ASHLISH VAXEN.

Skeeal Shenn Vretin.

Va tree chaghteryn jeig er ve ynsit mysh e ashlish, as jimmee ad roue dy hirrey my heear. Haink ad dys y clieau s'yrjey sy theihll, as veih'n vullagh b'leayr daue awinyn mooarey goll sheese dys y cheayn. Hroailt ad harrish yn strah 'saaley, as haink ad dys balley mooar ec beeal unnane jeh ny hawinyn er y strah.

Bione daue dy row ee shoh çheer ashlish Vaxen, as honnick ad y flod akerit ayns beeal ny hawin fo ny tooryn ardey ymmodee-ghaahit er y chashtal. Myr va'n Impir er n'yannoo, hie ad er boayrd y lhong s'aaley as hiaull ad harrish mooir as faarkey derrey haink ad dys Ellan. Va'n Ellan shoh Bretin. Hroailt ad harree derrey haink ad dys Snowdon.

"Shoh çheer sleityn ardey, coanyn dowiney as eayninyn agglagh honnick yn Impir," dooyrt ad. Veih mullagh dy row honnick ad ellan Anglesey, as bione daue dy row eh shen yn ellan elley ayns ashlish Vaxen. Honnick ad myrgeddin Aber Sain as cashtal ec beeal ny hawin. Va'n giat foshlit as hie ad stiagh. Bione daue y halley. Va'n daa phonniar lesh folt airhey cloie babban-tawlish. Va'n chenn dooinney niartal grainney babbanyn-tawlish ayns caayr lesh urlee airhey urree.

Va'n voidyn ny soie noi. Huitt ny chaghteryn er nyn ghlioonyn roee, gra, "Ven-Impir y Raue dy bannee dhyt!"

"Ta shiu jeeaghyn dy ve deiney onnoroil ceau cowrey chaghteryn reeoil, cre'n oyr dy vel shiu craidey moom er yn aght shoh?" dooyrt y voidyn.

"Cha nel shin craidey miu y venseyr. Ta Impir y Raue er n'akin oo dty chadley as er dy traa shenn cha nel bioys ny spyrryd faagit ayn kyndagh rhyts. Jig oo marin dys y Raue dy ve jeant ben-Impir, er-nonney bare lhiat yn Impir dy heet dys shoh dy dty phoosey?"

"Hiarnyn cha jargym obbal ny ta shiu er ghra as cha jargym credjal eh noadyr. My shynney lesh yn Impir mee, lhig da cheet dys shoh," d'reggyr ee.

"Hiyree ny chaghteryn oie as!aa er-ash dys y Raue as vannee ad rish yn Impir, gra: "Ta shin er n'akin ee ta Helen yn ennym eck; as neemayd dy-aignagh y leeideil oo dys e cashtal"

Chelleeragh jimmee yn Impir as e armee roue, as myr lhig eh harrish ny sleityn ny hooill eh seose as sheese y lhong bione da yn anchaslys eddyr ashlish as shen nagh vel ashlish. Hug eh enn er yn ellan foddey jeh. Ghow eh thalloo, as lhig eh er e hoshiaght derrey honnick eh reesht yn cashtal ec beeal ny hawin. Va'n giat foshlit as hie eh stiagh. Hoie Helen ayns shen yn voidyn honnick eh ayns e ashlish, as lhoob eh huic gra: "Ven-Impir y Raue, dy bannee dhyt!"

Haink ee dy ve e ven-phoost as hug eh jee myr toyrtys ellan Vretin as ny tree ellanyn ny sloo, as tree cashtalyn dy ve troggit raad d'oardee ee. Va'n fer s'yrjey jeant ec Arvon as ny feallagh elley ec Caerlleon as Carmarthen. Veih'n derrey cashtal dys y jei elley ren ee raaidyn harrish ny sleityn jeeragh tessyn er Bretin, as t'ad shoh enmyssit raaidyn Helen eer dys y laa t'ayn jiu as cha jinnagh deiney Vretin er n'yannoo ny raaidyn mooarey shoh agh er e sons. Dys Cashtal Arvon hug deiney lhieu ooir Romanagh, dy n'oddagh yn Impir cadley as soie as shooyll er ooir ghooie. Hannee eh ayns shen shiaght bleeaney, as d'aase deiney yn Raue skee fieau as ren ad Impir noa. Screeu yn dooinney shoh lettyr dys Vaxen as ny focklyn shoh er.

"My hig oo as my hig oo dy-bragh dys y Raue."

As hug Maxen lettyr er-ash lesh ny focklyn shoh er

"My higym dys y Raue, as my higym."

Geiyrt er y lettyr leeid eh armee dys giattyn y Raue, as braaraghyn Helen, ny deiney aegey lesh folt ruy, ghow adsyn yn ard valley da Maxen. Ayns shen reill eh marish Helen. Er son ny braaraghyn jimmee ad rhymboo reesht lesh sleih. Hug ad fo nyn gosh cheeraghyn as cashtalyn as ard valjyn, as tra va nyn ging lheeah hyndaa ad dys Bretin goaill maroo paart jeh ny mraane bwaagh bentyn da'n sleih va currit haart oc, giarrey magh nyn jengey er-aggle dy millagh ad glare Vretin.

(Yn Jerrey.)

GLOSSARY.

craue-vuc-varrey (whalebone).
tawlish (chess).
babbanyn-tawlish (chessmen).
strol (satin).
boadrymyn (buskins).
iuaagagh (ivory).
craueghan staillinagh (a steel file).
caayr (chair).
snaihaghan airhey (gold tissue).
b'leayr daue (they saw).