Yn Eddyr-Voggyl as ny Chengaghyn Celtiagh

Summary:

While some people may well be tired of hearing exaggerated claims for the Internet it has significant potential to further the cause of the Celtic languages.

Shimmey imraa mychione yn Eddyr Voggyl (Internet) t'ayns na pabyryn-naight er y gherrid. Er y fa dy vel y chooish shoh bentyn rish co-earrooderyn as y lheid, nee ram sleih gra nagh mie lhieu clashtyn my e chione. Agh oddagh y lheid jannoo foays da chengaghyn beggey goll rish ny chengaghyn Celtiagh as bare dooin goaill ymmyd jeh.

Ghow yn Eddyr-Voggyl toshiaght red goll rish jeih bleeaney as feed er dy henney tra va ny Americanee geearree co-earrooderyn mooarey y chiangley ry cheilley. Ec y traa v'ayn, cha nee agh co-earrooderyn mooarey v'ayn, ayns ynnydyn ronsee currit da cooishyn-caggee as ayns ollooscoillyn (ram jeusyn currit da cooishyn-caggee neesht). Lurg tammylt, hoig sleih dy liooar dy row eh beggan ommidjagh dy ve gobbraghey dy jeean lesh co-earrooder mooar ayns un voayl, geddyn ooilley ny eiyrtysyn (results) er tape ny pabyr, eisht cur lesh ooilley ny tapeyn as pabyr shen ayns gleashtan ny etlan dys co earrooder mooar elley ayns boayl elley, as jannoo obbyr dy liooar nagh row ymmyrchagh. Cre mysh kiangley y daa cho-earrooder ry cheilley as giarrey magh ram jeh'n obbyr? Eisht, veagh y daa cho earrooder 'loayrt' eddyr oc hene, goaill ymmyd jeh linnaghyn-chellvane. Dy beagh sheanseyryn (scientists) gobbraghey ayns California, abbyr, oddagh ad cur eiyrtysyn nyn obbyr stiagh ayns co-earrooder raad v'ad gobbraghey as eisht cur ny eiyrtysyn shen dys co-earrooder erbee va kianlt lesh y cho-earrooder ocsyn. Oddagh y nah cho-earrooder ve faggys da'n chied cho- earrooder, ny thousaneyn dy veeilaghyn ersooyl. As oddagh co-earrooderyn dy liooar ve kianlt ry cheilley dy yannoo moggyl (network).

Ghow sleih toshiaght dy chur chaghteraghtyn hug sleih elley harrish ny linnaghyn eddyr ny co-earrooderyn. Va shen y toshiaght jeh post lectraneagh as y toshiaght jeh'n Eddyr-Voggyl myr ta shin toiggal eh nish. Va moggylyn currit er bun son anaaseyn er-lheh (special interests). Eisht, va moggyl mooar jeant jeh ny moggylyn ooilley. Y moggyl mooar, shen yn Eddyr-Voggyl.

Derrey tammylt beg er dy henney, v'eh doillee da peiagh ny lomarcan dy ghoaill ayrn syn Eddyr-Voggyl. V'eh orts ymmyd y ghoaill jeh co-earrooder mooar va lesh reiltys ny ollooscoill ennagh. Agh nish, foddee oo goaill ayrn lesh co-earrooder persoonagh sy thie ayd hene, choud's ta jee-chummeyder (modem) ayd as t'ou surransagh dy liooar. Jee-chummeyder, shen greie ta lhiggey da co-earrooder ennagh 'loayrt' rish co-earrooder elley harrish linney chellvane.

T'ou geeck argid dy reiltagh da sheshaght-voggyl ennagh as t'ee shen cooney lhiat dy ghoaill ayrn sy voggyl eck hene as syn Eddyr-Voggyl. Dy firrinagh, t'eh foast doillee as costal dy liooar dy ghoaill ayrn, ga dy vod oo 'loayrt' rish sleih ayns Tokyo, abbyr, son y leagh jeh eam-chellvane ynnydagh (bwooise da'n argid reiltagh t'ou geeck da'n cheshaght voggyl). Ta'n doilleeid ayn kyndagh rish cooid-vog (software) teaymagh as jee chummeyderyn teaymagh. Ta colught Microsoft toiggal shoh, as t'adsyn er-chee creck stoo vees dty warree abyl dy ymmydey gyn boirey! Heemayd.

Ta moggylyn co-earrooder ymmydoil dooin er y fa dy vodmayd cur stoo Celtiagh noon as noal feiy ny cruinney. Fodmayd cur stoo-ynsee (lesh jallooyn as sheean) harrish ny linnaghyn. Dy jarroo, ta Marion Gunn voish Divlyn as e caarjyn jannoo y lheid rish shiartanse dy vleeantyn lesh y voggyl Gaelagh GAELIC-L. Agh foastagh, tra va shen currit er bun, v'ou eginit goll trooid co-earrooder mooar - red nagh vod oo roshtyn dy aashagh ayns Mannin. Nish, ta reddyn er jeet dy ve ny sassey.

Son shickyrys, cha nodmayd jerkal rish mirrilyn dy heet magh ass co-earrooderyn. Ta niart boghtynid er ny screeu mychione Ard-Raad Mooar y Fysseree (The Information Superhighway), raad vees co-earrooderyn, chellvaneyn as chellveeish gobbraghey ry cheilley. Dy firrinagh, cha nel monney anaase ec y chooid smoo dy 'leih er y lheid ec y traa t'ayn. Rouyr blaatar, foddee. Agh red erbee ta lowal dooin skeayley magh fys er yn Ghaelg, she red feeu t'ayn, gyn ourys erbee. Erskyn ooilley, sheeu eh tra ta sleih shirrey y lheid orrinyn. As ec y traa cheddin, fodmayd gynsaghey voish stoo ta shin geddyn voish cheeraghyn elley, stoo ta cheet harrish ny moggylyn.

Ta reiltysyn toiggal dy vel niart ec y fysseree (information). Er aghtyn ennagh, ta ny Americanee ny smoo currit da seyrsnys y pheiagh na ny Oarpee. Shen y fa dy daink yn Eddyr-Voggyl rish ayns America. Agh eer ayns shid, ta sleih pooaral cheet dy ve imneagh mychione corvaal yn Eddyr-Voggyl. By vie lhieu eh y chur fo'n smaght oc as gagh red y reill dy jesh. Choud's shoh, ta lught yn Eddyr Voggyl caggey dy jeean noi shen.

Surrys enn nagh bee reiltys Hostyn ny smoo graihagh er yn Eddyr-Voggyl lurg da fer brishey stiagh ayns co-earrooder Chellinsh Goaldagh as feddyn magh earrooyn-chellvane follit. Agh s'doillee da reiltys Hostyn lhiggey er dy vel eh geddyn rey rish reillyn as prowal dy screeu reillyn noa ec y traa cheddin. Dy bishee niart yn Eddyr-Voggyl! As nagh mie dy smooinaghtyn dy vel oo cur paart dy imnea er reiltys ennagh as oo cur cooishyn Celtiagh er e hoshiaght ec y traa cheddin.

Orree Crennell