Carn 105

Shennaghys: Rieughid as Neu-rieughid

Tammylt er dy henney hug mee my ner dy row inneen ayms goaill ymmyd jeh lioar-scoill enmyssit 'Discovering the making of the UK'. Shoh lioar t'ad gymmydey ayns scoillyn ayns Mannin. Ta'n lioar shoh ayrn jeh strane enmyssit 'Feddyn magh mychione y traa hie shaghey', as t'eh mychione 'Y Crooin, Ard-whaiyllyn as Pobble, 1500 - 1750'. Reesht, ta'n lioar ayrn jeh Shalee Shennaghys ny Scoillyn (The Schools History Project), va currit er bun ayns Sostyn sy vlein 1972. Va'n lioar hene currit magh ayns 1992 as reesht ayns 1995.

Foddee dy vel stoo mychione cheeraghyn elley ayns lioar elley sy 'trane 'Feddyn magh mychione y traa hie shaghey', agh ta'n lioar shoh ooilley mychione Sostyn, son y chooid smoo: Rheynn 1 - 'Sostyn ayns ny bleeantyn 1500'. Rheynn 2 -'Cre goll rish v'eh, cummal ayns Sostyn ec y traa shen?' Rheynn 3 - 'Cuin vaÕn Aachummey Agglish ayns Sostyn?' Rheynn 4 - 'Cuin va'n Ravloyd Sostnagh (English Revolution)?' Rheynn 5 - 'Cre cho jeianagh as va'n Reeriaght Unnaneyssit?' Rheynn 6 (Y Jerrey) - 'Turrys mygeayrt Britain'.

Lhig dooin jarrood Sostyn, Sostyn, Sostyn car y traa son minnid, as neemayd jeeaghyn er yn aght t'ad geearree gynsaghey shennaghys sy lioar shoh. Son shickyrys, tra t'ou fosley dty veeal as loayrt mychione shennaghys, nee peiagh ennagh gra dy vel oo aggairagh. Ayns cooishyn politickagh, s'mie lesh sleih er y skian jesh loayrt mychione ny reeghyn as mraane-rein as sleih niartal elley ayns shennaghys. Bare lesh lught y skian toshtal loayrt mychione y theay as cre goll rish ve ayns seihll y theay. Ayns Sostyn, tra hooar ny Thoreeyn y varriaght ayns 1979, phrow ad dy gheddyn rey rish yn eab va goll er ayns ny scoillyn dy ynsaghey da feallagh aeg mychione y theay syn ynnyd jeh gynsaghey ny daaytyn jeh reeghyn as mraane-rein. Va ny Thoreeyn lane shickyr dy row ram ynseyderyn keoi ayns Sostyn lhieeney king ny ynseydee oc lesh eieyn gaueagh. Haink shennaghys ayns ny scoillyn dy ve ny smoo politickagh foastagh.

Sy lioar-shennaghys ta mee screeu mychione ayns shoh tÕad dellal rish seihll y theay kiart dy liooar, agh ta stoo quaagh dy liooar ayn. Myr sampleyr, ta paart dy ghuillagyn sy lioar briaght 'Row y sleih boght dy firrinagh boght?' Ta shin lhaih dy row reiltys Hostyn boirit dy mooar sy cheyoo eash jeig as sy chiaghtoo eash jeig dy row y cheer lane dy wagaantee va shooyl ny dhieyn, shirrey jeirkyn. TaÕn lioar gra dy row ymmodee sleih baghey ayns stayd treih car y traa as cha row niart oc er shen. Agh eisht ta'n lioar goll er dy ghra: 'Agh shimmey peiagh sy cheyoo eash jeig as shimmey scrudeyr-shennaghys neayrÕs y lhing shen ren gra nagh row ram jeh ny wagaantee shoh as lught shooyl ny dhieyn dy firrinagh prowal dy chooney lhieusyn hene. Oddagh y sleih boght er nobbraghey dy beagh ad laccal jannoo shen, agh v'ad shaghney obbraghey jeh yioin. Bare lhieusyn beaghey liorish shooyl ny dhieyn, roosteyrys as geid.'

Va mee corree agglagh tra lhaih mee shoh. Y chied red, cha nel ny paitchyn aym gynsaghey agh feer veggan dy hennaghys Vannin ayns scoillyn 'Manninagh'. Y nah red, y shennaghys t'ad gynsaghey mychione Sostyn, t'eh jeeaghyn dy row paart jeh screeut ec Jenghiz Khan. Agh nee gagh moir as ayr toiggal dy vel oo ayns cront bentyn rish cooishyn-scoill as ny paitchyn ayd hene. Cha nel ad laccal oo dy yannoo musthaa sy scoill as cur nearey orroo. Myr shen, son y chooid smoo, t'ou eginit gaccan sy thie as jannoo veg. Eisht cheayll mee mychione yn arnane va currit da'n inneen aym dy yannoo: jannoo posteyr ry-hoi cur raaue da sleih mychione 'fer boght' nagh row boght er chor erbee v'eh goll mygeayrt geddyn jeirkyn liorish kialgeyrys! Ren mee sluggey my chorree reeshtagh.

Ta rheynn sy lioar enmyssit 'Unnaneyssey'n Reeriaght'. T'eh goaill toshiaght myr shoh: 'Ayns 1500, va ny hEllanyn Goaldagh jeant seose jeh un reeriaght va lajer dy liooar, Sostyn, daa reeriaght faase, Nerin as Nalbin, as Bretin, va fo smaght Hostyn as fo smaght flahaghyn seyrey. Va Britain (sic) mee-unnaneyssit. Myr ashoonyn scarrit, va Sostyn, Nerin, Nalbin as Bretin faase cosoylit rish cheeraghyn niartal myr y Rank as y Spaainey' Agh liorish 1750, son y chooid smoo, va ny kiare ashoonyn shoh fo smaght reiltys Lunnin, as gra y Reeriaght Unnaneyssit roo. Va'n unnaneys shoh cooney lesh Britain (sic) dy yannoo yn impiraght smoo niartal sy teihll. Cre'n aght ren shen taghyrt?'

Shegin dou goaill rish nagh vel y slane lioar cho scammyltagh as shen, agh ny-yei shen as ooilley yinnagh eh cur er Celtiee dooie dy hilgey. As shoh lioar oikoil ayns scoillyn Vannin. Lhisagh Rheynn Ynsee Vannin goaill nearey vooar.

Shegin dooin ve bwooisal son un red: ta caslys-cheerey beg sy lioar shoh ta jeeaghyn 'Britain' dooin as cha nel Nerin ry-akin (ny smenkey as ny smenkey nish ta 'Britain' sheeyney magh dy 'luggey seose Nerin ooilliu). Er y laue elley, voish caslyssyn-cheerey elley t'ou gynsaghey dy row Mannin cur MP-yn gys Lunnin!

Shoh doilleeid cadjin ta ry-gheddyn ayns gagh cheer Cheltiagh. Adsyn ta geddyn y varriaght, tÕad screeu y shennaghys. Agh ta ram sleih jarrood ny t'ad gynsaghey ayns ny scoillyn ansherbee. Ayns Nerin nish ta doilleeidyn erlheh ry gheddyn. Ta paart dy screeudeyryn-shennaghys gobbraghey goll rish y jouyl hene dy aa-screeu shennaghys Nerin as dy yeeaghyn dooin nagh row Sostyn cho agglagh as shen.

Ayns Mannin, tra vees y Curriglym 'Ashoonagh' scughit magh ass (as nee shen taghyrt ayns Sostyn hoshiaght) lhisagh shin ve aarloo dy chur shennaghys Manninagh roish ny ynseydee ayns scoillyn Vannin, goaill ymmyd jeh stoo ta screeut hannah as jeh stoo noa. Lhisagh shennaghys ny h-ellanyn shoh golf er ynsaghey er aghtyn Celtiagh chammah's aghtyn Sostnagh.

Brian Stowell

Summary

History text books currently in use in schools in the Isle of Man (and other Celtic countries) present a travesty of the history of 'Britain'.