LESSON 8.
GRAMMAR (for study).
Combinations of verb and preposition are employed in the construction of many phrases and idioms. In the Manx language the great variety and freedom of these combinations amply compensate for what at first sight appears the fewness of its verbs. Following are a few examples:—
goaill er (lamenting, assuming — taking on).
goaill rish (acknowledging, confessing).
goaill stiagh (including).
goll fo (sinking, going under).
goll rish (resembling).
goll er y hoshiaght (proceeding).
loayrt rish (accosting).
gra rish (saying to, telling).
cur ass (extinguishing).
cur fys (acquainting, sending word).
cur da (giving to, striking).
cur lesh (bringing, carrying).
cur jerrey (finishing).
cur-my-per (beholding).
cheet er y hoshiaght (prospering).
cheet er ash (showing itself, appearing).
cheet rish (showing itself, appearing).
jannoo ass y noa (repeating, renewing).
jannoo soo dy vie (making good use of).
jeeaghyn er (looking at).
jeeaghyn da (showing to).
jeeaghyn lesh (looking towards, regarding).
jeeaghyn jei (looking after).
goll rhym (like me).
goll rish (like him).
cur rish (practising).
guee er (invoke, beseech).
She dooinney dooyrt rhym (It was a man who told me).
Dooyrt mee rish (I told him).
Dy chur ny host (to silence).
"Ta çhengey ny-host ny share na olk y ghra"
(Better a silent tongue than evil speaking).
Ta mee guee ort (I beseech thee, I beg you).
Gwee mollaght er (imprecate, curse).
Fuirree rish (wait for).
Eaisht rish (listen to).
Duirree mee rish sheshaght (I waited for company).
Deaisht me rish chouds dod mee (I listened to him as long as I could).
CONVERSATION (for improvement of vocabulary and readiness of response).
WALKAL DYS KIONE Y DROGHAD.
Co-loayrtys eddyr daa inneen, Ealish as Moirrey.
Ealish: Er hoh shin ec y cheeill.
Moirrey: Vel y cheeill feer shenn?
Ealish: O, cha nel y cheeill t'ayn feer shenn eddyr, agh foddee yn chied cheeill Chreestee er ve troggit ayns shoh ayns y chey cheeadoo vlein nyn Jiarn.
Moirrey: Cre cha yindyssagh!
Ealish: As te bunnys shickyr dy row chiamble phaganagh ayns shoh ymmodee keead blein roish rug Creest.
Moirrey: T'ou cur yindys mooar orrym. Quoi da va'n cheeill casherickit?
Ealish: Da Noo Cristofer.
Moirrey: As kys ta'n ennym echey er ny yarrood?
Ealish: Ta aggle orrym dy vel eh ny skeeal liauyr, agh dy b'laik lhiat clashtyn eh, ver eh taitnys mooar dou dy insh dhyt eh.
Moirrey: Ta mee shickyr dy derragh eh mooarane taitnys dou clashtyn eh, dy beagh oo cha mie as dy insh dou
Ealish: Eisht inshym dhyt skeeal Noo Cristofer. Van Cristofer shoh dooinney feer chreeney, as tra ren ad jallooyn cloaie jeh, hug ad kione coo ny moddey er e gheayltyn, er yn oyr dy vel coyin ny moddee shellit dy ve feer chreeney. Shen-y-fa va Cristofer enmyssit ayns yn Erin Con-cheann, veagh ayns Gailck Coyin-chione. Va'n cummey Yernagh freilt ayns Mannin, Con-cheann, haink ayns traa dy ve Conchan
Moirrey: As cre'n-fa ta'n ennym nish Onchan?
Ealish: Oh, ta shen skeeal elley. T'ou fakin dy dug ny Loghlinee 'kirk' huggey, as eisht haink eh dy ve Kirk Conchan. Tra haink ny Sostnee, b'egin dauesyn goaill laue ayns y ghamman neesht, as haink eh dy ve Kirk Onchan, as eisht Onchan ny lomarcan.
Moirrey: Cre'n skeeal yindyssagh!
Ealish: Nagh vel? as foast ny s'yindysee, my hed oo stiagh ayns y cheeill, hee oo daa chlagh cooinaghtagh, as orroo jalloo jeh Cristofer, as er ny geayltyn echey nee oo fakin kione moddee ayns ynnyd jeh kione dooinney.
Moirrey: Nagh nee shen ass towse yindyssagh? Cre cha shenn bee ny claghyn shen?
Ealish: Oh mysh daa cheead vlein yeig er dy henney.
Moirrey: Te bunnys ro ghoillee dy chredjal.
Ealish: Ve mysh daa cheead vlein roish ghow ny Loghlinee toshiaght dy reill er Mannin.
Moirrey: Nagh yindyssagh eh!
Ealish: Nish te tayrn er-gerrey da traa jinnairagh. Share dooin goll thie.
Moirrey: Hooin roin eisht.
CHEER NYN AEG.
Cabdil 4.—Ayns Cheer nyn Aeg.
Haink sheshaght fir-chaggee neose veih'n Phlaase dy veeiteil roo. Nyn lurg oc d'eiyr Ree Cheer nyn Aeg ayns attey jeant jeh airh as diamonyn as garmad d'airh hollys er, as marish yn ven-rein as e moidynyn, as ayns ny tammyltyn sheidey ny cayrnyn. Ghow yn ree laue Oshin as vannee eh rish roish y sleih as ghow eh eh marish stiagh ayns y phlaase. Ayns shen ren ad feailley rish jeih laghyn as chum ad bannish Oshin as Niau.
Va Cheer nyn Aeg cha aalin as maynrey as va Niau er ghra. E goan, dy jarroo, eer marish y choraa bing, tuittym er cleayshyn graihder, v'ad er hoilshaghey aalid as maynrys ny cheerey, ynrican myr foddee goan y yannoo, dauesyn shen nagh vel er n'akin shen ny t'ad ginsh jeh. V'eh ny s'taitnyssee da Oshin dy ghoaill soylley jeh na v'eh ny yei shen sharroo dy chooinaghtyn. Whilleen taitnyssyn v'echey, tra by-chooinee lesh e vioys ayns shid va keead red jarroodit, as foast v'eh jeeaghyn dy ve do-yantagh. Son va Cheer nyn Aeg er n'yannoo aeg e annym as e chorp. Ny cahnyn v'eh er chaggey ayns yn Erin ayns ny shenn traaghyn, ny lhottyn, yn skeeys, yn imnea, yn dobberan, cha ren ad arragh cooney lesh dy chreoighey e oltyn as dy howse sheese e chree. D'irree eh 'sy voghrey gennal as hie eh booiagh dy lhie er yn oie. Cha d'aase eh rieau skee jannoo reddyn taitnyssagh harrish as harrish reesht. Va dagh oor v'ayn cha maynrey da myr ta'n oor foddey shaghey jeeaghyn dy ve da deiney nagh vel rieau er ve ayns Cheer nyn Aeg.
(Tannaghtyn).