DHOORAGHT
Earroo 7 Yn Cheshaght Ghailckagh Mean Fouyir 1997
Er hoh diu Dhooraght reesht. Ta'n raiee shoh chaie er ve feer annaasagh as ymmydagh
dou as da Gaelgeyryn elley er lhiam. Ec toshiaght Jerrey Souree hie Feailley Vooinjer
Veggey er cummal (tooilley fys er duillag elley), as hie Bing y Vooinjer Veggey mygeayrt er paart dy feaillaghyn souree elley troggal argid as ginsh da'n theay chaghteraght
vie yn Vooinjer Veggey!
Eisht lhaih shin yn screeuyn shen, scruit ec George Broderick, va clouit ayns y Vrialtagh
soilshaghey dooin ooilley nagh neeu veg yn Ghaelg ta goll er loayrt ayns Mannin nish!
She chengey varroo t'ayn as ta'n Ghaelg ain ooilley goll sheese y lhargagh myr gleashtan gyn glackanyn. Hug shoh corree-jiarg orrym as er ymmodee Gaelgeyryn elley
ec y toshiaght, agh lurg shiaghtin ny ghaa, smooinaghtyn er goan Horys, smooinee
mee dy row eh kiart.
Va mee coontey dy row yn Ghaelg aym chammah as ny v'ec y chooid smoo jeh ny loayrtee
flaaoil, eer ny share na paart jeu, agh son shickyrys ta ymmodee focklyn nagh vel
fys aym orroo as cha noddym fockley magh focklyn Gaelgagh myr dy beign my loayrtagh
dooghyssagh!
Loayr mee rish Shorys ec yn Chruinnaght mychione y chooish shoh, as lurg yn choloayrtys
ain haink mee dy ve lhag-chreeagh. Ec y toshiaght dob eh dy loayrt rhym ayns Gaelg
er y fa dy row eh boirit nagh jinnin toiggal ny v'eh gra. Vrie mee jeh cre'n fa nagh ren eh loayrt rooin mychione ny boiraghyn echey, ny screeu rish Dhooraght ny boiraghyn
echey, ayns Gaelg? Dreggyr eh, "Shen yn aght ta mee!" Bare da Shorys cur screeuyn
Baarle rish theay Vannin gra dy vel Gaelg ayns drogh stayd na cur coyrle yeeragh
as cooney da ny Gaelgeyryn!
Va bun yn choloayrtys ain dy row eh boirit dy row bing ny fainaghyn cur magh fainaghyn
myr v'ad taffeeyn, as va dooghys y Ghaelg loayrit caghlaait veih'n fraue. Er lesh
dy row fraueyn y Ghaelg fiojit as shirgit as nagh vod ushtey oor slaanee aa-vioghey
ee. Te doillee dou gra shoh agh va mee ayns coardailys rish ayrn mooar jeh'n chaghteraght
echey. Ec jerrey yn chooish ain va mee smooinaghtyn er treigeil y Ghaelg (Dhooraght,
Mooinjer Veggey as y lheid) dy bollagh - cha neeu veg ny eabbaghyn ain!
Va mee mysh mee smooinaghtyn myr shen, agh haink eh dy ve baghtal dou dy moal dy vel
Shorys cummal ayns seihll elley, as shen seihll scoillaragh. Keayrt dy row va ard-scoillaryn
dy liooar ayn va credjal nagh row yn seihll cruinn! Ta shinyn ta cummal ayns Mannin as gobbragh son aa-vioghey Gaelgagh smooinaghtyn dy vel yn chengey ain feeu
dagh minnid, oor, laa as blein ta shin gobbragh jee, as blebeeyn adsyn ta gra red
erbee elley.
Son shickyrys haink fraueyn y Ghaelg dy ve fiojit, agh ta'n luss er ve currit ayns
crockan braew noa nish. Ta paart jeh ny shenn fraueyn creen er ve giarit ersooyl,
agh ta'n luss ayns ooir menoyragh as ta ushtey currit jee dagh laa. Cha nel cummey
noa yn luss kiart gollrish yn cummey v'eck bleeantyn er dy henney, as foddee nagh vel ee chammah
as v'ee, agh t'ee foast bio. My ta shin geearree yn shenn chummey reesht ny cummey eer ny share na shen ny lhig
dooin faagail ee gyn ushtey as eoylley rish meeghyn, agh lhig dooin freayll arrey
urree as goaill kiarail jee!
S'treisht lhiam dy jean Shorys freayll yn paraquat echey ayns Mannheim rish blein
ny ghaa!
Philip Gawne.
Crout y Thelhear
Hooar mee shoh voish Sandra ta gobbragh 'sy lioarlagh ayns y Thie Tashtee. V'eh scruit
er cheu-cooylloo screeuyn va currit dys E. Rydings, Mwyljyn Olley Laksaa.
Haink thelhear, keayrt, dy obbryagh ec thie nagh row ennym feer vie jeh son beaghey.
Cha row veg goll agh prassyn as skaddan, laa magh laa stiagh, as hooar eh ching j'ee.
Haink moghrey dy row eh ny lomarcan daagit, as dy jeeagh dys yn aile. "Neem's cloie
crout ennagh nish er ad shoh, shickyr as ta mee bio, son nyn boiddee." As hooar eh
ehene sheese jearragh veih'n voayrd, as hie eh mygeayrt y thie; honnick eh teih ayns
corneil, hug eh greim j'ee er y chass; esh roie eh magh dys thie n' ollee. Va tharroo
mooar lheiy ays shen shassoo ayns corneil; chrog eh 'n teih as hug eh wapp da ayns y
kione, esh roie eh dy tappee sthie as heose er y voayrd reesht.
Myr va jinnair harrish, hie ben y thie magh lesh bine dy vainney son y lheiy, as dooar
ish eh ny lhie er yn (ooir) (cha noddym lhaih yn fockle shoh er y choip ayms
) as cha dirree eh. "Irree red litcheragh," dooyrt ish stampey cosh er yn ooir, "as
gow yn bainney shoh" agh cha vod eh gleashagh!
Roie ish 'sy thie agglit guyllagh, "Billey! Billey! trood ay's shoh." "Cere'd ta jannoo
ort ven?" "Ugh, ugh, ta mee goail aggle dy vel yn lheiy marroo, cha nel eh gol-rish
er ny ve roie, cha jean eh girree dy goaill y vainney." Hie eshyn sthie, as hug eh
polt da er y asnaghyn lesh y vraag, esh gow eh greim jeh er y daa chleash. "Er lhiam
dy vel eh marroo dy liooar," dooyrt eh; "t'eh y mie jannoo touill nish as ceau eh
ayn, ass y raad," "jarroo cha jean," dooyrt ish, 'cre'n siyr ta ort, gow yn uill
voish as gow yn craccan jeh, esh gow as cur (faaue) (cha noddym lhaih yn fockle shoh er y choip ayms . Mannagh vel faaue [a hint] yn fockle
foddee dy vel 'raaue' yn fockle kiart agh cha noddym toiggal yn bun jeh'n raa my
ta shen yn fockle
) niartal
dys y phaithchyn, ny abbyr ad veg mychione shoh roish y thelhear, as neemayn jannoo
bee blastyl er y hon, choud's t'eh marin."
Lurg shoh, dooar y thelhear cha roauyr, cha nod eh chrommey sheese da e obbyr, v'eh
foast cheet woish y voayrd as soie er stoyl drummey ec kione j'ee dy whaill.
Shen ny focklyn lettyrit magh myr v'ad er y choip currit dou. S'treisht lhiam dy vod
shiu toiggal yn skeeal heose, agh myr ta shiu fakin ta grammeydys yn chengey ain
er chaghlaa bit beg eddyr yn traa va shen scruit as yn traa t'ayn jiu!
Yn Shag as Yn Tay
Meer elley voish Sandra.
Hug ad y tay da'n shag ayns meddyr,
Loo yn shag nagh row eh mie,
Lheim eh seose as clap eh e skianyn,
As deayrt eh ooilley'n tay fud thie.
Quoi erbee ren screeu shoh cha s'aym, agh screeu eh beggan mychione yn drane:
'Cheayll mee red ennagh mychione shiaulteyr aeg v'ass Cornah (cha nel mee shickyr er yn fockle shen
), va cur lesh thie paart dy hey veih'n Cheen (China), as va eam goll magh er ny nabooyn
dy heet son ayrn yn taitnys shoh. Va'n skeeal shoh ayns drane, agh cha noddym cooinaghtyn
agh yn ronney shoh.'
2
Gowmayd Toshiaght Reesht
Tra va mee aeg va ny bodjalyn getlagh shaghey,
Bodjalyn breeney scughey erskyn y vagher,
Duirree mee my lomarcan, follit ayns y chlose,
Agh cha daink emshir oor, feaysleyder my vioys.
Faitagh as trimshagh honnick mee caghlaa'n treih,
Cha dug yn imbagh noa geill da Manninagh mie.
Chloie mee foast 'sy vagher ain marish my vraar,
Cha daink yn emshir oor, haink deiney aggair'.
Ayns eairee as lheeanee eer heese 'sy ghlion,
Cheau shin nyn laghyn as shinyn gaase shenn,
Deniagh as sollagh veagh shin roshtyn thie,
Slane ayns nyn gree, tra hie shin dy lhie.
Lhag-chreeagh dy shickyr kyndagh rish yn jeeill
T'er ve jeant dys y cheer agh cha derrym seose my ghean,
Mannin as ny Manninee heese 'sy laagh as skee,
Lhig da'n ghrian cheet er ash, as gowmayd toshiaght reesht.
Shen cubbyl dy 'ockle scruit aym daa ny tree bleeantyn er dy henney, son co-hirraghyn
yn Chruinnaght. Ta car ayms boayl ennagh son ny focklyn heose.
Bayrn Jiarg Beg
Va neen ayn keayrt dy row. Va moir as myrgeddin mwarree ec y neen. Va'n neen cummal
marish y voir eck ayns y valley beg cheerey. Va'n warree cummal ayns thie beg ayns
y cheyll. Va'n warree feer ghraihagh er y neen veg. Ren ee cloagey jiarg da'n neen
as myrgeddin bayrn jiarg feer aalin. Bynney lesh y neen y bayrn as v'ee dy-kinjagh ceau
eh, as shen yn oyr hug sleih Bayrn Jiarg Beg urree.
Un laa dooyrt y voir eck, "Vayrn Yiarg Veg, er hoh berreen aalin wooar. Nod oo goll
dys y warree ayd as cur lesh huic y verreen shoh?" "O, foddee Voir," dooyrt Bayrn
Jiarg Beg, "foddym dy-jarroo." "Immee royd eisht," dooyrt y voir, "er hoh yn verreen
ayns y vastag. Agh shegin dhyt goll dy-tappee as dyn cloie ayns ny keylljyn. Jean oo shen?"
"Nee, Voir, nee'm goll dy-tappee as dyn cloie ayns ny keylljyn." As hie yn neen veg
roee as y vastag er yn roie eck.
Va moyrn vooar er Bayrn Jiarg Beg. Er lhee, "ta mee my neen vooar, foddym goll my
lomarcan dys my warree." Beign da'n neen goll trooid keyll. S'leah honnick ee moddey-oaldey
mooar. "Moghrey mie dhyt, Vayrn Yiarg Veg."
"Moghrey mie dhyt hene, Vainstyr Voddey-oaldey."
"Cre t'ayd ayns y vastag?"
"Berreen da my warree."
"Vayrn Yiarg Veg, craad ta dty warree cummal?"
"Ayns y cheyll fo ny biljyn-juys mooarey ta'n thie eck."
"Nee shen myr te? Hems myrgeddin dys dty warree," dooyrt y moddey-oaldey. "Nee'm goll
dy-tappee as gra dy vel oo cheet. Foddee oo paart dy vlaaghyn y phluckey da'n warree
ayd. Ayns y cheyll ta mooarane blaaghyn aalin." "Kiart dy liooar," dooyrt Bayrn Jiarg Veg, son shynney lhee lane ny blaaghyn.
3
Dimmee yn moddey-oaldey dy-tappee roish. S'leah haink eh dys thie yn warree. Cha row
yn chenn ven sthie. V'ee ec y valley. Doshil y moddey-oaldey y dorrys as hie eh stiagh.
Er y voayrd va quoif vane vooar y warree. Hug y moddey-oaldey y whoif er as lhie
eh sheese ayns y lhiabbee.
S'leah chrank Bayrn Jiarg Beg ec y dorrys. "Trooid stiagh," dooyrt y moddey-oaldey."
Ren Bayrn Jiarg Beg fosley yn dorrys as ren ee goll stiagh ayns y chamyr.
"Ugh, Warree, vel oo ching?" dooyrt Bayrn Jiarg Beg.
"Ta mee feer ching. Agh c'red t'ayd ayns y vastag?"
"Berreen vooar dhyt."
"Cur y vastag er y voayrd," dooyrt y moddey-oaldey,
"as cur dty chloagey er y stoyl-drommey, te feer cheh ayns y chamyr."
Ren Bayrn Jiarg Beg cur e cloagey er y stoyl-drommey, agh cha ren ee cur jee e bayrn.
Eisht ren ee goll dys y lhiabbee.
"O Warree," dooyrt ee, "cre'n oyr dy vel lheid ny cleayshyn mooarey ayd?"
"Dy voddym share clashtyn oo," dooyrt y moddey-oaldey.
"O Warree, cre'n oyr dy vel lheid y beeal mooar ayd?"
"Dy voddym share fakin oo."
"O Warree, cre'n oyr dy vel lheid y beeal mooar ayd?"
"Dy voddym share paagey oo."
"Agh, Warree, cre'n oyr dy vel lheid ny feeacklyn mooarey ayd?"
"Dy voddym share gee oo."
"O Voir, Voir!" ren Bayrn Jiarg Veg geamagh.
Doshil y moddey-oaldey e veeal as veagh eh er n'ee yn paitchey, agh dee eh ynrican
y bayrn jiarg, as s'merg da, ren y bayrn lostey ayns y veeal gollrish aile. Lheim
eh ass y lhiabbee as veagh eh er roie magh ass y thie, agh cha n'oddagh eh feddyn
y dorrys.
Haink y warree dys y thie. Va sac mooar eck fo'n aghlish eck. Yeeagh ee trooid yn
uinnag as honnick ee yn moadey-oaldey ayns y chamyr. "Hah," dooyrt ee, "nee aynsoh
t'ou?" Doshil ee yn dorrys as doshil ee yn sac neesht. Haink y moddey-oaldey magh
ass y thie as lheim eh ayns y tac.
Ren y warree kiangley yn sac. Eisht hie ee as lhig ee da'n sac tuittym ayns yn awin.
"Ah, uss moddey-oaldey olk, nee oo my Vayrn Jiarg Beg y ee, jean oo?" dooyrt ee.
Eisht hie ee stiagh ayns y thie, boayl va Bayrn Jiarg Beg.
Ren y neen veg keayney dy-sharroo as ren ee geamagh "Voir, Voir!" "My phaitchey voght,"
dooyrt y warree, "ny keayn arragh, ta'n moddey-oaldey olk marroo." Hug y warree da
Bayrn Jiarg Beg cappan dy vainney as meer dy verreen, eisht hie ee thie marish y
phaitchey.
Ta Bayrn Jiarg Beg mennick goll dys e warree, agh t'ee dy-kinjagh goll dy-tappee as
cha nel ee cloie ayns ny keylljyn arragh.
Hooar mee yn skeeal shen scruit ayns lioar roortys ta ry-gheddyn ayns kishtey dy stoo
jeant ec J.J.Kneen t'ayns lioarlagh y thie tashtee.
KIONE Y SKER
Ta'n aundyr shoh (Kione y Sker) currit da peiagh erbee ta jannoo, ny ta er n'yannoo,
obbyr foaysagh da'n chenn ghlare ain. Cur fys da Brian Stowell, roish y 24oo, Jerrey Fouyir,
er peiagh erbee ta shiu coontey dy ve ny chooneyder ooasle da'n Ghaelg. Screeu ny
chellvane (623821) rish yn Scrudeyr, as ginsh da 'Quoi', as "Cre'n fa', agh roish
y 24oo, Jerrey Fouyir, my sailliu. Nee Eaghtyrane, Caairliagh, Screeudeyr as Tashteyder
yn Cheshaght Ghailckagh reih peiagh ennagh son 'Kione y Sker' mleeaney. Cur fys daue,
roish y 24oo, Jerrey Fouyir!
4
Feailley Ghaelgagh
22oo - 29oo Mee Houney
Ta claare yn 'eailley bunnys reaghit ain nish. Son shickyrys bee tooilley fys ry-akin
ayns ny pabyryn naight as ry-chlashtyn er y radio mysh shiaghtin ny ghaa roish yn
'eailley, as foddee dy bee yn claare caghlaait bit beg car ny meeghyn shoh cheet.
Er hoh diu yn claare myr t'eh reaghit ec yn traa t'ayn.
Jesarn 22oo. Bwaane Feailley Ghaelgagh.
Bee bwaane ayns Doolish (foddee 'syn Ynnyd Happal 'Strand', eddyr 10.00 as 3.30, raad
vees fys ry-gheddyn mychione yn 'Eailley, y Ghaelg, Mooinjer Veggey as y lheid. My
vees fir chiaullee dy liooar arryltagh dy heet bee paart dy chiaull ayn myrgeddin.
Fastyr Ynsee Aeglagh Vannin.
Bee shoh caa da'n aegid dy ynsaghey aghtyn kiaullee theay Vannin, tradishoonagh as
noa-emshyragh. Hed shoh er cummal ayns Purt ny h-Inshey (boayl ennagh
), ec 2.30, as nee Greg Joughin freayl rick er.
Oie Arraneys.
Lhig dooin ooilley goaill arrane ec y Thie Bane, Purt ny h-Inshey, mysh 8.30 'syn
'astyr.
Jedoonee 23oo. Forum Gaelgagh.
Bee caa dooin loayrt ry-cheilley mychione y Ghaelg, as resooney magh cooishyn scanshoil
dooin, ec 2.30, ec Halley Noo Andreays, Doolish (cha nel yn halley shoh er ve reaghit ain dy shickyr foast
) . S'treisht lhiam dy loayrmayd mychione cur er bun Laare Gaelgagh ayns Bun Scoill
ennagh, as cur er bun Boayrd Gaelgagh Oikoil, as cooish erbee elley ta shiu geearree.
Jelune 24oo. Leaght y Ghaaue.
Nee Brian Stowell yn leaght shoh y livrey, ec Halley ny Saasilee, Ballabeg, ec 7.30,
boayl ta ny brastylyn goll er cummal. Bee yn leaght livreit ayns Gaelg dy bollagh,
mychione cooish erbee agh Gaelg ee-hene.
Jemayrt 25oo. Leaght Ned Maddrell.
Nee Roy Peadarson yn leaght myleeaney ec yn Thie Tashtee, Doolish, ec 7.30. Loayree
eh mychione 'Yn Ghaelg myr Greinneyder Farrys.'
Jecrean 26oo. Oie Ghaelgagh.
Dy-chooilley Ghaelgeyr 'sy theihll ec Ynnyd Bluckan Coshey Skylley Maayl, ec 8.00.
Kiaull, cooish as boayrd bee.
Jerdein 27oo. Laa Foslee yn Vooinjer Veggey.
Tar as jeeagh er y phossan cloie shoh as fow magh yn oyr va lheid y phossan currit
er bun. Tey as cooish ry-gheddyn ec Mooinjer Veggey, Thie Scoill Vraddan, 10.00 -
12.00.
Oie Chiaullee.
Nee fir chiaullee as arraneyderyn voish Mannin, Nalbin as Nerin, cloie kiaull as goaill
arraneyn veih ny cheeraghyn Gaelgagh, ec 8.30, ec yn Thie Oast Wiggynnagh, Balley
Chashtal.
Jeheiney 28oo. Kiaull as Arrane son Scollagyn.
Hed possan beg mygeayrt ny scoillyn, soilshagey da ny paitchyn kiaull as arrane ny
cheeraghyn Gaelgagh.
Cruinnaght Ghaelgagh.
Cuirrey-kiaullee ec y Thie Tashtee, 7.30. Arraneyderyn as fir chiaullee voish Mannin,
Nerin as Nalbin.
Jesarn 29oo. Kiaull, Arrane as Bee.
Thie Oast Stashoon, Purt Le Moirrey, ec 12.30. Giense Mooar.
Daunsin, kiaull, arraneyn as y lheid. Arthur Caley ec thie oast ennagh.
Ta ram sheshaghtyn er ghialdin dooin argid. Ta Undinys Eiraght Vannin, Coonceil ny
h-Ellynyn, Eiraght Ashoonagh Vannin as Conister Trust plc er gialdin dooin ny smoo
na keead punt (dagh fer jeu)! Hig Catreeney MacPhee gys yn 'eailley, voish Nalbin,
as foddee dy jig arraneyderyn voish Nerin neesht.
5
Teisht Chadjin Ghaelgagh
Fy-yerrey hoal wass, ta Teisht (abbyr 'çhaysht') Chadjin Ghaelgagh (General Certificate
in Manx) goaill toshiaght ayns ny scoillyn ard. Bee red goll rish jeih ynseydee goaill
y coorse shoh mleeaney.
Ayns y toshiaght, ren y Rheynn Ynsee prowal dy gheddyn kied veih boayrd-scrutee (examination
board) sy Reeriaght Unnaneyssit dy chur GCSE Gaelgagh er bun. Agh ooilley ny buird-scrutee
shoh, ren reiltys Hostyn lhiggey er dy nee dellalyn v'ayn. Er y hon shen, t'ad er ngeddyn rey rish stoo nagh vel 'cosney' argid daue. (Nagh abbyr dy vel
ooilley yn argid çheet veih reiltys Hostyn!) Myr shen, ta buird-scrutee ennagh er
cheau magh çhengaghyn goll rish ny çhengaghyn Loghlinagh as Ollanish as eer Rooshish!
Er yn oyr shen, v'eh fardailagh dy ve shirrey er ny buird-scrutee Ghoaldagh ad dy chur
qualleeaght Ghaelgagh er e hoshiaght.
Anmagh dy liooar, ren y Rheynn Ynsee goaill rish dy nhegin da Mannin jannoo yn obbyr
jee hene. Va Bing-Fondee (Validation Commitee) currit er bun dy stiurey Teisht Chadjin
Ghaelgagh, ta kiart goll rish GCSE ayns çhengaghyn elley.
She coorse mynjeigagh (modular) t'ayn, lesh queig mynjeigyn. Lhisagh un vynjeig
ve jeant ayns un imbagh-scoill. Oddagh y coorse ve jeant ayns daa vlein as ny sloo.
Agh, coardail rish reillyn y choorse, foddee ynseydee jannoo mynjeig ny ghaa, faagail
y coorse as eisht çheet er-ash lurg shen. Ta'n slane coorse jeant er aght lhoobagh
dy ve cooie da sleih aasit chammah as ynseydee-scoill. Foddee peiagh ennagh ceau
queig bleeaney ooilley cooidjagh dy chooilleeney yn coorse.
Agh cha nel eh liklee dy bee sleih goaill wheesh traa as shen.
Son y chooid smoo, cha nod sleih aasit goaill y coorse shoh gys y vlein shoh çheet
(Mean Fouyir 1998). T'eh jeeaghyn dy by vie lesh sleih aasit dy liooar shen y yannoo.
Choud's shoh, she yn Ghaelg yn ynrican çhengey Cheltiagh nagh vod oo cosney qualleeaght er e son. Va Leval-O GCE ayn, agh tra haink shen gy kione, cha daink GCSE Gaelgagh
rish.
Bentyn rish y choorse noa shoh, ta Mynjeig 1 dellal rish reddyn goll rish bannaghtyn,
shirrey as cur fys mychione y lught-thie as sleih, ny t'ou jannoo gagh laa, as co-loayrtys.
Mynjeig 2, ta shen mychione Mannin - y çheer hene, troailt, as paart dy hennaghys as beeal-arrish. Mynjeig 3, ta shen mychione soccar, goaill stiagh soccar persoonagh
as yn aght dy ghoaill ymmyd jeh seyraaidyn theayagh (public facilities). Ta Mynjeig
4 bentyn rish ynsagh as obbyr, as ta Mynjeig 5 dellal rish shirveishyn goll rish arraghey, slaynt, bree, çhellinsh, shappal as argidys.
Ta studeyryn cosney cowraghyn liorish prowallyssyn ayns gagh mynjeig. Bee ny cowraghyn
currit ry-cheilley ec jerrey y choorse dy gheddyn magh y graayd (grade) ta'n studeyr
er chosney ayns TCG.
Y fer-ynsee ta stiurey çhaghnoaylleeaght-fysseree (IT) ec Scoill Ard Noo Ninian, Alex
Townsend, ta eshyn er nyannoo feeshan niartal vees cooney lesh studeyryn ta jannoo
y coorse. Ta Duke Video jannoo keead coip jeh'n feeshan shoh.
Brian Stowell
Feailley Vooinjer Veggey
Hie Feailley Vooinjer Veggey er cummal ayns Jerrey Souree. She laa rastagh v'ayn as
va frass ny ghaa ayn neesht, agh haink ymmodee mraane, deiney as paitchyn, as hrog
Mooinjer Veggey ny smoo na 370.00! Gura mie eu ooilley son cooney lesh y chooish
shoh, as gura mie ayd Bernard Caine son araid feer vie, livreit tra v'eh fosley yn 'eailley.
6
Aundyryn son Ymmydey Gaelg
Veagh daa aundyr noa currit magh ec yn Eailley Ghaelgagh myleeaney; un aundyr dy ve
currit gys ayrn jeh'n Reiltys (Rheynn, Bing, Possan ny Peiagh) as aundyr elley dy
ve currit gys co-lught ny peiagh ennagh ta gobbragh da co-lught as ta cooney lesh
yn Ghaelg ec e obbyr.
Veagh fo-ving cummit dy chur vriwnys er y chooish shoh, cummit ass Eaghtyrane, Caairliagh,
Scrudeyr as Tashteyder Yn Cheshaght, as Reagheyder yn 'Eailley. Verragh yn ving ny
aundyryn da possan, peiagh, Rheynn va jannoo obbyr vie son Gaelg vio.
Cur fys dooin mychione Rheynn, Bing, Possan ny Peiagh ennagh cooie shione diu, roish y 24oo Jerrey Fouyir, my sailliu
Focklyn, Enmyn as Raaghyn jeant ec Coonceil ny Gaelgey
Foddee dy vel ny focklyn shoh ec paart jiu, agh cha dooar mee ad agh shiaghtin ny
ghaa er dy henney. Verrym tooilley duillagyn jeh focklyn y Coonceil ayns ny Dhooraghtyn
shoh cheet.