SHIAULLEY MYGEAYRT MANNIN

Taggloo eddyr Jees.

(Ta'n vaatey sheidey).

A. Nish ta shin ersooyl, bee mayd goll mygeayrt Kione Doolish ayns minnid ny ghaa.

B. Er hoh yn thie-soilshee. Cre'n vannaght t'ad da sheelnaue.

A. Ta dy-jarroo. Nagh nhimmey persoon boght b'eign ve er ny vaih my daink ad ayn!

B. Ta mee credal dy nee Reejerey Illiam Hillary hug lesh stiagh ad.

A. She, as t'eh ny lhie ec fee ayns rullick Noo Yeorge.

B. Nish ta shin goll shaghey Purt Soderick.

A. Shoh raad ta ny joarreeyn goaill soylley daue hene ayns y tourey.

B. As ayns y gheurey cha nel veg ry akin agh foillanyn as ushagyn marrey elley.

A Ta Kione Stondane cheet rish nish as gerrid beemayd goll shaghey Runnysvie. Er hen, foddee oo fakin Langness nish.

B. As ayns shen ta Inish Michal neesht.

A. Va Runnysvie ny phurt reeoil ayns ny shenn laghyn.

B. Va, ta mee er lhaih shen raad ennagh.

A. Nish ta shin goll shaghey Balley Cashtal.

B. Yn lheid cheddin jiu, jea as son dy-bragh!

A. She, cha nel eh gleashagh monney lesh ny traaghyn.

B. Foddee t'eh feer chreeney ayns e hendeeaght

A. Cha b'laik lhiam fakin eh er ny chaghlaa, t'eh jeeaghyn feer chiarnoil as ooasle

(Tannaghtyn).

READING PRACTICE.

CHEER NYN AEG.

Oshin ayns yn Erin Reesht.

Va'n cree echey ro hrome dy ve foddey corree rish ny jallooyn beggey shoh jeh deiney. Hyndaa eh ersooyl e chabbyl as varkee eh roish gys ny buill jeh caggey as shelg as feailley bione da dy-mie. Va plaase Ynn yn thie jeh geayghyn as ushagyn er e skyn, jeh flee as onnaneyn fo. Va cronyn buill-aarlee ny Fenee foast ry-akin er ny reeastyn ardey, agh va ny Fenee ersooyl. Cha row deiney erbee er vakin ad. Cha d'od ad agh jeeaghyn da screeunyn cummal ny enmyn jeh Fynn, Oshin, Fergus, Oscar. Goal Dermod, as y chooid elley. Raad erbee hie eh cheayll eh mysh ny daanyn as arraneyn shoh ayns ynnyd jeh ny Fenee. Vlake deiney er, agh cha heill cagh dy nee Oshin v'ayn, fer jeh ny Fenee.

Noon as noal varkee eh cur shilley er ynnydyn feniaghtys. Agh cha vaik eh beg agh ny cretooryn beggey jeant ayns jalloo dooinney. D'ennee eh feer erreeishagh orroo.

Laa dy row ayns Glion Lhonyn honnick eh possan jeh ny deiney shoh goaill orroo troggal seose clagh vooar. Va tree keeadyn jeu ayn, agh cha yarg ad troggal ee gys e boayl ny seyrey ad hene veih foee, as dooyrt ad

"O roortagh reeoil, cooin lhien!"

Er shen heeyn Oshin er e hoshiaght hene er mwannal e chabbyl as lhoob eh as ghreim eh er y chlagh ayns un laue. Roie ny deiney beggey ooilley veih foee myr jialganyn-leaghyr boirit. Eisht hug Oshin magh e niart. Hrog eh yn chlagh erskyn e chione as hilg eh ee. Choodee ee yn chochruinnaght goll rish clea ard myr d'ettyl ee. Agh v'eh er vrishey tarragh-jeelt y chabbyl lesh yn eab huitt y jeelt as cha d'od eh tayrn eh hene seose reesht; as venn e chassyn rish yn ooir. Skell y cabbyl bane roish.

Nish haink ooilley cooidjagh yn caghlaa as eigid nagh d'od cheet er ayns Cheer nyn Aeg, hraie ersooyl e niart dy-bieau, as hie eh sheese g'osnaghey myr tonn; haink eh dy ve yn fer trean, annoon, shenn ren lieh-lhie er e leiy as eaishtagh rish Parick taggloo mysh Flaunys, as loayragh eshyn rish mysh Niau as mysh Cheer nyn Aeg.

(Yn jerrey.)