Oraid y Chaairliagh


Ta nyn ming eu er ve lane dy obbyr y vlein shoh jannoo nyn gooid share dy vishaghey yn chengey ain. S'taittin lhiam dy daink wheesh dy chooishyn lhien as haink. Roish jirrym veg ny s'odjey ta mee cur my villey booise da'n ving as dy chooilley pheiagh elley ta er chooney lhiam y vlein shoh. Gura mie mooar eu.

Nee yn Screeudeyr ginsh diu mychione boirey mooar yn waane Tinvaal, gyn ourys. Va shen yn chied taghyrt jeh'n vlein shoh chaie, as ghow yn cloudeyrys, yn radio as eer yn chellveeish anaase mooar er y chooish. Hug yn Screeudeyr nyn imneaghyn ain er y chooish shoh dys bing ronsee Tinvaal ny smoo na hoght meeghyn er dy henney, agh cha nel shin er chlastyn veg voue. Ec y chooid sloo ta'n ving shen lane tushtagh er y raa creeney smoo Manninagh - "traa dy liooar!"

Hug shin er bun 'fo-ving aavioghey' mysh shiaghtin y Chruinniaght. Ta'n fo ving shoh er jeet ny whaail tree ny kiare keayrtyn neayrys shen, as haink ram eieyn noa ass nyn smooiniaght ain. Myr sampleyr: Feailley Gaelgagh, Forum Gaelgagh, Oaseir Lhiasaghey, Cummey Jeih Bleeaney as y lheid.

Tra va shin ooilley grianaghey ayns ny laghyn liauyrey cheh Mee Luanistyn, hug yn Rheynn Ynsee cuirrey dooin ooilley dy screeu rish Brian Stowell mychione 'traa ry-heet y Ghaelg.' Va shen obbyr mooar doillee dy jarroo, agh hug tree feed as shiaght jin nyn eieyn da ec y jerrey. Ren Chris Sheard screeu "Smooinaghtyn as treealtyssyn ny Sheshaght Ghailckagh mychione traa ry heet y Ghaelg", as hug eh shoh da Brian (ayns Gaelg as Baarle).

Screeu eh dy row shin geearree:

1. Ynnyd shickyr as meanagh da'n Ghaelg 'sy churriglym.
2. Cur whilleen dy ynseyderyn da'n ynsaght Gaelgagh as ta ymmyrchagh.
3. Cur caa da paitchyn as yn Ghaelg oc hannah dy ynsaghey ny trooid. Scammyltagh 'sy lhing shoh dy vel ny scoillyn foast noi'n Ghaelg goll er loayrt myr chengey ghooghyssagh myr v'ad keead blein er dy henney!
4. Ta shin shirrey ...oik noa dy chur yn chooish scanshoil shoh er e hoshiaght, ny dy chur ynseyderyn dy liooar da'n Unnid Gaelgagh dy lhiggey da'n Oaseir Gaelgagh cooney lesh yn lught Gaelgagh as yn aavioghey chengey.
5. Oddagh yn reiltys cur cooney mooar da'n lught Gaelgagh liorish chebbal dooin coorseyn-ynsee er lheh.
6. Oddagh yn reiltys cooney lhien dy chur er bun Gaeltaght.

Va ny focklyn shoh ry lhaih ayns y skeeal ec Chris - "Shoh cree y chooish: Ta'n reiltys arryltagh dy liooar dy chur beeal ghraih da'n Ghaelg, agh cha nel eh cho arryltagh dy chur monney saaseyn da'n aavioghey Gaelgagh." S'treih lhiam gra dy vel ny focklyn shen jannoo cochaslys kiart jeh'n reiltys yn laa t'ayn jiu.

Wahll, lurg yn chooish scanshoil shen va mee ny ghaa seyr ain - caa mie dooin dy reaghey Feailley Gaelgagh! Er lhiam pene dy row Feailley Gaelgagh shiaghtin speeideilagh as v'eh lane foaysagh da'n chengey ain. Va shalee yn feailley dy chur roish y theay dy vel y Ghaelg yn red smoo scanshoil dauesyn, as myr shen hug shin ram soilsheenyn stiagh ayns ny pabyryn naight as er y radio. Hooar shin ny smoo na lieh thousane punt voish Undinys Eiraght Vannin as Conister Trust p.l.c. son y chooish shoh as ta shin cur nyn milley booise da ny sheshaghtyn shen.

Hie Oie Ghaelgagh, Cruinniaght Ghaelgagh, Leaght Ned Maddrell, Forum Gaelgagh as Giense Mooar er cummal yn shiaghtin shen. Va'n Leaght Ned Maddrell feer anaasagh as ymmydagh dooin. Ren Aodan Mac Poillin loayrt rooin mychione ny saaseyn aavioghey ayns Nerin Twoaie. Haink ymmodee eieyn ass yn leaght shen, agh haink yn fys smoo scanshoil dooys tra dooyrt Aodan dy row paitchyn flaaoil ny smoo scanshoil na red erbee elley my t'ou geearree aavioghey nyn jengey.

Va Forum Gaelgagh ymmydoil dy liooar dooin neesht. Haink ram sleih as ny mast' ain va ny smoo na kiare keead blein dy Ghaelg! Loayr shin mychione yn Ghaelg t'ayn jiu as ny aghtyn share dy vishaghey ee. Shoh paart dy eieyn ren cheet veih'n 'orum: earishlioar clouit liorish Yn Cheshaght; cur ny smoo Gaelg roish y theay ayns ny pabyryn naight as er y radio; cur Gaelg er lioaryn son paitchyn; cha row shin slane jeant magh lesh yn obbyr jeant ec y Rheynn Ynsee, by chair daue cur ny smoo argid as ynseyderyn da'n skimmee Gaelgagh; smooinee shin dy beagh possan cloie lane-emshyragh feer vondeishagh da'n Ghaelg . Choard shin dy bee eh femoil son ooilley ny Gaelgeyryn dy ghobbyragh cooidjagh, dy vishaghey yn Ghaelg.

Mysh kegeesh lurg Feailley Gaelgagh hie Giense y Nollick er cummal ec Balley Sallagh. Va'n giense shoh reaghit ec Peddyr Hayhurst as ny studeyryn voish ny brastyllyn Ballabeg, as ec y ghiense shoh hug shin yn chied 'chione y sker' da Juan y Crellin. Va 'Kione y Sker' yn smooinaght aghtal jeh Ernie Thorne voish Conister Trust. Ren Conister Trust chebbal da'n Cheshaght daa cheead punt dy lieh dy ve currit da peiagh ennagh ta er n'yannoo obbyr foaysagh da'n chengey ain. T'ad er ghialdin dooin yn symm shoh dagh blein rish queig bleeaney, as son shen lhisagh shin ooilley cur nyn mooise daue.

Hug shin yn chied Chione y Sker da Juan y Crellin, as va shoh reih lane niartal ny Gaelgeyryn. She Gaelgeyr ooasle ta Juan. T'eh cummal brastylyn ec Thie ny Gaelgey, t'eh er screeu skeealyn Gaelgagh, as t'eh er n'yannoo as t'eh foast jannoo obbyr erskyn towse da'n Cheshaght as y Ghaelg! Lhig dooin soilshaghey nyn mooise da.

Lurg y Nollick ren Tinvaal resooney "The Future Development of the Manx Language." Screeu mee rish dy chooilley oltey Tinvaal ass lieh yn Cheshaght roish laa yn resoonaght. Voyll mee yn skeeal screeuit ec yn Rheynn Ynsee mychione 'traa ry heet y Ghaelg' as hirr mee orroo dy chur nyn deiy son ny treealtysyn v'ayn, agh cha dug ad. S'treih lhiam gra nagh row ad arryltagh dy ghoaill treealtys erbee stiagh myr polasee yn reiltys voish yn skeeal va rhymboo, agh cha dooyrt oltey Tinvaal erbee fockle erbee noi'n Ghaelg, as ren queig olteynyn Tinvaal jeig cur nyn deiy son y Ghaelg (shey jeig noi).

Er y chied laa, Toshiaght Arree, hie 'Shibber Phot Cheh' er cummal ec Club Columba, ayns Doolish. Yeeagh shin da'n theay nyn lioaryn roortys noa, as she oie haitnyssagh v'ain . Ren Perree Bane daunse ny ghaa er nyn son, as ren Caarjyn Cooidjagh as nyn gaarjyn cummal seshoon kiaullee lurg yn chibber. Va ny lioaryn roortys jeant dy bollagh ec Séan O Bradaigh. Hrog eh yn argid son clou ny lioaryn voish y chloudeyr Playprint, Divlyn - 700, as Irish Permanent (IOM) Ltd - 700. Haink Mnr Phillip Murray, Stuireyder Irish Permanent dys y ghiense ain, as ren eh cur dooin ny lioaryn dy oikoil. Dooyrt eh dy row eshyn as y co-lught echey lane booiagh dy chooney lesh y Ghaelg myr shoh. Haink eh dy ve ny oltey jeh'n Cheshaght neesht. T'eh orrin reesht nyn mooise y chur dauesyn ren cooney lesh y chooish shoh.

S'treisht lesh y ving dy vodmayd creck ny lioaryn da ny scoillyn. Ta'n Shirveishagh Ynsee er nakin ny lioaryn as er lesh dy beagh ad feer vie son ny paitchyn. Ta kied ec yn Oaseir Gaelgagh dy screeu rish ny ard ynseyderyn nish, cur fys daue cha mie as ta ny lioaryn roortys as dy vel ad ry chreck voin.

Hie Chris Sheard as mee hene er turrys dys Inverness er y nah laa jeig, Toshiaght Arree, dy ronsaghey aavioghey ny Gàidhlig. Hie shin lesh shilley er Comunn na Gàidhlig, Comhairle nan Sgoitean Araich, Sabhal Mor Ostaig, Bun Sgoil Shlèite as Comann an Luchd-lonnsachaidh as va ard-haitnys orrin fakin cha niartal as ta nyn n'ghleashaght hengey. Ta ram caarjyn ain ayns Nalbin nish as ta fys ec ny smoo jeu nish nagh vel ny Manninee loayrt Bretnish! Va'd ooilley arryltagh dy chooney lhien lesh cooishyn Gaelgagh traa vees eh cooie as ymmydoil dooin, as son shickyrys beemayd shirrey yn coyrle oc 'sy traa ry heet. Cha beagh caa er ve ain dy gholl er y turrys shen mannagh dooar shin cho wheesh dy argid voish Undinys Eiraght Vannin son y turrys. Hooar shin 500 vouesyn, as hooar shin 100 voish Caarjyn ny Gaelgey neesht, as ta mee cur nyn mooise dauesyn.

Haink yn chied choip jeh Dhooraght dys dagh oltey yn Cheshaght kuse dy hiaghtinyn er dy henney. S'treisht lhiam dy bee Dhooraght clouit dagh raiee(dagh kiare meeghyn), agh bee feme ec nyn ming eu er cooney chymsaghey artyn, screeunyn as skeealyn, mooar ny beg!

Hie shirveishyn Tinvaal, yn ouyir, y Nollick as y Chaisht er cummal y vlein shoh. Ta shirveishyn ny sheshaght feer scanshoil da'n chengey ain, er lhiam, as ta mee cur nyn milley booise da'n Screeudeyr as Yn Arrymagh Thomson son reaghey as cummal ny shirveishyn cha mie as t'ad.

Ta bargane soiagh(lease) Thie ny Gaelgey yn chooish yerrinagh ta er chur boirrey mooar da'n ving car y vlein shoh. Ta'n reiltys(yn Rheynn Ynsee er lheh) er ve jannoo lhiettrimys orrin as ta'n slane cooish er n'gholl dy dree. Ta Fiona McArdle er ve dellal roo, as foddee dy bee ny smoo fys ec er y chooish, agh ta mee credjal dy vel bargane soiagh ain (ny bunnys ain) nish son y halley shoh fy-yerrey hoal. Gura mie mooar eu 'iona, son freayll rish yn obbyr dree shoh.

Ta'n Ghaelg ain bishaghey ny laghyn t'ayn jiu dyn wooise da ny ymmodee noidyn ta foast lhiettalagh ee. Ta'n vlein shoh chaie er ve lane foaysagh da'n Ghaelg, agh ta foast ram obbyr ry yannoo ec dy chooilley nane jin, dy baillin y Ghaelg dy vishaghey ny s'odjey na t'ee hannah. Ta mee lane shickyr dy begin dooin gobbragh da 'cummey traa ry heet y Ghaelg' cosoylagh rish y chummey screeuit ayms ayns Dhooraght, my ta shin geearree aa-vioghey nyn jengey myr chengey bio. Beemayd tarroogh y vlein shoh cheet, s'feer shen, as dy row shin ooilley gobbragh cooidjagh nee yn Ghaelg cosney!