DHOORAGHT
Earroo 9 Yn Cheshaght Ghailckagh Mayrnt 1998

Er hoh diu Dhooraght reesht. Gow my leshtal nagh row oc lieh Dhooraght eu raiee er dy henney. Va chingys ghailley agglagh jannoo orrym yn shiaghtin va mee son reaghey Dhooraght, as va mee currit gys y thie lheihys rish laa ny ghaa.

Kiartyssyn Çhengey ayns yn Oarpey

Er y chied laa jeh Mee Vayrnt 1998, va bree currit da Conaant Oarpagh ny Myn-Çhengaghyn, ass lieh Coonceil yn Oarpey. Choud’s shoh, ta shiaght çheeraghyn er hickyraghey’n (ratified) conaant, as ta un çheer jeig er ghra dy jean ad shickyraghey’n conaant.

Ta’n conaant lowal da reiltys jeh steat-ashoon reih levallyn dasyn hene. Ta shen dy ghra, my ta reiltys arryltagh dy chooney dy mooar lesh myn-çhengey ennagh, nee eh reih levallyn ard. Myr sampleyr, nee eh gra dy jean eh geeck son sleih dy veaghey trooid y myn-çhengey dy bollagh, foddee, gynsaghey trooid y çhengey ec yn ollooscoill, goaill ymmyd jeh’n çhengey ayns ny quaiyllyn as dellal trooid y çhengey ayns oikyn-reiltys as reddyn myr shen. Agh, er y laue elley, mannagh vel reiltys ennagh arryltagh y lheid ‘yannoo, foddee yn reiltys shen gra dy jean eh geeck son brastyl ny ghaa son sleih aasit as lowal da fockle ny ghaa jeh’n çhengey goll er clashtyn ayns ny quaiyllyn, myr sampleyr. Leval ard ny leval injil, my ta.

Er e hon shen, t’eh doillee y hoiggal cre’n fa nagh jean gagh reiltys ayns yn Oarpey shickyraghey’n conaant shoh my t’ad abyl dy scapail cho aashagh as shen. Agh t’eh jeeaghyn dy vel reiltyssyn ennagh goaill aggle roish cooishyn leighoil. My ta reiltys shickyraghey’n conaant as gra dy jean eh cooney ec leval ennagh, eisht bee ad eginit ec y leigh dy ‘reayll y leval shen (shen y red ta ram jin laccal ayns Mannin).

Ta’n conaant jiooldit dy bollagh ec kuse dy heeraghyn, ny mast’oc y Rank as y Turkee. As ta çheeraghyn elley resooney magh y chooish foast. Rish ymmodee bleeantyn ta ny Frangee dy jeean cur myn-çhengaghyn fo chosh. Ta gagh tromlagh (majority) cliaghtey jannoo y lheid, agh ta ny Frangee jeean agglagh. Erskyn ooilley, ta ny Britaanee as Bascee surranse dy mooar kyndagh

rish y polasee shoh. S’cosoylagh dy vel ny Frangee gobbal shickyraghey Conaant ny Myn-Çhengaghyn er y fa dy vel ad noi gagh çhengey sy çheer oc hene er lhimmey jeh Frangish.

Ayns y Reeriaght Unnaneyssit, foddee dy ren y reiltys s’jerree gobbal shickyraghey’n conaant er y fa dy row eh jeeaghyn ro ‘Oarpagh’ (‘Cha nel shin laccal ny joarreeyn agglagh shen as adsyn cur oardagh dooinyn’). As foddee dy row y reiltys Sostnagh boirit mychione argid dy jinnagh ad shickyraghey’n conaant. Ansherbee, reiltys Lunnin ec y traa t’ayn, t’eh smooinaghtyn er y chooish reesht.

Rish bleeantyn dy liooar nish, ta Oik Oarpagh ny Myn-Çhengaghyn gobbraghey dy chooney lesh ny myn-çhengaghyn syn Unnaneys Oarpagh. Ta’n obbyr goll er jannoo trooid bingyn ayns ny steatyn-ashoon syn Unnaneys. Bing y Reeriaght Unnaneyssit, t’ee freayll rick er Bretnish, Cornish, Yernish (ayns Twoaie Nerin) as Gaelg Albinagh. Hug y ving shoh cuirrey son Manninagh dy heet dys ny çhaglymyn myr cronneyder as shen myr ta’n Oaseir Gaelgagh jannoo nish. Ga nagh vod Oik Oarpagh ny Myn-Çhengaghyn cooney dy jeeragh lesh y Ghaelg, foddee eh cooney lhien dy neu-yeeragh.

Ned Thomas, yn Eaghtyrane jeh Bing y Reeriaght Unnaneyssit, t’eh smooinaghtyn dy jean y reiltys noa ayns Lunnin shickyraghey Conaant ny Myn-Çhengaghyn. Ta reiltys Lunnin cur cooney da ny myn-çhengaghyn fo’n smaght echey. Son y chooid smoo, ta’n cooney shen erskyn ny levallyn s’inshley ta’n conaant geearree, ga nagh vel reiltys Lunnin cooney lesh ny myn-çhengaghyn shen er aght corrym feiy’n steat ny kyndagh rish staydys leighoil. Ny yei shen, oddagh reiltys Lunnin shickyraghey’n conaant dy aashagh. Ta Ned Thomas jerkal dy jean reiltys y Reeriaght Unnaneyssit shickyraghey’n conaant as eaghtyraneys yn Unnaneys Oarpagh ec y reiltys shen.

Red vees cur yindys er sleih ennagh, ta Ned Thomas smooinaghtyn dy noddagh reiltys Vannin shickyraghey’n conaant ny lomarcan, gyn croghey er reiltys y Reeriaght Unnaneyssit. Mannagh vees y reiltys ain shickyraghey’n conaant, cha nod veg ve jeant my vees reiltys Vannin goll ergooyl as geddyn rey rish y cooney lesh y Ghaelg t’eh cur ec y traa t’ayn.

Dooinney ta gobbraghey da reiltys Vannin, David Killip, dooyrt eshyn dy nhegin da reiltys Lunnin shickyraghey’n conaant hoshiaght roish my vees bree ec slattyssyn t’aynsyn ayns Mannin hene. Tra vees Lunnin shickyraghey’n

conaant, t’eh smooinaghtyn dy bee reiltys Vannin laccal çheet stiagh neesht. Lhig dooin cooinaghtyn er shen son shickyrys! Ta shin laccal staydys leighoil son y Ghaelg.

Brian Stowell 2

Follym

Ta mee follym. Ta’n corp as aigney aym cho fardailagh as treigit as laare vullee lhong y Phaggad Gaal ec tree ‘sy voghrey er oie feayr, rastagh as fliugh ‘sy gheurey. T’eh orryms screeu red ennagh er y fa dy vel mee bio as ta mee my Ghaelgeyr, as mannagh beign screeu, cha jinnin agh lhie er my lhiabbee geaishtagh rish radio kiare (cha noddym jannoo lesh Radio Vannin ny laghyn shoh), ny cadley rish oor ny ghaa.

Ayns yn ooig vooar follym shoh ta mee tayrit. Cha noddym scapail voee. Eer my ashlishyn. Cha nel veg noa ny anaasagh cheet hym. Nish as reesht ta smooinaght ny cooinaght whummal shaghey my laue sheeynit agh cha noddym geddyn greim orroo. Cha nel ad goll ro happee shaghym agh cha nel bree dy liooar aym adsyn y hayrtyn.

Graih veen, nagh jean ad rieau scuirr veih pleateil? Radio, chellveeish, ny boandyryn as ny cummaltee elley ‘sy ward shoh t’ad lane dy voghtynid. Cre’n fa ta whillin dy ocklyn goll er loayrt oc gyn bun ny chaghteraght? Cre’n fa t’ad cho agglit jeh kiunys as shee as t’ad? Keayrt dy row va mee cliaghtey lhie sheese rish oor ny ghaa as yinnin smooinaghtyn er y theihll as er my vea, as ny keayrtyn cha jinnin agh jeeaghyn magh er yn uinnag goaill stiagh yn reayrt. Nish, wahll, shen skeeal elley.

Dy row mee magh ass shoh, ersooyl veih’n theihll noa, geiyrt er y cheeaght ny beaghey ny beiyn. Mish, my chabbil, ny ushagyn kiaulleeaght, aer oor as feayr, laa kiune as meen. Oh dy row mee ayns shen!

Ta shin cummal ayns lhing ta jingit dy yoarreeyn nagh vel toiggal ny boirrey mychione red erbee agh yn thie oc hene. Ta mee cur feoh da agh ec yn traa cheddin ta mee tayrnit stiagh ayns ny aghtyn shoh. Bare lhiam goll magh ass y thie as gobbragh ‘sy gharey ny shooyl mygeayrt y cheer; lhisin gobbragh er y cho-earroder croo lioaryn noa ta cur cooney da Mooinjer Veggey, agh t’eh foddey ny s’aasey dou jeeaghyn er boghtynid er y chellveeish.

Shee Yee orrym t’ad pleateil reesht!

Cur-shiu bwooise da Jee nagh row uss freayll arrey orrym choud’s va mee ayns y thie lheihys!

3
Troddan Traauee

“C’raad erbee ‘sy theihll ta ny cabbil litcheragh shen?” Ta frough ny lhie dy chiu er y cheer, ta mee skee, feayr as fliugh goll shelg ny shesheree. Ta shey cabbil ry-gheddyn roish my jig yn carr laadee ec hoght dy lieh as mish anmagh girree veih my lhiabbee. Bare lhiam jarrood yn clane cooish as ersooyl lhiam er-ash gys my lhiabbee blah as souyr, agh shoh my obbyr as s’mie lhiam eh tra yioym toshiaght lesh y cheeaght.

Ta’n thalloo goll er creau. Foddym goaill stiagh nish yn aggle anmey veagh er ve er sidooryn fuirraghtyn rish cabbil nyn noidyn lhigey huc ayns keeiragh kayeeagh ec irree yn laa. “Gow shiu kiarail woiaghyn!” Haink shey cabbil skirrey hyms er y thalloo bog fliugh. “Cre’n fa nagh vel shiu rieau fuirraghtyn orrym ec yn yiat.”

Fy yerrey hoal ta ny cabbil er y charr laadee, as lurg cred as snog ta ny eirinee granganagh fo raad dys y troddan traauee. “Ec Balley Keeill Varkysh magher y chaggee jiu nagh nee?” “Cha sym. Bee cowrey ayn, foddee!” Ta’n frough girree as ta laue eddrym yn ghrian gheuree faase my chrauenyn feayr y ghreesaghey.

Ta queeylyn y van skirrey ‘sy laagh vog fliugh choud’s ta shin gimman stiagh ‘sy vagher, agh cha bee feme ain er y tayrneyder dy chur tayrn dooin yn keayrt shoh. Er y raad gys ard ny cabbil ta shin goll shaghey ny irroo (traaueyderyn) elley, ny smoo jeu nyn eirinee shenn as correydank agh ta laue yn aegid (adsyn ny saa na tree feed blein dy eash) cheet stiagh er y chooish nish.

“Shoh eh!” Keeaghtyn magh, fow my chooneyder, gow my hesheragh cha leah’s ta’n carr laadee roshtyn y boayl. “Nish, nee’m shiaullaghey y keeaght choud’s t’ou glenney as kerey ny cabbil. Jean siyr! Cha nel agh lieh oor roish my gowmayd toshiaght!” Nish coltar kiart, queeyl vooar shey oarleeyn, queeyl veg nuy oarleeyn kyndagh rish yn thalloo bog. Ta ny cabbil glen as corkey ayns nyn molg - berreman as driaghtyn er nyn gorp.

Shegin dooin kiartaghey yn thalloo ry-hraaue ain roish my gowmayd toshiaght. Ta ooilley ny claghyn ta lhie er y thalloo ceaut ersooyl ain, eisht shegin dooin cowrey magh linney jeeragh tessyn yn immyr myr stiurag yn chied chreagh. Tra ta shen jeant ersooyl lhien gys y shesheragh ain as kiangle ee gys y cheeaght.

Ta shin er chee goaill toshiaght. Ta ny laueyn aym greimmey dy chionn er ny skeieeyn. Ta ny deiney beggey cummal giense bioyr ayns y volg aym as ta mee smooinaghtyn dy vel cosney foddey ny smoo scanshoil na commee y ghoaill! Jeih dy lieh - hooin roin. Nish yn skeeal nagh vod ve inshit. Skeeal folliaghtagh as neuchredjallagh. She skeeal pishagagh ee mychione jeeanid, yindys as jeeigeyrys aignagh as corpagh. Shen dy ghra TRAAUE!

Ta’n chied chabdil jeh’n skeeal yn bai (shen yn chied daa chreagh currit dy-cheilley). Ta mee er nakin shenn Yernagh, va traaue ec yn troddan traauee ashoonagh Nerin, ceau ny smoo na lieh yn traa echey jannoo yn chied daa chreagh as mysh daeed creagh ry-yannoo ooilley cooidjagh. Va mee shickyr nagh beagh yn immyr echey jeant ec yn traa kiart, agh v’eh jeant as chossyn eh ny varriaght neesht!

Wahll, ta’n nah chreagh er ve currit dys y vai aym as ta peiagh ennagh gyllagh “tar shiu as gow shiu nyn n’yinnair!” “Neemayd gee beggan, agh cha nel traa dy liooar ain son ram bee.” Ta’n shesheragh feayslit veih’n cheeaght, kianglt gys y van as bart dy hraagh currit j’ee. Eisht ersooyl lhien gys y phaalan son awree, braghtan, berreen as cappan dy hey.

“Ta Caine jannoo feer vie jiu.” “T’eh jeeragh dy liooar agh ta ny creaghyn jeeaghyn shang agglagh dooys.” “Smooinee mee dy row ad mie dy liooar.” “Aw, cha nel woie! Cha nel mee rieau er nakin eh jannoo brock myr shen. Ta’n nah chreagh soie myr cleigh eddyr yn chied as
yn trass.” “Boghtynid t’eh jeeaghyn ......” as shen myr t’eh derrey vees nyn mee ain.

4

Daa oor faagit as t’eh orrin goll gollrish y jouyl. She cooish feer chondaigagh t’ayn nish. T’eh er ny cabbil goll cha moal as foddee ad my ta shin shirrey traaue mie, agh ta driss mooar agglagh orrin. Ta mee roie noon as noal mygeayrt my immyr kiartaghey creaghyn, geddyn towse yn thalloo faagit, as ny creaghyn traaueit, as eisht geddyn greim er y cheeaght as geiyrt er seose yn eerey cha moal as crammag snaue seose y boalley.

“Kerroo oor faagit ghooinney! Bee oo ceaut magh ass y troddan traauee shoh mannagh bee oo jeant ec tree er y chlag.” Cha nel agh yn clash ry-yannoo aym nish. Daa creagh, yn creagh s’jerree jeh’n thalloo kiart as eisht yn creagh ooirrey, traaueit magh ec yn cabbyl (cha nel reamys dy liooar son daa chabbyl
nish). “Lhig dooin jeeaghyn er ny staayneyderyn roish my jeanmayd shoh.” Ta shoh yn cliaghtey aym nish. Ta mee feddyn magh my vees feme aym er eab mooar na beg tra verrym jerrey er my immyr.

Ta musthaa mooar er ooilley ny cohirreyderyn nish. “Queig minnid faagit!” Ta shin ooilley snaue seose nyn eerey s’jerree nish. Ta feed poynt ry-gheddyn son y chlash as my ta brock jeant nish bee yn caa cosnee aym spooillit dy bollagh.

“Jeant!” Ta mee er nakin immyr traaueit ny s’messey na shen. Keeaght ersooyl , cullee veih ny cabbil as cur meilley dy chorkey daue. “Neemayd briwnys er traaue nish.” Shoh yn oor s’jerree jeh’n troddan traauee. Neemayd briwnys as nee ny briwnyn briwnys as eisht hed arganys mooar y cummal.

Ersooyl lhien dy valley nish, skee, feayr as sollagh agglagh. Shegin dou beaghey ny beiyn as cur ny cabbil er ash gys y vagher oc roish my roshym tobbyr oonlee lane dy ushtey cheh. Ta mee cliaghtey lhie ayns shen rish oor smooinaghtyn mychione yn troddan traauee shoh cheet!

Phillie Beg

“Yn Chied Veeiteil”

Ayns y vlein nuy keead jeig jeih as feed va laa feailley aym son y chingeesh as ren mee markiagh er cabbyl-yiarn dys Ballachashtal as ayns shen veeit mee carrey. V’eh gobbragh son pabyr naight ayns jiass yn Ellan as er yn oyr va seyrsnys echey dy gholl mygeayrt ayns ny ardjyn sodjey-magh jeh’n skeerey fegooish lhietrymys. Ec y traa shoh va mee kiarit dy ynsaghey Gaelg as va mee smooinaghtyn dy veagh fer ennagh ayns Cregneash ren taggloo yn chenn Ghlare.

Hie shin roin as lurg oor va shin goaill bine dy lhune losserey cheu-mooie thie thooit ‘sy valley veg son va chiass mie ayn as va shin gollish. Denee mee jeh’n ven-thie “Nee ben Vanninagh oo?” “Cha nee,” dooyrt ee rhym, “agh ta my heshey dooinney Manninagh.” “Nod eh taggloo Gaelg” va’n nah feysht, as dreggyr ee “cha nod.”

Cha row shen feer ymmydoil. Eisht dooyrt ee “Ta shenn ghooinney baghey shid hoal as ta Gaelg vie echey agh cha nel eh ymmyd erbee dy gheddyn magh eh son cha vel eh laccal dy ve boirit rish joarreeyn.”

Er shen hooyl shin sheese y traid agh cha row pyagh erbee ayns shilley. Va dy chooilley nhee cha feagh ve gollrish balley fadaneagh, er lhimmey va’n jaagh vane troggal seose veih ny chymleeyn. Va paart kiarkyn trome-chadlagh screebey er thorran as va moddey ny lhie ny chadley fo creeagh. Ghooisht eh as yeeagh eh orrin agh v’eh ro litcheragh dy irree.

Eisht cheayll mee thassane as lurg goll er tammylt va fys ain dy row sleih ayns tholtan ec cass yn ughtagh. Va tree deiney ayns shen as mysh shey ny shiaght jeig kirree, as v’ad lommyrt ny kirree, son lurg caghlaa dy aiyr v’ad keckit as croo. Va dooinney saa mysh queig bleeantyn as feed dy eash, yn nah ghooinney mysh dooble yn eash shen as y trass ghooinney bunnys kiare

5

feed bleeantyn dy eash. Dy jarroo, smooinnee mee, ta mee shickyr dy vel eshyn ny Manninagh dooie. V’eh queig trieyn as reaish er yrjid, va edd keeir er e chione, as va’n cooat echey ro liauyr. Fo’n edd va daa hooillyn gial jeeaghyn magh voish eddin combaasit lesh faasaag vollagh.

V’eh cummal jouishyn ayns e laueyn as honnick mee dy row e ordaagyn croymmit cour ny mairyn, gollrish laueyn eeasteyr.

Ren my charrey taggloo son tammylt beg rish y nah ghooinney (son va enn echey er) mysh ny Barrantee Purt-noo- Moirrey as er-lhiam dy row oyr nyn yurnah jarroodit. Ny yeih, doaltattym, denee eh jeh “vel pyagh erbee ayns shoh ta taggloo Gaelg?” Hrog eh e volleeyn, as loayr eh ny goan cheddin myr rish eh-hene. Eisht hyndaa eh gys e heshaghyn as vrie eh jeu.

Yeeagh ad yn derrey yeh gys y jeh elley, as eisht, lesh un aigney, chrie ad nyn ging. Hyndaa eh rooin, “cha nel” dooyrt eh, ‘cha nel Gaelg erbee loayrit ayns shoh nish. Shirr-jee ayns Purt-noo-Moirrey.” Va shoh naight trimshagh as bunnys erskyn credjue. Agh son shoh as ooilley va ourys aym dy row eh ginsh breagyn.

Eisht veeit shin dooinney coamrit myr preachoor ny hassoo cheu-mooie bwaane thooit, as ren shin taggloo rish mysh aalid y valley veg as yn earish. Va ennym Gaelgagh harrish dorrys e hie, as lurg tammylt, dooyrt eh rhym ayns aght fastagh dy row eh cliaghtit dy lhaih yn Vible ayns Gaelg dy chooilley laa. “Dy jarroo” dooyrt mee “ta shen yindyssagh, son ta mee credjal dy vel oo Sostynagh liorish dty hengey. Va shin briaght ayns shoh agh dinsh ad dooin cha nod pyagh erbee taggloo Gaelg.” Ren eh garaghtee choud as v’eh jeeaghyn cour y tholtan. “Vel oo fakin yn shenn ghooinney ayns shen? Ta Gaelg flaaoil echey” dooyrt eh, “t’eh goaill aggle mooar roish joarreeyn, agh tooid marym, son bee eh chymmey myr ta shiu er jeet voish Doolish dy gholl ersooyl fegooish clashtyn un ockle.Haink y shenn ghooinney voish y tholtan, chroym eh sheese as niee eh e laueyn ayns ammyr combaasit lesh undaagaghyn rish oirr y raad.

“Harry” dooyrt my charrey noa, “ta’n dooinney aeg shoh er jeet voish Doolish dy chlashtyn Gaelg dy shickyr. Cha jean shiu eh y hyndaa ersooyl mollit.” “Ugh”, dooyrt Harry “cha s’ayms.” Eisht hass eh seose chirmaghey e laueyn er lhiatteeyn e vreechyn - “Cha nel agh paart focklyn ayms - te bunnys jarroodit ayms nish. Shegin dou goll thie dy gheddyn cappan dy hey son Thobm as Juan nish.” “Fuirree Harry, cha nel shiu cha tarroogh. Abbyr red ennagh, ta mee guee orts, rish y ghuilley.”

Duirree eh, as yeeagh eh dy-gyere orrym, as eisht dooyrt eh “As ta shiu er jeet voish Doolish, ghooinney aeg. Oh m’ arrane, ta shen raad liauyr - agh c’red t’ou laccal clashtyn?” “Oh red erbee my sailliu.” “Eaisht-jee, eisht” dooyrt eh, as loayr eh “Padjer y Chiarn.” Va yindyssagh erskyn insh.

Va shen queig bleeantyn er dy henney, as ta Harry er n’gholl gys e hennayryn, agh cha bee yn laa shen dy bragh jarroodit ayms.


M.Braide 1935


Gow my leshtal son shoh. Hooar mee yn skeeal shoh vieh lioar giarrag Markys Braide, agh ta mee bunnys shickyr nish t’eh clouit ayms dy vel mee er lhaih eh boayl ennagh elley.

6
Dreeym er ash!

Tra va mee ayns Beeal Feirshtey ec y cho-whaiyl va mee prowal dy hoiggal yn Yernish as Albinish va goll er loayrt. V’eh feer anaasagh geaishtagh rish ny chengaghyn elley as hooar mee aght noa dy ghra (wahll noa doos) back to front as va shen ‘dreeym er ash!’ Smie lhiam shen.

Dobberan y Chenn Ghlare

Tra ta mee shooyl er Cronk Cregneash
Ny vud y choinney freaie,
Yn traa ta goll dy siyragh eisht
Myr coau goll roish y gheayee.

My smooinaghtyn dy mennick ta,
Jeh’n ferish as buggane,
Fastyryn aalin ceau yn traa
Dy mennick screeu arrane.

Tra ta mee jeeaghyn er yn aer
Ec croymmey sheese y ghrian,
Ny bodjalyn ta jiarg as keeir
Er yn muir mooar soilshean.

Tra ta’n druight meeley shilley sheese
Dy ooraghey yn faiyr,
As dorraghys dy hoie cheet rish
Myr doallagh ny screeudeyr.

She shoh ta mennick gerjagh mee
Tra ta’n gheay vooar goaill fea,
Ta ooilley eisht mygeayrt ec shee
As feer taitnyssagh te.

Eisht ta ny ferishyn cheet magh,
Dy ghaunsin noon as noal
Tra nagh vod dooinney jeu baght goaill
T’ou rouail er nyn oayll.

As eisht ta markit fud ny hoie
Eer er gys brishey’n laa,
Harrish ny magheryn glassey roie
Feer tooillit keayrt ny ghaa.