Carn 123

Vel shin nyn Geltiee ny dyn?

Ta kuse dy henndaaleeyn ayns ny hellanyn shoh (as buill elley?) er jeet dy ve greesit dy liooar mychione y chooish shoh: vel ny Albinee, Bretnee, Britaanee, Cornee, Manninee as Yernee nyn Geltiee firrinagh? Ta shen dy ghra, vel ad jehÕn sluight cheddin as ny shenn Cheltiee er y Cheer Vooar Oarpagh ren ny shenn Ghreagee as Romanee screeu mychione ny smoo na daa veeilley blein er dy henney?

Ta shin cliaghtit lhaih dy daink ny Celtiee dys ny h-ellanyn shoh veih'n Cheer Vooar roish my row Yeesey Creest ayn - as dy daink ram jeu ayns ruegyssyn (invasions). Shen yn aght haink ny chengaghyn as y cultoor Celtiagh dys ny hellanyn shoh. Agh nish ta shenndaaleeyn gra nagh vod ad feddyn cowraghyn erbee jeh lheid ny ruegyssyn shen. As, ga nagh vel money prowallyn jeant choud as shoh, cha nel eh jeeaghyn dy vel DNA ny 'Celtiee' ellanagh goll rish DNA ny shenn Cheltiee er y Cheer Vooar. Dy jarroo, ta'n DNA t'ec 'Celtiee' ellanagh ennagh jeeaghyn goll rish DNA ny Bascee t'ayn nish! Bentyn rish shoh, ta sleih ennagh credjal dy row ny Bascee yn chied phobble Oarpagh. As foddee dy vel sleih dooie ny h-ellanyn shoh er ve ayns shoh rish meeillaghyn as meeillaghyn dy vleeantyn, neayr's traaghyn ny shelgeyryn-chymsee (hunter-gatherers). My s'feer shen, foddee dy vel eh soilshaghey magh yn oyr dy vel DNA ny Bascee goll rish DNA ny Bretnee as ny Yernee: she shenn, shenn Oarpee tÕayn. As, my s'feer shen, shegin soilshaghey magh yn oyr dy vel chengaghyn Celtiagh ec 'Celtiee' ny hellanyn shoh.

Agh erskyn shoh as ooilley, cre'n fa ta sleih ennagh cho debejagh dy vrishey seose ashlishyn ny 'Celtiee' ellanagh? Vel politickaght cheu-heear jeu? Nar lhig y smooinaght agglagh shen cheet stiagh ayns dty chione. Agh ny yei shen as ooilley... T'eh symoil dy vel lheid y BNP (y Partee Goaldagh Ashoonagh) jeant cho booiagh dy chlashtyn yn eie nagh vel Yernee yn laa t'ayn jiu jeh'n chynney cheddin as ny shenn Cheltiee er y Cheer Vooar Oarpagh. My t'ou uss jeeaghyn er ynnyd-eggey (website) yn BNP, hee uss dy vel lught y BNP jeeaghyn roue gys y laa yiowmayd magh dy nee DNA Sostnagh ta ry gheddyn ayns Nerin son y chooid smoo!

As cre'n fa ta lught y BNP (as sleih elley) smooinaghtyn dy vel shinyn ta gobbraghey son cooishyn Celtiagh coontey kynney dy ve cho scanshoil? Ta'n Commeeys Celtiagh as sheshaght Celtiagh elley kiart tra t'ad gra dy nee ny chengaghyn Celtiagh ny reddyn smoo scanshoil - ny benn rish y kynneeaghys.

She chengaghyn, cultoor as seyrsnys politickagh ny h-undinyn jeh ny gleashaghtyn ain, as cha nee DNA, ga dy vel y chooish shen anaasagh. Eer my vees ny shenndaaleeyn shen kiart as cha nel kianglaghyn-kynney eddyr ny shenn Cheltiee er y Cheer Vooar as sleih ny hellanyn shoh, ta whilleen sleih goaill ymmyd jeh'n ockle 'Celtiagh' nish as dy beagh eh fardailagh dy phrowal dy gheddyn rey rish as shinyn loayrt mychione Albinee, Bretnee as myr shen. Ta eer 'Commeeys Celtiagh' ayn nish ta currit da cloie rugbee. As cha beeym boirit my vees ad lane shickyr nagh vel mee jeh'n chynney cheddin as ny shenn Cheltiee.

Myr ren un shenndaalee ayns Mannin goaill rish, t'eh ro anmagh nish: taÕn fockle 'Celtiagh' soiet ayns aignaghyn y theay. Ta paart dy scoillaryn goll ny sodjey na gra nagh row sleih ayns ny h-ellanyn shoh nyn Geltiee: ta ny scoillaryn shoh jannoo beg jeh ny shenn Cheltiee er y Cheer Vooar. Agh shen skeeal elley. Red ta boiragh dy liooar ayns Mannin, shen yn aght ta sleih ynsit ennagh dellal rish ny Wiggynnee. Dy jarroo, oddagh oo gra, bunnys, dy vel kynneeaghys cheet stiagh sy chooish: 'Wiggynnee heose, Celtiee heese.' Shione dou dy row ny Loghlinee scanshoil ayns shennaghys Vannin. Agh veih'n aght ta sleih ennagh loayrt, cha jinnagh oo smooinaghtyn dy row chengey as cultoor Vannin feer Ghaelgagh rish keeadyn dy vleeantyn. T'eh jeeaghyn nagh vod sleih ennagh jannoo lesh yn eie resoonagh dy row cruinnaght Cheltiagh casley rish Tinvaal ayns Mannin roish my daink ny Loghlinee, foddee. Cre'n eie scammyltagh! Gyn ourys, s'cummey lesh yn chooid smoo jeh'n theay ny h-eieyn shoh. Agh ny smoo as ny smoo, oddagh oo gra dy vel claaryn-shennaghys er y chellveeish lane dy h-ashoonaghys Sostnagh. Ta fir-shennaghys er y chellveeish gaghtey myr rollageyn-fillym, as fer ny ghaa jeu gra nagh row yn impiroilaghys Goaldagh cho olk ny yei shen as ooilley. Shegin dooin jannoo nyn gooid share freggyrt y chur, as ta cooish ny Celtiee kianlt seose lesh shen. Ta tromlagh kinjagh guee er mynlagh, 'Jean-shiu firrinaghey shiu-hene!' As car y tract ta'n feysht golf er briaght 'Quoi va/ta ny Celtiee?' Myr shen, t'eh aitt dy chlashtyn mychione y ronsaght noa bentyn rish Sostyn as DNA ny cummaltee ayns shen keeadyn dy vleeantyn er dy henney. T'ad er ngeddyn magh dy vel DNA Anglo-Hostnagh goan dy liooar ayns Sostyn. As cha nod ad feddyn cowraghyn dy row ruegyssyn mooarey jeans ec Anglo-Hostnee ayn er chor erbee. Myr shen, brie yn feysht 'Quoi va/ta ny Sostnee?' Foddee dy lhisagh shin cur cuirrey da Sostyn dy heet stiagh sy Chommeeys Celtiagh.

Summary

Archaeologists argue that there was no ethnic link between the ancient continental Celts and the peoples of Britain and Ireland, denying the existence of the insular Celts. This has been seized on with suspicious eagerness by some, who seem to have the idea that discredited theories of 'race' underpin our philosophies.

Brian Stowell