DHOORAGHT
Earroo 8 Yn Cheshaght Ghailckagh Mee ny Nollick 1997

Y Manninagh Dooie as y greie recortys

“Tra va mee aeg,” dooyrt y shenn dooinney,
“Va mee troggit seose faggys da Purt ny h-Inshey.”
Dynsee mee Gailck veih dooinney my voir,
Ec scoill hoie mee oor lurg oor.
Cheayll mee Baarle, ny lomarcan ayns shen,
Va’n Ghailck chengey follit son shin hene.
“Cha cossyn shiu argid erbee
Veih’n Ghailck,” dooyrt y fer ynsee.
Cha row mee loayrt Ghailck ayns scoill
Agh v’eh chengey ymmydoil,
Son jannoo ymmyd jeh myr chengey follit,
Va ny Sostynee ‘sy valley boirit
Tra va shin gyllagh magh
Son spotch orroo enmyn lunagh.
Cheayll mee ymmodee keayrtyn,
T’ad gra “cha nel Gailck ry-chlashtyn,”
Agh gyn dooyt ta boayl mie
Ayns creeaghyn y shenn sleih,
Son chengey ny mayrey oc hene
Nyn eiraght rish ymmodee keeadyn.
Freill yn aile foaddit,
Cha nel chengey Vannin foast plooghit.
Haink daa ghooinney aeg my whail,
Dooyrt fer jeu “Vel oo Illiam Mac Whaiyl?”
Ayns e laue yesh va red gollrish chaghter bieau,
Y lheid nagh vel mee er nakin rieau.
“She gless-huarastyl sheean”
“Ta cloie back yn choraa ayd,” dooyrt eshyn.
Haink bree yn greie choraa voish kishtey
pooar mwyllin y jouyl,
Freayll yn chengey bio son traa fy yerrey hoal.

Juan y Wright

Ayns cooinaghtyn jeh Markys Braide, Doolish y Karagher, Illiam y Radlagh, Chalse Mooar Craine, Walter y Cleree as y lheid son jannoo recortys y shenn sleih as foaddey aile Gailck noa as freayll ee bio!

(chaghter bieau - chellvane, mwyllin y jouyl - gleashtan.)

SELLAFIELD

Shoh’n chied cheayrt va Leaght y Ghaaue currit, as ta mish lane bwooiagh dy chur eh. Ta shin kiarail cur y leaght shoh gagh blein, reih cooishyn nagh vel bentyn dy jeeragh da’n Ghaelg.

Fodmayd fakin Sellafield voish Mannin. Erskyn ooilley, my t’ou heose ayns ny sleityn erskyn Rhumsaa, foddee oo fakin çhimleeyn Sellafield dy h-aashagh my ta’n emshyr cooie. Shimmey peiagh ta smooinaghtyn dy vel Sellafield ny stashoon-pooar çhesh-veanagh (nuclear). Dy jarroo, ta’n lheid ayn, agh cha nel shen yn ard-chooish. Y red ta shin clashtyn nish son y chooid smoo, shen dy vel ad geddyn conney çhesh-veanagh (nuclear fuel) ass shenn ‘lattyn-conney (slattyn-conney = fuel rods, fuel elements). Ta ny slattyn-conney shoh çheet voish stashoonyn-pooar ayns çheeraghyn feiy ny cruinney.

Dy hoiggal ny cooishyn shoh, sheeu goll dys fishag. Ta dy chooilley nhee jeant ass kinneigyn (particles) as goullraght (radiation). Er y teihll shoh, ta stoo jeant ass breneenyn (atoms) as co-vreneenyn (molecules). Ta red goll rish keead bun-stoo (element) ayn er y teihll, voish hiddragien (hydrogen) ta eddrym seose dys bun-stoo goll rish uraaniu (uranium) ta feer hrome.

Dy yannoo skeeal aashagh jeh, fodmayd gra dy vel breneen erbee jeant ass çhesh-vean (nucleus) as lectraneyn (electrons) ta goll mygeayrt y çhesh-vean, er yn aght cheddin as ta’n seihll goll mygeayrt y ghrian.
Ta’n çhesh-vean jeh gagh breneen er-lhimmey jeh hiddragien jeant ass kinneigyn ta shin gra protaneyn (protons) asnaeeraneyn (neutrons) roo. Ny çhesh-veanyn jeh bun-stooghyn trome goll rish uraaniu, cha nel ad fondagh as ta beoyn orroo cur magh kinneigyn as goullyn as caghlaa dys breneenyn elley. Ta shin gra roorid-goull (radioactivity) rish shoh. Foddee yn roorid-goull ve gaueagh dy liooar - foddee eh cur kahngyr fo raad.

Agh, er lhimmey jeh kinneigyn as goullyn (rays) çheet voish ny çhesh-veanyn jeh breneenyn goll rish uraaniu, foddee ny çhesh-veanyn trome goll er scoltey. Ta shoh livrey ram bree - foddey ny smoo bree na lostey stoo. My ta shin lostey stoo, shen red kemmigagh raad ta ny lectraneyn lheim mygeayrt as livrey bree. Agh my ta shin scoltey çhesh-vean jeh breneen trome, shen red çhesh-veanagh ta livrey niart bree.

Fodmayd scoltey çhesh-veanyn uraaniu lesh naeearaneyn. Tra ta çhesh-vean uraaniu goll er scoltey, ta shen livrey naeearaneyn ta goll er dy scoltey tooilley çhesh-veanyn as livrey tooilley bree. Ta shin gra co-aghtey-slouree (chain reaction) rish shoh. Roish my ren ny Americaanee yn bleaystan çhesh-veanagh (nuclear bomb) ayns y vlein nuy cheead jeig queig as daeed, va paart jeu goaill aggle dy jinnagh ad sheidey seose y slane seihll dy jinnagh ad cur co-aghtey-slouree fo raad!

Dy jeeragh roish y Nah Chaggey Mooar, ren fishagee (physicists) ayns y Germaan Natseeagh toiggal dy noddagh bleasytan niartal ass towse (bunnys) goll er jannoo liorish scoltey çhesh-veanyn uraaniu lesh naeearaneyn. Hug Niels Bohr, fishagagh Danvargagh, y fys shoh da ny Sostnee as Americaanee. Lesh cooney Einstein, hug yn eaghtyrane Amricaanagh Shalee Manhattan (The Manhattan Project) er bun dy yannoo yn bleaystan breneenagh.

Hug ny Sostnee cooney dy liooar da ny Americaanee ayns ny cooishyn shoh. Dy jarroo, she Sostnagh, James Chadwick, ren feddyn y naeearane sy vlein nuy cheead jeig daa-yeig as feed. Va Chadwick yn Olloo-Fishag ec Ollooscoill Lerpoyll voish 1935 dys 1948. Va mish my studeyr sy voayl cheddin voish 1955 dys 1958, as va Chadwick coontit dy ve sorçh dy yee ayns shen.

Goll erash dys y caggey, v’eh ro ghaueagh dy yannoo yn aa-hirrey çhesh-veanagh ayns Sostyn kyndagh rish bleaystanyn Germaanagh - as genney argid. Myr shen, hie Sostnee dy liooar dys Los Alamos ayns New Mexico dy obbraghey er y vleaystan.

Lurg y caggey, cha row ny Americaanee arryltagh dy lhiggey da ny Sostnee co-obbraghey arragh. Va shoh kyndagh rish ny speeikearyn va gobbraghey da ny Rooshee dyn yss da ny Sostnee as Americaanee. Dy firrinagh, oddagh ny Rooshee er nyannoo bleaystan dauesyn hene, gyn cooney. Agh t’eh jeeaghyn dy row ad abyl jannoo eh ny smoo tappee kyndagh rish speeikearyn.

Ny mast’oc shid va Klaus Fuchs, va currit ec Sostyn dys America dy obbraghey er y vleasytan. Dy yannoo skeeal aashagh reesht, ta daa horçh dy h-uraaniu ayn - uraaniu-235 as uraaniu-238 (ta 92 phrotane sy çhesh-vean jeh’n daa horçh, agh 235-92 naeearaneyn sy çhesh-vean jeh uraaniu-235, as 238-92 naeearaneyn sy çhesh-vean jeh’n torçh elley).

My t’ou laccal dy yannoo bleasytan (ny stashoon-pooar), she uraaniu-235 y sorçh t’ou laccal. Agh ta Jee er nyannoo crout dy choadey shin, beggan. Tra t’ou reuyrey uraaniu ass y thalloo, cha nel agh 0.7% jeh uraaniu-235! T’eh costal ram argid dy scarrey’n stoo t’ou laccal veih’n stoo nagh vel oo laccal. Ta aghtyn anchasley ayn dy gheddyn y stoo t’ou laccal. Ren ny Sostnee as Americaanee reih dy yannoo hexa-flooarid-uraaniu (uranium hexafluoride) ny ‘hex’ lesh yn uraaniu, sheidey y hex trooid farchrackanyn (membranes) as sheeley magh (filtering out) yn U-235. She Klaus Fuchs ren gobbraghey magh yn vaddaght ry hoi shoh ayns America. Lurg y caggey, haink eh erash dys Sostyn, raad v’eh gobbraghey ayns Capenhurst, thie-jannoo faggys da Chester. Va Capenhurst troggit dy yannoo stoo son bleaystanyn. Ayns y thie-jannoo shoh, va greienyn-broojee (compressors) traastey hex trooid farchrackanyn dy heeley magh yn U-235.

Stoo elley ta mie son bleasytanyn (as stashoonyn-pooar), shen plutoyniu (plutonium). Cha nod oo reuyrey plutoyniu ass y thalloo: shegin dhyt jannoo eh ayns frasseeagh (reactor). My t’ou cur ram slattyn dy h-uraaniu dooghyssagh (0.7% U-235 as 99.3% U-238) ry cheilley ayns ushtey ny ayns graphite as reaghey dy chooilley red dy kiart, shen frasseeagh. As shegin traastey (pressurising) gas ny ushlagh (liquid) roie harrish ny slattyn-uranniu dy ghoaill magh yn çhiass.
My t’ou kiarail jannoo bleaystanyn, t’ou ceau yn çhiass ersooyl. My she stashoon-pooar t’ayn, t’ou goaill ymmyd jeh’n çhiass dy yannoo lectraghys. Frasseeagh erbee, ta paart jeh’n uraaniu caghlaa dys plutoyniu. Oddagh oo goaill ymmyd jeh’n phlutoyniu dy yannoo bleaystanyn. Shoh yn ard-red: s’goan y frasseeagh va troggit nagh row troggit dy gheddyn plutoyniu son bleaystanyn. Cooinee: U-235 ny/as plutoyniu son bleastanyn - ny stashoonyn-pooar!

Rish paart dy vleeantyn, she Capenhurst va’n thie-jannoo lesh y clea smoo syn Oarpey. As v’eh troggit ayns ard-glass (greenbelt) dyn-yss da’n chooid smoo jeh cummaltee Hostyn! Tra va Capenhurst gobbraghey lesh niart-ard, v’eh goaill wheesh lectraghys as ard-valley goll rish Sheffield. Va kiare stashoonyn-pooar ‘fassaghey’ eh.

Lurg blein ny ghaa, hooar ad magh dy row Klaus Fuchs gobbraghey da ny Rooshee. She cumannagh jeean v’ayn, va currit ayns pryssoon ayns Sostyn. Va mish gobbraghey ec Capenhurst voish 1960 dys 1964. Va mee ronsaghey trooid shenn phabyryn ayns shen, as hooar mee ny giare-hennaghyssyn jeh bing ennagh va Fuchs goaill ayrn ayn. Va’n ennym echey ny mast’ocsyn va kionfenish dys y laa v’eh goit! Cha dooyrt ad dy ren eh cur e leshtallyn lurg shen.

Agh va ny Sostnee er reih dy yannoo bleaystan çhesh-veanagh jeeragh roish y caggey. Cha jinnagh ny Americaanee cur fys çhesh-veanagh daue er y fa dy smooinee ny Americaanee dy jinnagh y fys shen goll dys ny Rooshee. Ren reiltys Attlee troggal thieyn-jannoo goll rish y jouyl hene, dyn-yss da Kiare as Feed Hostyn son y chooid smoo.

Ayns 1946, va Rheynn Bree Breneenagh currit er bun lesh oardaghyn dy hroggal thieyn-jannoo dy yannoo kiare reddyn:

1. dy gheddyn metal-uraaniu ny hex veih stoo-meainyn
2.dy ghoullraghey (to irradiate) yn metal ayns frasseeaghyn (reactors).
3. dy ghoaill magh plutoyniu veh’n vetal goullit (irradiated)
4. dy gheddyn uraaniu-235 liorish sheeley

Son y chooid smoo, va ny thieyn-jannoo troggit ayns yn ayrn jeh Sostyn ta faggys dooinyn ayns Mannin. Va ny ard-offishyn soeit ec Risley ayns 1946, faggys da Warrington. Va thie-jannoo troggit ec Springfields, faggys da Preston, dy yannoo slattyn-conney, goaill toshiaght ayns 1946. Ghow ad toshiaght dy hroggal frasseeaghyn ec Windscale ayns Cumbria ayns 1947. Va ny reddyn shoh ry hoi jannoo bleasytanyn, jarrood boghtynid erbee mychione stashoonyn-pooar.

Ghow ad toshiaght dy hroggal Capenhurst ayns 1949. Va shoh troggit ec bieauid mirrilagh - veeit mee rish deiney as y claynt oc millit dy bollagh liorish y traastey jeh’n obbyr shen. Lurg Aldermaston as Porton Down, she Capenhurst y boayl smoo follit ayns Sostyn. (Cha nel ad geddyn U-235 liorish sheeley nish, agh lesh scarreyderyn-cassee (centrifuges).
Paart jeh’n oyr dy vel sleih goaill aggle roish Saddam Hussein, shen er yn oyr dy vel sleih smooinaghtyn dy vel scarreyderyn-cassee echey dy gheddyn stoo-bleaystan).

Çheet fy yerrey hoal wass dys Sellafield, dy firrinagh she boayl er lheh t’ayn nagh vel yn un red as Windscale. Agh haink drogh-ghoo er yn ennym ‘Windscale’ as, gyn ourys, bare lesh Lught-Reill Bree Breneenagh (Atomic Energy Authority) as Connaghyn Çhesh-Veanagh Goaldagh (British Nuclear Fuels) yn ennym ‘Sellafield’.

Y red t’ad jannoo ec Sellafield, shen goaill magh stoo ymmydoil ass shenn ‘lattyn-conney voish frasseeaghyn ayns kuse dy heeraghyn - Sostyn, y Ghermaan, yn Çhapaan as çheeraghyn elley. Y stoo ymmydoil shen, shen plutoyniu as U-235. Ta BNF er chosney conaantyn ta feeu millioonyn as millioonyn dy phunt. As, son y chooid smoo, ta reiltys Hostyn er lhiggey’n raad daue. Agh cha nel y raad dys stoyr fo’n cheayn goll dy mie er y nagh vod BNF gra son shickyrys dy bee shen sauçhey.

Cha bee yn reiltys noa ayns Sostyn ny smoo arryltagh na’n fer shoh chaie dy chur sthap er Sellafield. Myr sampleyr, ta Jack Cunningham ny hirveishagh ayns reiltys Hostyn as eshyn yn MP son Sellafield as mygeayrt y mysh. S’goan ta kiartaghyn syn ard shen as, er aght ennagh, ta sleih bunnys aarloo dy varroo ad hene dy chummal greim er kiartey erbee. S’cooin lhiams dy loayr mee noi pooar çhesh-veanagh ec çhaglym jeh sheshaghtyn-keirdee ayns Manchuin. Va deiney ayns shen veih Sellafield va arryltagh mish y varroo, er lhiam.
Chammah as kiartaghyn, shoh yn ard, ard red: my ta çheer er ngeddyn bleasytanyn çhesh-veanagh, t’ee feer, feer neu-arryltagh dy gheddyn rea roo. Bleaystan çhesh-veanagh, shen smaght, pooar, niart as bwoid mooar. Tra va blaatar grait as Ben-Rein Hostyn fosley Calder Hall ayns 1956 dy yannoo lectraghys, va’n Bleaystan çheu-heear jeh dy chooilley nhee.

Er lhimmey jeh bleasytanyn, mannagh jean sheelnaue caghlaa shenn chliaghtaghyn jeh jummal bree (cre’n treisht!), cha bee gas, ooill ny geayl faagit. Cha nel pooar çhesh-veanagh er ngoll ersooyl. Ayns çheeraghyn dy liooar, ta sleih croutagh smooinaghtyn er aghtyn dy chreck ‘pooar çhesh-veanagh ta sauçhey’ da’n theay. Cha nod eh ve sauçhey dy bragh.

Ta lught-reill çhesh-veanagh kinjagh gra dy vel goullraght faase ‘sauçhey dy liooar’. Quoi ec ta fys? Son shickyrys, ta’n ghoullraght ayns Cumbria ny smoo na ayns Mannin. Agh cre’n fa ta kahngyr cho cadjin dy liooar ayns Mannin? As VEL eh cadjin - cha nod oo geddyn ny h-earrooyn veih Reiltys Vannin er y fa nagh vel peiagh erbee cummal earrooyn kiart!

Son shickyrys, va paitçhey ruggit ayns Mannin lesh red agglagh myr ‘cloacal extrophy’ - ny collaneyn oc çheu-mooie jeh’n chorp. Dy cliaghtagh, ta’n lheid feer ghoan (paart dy hambil mastey millioonyn dy ‘leih). Cha beagh oo smooinaghtyn dy beagh sambyl erbee jeh ayns Mannin çheu-sthie jeh blein ny ghaa. Agh, dy jarroo, ta’n lheid er daghyrt ayns shoh. Cre’n fa? Quoi ec ta fys.

Red oddys mayd ve shickyr mychione: cha nel y chooid smoo jeh cummaltee Vannin laccal Sellafield. Lhisagh eh ve dooint.

Brian Stowell.