n scape noa shoh as ny h-eeanlee hene ersyn.

Screeuyn rish y Reagheyder


Y Charrey,

Va'n skeeal bentyn rish yn greie kiaullee enmysit yn sittyr, ayns Dhooraght earroo queig, feer symoil. Hug mee yn skeeal shen da Phillie Gawne, myr dooyrt eh, agh cha ren Phillie soilshaghey cre'n aght hooar mee yn oayllys shen ayns y toshiaght. Shoh myr haghyr eh.

Ec y Chaisht 1995 va mee, my ven as yn daa inneen ain er nyn laghyn seyrey ayns Praag, ard-valley ny Pobblaght Sheckagh. Va shin shooyl er y chenn droghad ta enmysit Droghad Chalse. Cha nel traaght raad er y droghad shen nish agh ny coshee ta jeeaghyn er yn sleih ta cloie kiaull, creck caartyn as cooinaghtaneyn as er ny peinteyryn ta jannoo jallooyn as cochaslysyn.

Honnick shin yn dooinney shoh as v'eh cloie er greie kiaullee nagh vaik mee rieau roie. Va'n greie er boayrd echey, as v'eh crankal ny bwoalley mairyn gollrish clouscreeuder lesh y laue hoshtal as v'eh cloie teaddyn lesh y laue yesh. Duirree shin geaishtagh rish tammylt beg. Denee yn kiaulleyder jin row shin laccal oayllys mychione yn sittyr echey. Dooyrt shin dy row dy jarroo.

"T'ou voish cre'n cheer?" denee eh.
"She Yernagh mish", dreggyr mee.
"By vie lhiat duillag oayllys ayns Yernish ny ayns Baarle?"
"By vie lhiam eh ayns Yernish, my sailliu."

Hug eh dou eh, duillag A4 as oayllys er ayns reih-Yernish dy jarroo.

"Vel yn teks shoh ayd ayns Gaelg Vannin neesht?" as mish.
"Ta dy jarroo," as hug eh dou yn teks cheddin ayns Gaelg. Tammylt ny yei shen hug mee coip da Phillie Gawne as shen yn teks haink magh ayns Dhooraght earroo queig.

Va yindys orrym yn laa shen ayns Praag. Va duillagyn ec yn dooinney shoh ayns ooilley ny chengaghyn Celtiagh er lhimmey jeh Gaelg Nalbin. Tra haink shin dy valley loayr my ven rish olloo Albinagh, as ren eh chyndaa yn teks ayns Gàidhlig as hug shin eh da'n chiaulleyder, Mnr Klenha, ayns Praag. Cha dooar mee screeuyn ny caart booise voish, agh ta mee jerkal dy vel eh cur magh ny duillagyn foastagh ayns ny chengaghyn Gaelgagh ain.

Cha nee ayns Mannin ny lomarcan ta'n Ghaelg bio agh ayns cheer yoarree neesht. S'mie shen!

Lhiats dy firrinagh,
Seán Brádaigh.
7

Feailley Vooinjer Veggey


Jesarn, 28th, Mean Souree

Nee Mnr Bernard Caine

Eaghtyrane, Yn Cheshaght Ghailckagh

Fosley Yn 'Eailley


Bee Onchan Silver Bann as Perree Bane ayn

Bee ymmodee gammanyn as
co-hirraghyn ayn ver ard-taitnys erriu, bwaneyn elley as bee as jough

2.00 sa - 4.30 sa

Thie Scoill Vraddan

Faggys da Scoill Vraddan
Faag nyn n'ghleashtan eu ayns pairk ghleashtan y scoill!

 Leaghyn: Sleih aasit 1.00,
Paitchyn 50p,Tiggad lught thie 2.00.

Ta shin shirrey cooney lesh Feailley Vooinjer Veggey; aundyryn cronghyr berreenyn as brishtaghyn er lheh son bwane berreenyn, bee as jough.

Cooin lesh yn eab Vooinjer Veggey shoh. Ta shin troggal argid son
Gaelg vio 'sy traa ry heet!

Focklyn, Enmyn as Raaghyn jeant ec Coonceil ny Gaelgey

Foddee dy vel ny focklyn shoh ec paart jiu, agh cha dooar mee ad agh shiaghtin ny ghaa er dy henney. Verrym tooilley duillagyn jeh focklyn y Coonceil ayns ny Dhooraghtyn shoh cheet.