Carn 95.

Summary

Efforts to extend Gaelic medium education to secondary schools in Scotland have been stalled. Many people do not believe the real reason for this is the shortage of suitable teaching material.

Cha nel reiltys Lunnin arryltagh dy lhiggey da scoillyn ard ayns Nalbin gynsaghey cooishyn-scoill trooid Gaelg Albinagh kyndagh rish 'doilleeid obbree'. Ta'n Scrudeyr-Steat son Nalbin er ghra dy vel eh ymmyrchagh dy smooinaghtyn dy dowin er aghtyn dy ve speeideilagh sy traa ry-heet. Ta'n Scrudeyr-Steat gra dy vel reiltys Lunnin goaill ayns laue shaleeyn dy gheddyn tooilley ynseyderyn oddys gynsaghey trooid Albinish. Keimeeyn (graduates) as Albinish oc ta gobbraghey ayns bunscoillyn, bee toyrtyssyn eear-cheimagh (postgraduate grants) ry-gheddyn oc. Bee coonseilyn ynnydagh goll er greinnaghey dy yannoo ny smoo son possanyn roie-scoill ta cur Gˆidhlig er e hoshiaght. As lhisagh coonseilyn ynnydagh as sheshaghtyn Albinish co-obbraghey ny share.

Ec y traa t'ayn, ta lieh-cheead unnid Albinish ayns Nalbin lesh thousane dy lieh dy h-ynseydee ayndaue ooilley cooidjagh. Paitchyn ayns ny h-unnidyn shoh, t'ad goll er ynsaghey trooid Albinish ayns bunscoillyn raad ta ny paitchyn elley goll er ynsaghey trooid Baarle. Ta ny h-unnidyn shoh feer speeideilagh, as sleih ta gobbraghey son Albinish, v'ad jerkal dy beagh unnidyn Albinish currit er bun ayns scoillyn ard Albinagh. Ta imnea mooar er ram jeh'n sleih shen nish kyndagh rish mee-arryltys reiltys Lunnin dy chur ynsaghey trooid Albinish er e hoshiaght.

Agh ta leshtal ec reiltys Lunnin sy chooish shoh. Foddee ad gra: 'Cur-shiu my ner: ta shin cur yn chengey er e hoshiaght er aght keeallagh as fondagh. Cha jeanmayd goll ro happee as milley y slane shalee'. Son shickyrys, ta ny toyrtyssyn son Albinish goll seose dys 2.1 millioon (bishaghey jeih sy cheead), bee coorsyn noa ry-gheddyn ayns scoillyn ard, as bee ad cur er bun ynnyd ry-hoi jannoo stoo-ynsee as dy chur magh eh.

Yn argid ta colleish Sabhal Mor Ostaig geddyn veih coonseilyn ynndyagh, hig shen dy ve fo smaght Oik Nalbin. S'taittin lesh stiureyder y cholleish shen, er y fa dy bee eh ny sassey geddyn argid veih un oik na veih hoght oikyn.

Goll erash dys Albinish ayns scoillyn ard, ayns 1994 ren scruteyryn-scoill cur magh imraa va noi sheeyney ynsagh trooid Albinish veih bunscoillyn dys scoillyn ard.

Va sleih goaill yindys jeh briwnys ny scruteyryn. Kyndagh rish shen, ta 123 dy heshaghtyn as persoonyn er chur ny barellyn oc mysh imraa ny scruteyryn. Ga dy beagh bunnys gagh nane jeh ny h-aghinyn noi briwnys ny scruteyryn, ta'n Scrudeyr-Steat er nobbal sheeyney ynsagh trooid Gaelg Albinagh dys scoillyn ard. Yn MP son ny h-Ellanyn Heear, Calum Mac Donald, dooyrt eshyn dy row trimshey ersyn er yn oyr nagh dug yn Scrudeyr-Steat as Oik Nalbin geill da ny barellyn ta noi briwnys ny scruteyryn.

Cha nel Comunn na Gˆidhlig ny Comunn nan Parant jeant bwooiagh noadyr. Shenn chrout politickagh t'ayn, fockley drogh naight fo cloagey meer veg dy naight vie as guee nagh jean y theay cur monney geill da'n drogh naight. Dy firrinagh, she drogh naight t'ayn nagh vod ny h-Albinee cur ynsagh trooid Gaelg Albinagh er e hoshiaght ec y traa t'ayn. Son shickyrys, bee reiltys Lunnin ceau tooilley argid er yn chengey ayns ny scoillyn, agh s'beg yn argid t'ayn - ommidjagh, yiarragh ram sleih. T'eh jeeaghyn dy vel reiltys Lunnin arryltagh dy cheau paart dy h-argid er Albinish ayns bunscoillyn, agh cha mie lesh yn reiltys shen yn chengey y ve myr chengey vio as ymmyd jeant jee son cooishyn y laa t'ayn jiu, goll rish co earrooderyn as keintys. Ta Lunnin gialdyn dy bee tooilley coorsyn 'Gaelagh' ry gheddyn, agh she 'Studeyrys Celtiagh' vees ayn, cha nee coorsyn-chengey kiart. Surrys enn dy vel Gaelg Albinagh (goll rish ny myn-chengaghyn ooilliu) sauchey choud's t'ee dooint ayns ghetto, loayrt ree hene. Ta Albinee corree er y hon dy vel ynsagh trooid ny chengaghyn dooghyssagh ry-gheddyn ayns Bretin as Nerin ayns scoillyn ard, as cha nel shen lowit ayns Nalbin. Ta ymmodee Albinee smooinaghtyn dy vel Lunnin gimraa genney stoo-ynsee ayns scoillyn ard myr leshtal.

Ta'n red cheddin ry-gheddyn ayns Mannin. Ta kuse dy h-olteynyn jeh'n Chiare as Feed lane shickyr dy vel yn Ghaelg myr cooish lhiannooagh ny lomarcan, cooish ta cooie da paitchyn aegey as tootyn aasit ('Cha row yn Ghaelg rieau ny chengey chiart'). As shegin dooin goaill rish dy vel sleih ayn ta slane ayns foayr jeh'n Ghaelg agh t'ad smooinaghtyn nagh vod ee dellal rish cooishyn ayns scoillyn ard.

Son shickyrys, s'beg y stoo-ynsee Gaelgagh ry-hoi scoillyn ard ta ry-gheddyn ec y traa t'ayn. Agh foddee ny Gaelgeyryn croo stoo-ynsee chammah as focklyn noa er yn aght cheddin as ta goll er jannoo ayns cheeraghyn elley. Foddee Gaelgeyryn cheet dy ve cliaghtey loayrt mychione tooilley cooishyn ayns Gaelg. Mannagh vees ny Gaelgeyryn prowal jannoo shen, hig yn ghleashaght Ghaelgagh dy ve ny gleashaght-shennaghys ny lomarcan.

Myr shen, ga dy vel yn Ghaelg Albinagh foddey ny stroshey na'n Ghaelg, ta cosoylaghtyn eddyr staydyn yn daa hengey. Ta sleih dy liooar ayns yn daa heer smooinaghtyn dy vel red beg jeh'n chengey cooie da paitchyn, agh s'liooar shen.

Sleih ta smooinaghtyn myr shen, ta kuse jeu credjal dy vel ny chengaghyn Gaelagh jeh beggan scansh as nagh vel ad baggyrt er peiagh erbee. Agh t'eh baghtal ry-akin dy vel sleih elley coontey dy vel gaue ennagh ayns ny chengaghyn shoh. Red scarree t'ayn, er-lhieu, dy ve loayrt chengey elley ta soilshaghey magh nagh vel oo goll rish sleih elley ta slane biallagh da'n steat. Cha nel y beoyn shen cho lajer as v'eh, agh t'eh foast ayn. Shegin dooin streeu dy hoilshaghey magh nagh vel eh ny red quaagh dy ve loayrt ass chengey erbee sailt, as dy vel eh ny red dooghyssagh dy veaghey trooid y chengey shen chammah as oddys oo.

Orree Crennell