Oraid Ghaelgagh: Laa Illiam Dhone 2004

Un vlein daeed as three keead er dy henney va dooinney lhieggit gy- baase ec y chronk shoh, Illiam y Christeen, Manninagh dooie, lheiggit ec Manninagh dooie elley, Illiam McCowle. Shoh yn skeeal va goll mygeayrt keead blein ny lurg (shiaght keed jeig shey-jeig as tree feed, 1776), ansherbee. Va’n jees jeu gra dy row ad lheihaltagh da Chiarn Vannin, as da Ree Hostyn neesht. Agh hooar yn derrey ghooinney baase as ardghoo, hooar yn fer elley thalloo as anghoo.

Va’n lhing oc anchasley er kuse dy aghtyn rish yn lhing ain, va Caggey Theayagh trooid ooilley ny hEllanyn Goaldagh; car ny bleeantyn shen va reeriaght, pobblaght, as reeriaght ayn reesht. Va deiney dy liooar currit gy-baase ayns ny caggaghyn, goaill stiagh yn chied Chalse, Ree Goaldagh, ayns shey keead jeig, nuy as daeed Jamys, yn Stanlagh Mooar, Chiarn Vannin, ayns shey keead jeig un jeig as daeed as lurg Coyrt Er-ash (Restoration) y nah ’Halse dy Ghoal ayns shey keead jeig as three feed, hug Ree Chalse pardoon da dagh peiagh va goaill ayrn er cheu yn Reiltys Co-unnanys (Commonwealth Government). V’eshyn son leih daue nyn loghtyn, adsyn va goaill ayrn ayns y chaggey, ga dy row yn ayr echey currit gy-baase. Cha row Chalse Stanlagh, Chiarn Vannin, cho myghinagh mychione baase e ayr hene. Hug eh foill er Illiam y Christeen, cha nee ny lomarcan son soiaghey jeh armee yn Reiltys Co-unnanys ayns Mannin noi’n Ven-eearley Charlotte (yn voir echey), agh son baase yn ayr echey ec Bolton ‘syn un vlein.

Ayns nyn lhing ainhene ta keishtyn anchasley ayn, agh s’lickly nagh vel dooghys -gheiney er chaghlaa monney. Ta mieys as sieys ny-neesht er-mayrn. Ta foast arganeysyn goll er bentyn rish yn Reiltys, yn co-chiangley eddyr yn Reeriaght Unnanysit as Mannin, pooar yn Chiannoort as yn Aspick agh, red er-lheh nish, ta smoo dy phooar ec yn theay - my ta’n theay geearree jannoo ymmyd jeh. Cha nee pobblaght ayn foast, agh ta Tynvaal smoo pooaral na’n Ven-rein as e Kiannoort. Agh c’red t’ad jannoo lesh y phooar t’oc?- g’accan nagh vel anaase ec yn theay ayns cooishyn politickagh.

Cre’n fa nagh vel anaase ec yn theay er cooishyn politickagh? Well, un red - shen nagh vel monney sleih cur treisht ayns Cooinceil ny Shirveishee - reihit ec yn Ard-Shirveishagh. T’eh jeeaghyn dy vel ny Rheynnyn oc jannoo red erbee sailloo ny keayrtyn - dyn goll dys Tynvaal. Bee-jee er nyn dwoaie neesht dy vel politickeyryn ayn nagh mie lhieu yn theay monney as dy vel un voayl sauchey foast faagit dauesyn ayns Mannin - yn Coonceil Slattyssagh, boayl nagh nod yn theay roshtyn ad. Jeeagh-jee er ny gammanyn hie er nurree! S’cammyltagh eh nagh noddym eer cooinaghtyn er cho whilleen dy cheayrtyn hie ‘reihyssyn’ er cummal da un startey aynshen! As ta daa Hirveishagh ayns yn Choonceil shen follaghey ad-hene cooyl ec olteynyn yn Chiare-as-Feed, as cha nel yn Ard-Shirveishagh ro hrimshagh mychione shen noadyr. Lhisagh caghlaayn mooarey ve jeant aynshen - cur cheb da’n theay reih ny ‘steateyryn shinney’ t’adsyn geearree ayns yn Nah Hamyr dagh queig bleeaney, ny traa cooie myr shen. Eisht veagh daa Rheynn smoo cur freggyrt rish yn theay - cha nee ny lomarcan rish yn Ard-Shirveishagh.


’Sy chiaghtoo cheead vlein jeig ghow Chiarn Vannin rey-rish shiaght olteynyn yn Chiare-as-Feed tra ghow adsyn ayrn ayns cooish Illiam Dhone - ta’n Ard-Shirveishagh ny Vanninagh jiu as foddee eshyn geddyn rey-rish Shirveishee nagh mie lesh. Agh c’raad t’ad? Cha nel condaigee ayn! - t’ad ooilley goaill ayrn ’sy Reiltys (as geddyn tooilley argid shen y yannoo). Ta politickeyryn gra dy vel eh mie nagh vel rour dy arganeysyn ayn, agh vel eh? Ny keayrtyn ta fer ny ghaa onnoragh ayn, g’accan mychione cooish myr yn ‘Cronk Murray’, agh cha bee eshyn (ny ish) rieau geddyn cooney dy liooar veih ny olteynyn elley, as cha bee red erbee jeant, eer my ta fys oc dy row aggairyn ayn. As ta shiu foast goaill yindys nagh vel anaase ec yn chooid smoo dy ’leih ayns cooishyn politickagh?

Yn oyr hooar Illiam Dhone ardghoo, va shen kyndagh rish e chredjue dy row eh jannoo e chooid share da Mannin as yn theay tra haink armee Hostyn fo Curnal Duckenfield dys shoh. Va’n reayrtys echey onnoragh as cha ren eh veg mee-onnoragh: va’n reayrtys echey dy ’eddyn yn aght share dy chur shee da Mannin as dy hauail yn theay veih caggey. Dy beagh arrym ayns Mannin son y Ven-eearley Charlotte cha lhisagh shin ve aynshoh jiu cooinaghtyn er Illiam Dhone: agh cha row ish coontey veg jeh ny Manninee as va Illiam fer jeu as v’eh toiggal as cur geill da nyn smooinaghtyn.

Shoh my ’haghteraght da politickeyryn jiu- cur-jee geill da smooinaghtyn, barelyn, as treishtyn theay Vannin.

My ta ny jannooyn eu ny reddyn ta shiuish smooinaghtyn dy ve share, dyn eaistagh rish barelyn yn theay, bee shiu beggan myr yn Manninagh ren marroo Illiam Dhone, shirrey ard-ennym diu-hene ny lomarcan. My ta shiu toiggal red ta’n theay feme, tannee shiu ayns foayr mâroo as nee shiu cosney arrym as foddee ardghoo.

Ta’n caggey ain jiu noi dellalyn mooarey eddyr-ashoonagh ta cassey argid voish Mannin, troggal thieyn da sleih nagh jannoo foays da Mannin, troggal losteyder va’n theay slane noi, troggal carnane-orch ec fer jeh ny Ardyn ayns Mannin raad s’cosoyllagh dy bee eh sollaghey tree awinyn ’sy traa ry-heet- as cha nee shen agh troor dy chooishyn foddym g’imraa. Dy shickyr, ta’n theay shirrey stundayrt mie ayns nyn mea, as ayrn jeh shen, t’ad shirrey thieyn foddee ad fordrail. Cha nel ad shirrey thieyn currit er mayl deyr daue ec sleih smoo berchagh ren kionnaghey yn lheid ec prios s’inshley da kionneyderyn noa. Cha nel ad shirrey aer as ushtey sollit noadyr.

Agh ta’n theay shirrey eer ny smoo. T’ad shirrey mieys da nyn gree as da nyn aigney neesht, eiraght Vannin, yn cheer, yn chengey as yn cultoor.

Hug eh foays da my chree fakin dy vel yn Reiltys er chur enn er yn Ghaelg dy oikoil fy-yerrey hoal, as shen bun mie da’n traa ry-heet; as dy vel yn Ard-Shirveishagh as yn Shirveishagh Ynsee er ve ayns Bretin loayrt rish politickeyryn voish Bretin, Nerin, Nalbin as Sostyn bentyn rish myn-chengaghyn dooie. T’eh er ny Gaelgeyryn neesht dy ghreinnaghey yn theay, as bee tooilley cooney ry-gheddyn veih’n Reiltys. Ghow mee eunys tra haink eh lesh Phillie Gawne, Gaelgeyr as Manninagh dooie, cosney yn Reihys ayns Rosien. Moylley as soylley da! T’eh ersyn nish caggey ayns Tynvaal hene ass-lieh yn chengey as theay Vannin. Ta mee slane shickyr dy bee eh Coadeyder ny Gaelgey nish cho mie as v’eh Greinneyder ny Gaelgey.

Ny jean-jee jarrood Illiam Dhone - v’eshyn er cheu theay Vannin. My ta’n Reiltys cur geill da’n chaghteraght shen, as adsyn, na’n tromlagh jeu, er cheu Vannin neesht dy h-onnoragh myr v’eshyn, hig aigney -mie yn theay er-ash as bee Mannin ny voayl share.



Brief synopsis
Illiam Dhone is remembered now for standing up for the Manx people against the wishes of the legitimate government of his day. Today’s government wonders why voters are apathetic. They must remember that they also should stand up for the Manx people in today’s conflict against some big businesses which aim to make money out of Mannin while putting little of value back. Where they are seen to do this, they will get the support they wish for.


Fiona McArdle
Jerrey Gheuree, 2004
January 2004